Ezequiel 1–3; 33–34; 36–37; 47

Iti Ezekiel 3 ken34, ibasar ti Apo kadagiti lider dagiti taona a kas agbambantay ken agpaspastor. Bayat ti panagbasam kadagitoy a kapitulo, ibilang ti maipapan iti no ania ti kayat a sawen ti agbalin a maysa a lider.

Asino dagiti “karnero” a kayat ti Apo a pakanem? Ania ti masarakam iti Ezequiel 34 a makatulong iti maysa a tao nga agsagsagana nga agserbi iti mision, agpatpatanor kadagiti ubbing, wenno mangipatpatungpal iti ministering assignment? Kasano a masurotmo ti pagwadan ti Mangisalakan a kas pastortayo? (kitaen kadagiti bersikulo 11–31).

Mabalinmo pay nga utoben ti simbolismo a masarakam iti daytoy a kapitulo. Ania ti mabalin nga ibagi ti “nasayaat a pagaraban” ken “nasayaat a pagapunan” iti bersikulo 14? Ania ti pagdumaan ti karnero a “napukaw“ ken ti maysa a “napapanaw”? (bersikulo 16). Ania dagiti dadduma pay a simbolo a masarakam?

Kitaen met iti Juan 21:15–17; Gerrit W. Gong, “Ministering,” Liahona, Mayo 2023, 16–19.

“No … adda dagiti basbasolmi a naipabaklay kadakami,” napanunot dagiti naibalud nga Israelita, “kasano ngarud ti nasken a panagbiagmi?” (Ezequiel 33:10). Kas sungbat, insuro ti Apo kadakuada maipapan iti panagbabawi ken pannakapakawan. Makatulong dagitoy a saludsod kenka a mangutob no ania ti insurona:

• Ania iti panagkunam ti kayat a sawen ti “agtalekka iti [bukodmo] a kinalinteg”? (kitaen iti Ezequiel 33:12–13).

• Ania koma ti isaom iti maysa a tao a makarikna a dagiti tao a nailadawan iti Ezequiel 33:12–19 ket saan nga agpada ti pannakatratoda? (kitaen met iti Mateo 21:28–31; Lucas 18:9–14).

• Ania ti masarakam kadagitoy a bersikulo a makatulong kenka a makaawat no ania ti kaipapanan ti agbabawi? Ania dagiti nayon a pannakaammo ken pannakaawat a masarakam iti Ezequiel 36:26–27 ken Alma 7:14–16?

Nailadawan ti panaguummong ti Israel iti Ezequiel 37 babaen iti dua a simbolo. Bayat ti panangbasam maipapan iti umuna (a simbolo)—maisubsubli nga agbiag dagiti natay a tulang (kitaen kadagiti bersikulo 1–14—utobem no ania ti isingasing kenka maipapan iti panaguummong ti Israel iti agsumbangir ti belo (kitaen met iti Ezequiel 36:24–30). Ibilangmo dagiti saludsod kas kadagitoy:

• Ania ti padpadasen ti Apo nga ipatungpal babaen iti pannakaummong ti Israel?

• Kasano nga ipatpatungpalna daytoy?

Mabalinmo a saludsoden iti bagim dagitoy met laeng a saludsod bayat ti panangbasam maipapan iti maikadua a simbolo, kadagiti bersikulo 15–28. Maipanggep iti dua a sarukod daytoy a simbolo nga ibukbuksil ti adu nga iskolar a kas pagsuratan a kayo a tabla a napagtipon babaen ti maysa a bisagra. Ti sarukod [stick] ni Juda ket mabalin a mangibagi iti Biblia (gapu ta adu iti Biblia ti insurat dagiti an-annabo ni Juda), ken ti sarukod [stick] ni Jose ket mabalin a mangibagi iti Libro ni Mormon (gapu ta ti kaamaan ni Lehi dagiti an-annabo ni Jose iti Egipto). Sipapanunot iti dayta, ania ti isuro kenka dagitoy a bersikulo maipapan iti akem dagiti nasantuan a kasuratan iti pannakaummong ti Israel?

Panunotem no kasano a nagtinnulong ti Biblia ken Libro ni Mormon iti biagmo—nangnangruna, a matulongannaka nga umasideg ken ni Cristo. Ania dagiti binatog iti nasantuan a kasuratan a naisangangayan a napateg kenka?

Kitaen met iti 2 Nephi 3:11–13; 29:14; “Israel, Israel, God Is Calling,” Hymns, no. 7; Topics and Questions, “Bible,” “Book of Mormon,” Gospel Library; “The Book of Mormon Gathers Scattered Israel” (video), Gospel Library.

1:31

Bayat ti panangbasam iti Ezequiel 47:1–12, mabalin a makatulong nga ilawlawag a ti Natay a Baybay ket naapgad unay tapno saan a makapagbiag ti ikan ken mulmula ditoy. Ania ti pakaawisan ti riknam maipanggep kadagiti danum a nailadawan kadagiti bersikulo 1–12? (kitaen met iti Apocalipsis 22:1). Ania ti mabalin nga isimbolo dagitoy a danum? Ania ti mabalin nga ibagi dagiti kayo a nailadawan iti bersikulo 12?

Ania ti inayon ti mensahe ni Elder Dale G. Renlund “Family History and Temple Work: Sealing and Healing” iti pannakaawatyo? (kitaen iti Liahona, Mayo 2018, 47–48). Utobem no kasano a nasarakam ti naespirituan a biag ken pannakaagas gapu iti templo.

• Mabalin a magustuan dagiti annakmo ti agaramid kadagiti tignay a maigiddan iti Ezequiel 3:17. Kas pagarigan, mabalinda nga itudo kadagit mata, lapayag, ken ngiwatda no basaem dagiti balikas nga “agbambantay,” “denggen,” ken “ngiwat.” Mabalin met a magustuanda ti agpagnapagna—iti ruar wenno iti aglawlaw laeng ti siled. Bayat ti panagnada, ballaagam ida maipapan kadagiti banag iti desdes, kas kadagiti karayan a pagtapuakan, sangsanga a paglemmengan, wenno dagiti ayup a liklikan (pudno wenno agpammarang). Daytoy ti mangiturong iti saritaan maipapan iti no kasano a ballaagannatayo ti propeta ti Apo maipapan kadagti peggad a saantayo a makita.

• Daytoy ti sabali a wagas a mangipakita iti Ezequiel 3:17; 33:1–5. Maysa kadagiti annakmo ti mabalin nga agpammarang nga “agbambantay” babaen ti panagtamdagna iti tawa ken panangibagana iti dadduma pay no ania ti mapaspasamak iti ruar. Mabalinyo pay a buyaen ti video “Watchman on the Tower” (ChurchofJesusChrist.org). Kasano a kas maysa nga agbambantay kadatayo ti sibibiag a propetatayo?

  

  4:17

• Kalpasan ti panangbasa iti Ezequiel 37:15–23 nga aggigiddan, mabalinmo ken dagiti annakmo ti mangsapul ti dua a sarukod [stick] ken mangisurat iti maysa iti Para iti Juda (Biblia) ken iti sabali pay iti Para ken ni Joseph (Libro ni Mormon). Kalpasanna mabalinmo ti mangibinglay kadagiti estoria wenno nasantuan a kasuratan manipud iti Biblia ken Libro ni Mormon a makatulong kadakuada a makarikna nga as-asidegda iti Mangisalakan ken agbalin a “tattao[na]” (bersikulo 23). Apay a nasayaat a maaddaan iti agpada a dua a libro ti nasantuan a kasuratan?

• Ezekiel 47 iladawan dagitoy a bersikulo ti parmata maipapan iti danum nga agay-ayus manipud iti templo ken mangpapaimbag iti Natay a Baybay—maysa a baybay a naapgad unay tapno saan a makapagbiag dagiti ikan ken mula iti daytoy. Mabalin a tunggal maysa dagiti annakyo ket makadrowing iti maysa wenno dua a banag manipud iti sirmata, kas iti templo, karayan, desierto, Natay a Baybay, nakaad-adu nga ikan, wenno nabunga a kayo. Kalpasanna, bayat ti panagbasayo kadagiti bersikulo 1–12 nga aggigiddan, mabalinda nga ibinglay ti drowingda no madakamat dayta a banag. Ania dagiti bendision a dimteng manipud iti karayan iti daytoy a parmata? Tulongam dagiti ubbing a mangkita no kasano a maipada dagitoy a bendision kadagiti bendision nga idiaya ti Mangisalakan kadagiti agtungpal kadagiti katulagan iti templo. Makatulong ti video nga “And the River Will Grow” (Gospel Library).

  

  3:43

• Mabalinyo ti aggigiddan nga agkansion iti maysa a kanta a mangiladawan kadagiti bendision ti templo, kas iti “Families Can Be Together Forever” (Children’s Songbook, 188). Ania ti isuro daytoy a kanta maipapan iti no kasano a bendisionannatayo ti Apo iti nasantuan a balayna?