“Oktubre 26–Nobiembre 1. ‘Pagbalinekto ti Leddaangda a Rag-o’: Jeremias 31–33; 36–39; Dagiti Un-unnoy 1; 3” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)
“Oktubre 26–Nobiembre 1. ‘Pagbalinekto ti Leddaangda a Rag-o,’” Umaykayo, Sumurot Kaniak: Daan a Tulag 2026
Ni Jeremias nga Agladladingit iti Pannakadadael ti Jerusalem, ni Rembrandt van Rijn
Oktubre 26–Nobiembre 1: “Pagbalinekto ti Leddaangda a Rag-o”
Jeremias 31–33; 36–39; Dagiti Un-unnoy 1; 3
Idi umuna nga inawagan ti Apo ni Jeremias tapno agbalin a propeta, imbagana kenkuana a ti misionna ket “mangparut ken mangrebba” (Jeremias 1:10)—ken iti Jerusalem, adu ti kinadangkes a maparut ken marebba. Ngem daytoy laeng ti paset ti mision ni Jeremias—isu ket naawagan pay a “mangbangon, ken mangimula” (Jeremias 1:10). Ania ti mabalin a mabangon wenno maimula kadagiti naliday a dadael nga imbati ti panagalsa dagiti natulagan a tattao? Agsaludsod iti sabali pay, no imbati ti basol wenno rigat dagiti dadael it biagtayo, kasano a makabangon ken makapagmulatayo manen? Masarakan ti sungbat iti “Ti Sanga ti kinalinteg” (Jeremias 33:15), ti naikari a Mesias. Mangisangbay ti Mesias iti “baro a tulag” (Jeremias 31:31)—maysa nga agkasapulan iti ad-adda pay ngem iti akinruar a langa ti kinapasnek. Nasken nga adda ti lintegna “iti akin-uneg a paset[tayo],” a naisurat “iti puspuso [tayo].” Dayta ti talaga a kaipapananna tapno “agbalin a Dios [tayo]” ti Apo ken tapno “agbalintayo a tattaona” (Jeremias 31:33). Daytoy ti tungpal biag a proseso, ken agbidduttayto pay laeng ket nangigaputayo iti panagladingit no dadduma. Ngem no aramidentayo, ikari ti Apo: “Pagbalinekto ti leddaangda a rag-o” (Jeremias 31:13).
Para iti pakagupgopan ti Dagiti Un-unnoy, kitaen iti “Un-unnoy, Libro dagiti” iti Pangiwanwan iti Nasantuan a Kasuratan.
Dagiti Kapanunotan iti Panagsursuro iti Pagtaengan ken iti Simbaan
Jeremias 31; 33
Wayawayaanto ti Apo dagiti natulagan a tattaona iti pannakabalud.
Iti Jeremias 31;33 binigbig ti Apo ti “un-unnoy ken napait a panagsangit” (Jeremias 31:15) a mapadasan dagiti Israelita iti pannakabalud. Nupay kasta, indatonna pay dagiti balikas ti liwliwa ken namnama. Sapulem dagitoy bayat ti panagadalmo kadagitoy a kapitulo. Ania dagiti kari a masarakanyo a mayaplikar kadakayo?
Jeremias 31:31–34; 32:37–42
“Isudanto dagiti taok, ket Siakto ti Diosda.”
Nupay linabsing dagiti Israelita dagiti katulaganda, impadto ni Jeremias nga ipasdekto manen ti Apo ti “baro” ken “agnanayon a katulagan” kadakuada (Jeremias 31:31; 32:40). Ania dayta a katulagan? Ibilang ti panangsapul kadagiti nalawag a pannakaammo ken pannakaawat iti Pangiwanwan iti Nasantuan a Kasuratan, “Baro ken Agnanayon a Katulagan,” Gospel Library.
Bayat ti panangbasam iti Jeremias 31:31–34; 32:37–42, utobem ti:
-
No ania ti kayat a sawen kenka ti agbalin a paset dagiti natulagan a tao ti Dios.
-
No ania ti kayat a sawen ti paisurat ti lintegna iti pusom.
-
No ania ti kari ti Apo no agaramidka kadagiti katulagan Kenkuana.
-
Kasano a balbaliwannaka iti pannakitulagmo iti Apo.
Ania dagiti kari nga inaramidmo iti Dios bayat ti pannakipasetmo kadagiti sagrado nga ordinansa? Kasano nga ipatpatungpalna dagiti karina kenka?
Kitaen met iti David A. Bednar, “Abide in Me, and I in You; Therefore Walk with Me,” Liahona, Mayo 2023, 123–26.
Jeremias 36
Addaan dagiti nasantuan a kasuratan iti bileg a mangyadayo kaniak iti dakes.
Segun iti Jeremias 36:2–3, apay a binilin ti Apo ni Jeremias nga isuratna dagiti padtona? Bayat ti panangbasam iti Jeremias 36, ibilangmo ti panangisurat no kasano ti panagrikna dagiti sumaganad a tao maipapan kadagitoy a padto:
-
Ti Apo (kitaen kadagiti bersikulo 1–3, 27–31)
-
Jeremias (kitaen kadagiti bersikulo 4–7, 32)
-
Baruc (kitaen kadagiti bersikulo 4:8–10, 14–18.)
-
Da Jehudi ken Ari Jehoiakim (kitaen kadagiti bersikulo 20–26)
-
Da Elnatan, Dalaias, ken Gemarias (kitaen kadagiti bersikulo 25)
Utobem no kasano ti riknam maipapan kadagiti nasantuan a kasuratan. Kasano a natulongandaka nga umadayo manipud iti dakes?
Jeremias 37–39
Agbalinka a natibker iti panangsurot kadagiti propeta ti Dios.
Iti Jeremias 37:1–3, 15–21; 38:1–6, 14–28, ania a pammaneknek ti makitam a patien ni Ari Zedekias a ni Jeremias ti pudno a propeta ti Apo? Ania ti makitayo a pakakitaan a saan a patien ni Zedekias? Ania dagiti masursuroyo manipud iti daytoy a panangidilig? Bayat ti panangbasam iti Jeremias 39, utobem ti pagdumaan koma no sinurot ni Zedekias ken dagiti taona ti propeta ken tinungpalda dagiti bilin ti Apo. (Idilig ti napasamak ken ni Zedekias iti napasamak iti pamilia ni Lehi iti 1 Nephi 1–2.)
Jeremias 38:6–13; 39:15–18
Makapagbalinak a natured a mangitakder iti no ania ti umno.
Narikna dagiti opisial ti ari a dagiti padto ni Jeremias ti mangar-aramid a saan unay a nagtallugod a makigubat dagiti soldadoda, isu nga imbellengda ni Jeremias iti narugit a pagbaludan (kitaen iti Jeremias 38:1–4). Iti Jeremias 38:6–13, ania ti makaawis iti riknam maipapan iti sungbat ni Ebed-melec nga Etiope? Kitaen met ti bendision nga inted ti Apo ken ni Ebed-melec iti Jeremiah 39:15–18.
Kasano a masurotyo ti pagwadan ni Ebed-melec?
Ti Sangit ni Jeremias
Dagiti Un-unnoy 1; 3
Mabalin a palag-anen ti Apo ti ladingit a mapadasak gapu iti basol.
Maysa a napagtitipon a dandaniw ti libro ti Dagiti Un-unnoy a naisurat kalpasan ti pannakadadael ti Jerusalem ken ti templona. Apay iti panagkunam a napateg a nataginayonda? Ibilangmo no ania ti makatulong kenka a makaawat kadagiti metapora iti Dagiti Un-unnoy 1 ken3 maipapan iti nakaro a panagleddang a narikna ti Israel. Ania dagiti mensahe ti namnama ken ni Cristo a masarakam? (kitaen nangnangruna iti Dagiti Un-unnoy 3:20–33; kitaen met iti Mateo 5:4; Santiago 4:8–10; Alma 36:17–20).
Dinakamat ni Presidente M. Russell Ballard ti sumagmamano a kasasaad a mabalin a makaigapu iti sumagmamano a mapukawan iti namnama, ket indiayana ti balakad maipapan iti no sadino ti pakasarakan iti namnama:
“Sumagmamano kadatayo ti mabalin a makasarak iti biagtayo a napnuan iti pannakaupay, pannakapaay, ken panagleddaang. Adu dagiti makarikna nga awan ti maaramidanda a mangsaranget iti riribuk a kasla agraira iti lubong. Maluksaw dagiti dadduma kadagiti miembro ti pamilia a maisungsong iti maysa a napegges, rumungrungsot nga ayus dagiti kumapkapuyen nga ik-ikkan pateg ken bumabbaban a pagrukodan iti kinadalus ti dayaw. … Adu payen ti nangipalubos iti bagbagida nga umawat iti saanen a maatur a kinadangkes ken kinaranggas ti lubong. Insukodan ti namnamada.…
“… Sumagmamano kadatayo ti mabalin a nakapukawen iti amin a namnama gapu iti basol ken salungasing. Mabalin a napalaus ti pannakairarem ti maysa a tao kadagiti wagas ti lubong ta awan ti makitana a pakaruaran ken mapukawna ti amin a namnama. Ti pakaasik iti amin a matnag iti daytoy a palab-og ti kabusor ket ti saan nga isusuko iti kaano man! Iti laksid ti mabalin a kasla kinaawan namnama dagiti banag wenno mabalin a kinaawan namnama ti pagbalinanda, mamatikayo koma kaniak, maaddaankayo a kanayon iti namnama. Kanayon” (“The Joy of Hope Fulfilled,” Ensign, Nob. 1992, 31–32).
Kitaen met iti “Come, Ye Disconsolate,” Hymns, no. 115.
Tulongam dagiti dadduma nga umawat iti pagrebbengan para iti bukodda a panagsursuro. No dadduma kasla ti kalalakaan a wagas ti panangisuro ket ti panangibaga laeng kadagiti agad-adal no ania ti pagarupentayo a rumbeng nga ammuenda. Nupay kasta, ti kalalakaan a wagas ket saan a kanayon a kasayaatan a wagas. Insuro ni Elder David A. Bednar: “Nasken a saan koma a kastoy ti panggeptayo ‘Ania ti ibagak kadakuada?’ Ketdi, dagitoy dagiti saludsod a damagentayo ‘Ania ti mayawisko nga aramidenda? Ania dagiti naparegta a saludsod a madamagko a, no natallugodda a sumungbat, mangruginto a maawis ti Espiritu Santo iti biagda?’” (evening with a General Authority, Peb. 7, 2020, broadcasts.ChurchofJesusChrist.org; kitaen met iti Panangisuro iti Wagas ti Mangisalakan, 25). Adu dagiti wagas a pakatulongan kadagiti agad-adal nga umawat iti pangrebbengan para iti panagsursuroda. Kas pagarigan, iti daytoy a balabala ket maawis dagiti agad-adal nga agsukisok, agutob, agaramid kadagiti listaan, kumita kadagiti ladawan, makiraman kadagiti adalen a banag, agdrowing, ken mangibinglay ken mangyaplikar no ania ti masursuroda.
Dagiti Kapanunotan para iti Panangisuro kadagiti Ubbing
Jeremias 31:3
Patpatgennak ti Nailangitan nga Ama ken ni Jesus “nga addaan iti agnanayon a panagayat.”
-
Bayat ti panagbasam iti Jeremias 31:3 a kaduam dagiti annakmo, mabalin a matulongandaka a mangbirok kadagiti banag (wenno ladawan dagiti banag) nga agpaut iti nabayag, kas iti metal a sinsilio, ken ti dadduma a saan, kas iti maysa a prutas. Mabalinyo a pagsasaritaan maipapan iti kayat a sawen ti “agnanayon” ken ibinglayyo iti tunggal maysa no kasano a nariknayo ti “agnanayon nga ayat” ti Nailangitan nga Ama. Mabalinyo pay ti aggigidan a mangkanta iti “God Is Watching Over All” (Children’s Songbook, 229).
Jeremias 31:31–34; 32:38–41
Tulongannakto ti Dios a mangtungpal kadagiti katulagak.
-
Mabalin a magustuan dagiti annakmo ti agdrowing iti puso iti papel ket kalpasanna isuratda iti puso dagiti banag a masursuroda manipud iti Jeremias 31:31–34 maipapan iti panagaramid kadagiti katulagan iti Dios. Mabalin a kayatmo nga irebyu ti katulagan nga aramidenda iti panagbuniag (kitaen iti Mosiah 18:10, 13) ken pagsasaritaan no ania ti kaipapanan ti pannakaisurat dagitoy a kari iti puspusoda.
Jeremias 36:1–4
Dagiti nasantuan a kasuratan ti balikas ti Dios.
-
Ti panid ti aktibidad iti daytoy a lawas ti makatulong kadagiti annakmo a makasursuro maipapan kada Jeremias, Baruc, ken ti ari (kitaen iti Jeremias 36). Mabalinda met nga aramiden dagiti tignay a kagiddan dagiti balikas iti Jeremias 36:4–10, kas iti panagsurat iti maysa a libro ( kitaen iti bersikulo 4) ken panangibasa iti nasantuan a kasuratan kadagiti tao (kitaen iti bersikulo 8, 10).
-
Mabalinmo ken dagiti annakmo ti mangkita iti maysa a libro dagiti ubbing ken kopia dagiti nasantuan a kasuratan ket pagsasaritaanyo no kasano a naiduma dagitoy a libro. Ania ti mamagbalin a naisangsangayan dagiti nasantuan a kasuratan? Mabalin a makaparegta ti mangibinglay iti tunggal maysa iti sumagmamano a binatog ti nasantuan a kasuratan a naisangsangayan kadakayo.
Jeremias 38:6–13
Maitakderak no ania ti ammok nga umno.
-
Mabalinmo nga usaren ti ladawan iti ngudo ti balabala tapno matulongan dagiti annakmo a mangiladawan iti estoria ni Ebed-melec iti Jeremias 38:6–13. Nalabit a matulongam ida a mangbirok iti maysa a bersikulo a nangaramidan ni Ebed-melec iti maysa a banag a natured a tumulong iti propeta ti Apo. Ania ti maaramidtayo a mangipakita nga ammotayo nga inawagan ti Dios ti propetatayo ita?
Dagiti Un-unnoy 1:1–2, 16; 3:22–26
Inaramid ti Mangisalakan a mabalinak a mapakawan kadagiti basolko.
-
Tapno mayam-ammo ti Dagiti Un-unnoy, mabalin a kayatmo nga ilawlawag kadagiti annakmo a gapu ta saan a nagbabawi dagiti Israelita, nadadael ti Jerusalem ken ti templo. Mabalinyo nga ibinglay iti tunggal maysa no kasano ti mabalin a nariknayo no agnanaedkayo sadiay iti dayta a panawen (kitaen iti Dagiti Un-unnoy 1:1–2, 16). Kasano a mabalin a nangted kenka iti namnama ti mensahe iti Dagiti Un-unnoy 3:22–26?
-
Mabalinyo pay nga isarita iti tunggal maysa maipapan kadagiti panawen a nariknayo ti liday maipapan iti inaramidyo a dakes a pili. Ania ti masarakanyo iti Dagiti Un-unnoy 3:22–26 a mangtulong kadatayo a makaawat iti pammakawan nga idiaya ti Apo?
Para iti ad-adu pay, kitaen iti isyu ti magasin a Friend iti daytoy a bulan.