Daniel 1–7

Iti kaipapananna, agbibiagtayo amin iti Babilonia. Masansan a maipasangotayo kadagiti sulisog a mangikompromiso kadagiti pagalagadantayo ken mangtallikud iti pammati ken Cristo. Bayat ti panangbasam iti Daniel 1, 3, ken6, kitaem dagiti wagas a nakapilitan da Daniel, Sidrac, Misac, ken Abdenago a mangaramid kadagiti banag nga ammoda a biddut. Kasano a sinungbatanda dagitoy a kasasaad? (kitaen iti Daniel 1:10–13; 3:15–18; 6:10). Ania dagiti bunga ti pammatida? Ania ti nasursurom manipud kadagitoy a padas a makatulong kenka nga agtalek iti Apo no maipasangoka iti oposision? Ibilang pay dagiti sumaganad a saludsod:

• Kaano ti pannakariknam a napilitka nga agaramid iti maysa a banag nga ammom a biddut? Kasano a binendisionannaka ti Apo iti panagtungpalmo kadagiti bilinna?

• Ania no ti pammatiyo ket saan a mangiturong kadagiti milagro a kalkalikagumanyo a gun-oden? (kas pagarigan, kitaen iti Alma 14:8–13). Maibatay iti no ania ti nabasam iti Daniel 3:13–18, kasano iti panagkunam no sinungbatan koma da Sidrac, Misac, ken Abdenago daytoy a saludsod? Kasano a makaapekto iti pagwadanda iti no kasano a sanguem dagiti pannubokmo?

• Kasano a makaiturong dagiti nalinteg a pilim kadagiti dadduma iti dakdakkel a pammati iti Apo? (kitaen iti Daniel 2:47; 3:28–29). Utobem dagiti epekto a mabalin nga ipapaay dagiti pilim kadagiti dadduma.

Kitaen met iti Dieter F. Uchtdorf, “Be Not Afraid, Only Believe,” Liahona, Nob. 2015, 76–79.

Babaen ti paltiing, nakita ni Daniel a ti tagtagainep ni Nabucodonosor ti nangisirmata kadagiti masakbayan a nainlubongan a pagarian, a kasta met iti masakbayan a pagarian ti Dios, a “kaano man dinto madadael” (Daniel 2:44). “Ti Simbaan ti naipadto a pagarian iti ud-udina nga aldaw,” insuro ni Elder D. Todd Christofferson, “saan a pinarsua ti tao ngem impasdek ti Dios iti langit ken agtulidtulid kas maysa a bato a ‘natagaan iti bantay a saan a gapuanan dagiti ima’ tapno mangpunno iti daga” (“Why the Church,” Liahona, Nob. 2015, 111). Panunotem ti maipapan iti pagarian ti Dios iti ud-udina nga aldaw bayat ti panangbasam kadagiti pannakailadawan ti bato iti Daniel 2:34–35, 44–45. Ania ti akemmo iti panangtulong iti daytoy a padto a mapasamak?

Kitaen met iti “Hark, All Ye Nations!,” Hymns, no. 264; “God Gave Them Knowledge” (video), ChurchofJesusChrist.org.

13:49

Bayat iti panangrebyum iti Daniel 2:1–15, ibilngmo no kasano ti riknam no addaka koma iti sasaaden ni Daniel. Ania ti inaramid ni Daniel? (kitaen iti Daniel 2:16–18). Ania ti masursurotayo manipud iti Daniel 1:17 maipapan no kasano nga insagana ti Dios ni Daniel? Ania ti masursurotayo manipud kadagiti balikas ken tignay ni Daniel kalpasan a naawatna ti tulong ti Apo? (kitaen iti Daniel 2:19–30).

Bayat ti naindagaan a panangministro ti Mangisalakan, adu a Judio ti nangibilang iti pangawag nga “Anak ti tao” manipud iti Daniel 7:13 a mangibasar iti yaay ti Mesias. Ania ti masursuroyo maipapan iti Mesias manipud iti Daniel 7:13–14? (kitaen met iti Moises 6:57).

Masansan nga imbasar ti Mangisalakan ti bagina kas “ti Anak ti tao.” Ibilang ti panangrebyu iti sumagmamano a pagarigan: Mateo 25:31; Marcos 9:31; 10:45. Ania ti isursurona maipapan iti Bagina kadagitoy a bersikulo? Iti Marcos 14:61–64, inusar ni Jesus daytoy a pangawag iti maudi nga aldaw ti mortal a biagna. Kitaem ti reaksion manipud kadagiti tao a nakangngeg iti panangipakdaarna. Kasano nga apektuan ti padto ni Daniel maipapan iti Anak ti Tao ti riknam maipapan iti napasamak Kenkuana iti Marcos 15?

Kas met laeng no kasano a nagura ni Jesus iti panangipakdaarna nga Isu ket “ti Anak ti tao,” mabalin a maipasangoka met iti pannakaidadanes gapu iti panangipakdaarmo iti kinapudno. Idilig ti padto iti Daniel 7:13–14 kadagiti kari iti Doktrina ken Katulagan 121:29, 46.

Kitaen met iti Doktrina ken Katulagan 49:6; Pangiwanwan iti Nasantuan a Kasuratan, “Anak ti Tao,” Gospel Library.

• Tapno matulongam dagiti annakmo a makasursuro manipud kadagiti makaparegta nga estoria iti libro ni Daniel, mabalinmo a sapulen dagiti ladawan dagiti pasamak iti Daniel 1, 3, ken 6 (kitaen iti panid ti aktibidad jti daytoy a lawas wenno iti Libro ti Arte ti Ebanghelio, dagiti num. 23, 25, 26). Kalpasanna, mabalinmo nga ikabil dagiti ladawan a nakasango iti baba ket awisem ti maysa nga ubing a mangbaliktad iti maysa ken isaritana ti estoria nga ibagina. (Para iti tulong, kitaen iti “Ni Daniel ken dagiti Gagayyyemna,” “Da Sidrac, Misac, ken Abdenago,” ken “Ni Daniel ken ti Rukib dagiti Leon” iti Dagiti Estoria iti Daan a Tulag, 154–56, 160–62, 163–65.)

  

  1:39

  

  1:39

  

  1:45

• Tulongam dagiti annakmo a mangpanunot kadagiti kasasaad a mabalin a mapilitda a mangaramid iti saan nga umisu a pili, kas iti kasasaad ni Daniel ken dagiti gagayyemna iti Daniel 1, 3, ken 6. Ibinglayyo iti tunggal maysa no kasano a nabendisionankayo gapu iti panangaramidyo iti umno a pili uray no narigat daytoy. Aggigiddan nga agkansion iti kanta a mainaig iti daytoy a topiko, kas iti “Choose the Right” (Hymns, no. 239).

• Ti panangbasa iti estoria maipapan ken ni Daniel ken dagiti gagayyemna a mangkedkedked iti karne ken arak ti ari ket mabalin a mangparegta iti pagsasaritaan maipapan iti linteg ti salun-at nga inted kadatayo ti Nailangitan nga Ama ita (kitaen iti Doktrina ken Katulagan 89). Nalabit a mabalinmo a sapulen dagiti bendision nga inawat ni Daniel ken dagiti gagayyemna ket idiligmo dagitoy kadagiti bendision a naikari iti Nainsiriban a Balikas ( Word of Wisdom) (kitaen iti Daniel 1:15–17 ken Doktrina ken Katulagan 89:18–21).

• Bayat ti panangbasam iti Daniel 2:31–35, 44–45 a kaduam dagiti annakmo, mabalinmo nga awisen ida a mangidrowing iti ladawan ti tagtagainep ni Nabucodonosor. Tulongam ida a makaawat a ti bato iti tagtagainep ket mangibagi iti Ti Simbaan ni Jesucristo dagiti Santo iti Ud-udina nga Aldaw. Ania ti masursurotayo maipapan iti Simbaan manipud iti daytoy a tagtagainep? Mabalin a manginagan dagiti annakmo iti sumagmamano a banag nga inaramid ti Nailangitan nga Ama a mangbangon iti Simbaanna kadagiti ud-udina nga aldaw. No kasapulanda ti tulong, mabalinmo nga ipakita dagiti ladawan dagiti pasamak manipud iti Pannakaisubli ti Simbaan (kitaen iti Libro ti Arte ti Ebanghelio, dagiti num. 90–95).

• Apay a napateg unay ti panagkararag iti Nailangitan nga Ama ken ni Daniel? Nalabit mabalinmo ken dagiti annakmo a pagsasaritaan maipapan iti dayta a saludsod bayat ti panagbasayo iti Daniel 6 nga aggigiddan. Kalpasanna mabalinyo nga ibaga iti tunggal maysa no apay a napateg kadakayo ti panagkararag. Mabalin a maragsakan dagiti annakmo nga agdrowing kadagiti ladawan ti bagbagida nga agkarkararag iti nadumaduma a kasasaad. Mabalinda nga usaren dagiti drowingda a mangisuro iti tunggal maysa a mabalintayo ti agkararag iti Nailangitan nga Ama uray sadino ti ayantayo wenno ania ti kasapulantayo.