Dagiti Pannignay ti Espiritu
Ti kanayon a pannakikadua ti Espiritu Santo ti maysa kadagiti kaindaklanan a naespirituan a sagut a sagsagrapen dagiti Santo iti Ud-udina nga Aldaw.
Pakauna
Itay nabiit, naipamaysa ti imatang ti lubong ti isports iti 2023 Women’s World Cup, nga indauluan ti Australia ken New Zealand. Dagiti world-class athlete a mangibagi iti nasurok a 200 national team iti intero a lubong impakitada ti kinatibker, dedikasion, talento, ken kinaatletada bayat ti panagsasalipda para iti kangatuan a pammadayaw iti lubong ti soccer.
Masdaawkami kadagiti agpabuya iti nagadu nga isports ken dadduma pay a disiplina a manggun-od iti kangatuan a level ti art-da. Saritaenmi dagiti talento wenno sagutda nga inted ti Dios. Iraman ditoy dagiti addaan sagut iti panagsala, gymnastics, musika, arte, drama, matematika, siensia, ken adu pay. Tunggal kasta a tao ipakitana dagiti sagut nga inted ti Dios a sagut a napapintas ken napasayaat babaen ti napinget a panagtrabaho, panagadal, ken panagsanay. Dagiti sagut nga inted ti Dios ti mamagbalin kadagiti nasagutan a tao.
Panangaramat kadagiti Naespirituan a Sagut
Iti panangkita iti lens ti ebanghelio, ipaayan ti Dios iti annakna iti adu a naespirituan a sagut, nga aramidenna ida a tattao a naespirituan a nasagutan. Maikkan dagiti covenant-keeping a miembro ti Simbaan iti sagsagut ti Espiritu, a pakairamanan ti sagut ti pammaneknek ni Jesucristo kas Mangisalakantayo, sagut ti Espiritu Santo, sagut ti pammati a mangagas ken maagasan, sagut ti discernment, sagut ti yaawat iti milagro, ken sagut ti sirib ken pannakaammo.1. Awisennatay ti Apo a mangsapul iti kasayaatan a sagsagut, uray ti naespirituan a sagut. Mangted naespirituan a sagsagut a mangbendision kadatayo ken usaren a mangbendision iti dadduma.2
No agsublitayo iti analohia dagiti nalalaing nga agpabuya, laglagipen a no sagut laeng ket saan a mangaramid iti maysa a master. Nupay kasta ti extraordinary natural talent, babaen ti naganetget a panagsanay ken panagkagumaan a mapasayaat ken mapapintas dagiti agpabuya ti craft-da tapno maragpat ti kangatuan a lebel ti artistry. Uray dagiti sagut a naawat ken naluktan ket masansan a mapakuyogan iti nakabutbuteng a pagsasao a “kasapulan ti sumagmamano a taripnong.”
Kasta met, napaliiwko ti rigat ti panagsursuro a mainaig kadagiti naespirituan a sagut. Ti panangusar ti naespirituan a sagsagut agkasapulan iti naespirituan nga ehersisio “Ti kaadda ti pannarabay ti Espiritu Santo iti biagyo agkasapulan iti naespirituan nga aramid. Daytoy nga aramid iramanna ti napasnek a kararag ken agtultuloy a panagadal iti scripture. Iramanna pay ti panagtungpal iti katulaganyo ken dagiti bilin ti Dios. … Iramanna ti pannakaikari a makiranud iti sakramento iti tunggal lawas.”3
Ania dagiti bunga ti panangaramat iti naespirituan a sagsagut? Iramanda dagiti pannignay manipud iti Espiritu a tumulong kadatayo a mangsango iti inaldaw a kasapulantayo ken mangipakita no ania ti aramiden ken ibagatayo ken dagiti bendision ti talna ken liwliwa. No dumngeg ken agtignaytayo kadagitoy a naespirituan a pannignay, padakkelen ti Espiritu Santo ti kabaelantayo tapno adayo a lumab-aw iti maaramidtayo. Dagitoy naespirituan a sagut tulongandatayo iti tunggal aspeto ti biagtayo.4
Ti kanayon a pannakikadua ti Espiritu Santo ti maysa kadagiti kaindaklanan a naespirituan a sagut a sagsagrapen dagiti Santo iti Ud-udina nga Aldaw.
Kasano ti kapateg daytoy a sagut? Sinungbatan ni Presidente Russel M. Nelson daytoy a saludsod iti kinunana a “kadagiti umay nga aldaw, saanton a posible ti agbiag a naespirituan no awan ti pangiwanwan, pangiturong, pangliwliwa, ken agtultuloy nga impluensia ti Espiritu Santo.”5
Kasano ti Mangawis ken Mangbigbig iti Pannignay ti Espiritu
Iti las-ud ti panagserbik, nasarakak ti sapasap a panagtarigagay ti tunggal maysa a mangammo no kasano ti mangawis ken mangbigbig iti pannignay ti Espiritu Santo. Dagiti pannignay ti Espiritu ket personal unay ken umayda iti agduduma a wagas. Nupay kasta, naparaburantayo kadagiti balikas dagiti propeta, nagkauna ken moderno, a mangted kadatayo iti napapateg a pannakaawat maipapan no kasano ti umawat iti direksion manipud iti Espiritu.
Idiayak man ti uppat a pangiwanwan a pagbatayan a makatulong kadakayo iti panangawis ken panangbigbig kadagiti pannignay ti Espiritu.
Agtakder kadagiti Nasantuan a Lugar
Umuna ti agtakder iti nasantuan a lugar.6 Nabiit pay a nakipasetak iti Tokyo Japan Temple open house. Ti sungbat kadagiti pormal nga awis a naipatulod iti agpada a sangsangaili ti media ken VIP adayo a nalablabes ngem ninamnama. Ginasut ti nakikadua kadagitoy natarabay a panagpasiar iti templo. Natignay unay dagiti sangaili iti kinapintas ti templo, agraman dagiti pattern ken motif nga adda nauneg a tradisional a koneksion dagiti Hapones. Ad-adda pay a makapikapik ti naraem ken nadayaw a reaksion dagiti sangaili idi mailadawan dagiti ordinansa dagiti kapuonan kadagiti siled a pakaaramidanda. Ngem ti makaitandudo unay iti puso ket ti panangguyugoy ti Espiritu.
Maysa a kasta a kanito iti maysa a nalatak nga opisial ti gobierno ti malagipko unay. Kalpasan ti kanito a kinaulimek iti celestial a siled, nasagid unay ti riknana, inyarasaasna kaniak, “Uray ti angin a lang-abek ditoy a siled nagpaiduma ti riknak.” Nabigbigko a padpadasenna nga iladawan ti kaadda ti Espiritu Santo, a, pudno, agnanaed iti sagrado a lugar. No namnamaem a mariknam ti Espiritu, addaka iti lugar a nalaka a pagnaedan ti Espiritu.
Dagiti templo ken pagtaengantayo ti kasagraduan kadagitoy a naidaton a lugar. Kadagitoy nalaklaka nga awisen ken bigbigentayo ti Espiritu. Dadduma pay a nasantuan a lugar iramanna dagiti siled ken espasio iti meetinghouses, seminary buildings ken institutes, ken Church history sites ken visitors’ centers. Agtakder iti nasantuan a lugar.
Makipagtakder iti Nasantuan a Tattao
Maikadua, makipagtakder kadagiti nasantuan a tattao. Iladawanko ti maikadua a pangiwanwan a pagbatayan iti sabali a lagip.
Diakto kaano man malipatan ti pannakipaset iti debosional a naangay iti nalatak nga arena ti isports. Gagangay a napno ti arena kadagiti naariwawa a fans a mangchi-cheer iti home team-da ken mangrabrabak iti kalabanda. Ngem iti daytoy a rabii, sabali unay ti aglawlaw. Napno ti arena iti rinibu nga agtutubo a naguummong a mangpadayaw ken manglaglagip iti biag ni Propeta Joseph Smith. Ti nadayaw, naulimek a tono; panagyaman; ken managkararag a pusoda ti nangpunno iti arena iti kaadda ti Espiritu Santo. Makitak mismo daytoy iti rupada. Daytoy ti sagut ti Espiritu Santo nga agtigtignay, a mangpaspasingked kadagiti pammaneknek nga imburay ni Joseph Smith ken ti Pannakaisubli ti ebanghelio.
Saan a malapdan ti Espiritu a dumar-ay iti panaguummong dagiti nasantuan a tao. No namnamaenyo a mariknayo ti Espiritu, addakayo iti tattao a nalaka a mapagnaedan ti Espiritu. Insuro ti Mangisalakan ti kastoy: “No agummong ti dua wenno tallo iti naganko adtoy, addaakto iti baetda.”7 Para kadagiti agtutubo, ibilangyo dagiti panaguummongyo kadagiti nasantuan a tao: korum ken klase, FSY ken seminario, aktibidad iti ward ken stake—ken koro ti ward. Pilienyo ti makikadua kadagiti tao ken mapan kadagiti lugar a pakasarakan iti kinalinteg. Sapulenyo ti pigsayo iti kaaduan. Sapulenyo dagiti nasayaat a gayyem. Agbalin a nasayaat a gayyem. Agtitinnulongkayo sadinokayo man. Makipagtakderkayo kadagiti nasantuan a tao.
Paneknekan dagiti Nasantuan a Kinapudno
Maikatlo, paneknekam dagiti nasantuan a kinapudno a masansan. Masansan nga ibinglay ti Mangliwliwa ti timekna no agpaneknektayo iti timektayo.| Agpada nga agpaneknek ti Espiritu iti agsasao ken dumdumngeg.
Malagipko a nagluganak iti taksi iti 45 a minuto idiay New York City. Iti nasinged a pannakisaritak maipapan iti ebanghelio iti drayber iti panagluganko nga agturong iti airport, binayadak ket nagsaganaak a rummuar iti taksi. Idi naamirisko a diak nangted pammaneknek iti imbinglayko. Iti panagsardengko, inbinglayko ti simple nga ababa a pammaneknek, a mangaw-awis iti Espiritu, a namaglua iti agpada a matami.
Iti panagkiddawyo ken panangalayo iti gundaway nga agpaneknek iti dadduma, mangparnuaykayo kadagiti kanito a mangbigbig iti Espiritu para iti bagiyo.
Dumngeg iti Nasantuan nga Espiritu
Maudi a pagbatayan ti dumngeg a naimbag iti Nasantuan nga Espiritu. Mabalinna ti kanayon a kaduatayo, ngem agsao iti di madlaw, naulimek a tono. Natakuatan ni propeta Elias a ti timek ti Apo awan iti angin, ginggined, wenno apuy ngem “maysa a naulimek a bassit a timek.”8 Daytoy “saan a timek ti gurruod,” ngem “maysa a naulimek a timek ti naan-anay ti kinalamuyotna, a kasla arasaas,” ket kaskasdi a “simmeksek iti kaunggan ti kararua.”9
Kinuna ni Presidente Boyd K. Packer: “Saan a maala ti Espiritu ti atensiontayo babaen ti panangipukkawna wenno panangyugyugyogna kadatayo iti nadagsen nga ima. Ketdi agarasaas daytoy. Naalumamay unay ti aprosna isu a no okupadotayo, mabalin a ditay marikna dayta.”10 Napaliiwko a no dadduma naannad unay ti timekna, wenno nakumikomak unay, ta ti maysa a patpatgen ti umawat para kaniak. Adu ti panawen nga umay kaniak dagiti pannignay ti Espiritu Santo babaen ti asawak, ni Lesa. Mabalin nga umawat dagiti nalinteg a nagannak wenno lider iti naparegta a pangiwanwan para kadakayo.
Mabalin a parmeken ti ringgor, ariwawa, ken supiat a nasaknap iti lubong dagiti natalna, naulimek nga impresion ti Espiritu Santo. Sapulem ti naulimek, nasantuan a lugar a mabalinmo a pangawatan iti direksion ti Espiritu.
Sumagmamano a Balikas ti Panagannad
No ibilangyo dagitoy a pagbatayan a mangawis ken mangbigbig iti Espiritu, ibilangyo dagiti sumaganad a balikas ti pakdaar a pannarabay.11
Pasingkedanyo dagiti naespirituan nga impresionyo. Kas pagarigan, dagiti impresion ti Espiritu ket maitunos kadagiti nasantuan a kasuratan ken pannursuro dagiti sibibiag a propeta.
Penken a dagiti rikna a maawatyo ket maitunos iti assignment-yo. Malaksid no nnaawagankayo babaen ti umno a turay, saan a maited dagiti impresion ti Espiritu tapno mangbalakad wenno mangaturkayo iti dadduma.
Saan a mapilit dagiti naespirituan a banag. Mapatanoryo ti ugali ken aglawlaw a mangawis iti Espiritu, ken maisaganayo ti bagiyo, ngem diyo maidikta no kasano ken kaano nga umay ti inspirasion. Anusan ken agtalekkayo a maawatyo ti kasapulanyo iti umno nga oras.
Usarenyo ti kapintasan a pangeddengyo. No dadduma kayattayo a paiturong iti Espiritu iti amin a banag. Nupay kasta, masansan a kayat ti Apo nga usarentayo ti inted ti Dios a saririttayo ken agtignaytayo iti wagas a maitunos iti kasayaatan a pannakaawattayo. Insuro ni Presidente Dallin H. Oaks:
“Ti tarigagay nga agpaiturong iti Apo ket maysa a pigsa, ngem kasapulanna a mabuyogan iti pannakaawat nga ibati ti Nailangitan nga Ama ti adu a pangngeddeng para kadagiti bukodtayo a pili. Dagiti tao a mangpadas a mangisukat iti Apo iti amin a panangaramid iti pangngeddeng ken agpakaasi para iti paltiing iti tunggal pili ket masarakandanto iti mabiit dagiti kasasaad a pagkararaganda para iti pannarabay ken dida maawat daytoy.
“Adalentayo koma dagiti banag iti panunottayo. … Sa agkararagtayo iti tarabay ken agtignay iti daytoy. … No ditay maawat ti tarabay, agtignaytayo iti kasayaatan a pangngeddengtayo.”12
Panangigibus nga Addaan Awis
Kas panggibus, dagiti Santo iti Ud-udina nga Aldaw ti nasagutan a tattao koma nga agtungtungpal iti katulagan. Nupay kasta, agtalinaed daytoy kadatayo amin a tapno usaren ti naespirituan a saguttayo sa awisen ken adalentayo a bigbigen dagiti pannignay ti Espiritu. Adtoy ti uppat a pagbatayan a mangtarabay kadatayo itoy napateg a naespirituan nga aramid:
-
Agtakder iti nasantuan a lugar.
-
Makipagtakder iti nasantuan a tattao.
-
Paneknekan dagiti nasantuan a kinapudno.
-
Dumngeg iti Nasantuan nga Espiritu.
Ti kabaelanyo a mangawis ken mangbigbig iti pannignay ti Espiritu ket mangpadur-as iti addang iti tunggal gundaway. “Ti ad-adda a maitunos iti pagsasao ti Espiritu ket kasla panagadal iti sabali a pagsasao. In-inut a proseso nga agkasapulan iti napasnek, naanus nga aramid.”13
Iti isusubli iti nangrugiantayo, laglagipen a kas Santo iti Ud-udina nga Aldaw nasagutankayo. Iladawanyo toy pamiliar a buya ti Domingo, a nabiit pay a nailadawan kaniak. Maysa nga ubing, a nakatakder iti tugaw, ket dandani di makita iti pulpito. Nagtakder ni tatangna iti abayna a mangparparegta ken tumultulong a mangyarasaas iti lapayagna bayat ti sipapannakkel a panangibinglayna iti, “Anaknak ti Dios.”
Naggapu ti sumaruno a pammaneknek iti maysa a single adult a nangirugi: “Adda koma maysa nga agyarasaas iti lapayagko a kas iti dayta.” Sa naaddaan iti inspirasion ket impaneknekna, “Adda agyar-arasaas iti lapayagko a kasdiay—ti Espiritu Santo!”
Gibusak iti maysa nga awis nangnangruna iti amin nga agtutubo! Adu ti mangirugi iti aldawyo nga agtakderkayo iti sango ti sarming. Iti bigat, daytoy a lawas, daytoy a tawen, kanayon nga agsardengkayo ket kitaenyo ti bagiyo iti sarming. Panunoten ti bagiyo, wenno isao ti kayatyo: “Wow, kitaennak! Nasingpetak! Anaknak ti Dios! Am-ammonak! Ay-ayatennak! Nasagutannak—sagut ti Espiritu Santo kas kanayon a kadkaduak!”
Paneknekak kadakayo, nasagutan a Santo iti Ud-udina nga Aldaw, ti Dios Ama, ni Jesucristo, ken ti Espiritu Santo, a mangpaneknek Kadakuada. Iti nagan ni Jesucristo, amen.