“Oktubre 19–25. ‘Sakbay ti Panangbukelko Kenka iti Tian Nabigbigankan’: Jeremiah 1–3; 7; 16–18; 20,” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)

“Oktubre 19–25. ‘Sakbay ti Panangbukelko Kenka iti Tian Nabigbigankan’”: Umaykayo, Sumurot Kaniak: Daan a Tulag 2026

Jeremias, ni Walter Rane

Oktubre 19–25: “Sakbay ti Panangbukelko Kenka iti Tian Nabigbigankan”

Jeremias 1–3; 7; 16–18; 20

Idi damo, saan a napanunot ni Jeremias nga agbalin a maysa a nasayaat a propeta. “Adtoy, saanko nga ammo ti agsao,” indayengdengna (Jeremias 1:6). Ngem impanamnama ti Apo kenkuana, “Inkabilko dagiti saok dita ngiwatmo” (bersikulo 9). Narikna ni Jeremias nga isu ket maysa nga “ubing” nga awan pay padasna (bersikulo 6), ngem inlawlawag ti Apo a talaga nga ad-adda a naisagana isuna ngem iti naamirisna—naordenan isuna iti daytoy nga awag (calling) uray pay sakbay ti pannakayanakna (kitaen iti bersikulo 5). Iti kasta inikkat ni Jeremias dagiti butengna ket inawatna ti awag (calling). Binallaaganna dagiti ari ken saserdorte a dagiti sinsinan a kinasantoda ket saanto a mangispal kadakuada. Ti “ubing” a nangipagarup a saan a makapagsao nakarikna iti balikas ti Dios “iti puso[na] kas makauram nga apuy” ket saan a makapagulimek (Jeremias 20:9).

Estoriayo met ti estoria ni Jeremias. Am-ammonakayo, met, ti Dios, sakbay a nayanak ken naisaganakayo para iti misionyo iti biag. Maibilang iti dadduma pay a banag, iraman dayta a mision ti maysa a banag a nasirmata ni Jeremias: panangummong kadagiti tao ti Dios, a saggaysa, tapno “ipan[na] [ida] idiay Sion” (Jeremias 3:14). Ket uray no dikayo ammo eksakto no ania ti aramiden wenno sawenyo, “saan[ka] nga agbuteng …; ta addaak kenka, kuna ti Apo” (Jeremias 1:8, 19).

Para iti pakagupgopan ti libro ti Jeremias, kitaen iti “Jeremias” iti Pangiwanwan iti Nasantuan a Kasuratan.

Dagiti Kapanunotan iti Panagsursuro iti Pagtaengan ken iti Simbaan

Jeremias 1:4–19; 7:1–7; 20:8–9

Naawagan dagiti propeta a mangisao iti balikas ti Dios.

Panunotem a makisarsaritaka iti maysa a gayyem a di pay pulos nangngeg ti maipapan kadagiti propeta, ket ikeddengmo nga ilawlawag ti konsepto babaen ti panangusar iti awag ni Jeremias nga agbalin a propeta iti Jeremias 1:4–19. Ania ti masarakam kadagitoy a bersikulo a mangisuro iti maysa a banag maipapan kadagiti propeta ti Dios? Mabalinmo pay a kitaen iti Jeremias 7:1–7; 20:8–9 ken iti himno a kas “We Listen to a Prophet’s Voice” (Hymns, no. 22).

Mabalin met a kayatmo nga isuro iti gayyemmo maipapan iti sibibiag a propeta ita. Adda kadi banag kadagitoy a bersikulo a mabalin a makatulong? Kas pagarigan, ania ti “paruten” wenno “rebbaen” dagiti propeta iti aldawtayo? Ania ti “bangonen” ken “imulada”? (Jeremias 1:10). Kasano a naammuam nga inawagan ti Dios ti sibibiag a propetatayo?

Kitaen met iti Dagiti Pagannurotan ti Pammati 1:6, 9; “Apay nga Addaantayo kadagiti Propeta?” (video), ChurchofJesusChrist.org.

Jeremias 1:5

Am-ammonak ti Dios sakbay a nayanakak.

Ania ti nasursuro ni Jeremias maipapan iti bagina iti Jeremias 1:5? Kas maysa a kabarbaro a naawagan a propeta, apay a napateg a maammuanna dayta nga impormasion?

Kaaduan ti nasursuro ni Jeremias maipapan iti bagina iti Jeremias 1:5 ket pudno met maipapan kadakayo. Am-ammonakayo ti Dios sakbay a nayanak ken naisaganakayo para kadagiti masinunuo a pagrebbengan. Tapno maammuam ti ad-adu pay maipapan iti biagmo sakbay a nayanakka, basaem ti Alma 13:1–4; Doktrina ken Katulagan 138:53–56; and Abraham 3:22–23. Mabalinmo nga ilista no ania ti naammuam. Apay a napateg a maammuam daytoy nga impormasion?

Tapno masursurom no kasano nga inapektuan dagitoy a kinapudno ti biag ni Elder Ahmad S. Corbitt, adalen ti mensahena a “You Can Gather Israel!” (Liahona, Mayo 2021, 63–63). Kasano a ti pannakaammo maipapan iti biag sakbay daytoy a biag ket mangapekto iti wagas ti panagbiagyo iti mortal a biagyo?

Adtoy ti kinuna ni Presidente Russell M. Nelson maipapan iti biagyo sakbay daytoy a biag:

“Am-ammonakan ti Nailangitan nga Amam iti nabayag unayen a panawen. Sika, a kas anakna, pinilinakan nga umay iti daga iti daytoy umisu a panawen, nga agbalin a maysa a lider ti naindaklan nga aramidna iti daga. Napilika a saan a para kadagiti pisikal nga ugalim ngem para kadagiti naespirituan a kababalinmo, kas iti kinamaingel, kinatured, integridad ti puso, pannakawaw iti kinapudno, panagbisin iti kinasirib, ken tarigagay nga agserbi kadagiti dadduma.

“Napadur-asmo ti sumagmamano kadagitoy a kababalin iti biag sakbay daytoy a biag. Mabalinmo a padur-asen dagiti dadduma pay ditoy daga bayat ti panagpursigim nga agkalikagum a manggun-od kadagitoy” (“Decisions for Eternity,” Ensign, wenno Liahona, Nob. 2013, 107).

Panunotem ti sumagmamano a kasasaad a mabalin a pakaipasanguam a napateg koma a laglagipem dagitoy a kinapudno maipapan iti biagmo sakbay daytoy a biag. Ania ti maaramidam a mangipalagip iti bagim kadagitoy a kinapudno?

Kitaen met iti Russell M. Nelson, “Decisions for Eternity,” Liahona, Nob. 2013, 106–9; Topics and Questions, “Foreordination,” “Premortal Life,” Gospel Library.

iti kannigid, maysa a tao a nakatakder iti dakkel nga awan nagianna a pagurnongan ti danum; iti kannawan, maysa a waterfall — Iti Jeremias 2:13, inyarig ti Apo ti naespirituan a kasasaad dagiti tao kadagiti “naburak a bubon” ket inyarigna ti Bagina iti “ubbog ti sibibiag a danum.”

Jeremias 2; 7

“Naglikudandak nga ubbog dagiti dandanum a sibibiag.”

Iti lugar nga awan tudona a nagindegan dagiti Israelita, nagurnong dagiti tao iti napateg a danum iti uneg ti daga a maawagan iti bubon [cistern]. Ania iti panagkunam a mabalin nga isimbolo dagiti “bubbubon a nagrengngat” a nadakamat iti Jeremias 2:13? Apay a nasaysayaat ti umaw-awat iti danum manipud iti maysa nga ubbog ngem iti agpanpannuray iti maysa a bubon [cistern]? Ania ti kayat a sawen ti manglipat “iti ubbog dagiti dandanum a sibibiag”? Bayat ti panangbasam iti Jeremias 2 ken 7, kitaem no kasano a binaybay-an dagiti tao ti sibibiag a danum ti Apo (kitaen, kas pagarigan, iti Jeremias 2:26–28; 7:2–11). Apay a ti “danum a sibibiag” ti maysa a nasayaat a simbolo para iti no ania ti ited ti Mangisalakan kadatayo? Panunotenyo maipapan iti no kasano nga aw-awatenyo ti danum a sibibiag.

TiJeremias 7 ket maiturong kadagiti tao a sumsumrek “iti balay ti Apo … tapno agdaydayaw iti Apo,” ngem dagiti tignayda ket saan a maitunos iti makinruar a debosionda (kitaen kadagiti bersikulo 2–11). Ania dagiti mensahe a mariknam a mabalin nga adda iti Apo para kenka kadagiti bersikulo 21–23?

Agaramat kadagiti adalen a banag [object lesson]. Masansan nga idilig dagiti propeta ti Apo dagiti naespirituan a kinapudno kadagiti pamiliar a banag. Ibilangmo ti panangaramid iti isu met laeng bayat ti panagsursuro ken panangisurom iti ebanghelio. Kas pagarigan, tapno mailadawan ti Jeremias 2:13, mabalinmo nga ikabil ti danum iti nagbirri wenno naburak a pagkargaan wenno uminum manipud iti ubbog a paginuman. Kasano a kas maysa nga “ubbog dagiti danum a sibibiag” ni Jesucristo? (Jeremias 2:13). Kasano nga uminumtayo manipud iti danumna a sibibiag?

Jeremias 3:14–18; 16:14–21

Ummongento ti Apo dagiti taona.

Iti Jeremias 16:14–15, inyarig ni Jeremias ti pannakaummong ti Israel kadagiti maudi nga aldaw iti Ipapanaw ti Israel manipud Egipto. Iti panagkunam, apay a napatpateg pay ti panaggummong kadagiti tao ti Dios ngem iti Ipapanaw?

Ania ti isingasing ti Jeremias 3:14–18; 16:14–21 maipapan iti no kasano a mapasamak dayta a panaguummong?

Iti mensahena a (“Hope of Israel,” ni Presidente Russell M. Nelson, kas ken ni Jeremias, insurona a paset daytoy amin ti pannakaummong ti Israel, a “daytoy ti kapatgan a banag a mapaspasamak iti daga iti agdama” (worldwide youth devotional, Hunio 3, 2018, Gospel Library). Basaem wenno denggem ti mensahena, ket kitaem no matakuatam (a) no kasano nga ilawlawag ni Presidente Nelson ti panaguummong ti Israel, (b) no kasano nga iladawanna ti kinapateg daytoy, ken (c) no kasano a mabalinmo ti agbalin a paset ti panaguummong.

Para iti ad-adu pay, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Jeremias 1:5

Am-ammonak ti Nailangitan nga Ama sakbay a nayanakak.

Tapno mayam-ammo ti napateg a kinapudno a maisursuro iti Jeremias 1:5, mabalinmo nga ipakita kadagiti annakmo ti ladawan ti maysa a maladaga (wenno, no mabalin, mabalinmo a kitaen dagiti ladawan dagiti annakmo idi maladagada pay). Saludsodem kadagiti annakmo no ammoda ti nagnaedanda sakbay ti pannakayanakda. Mabalinyo pay ti agkansion iti maysa a kanta a mangisuro maipapan iti biag sakbay ti yaay ditoy daga (premortal life), kas iti “I Lived in Heaven” (Children’s Songbook, 4).
No kayat dagiti annakmo a masursuro ti ad-adu pay, mabalinmo a tulongan ida a mangbirok iti “Biag Sakbay ti Yaay ditoy Daga” iti Pangiwanwan iti Nasantuan a Kasuratan. Mabalinda ti agsapul kadagiti sungbat iti “siasino,” “kaano,” ken “ania” a saludsod maipapan iti biag sakbay ti yaay ditoy daga.

maysa nga ubing a babai a mangig-iggem iti maysa a maladaga

Jeremias 1:4–19

Naawagan dagiti propeta a mangisao kadagiti balikas ti Apo.

Ibilang ti panangipakita kadagiti ladawan ti sibibiag a propeta wenno dagiti propeta manipud kadagiti nasantuan a kasuratan (masarakam ti sumagmamano iti Church magazines, ti Gospel Art Book, ken Umaykayo, Sumurot Kaniak). Saludsodem kadagiti annakmo no ania ti ammoda maipapan kadagitoy a propeta.
Tapno maisuro maipapan iti ar-aramiden dagiti propeta, mabalinmo ti agpili iti sumagmamano a makatulong a bersikulo manipud iti Jeremias 1, kas kadagiti bersikulo 5, 7, 10, ken 19. Mabalin a pilien ti tunggal maysa kadagiti annakmo ti maysa kadagiti bersikulo, basaen daytoy, ken ibinglay ti maysa a banag a masursuroda maipapan kadagiti propeta.

Jeremias 16:14–16

Matulongak dagiti annak ti Nailangitan nga Ama nga agsubli Kenkuana.

Bayat ti panangbasam iti Jeremias 16:16, mabalin nga agpammarang dagiti annakyo nga “agkalap” wenno “aganup” kadagiti banag iti aglawlaw ti siled. Indilig ni Presidente Russell M. Nelson dagiti mangngalap ken mangnganup iti daytoy a bersikulo kadagiti misionario (kitaen iti “The Gathering of Scattered Israel,” Liahona, Nob. 2006, 81). Ania ti aramiden dagiti misionario? Kasano a makatulongtayo a “mangkalap” ken “manganup” iti nawarawara nga Israel? (kitaen kadagiti “A Message for Children from President Russell M. Nelson” [video], ChurchofJesusChrist.org).

3:30
Video: A Message for Children from President Russell M. Nelson

Jeremias 18:1–6

Mabalinko a paiwanwan iti Apo ti biagko, kas iti maysa nga agdamdamili a mangsukog iti pila (clay).

Tapno agsukisok kadagitoy a bersikulo, mabalinmo nga ilawlawag wenno ipakita no kasano ti mangaramid iti damili (kitaen ti ladawan iti ungto daytoy a balabala). Ania ti mensahe ti Apo para kadatayo iti Jeremias 18:1–6? Ania ti kayat a sawen ti agbalin a pila kadagiti ima ti Apo? (kitaen met iti Isaias 64:8). Para iti sabali pay nga estoria a mangidilig kadatayo iti pila ti agdamdamili, kitaen ti mensahe ni Elder Richard J. Maynes “The Joy of Living a Christ-Centered Life” (Liahona, Nob. 2015, 27–30).

Para iti ad-adu pay, kitaen iti isyu ti magasin a Friend iti daytoy a bulan.

dagiti ima a mangsuksukog iti damili iti maysa a pilid — “Adtoy, kas iti pila iti ima ti agdamdamili, kastakayo iti imak, O balay ti Israel” (Jeremias18:6).

panid ti aktibidad iti Primary: Matulongak dagiti annak ti Nailangitan nga Ama nga agsubli Kenkuana — “Adtoy, kas iti pila iti ima ti agdamdamili, kastakayo iti imak, O balay ti Israel” (Jeremias18:6).