Oseas 1–6; 10–14; Joel

Ti asawa ni Oseas, ni Gomer, saan a napudno kenkuana, ket intudo ti Dios daytoy naliday a pasamak a mangisuro kadagiti Israelita no kasano ti panagriknana maipapan kadakuada ken dagiti katulaganda Kenkuana. Bayat ti panangbasam iti Oseas 1–3, utobem no kasano ti pannirigan ti Apo iti relasionna kadagiti natulagan a tattaona. Kasano a maipada ti panagaramid iti katulagan iti Apo iti iseserrek iti maysa a kallaysa? Kasano a maipada ti panaglabsing iti dayta a katulagan iti panagbalin a saan a napudno iti asawa? (kitaen iti Oseas 2:5–7, 13). Ania ti isuro kenka ti Oseas 2:14–23 maipapan iti ayat ken asi ti Apo? Kasano nga ipakitam Kenkuana ti ayatmo ken kinapudnom?

Iti Oseas 14, kitaenyo dagiti adu a napipintas a kari nga aramiden ti Apo kadagiti agsubli Kenkuana. Ania ti kayat a sawen kenka ti ragup ti balikas nga “ayaten ida a nawadwad”? (bersikulo 4). Ania ti isuro kenka dagiti metapora iti mula kadagiti bersikulo 5–8 maipapan kadagiti bendision ti Apo, a pakairamanan dagiti bendision ti panagbabawi? Kas paset ti panangadalmo, ibilangmo ti panagkanta wenno idedengngeg iti maysa a himno maipapan iti asi ti Mangisalakan, kas iti “Come unto Jesus” (Hymns, no. 117).

Agidatdaton kadagiti ayup dagiti tao iti aldaw ni Oseas, ngem lablabsingenda dagiti napatpateg a bilin. Ania iti panagkunam ti kayat a sawen a ti Apo a “tinarigagayan[na] ti kinaimbag a saan ket a daton; ken ti panangbigbig iti Dios naim-imbag pay ngem dagiti daton a mapuoran”? (Oseas 6:6). Ania iti panagkunam ti kayat a sawen ti kinalinteg a mayarig iti ulep wenno kas linnaaw? (kitaen iti Oseas 6:4). Ania ti nasken a pakayarigan ti kinalintegtayo? (kitaen iti Isaias 48:18; 1 Nephi 2:9–10).

Mabalinmo pay a basaen ti Mateo 9:10–13; 12:1–8 tapno kitaen no kasano nga inusar ti Mangisalakan ti Oseas 6:6 kabayatan ti panagministrona. Kasano a makatulong kenka dagitoy a binatog a makaawat kadagiti balikas ni Oseas?

No agbasbasaka iti Joel 2:12–13, mabalin a makatulong a mangammo a ti naikannawidan a panagray-ab wenno panangpigis ti maysa a kawes ket maysa nga akinruar a pagilasinan ti panagladingit wenno sakit ti nakem. Kasano a maigiddiat ti panangpigis ti puspusotayo iti panagpigis kadagiti pagan-anaytayo?

Ania dagiti pagpapadaan a makitam iti nagbaetan ti aldawtayo ken ti aldaw a nasaksakbay a nakita ni Joel? (kitaen nangnangruna iti Joel 2:1–2, 11, 18–32). Ania ti makaawis iti riknam maipapan kadagiti bendision nga inkari ti Apo kadagiti bersikulo 18–32? Apay a mabalin a napateg dagitoy a bendision ita?

Mabalin a makaay-ayo a basaen no ania ti kinuna ni Moroni maipapan iti Joel 2 idi sinarungkaranna ni Joseph Smith idi 1823 (kitaen iti Joseph Smith—Pakasaritaan 1:41). Kasano ti mariknayo a matungtungpal dagiti padto iti Joel 2:28–32 iti aldawtayo? (kitaen met iti Dagiti Aramid 2:1–21). Ania iti panagkunam ti kayatna a sawen a ti Apo “ibukbokna ti espiritu[na] iti amin a lasag”? (Joel 2:28).

Mabalinmo nga utoben dagitoy a balikas manipud ken ni Presidente Russell M. Nelson: “Kadagiti umay nga aldaw, a saanton a posible ti agbiag a naespirituan no awan ti panangtarabay, panangiturong, ken panangliwliwa, ken kanayon nga impluensia ti Espiritu Santo” (“Revelation for the Church, Revelation for Our Lives,” Liahona, Mayo 2018, 96). Apay a kasapulan unay ti paltiing iti naespirituan a panagbiag?

Ania ti mabalin nga aramidem no mariknam a kasla saanka nga umaw-awat iti dayta a panangibukbok? Adtoy ti sumagmamano a pagarigan a makatulong. Ania ti inaramid dagiti tao kadagitoy a nasantuan a kasuratan tapno umawat iti panangibukbok iti Espiritu ti Apo?

• Mosiah 4:1–3, 19–20; 18:7–11

• Helaman 6:34–36

• Doktrina ken Katulagan 19:37–41

Bayat ti panangbasam kadagitoy a balikas manipud ken ni Elder David A. Bednar, utobem no ania ti kaipapanan kadakuada ti makarikna iti pannakaibukbok ti Espiritu Santo iti inaldaw a panagbiagda:

“Masansan a parparigatentayo ti bagbagitayo nga umawat iti bukod a paltiing. Babaen iti dayta kayatko a sawen, ti kari iti katulagan a no dayawentayo dagiti katulagantayo, mabalin nga adda a kanayon kadatayo ti Espiritu Santo nga agbalin a kanayon a kadkaduatayo. Ngem pagsasaritaantayo maipapan iti daytoy ket ibilangtayo a manmano a pasamak ti kasla dumdumngeg iti timek ti Apo babaen ti Espirituna. … Nasken nga adda kadatayo [ti Espiritu] iti amin a kanito. Saan nga iti tunggal apagdarikmat, ngem no ti maysa a tao ket ar-aramidenna ti amin a kabaelanna—saanmo kasapulan ti agbalin a perpekto—ngem no aramidentayo ti amin a kabaelantayo ket saantayo nga agar-aramid iti nadagsen a basol, ngarud mabalintayo ti agtalek iti Espiritu Santo a mangtartarabay kadatayo. …

“… Kasla mamatitayo a dramatiko ti Espiritu Santo ken dakkel ken kellaat, idinto a naalumamay ken bassit ken dumakdakkel iti panaglabas ti panawen” (“Elder David A. Bednar Discussion” [evening with a General Authority, Peb. 7, 2020], broadcasts.ChurchofJesusChrist.org).

Kitaen met iti Gary E. Stevenson, “Promptings of the Spirit,” Liahona, Nob. 2023, 42–45; “Enemy Territory” (video), Gospel Library.

3:38

• Iti libro ti Oseas, indilig ti Apo ti katulaganna kadagiti taona iti maysa a kallaysa. Tapno makasursuro manipud iti daytoy a panangidilig, mabalinmo ken dagiti annakmo ti mangkita iti ladawan ti maysa a nobia ken nobio ken pagsaritaan no kasano a kayat ti Nailangitan nga Ama ti panagtitinnulong ti asawa a lalaki ken asawa a babai. Tulongam dagiti annakmo a mangsapul kadagiti balikas iti Oseas 2:19–20 a mangiladawan no kasano ti rikna ti Apo maipapan kadatayo. Kasano a maipakitatayo a patpatgentayo ti Apo ken agbalintayonto a napudno Kenkuana?

• Dinakamat ti Oseas 10:12 ti panagmula, panagani, oras, ken tudo a mangawis kadatayo a mangsapul iti Apo. Bayat ti panangbasam iti daytoy a bersikulo, ania dagiti managpartuat nga ideya a mapanunotmo a mabalin a mangparegta kadagiti ubbing a mangsapul Kenkuana? Kas pagarigan, nalabit a makapagdrowing dagiti ubbing iti maysa a pagorasan ket isuratda dagiti wagas a mabalin a pangsapulanda iti Apo iti nadumaduma a gundaway iti unos ti agmalem. Ti maysa a kanta kas iti “Anytime, Anywhere” (Gospel Library) ket makatulong kenka a mangisuro a kanayon a nasayaat a gundaway ti mangsapul iti Apo.

• Wenno mabalin dagiti annakmo ti agaramid kadagiti simple a tignay a kagiddan ti bersikulo, kas koma iti panagpammarang nga agmula iti bukbukel, agpuros iti natnateng, wenno agtakder iti katuduan. Tulongam dagiti annakmo a mangidilig ti panagmula iti bukel ken panagani iti nasayaat a taraon iti panagbiag a sililinteg ken panangawat kadagiti bendision ti Apo. Kalpasanna mabalinyo nga isarita iti tunggal maysa maipapan kadagiti bendision nga imbukbok ti Apo kenka bayat ti panagikarigatam a mangsapul Kenkuana.

• Tapno mayunay-unay ti kinapudno iti Oseas 13:4 nga awan ti Mangisalakan malaksid ken Jesucristo, mabalinmo nga ipakita kadagiti annakmo dagiti ladawan ti sumagmamano a tao, agraman ni Jesus. Mabalin dagiti annakmo ti agsisinnublat iti panangitudo iti tao nga addaan iti bileg a mangisalakan kadatayo manipud iti basol ken ipapatay. Ibinglaymo ti pammaneknekmo maipapan ken ni Jesucristo ken ti Pannubbotna.

• Mabalin a sapulen dagiti annakmo dagiti balikas iti Oseas 13:4, 14 a mangiladawan ken ni Jesucristo. Ania ti isuro kadatayo dagitoy a balikas maipapan Kenkuana? Ibilang ti panangtulong kadagiti annakmo a mangusar iti Pangiwanwan iti Nasantuan a Kasuratan wenno mangsapul iti dadduma pay a nasantuan a kasuratan a mangisuro a ni Jesucristo ti Mangisalakan ken Mannubbottayo. Ibinglayyo iti tunggal maysa no ania ti riknayo maipapan ken ni Jesucristo.

• Nalabit a mabalinmo a tulongan dagiti annakmo a makaawat iti Joel 2:28–29 babaen ti panangpaibukbok kadakuada iti likido ket kalpasanna panangidilig iti daytoy iti maysa a tedted wenno patak. Ania ti mabalin a kayat a sawen ti Espiritu a “maibukbok” kadatayo?

• Bayat ti panangbasayo iti Joel 2:28–29 nga aggigiddan, mabalinmo nga awisen dagiti annakmo a mangisingit iti nagan ti tunggal maysa a kasukat dagiti ragup ti balikas nga “annakmo a lallaki” ken “annakmo a babbai.” Kalpasanna, tulongam ida nga agsukisok kadagiti nasantuan a kasuratan kas iti Juan 14:16; Moroni 10:5; Doktrina ken Katulagan 42:17 tapno ammuenda no kasano a makatulong ti Espiritu kadakuada.