“Oktubre 5–11. ‘Inturedna dagiti Lidaytayo, ken Inawitna dagiti Ladingittayo’: Isaias 50–57” Umaykayo, Sumurot Kaniak—Para iti Pagtaengan ken Simbaan: Daan a Tulag 2026 (2026)
“Oktubre 5–11. ‘Inturedna dagiti Lidaytayo, ken Inawitna dagiti Ladingittayo,’” Umaykayo, Sumurot Kaniak: Daan a Tulag 2026
Ti Pannakalalais ni Cristo, ni Carl Heinrich Bloch
Oktubre 5–11: ‘Inturedna dagiti Lidaytayo, ken Inawitna dagiti Ladingittayo”
Isaias 50–57
Iti unos ti panagministrona, nagsao ni Isaias maipapan iti maysa a mannakabalin a mangisalakan. Dagitoy a padto koma ti nangnangruna a napateg kadagiti Israelita kalpasan ti adu a siglo idi addada iti pagbaludan iti Babilonia. Maysa a tao a makatumba kadagiti pader ti Babilonia ti agbalin a pudno a nabileg a mangparmek. Ngem saan kadi dayta ti kita ti Mesias nga inladawan ni Isaias kadagiti kapitulo 52–53: “Isu nauy-uyaw ken binaybay-an dagiti tao; maysa a tao ti ladladingit, ken nakaam-ammo iti lidliday, ket naum-umsi kas iti maysa a tao a kenkuana dagiti tao ilingedda dagiti rupada. … Isu impatotayo a nasaplit, nakabil iti Dios, ket napagsagaba” (Isaias 53:3–4).
Babaen ti panangtedna iti saan a ninamnama a mangisalakan, insuro ti Dios kadatayo maipapan iti pudno a pannakaisalakan. Tapno maisalakantayo manipud iti pannakailupitlupit ken rigat, imbaon ti Dios ti Maysa nga Isu Mismo ket “naparigat, ken … napagsagaba.” A sumagmamano ti nangnamnama iti maysa a leon, nangibaon iti kordero (kitaen iti Isaias 53:7). Awan duadua, saantayo a wagas dagiti wagas ti Dios (kitaen iti Isaias 55:8–9). Wayawayaannatayo ni Jesucristo saan laeng a babaen ti pananglukat iti pagbaludan ngem babaen ti panangala iti lugartayo sadiay. Pagin-awaennatayo manipud kadagiti kawar ti ladingit ken liday babaen ti panangibturna kadagitoy Mismo (kitaen iti Isaias 53:4–5, 12). Saannatayo nga isalakan manipud iti adayo. Makipagsagaba kadatayo, kadagiti aramid ti “agnanayon a kinamanagayat” a “saanto a pumanaw kenka” (Isaias 54:8, 10).
Dagiti Kapanunotan iti Panagsursuro iti Pagtaengan ken iti Simbaan
Isaias 50–52
Naraniag ti masakbayan para kadagiti tao ti Apo.
Nupay binubos dagiti Israelita ti adu a tawen iti pagbaludan—ken uray pay dayta a pannakabalud ti bunga dagiti bukodda a nakapuy a pili—kayat ti Apo a makitada iti masakbayan nga addaan iti namnama. Ania ti masarakanyo iti mensahe ni Isaias a mangted kadakayo iti namnama? Maysa a tsart a kas iti daytoy ti makatulong kadakayo nga agadal:
|
Ania ti masursurok maipapan iti Dios (kitaen, kas pagarigan, iti Isaias 50:2, 5–9; 51:3–8, 15–16; 52:3, 9–10) | |
|
Dagiti mensahe ti namnama (kitaen, kas pagarigan, iti Isaias 50:9; 51:3–5, 11–12, 22–23; 52:9–10) | |
|
Ania ti maaramidko tapno agbalin a pumudno ti namnama (kitaen, kas pagarigan, iti Isaias 50:10; 51:1–2, 6–9; 52:1–3, 9–11) |
Kitaen met iti Mosiah 12:20–24; 15:13–18; 3 Nephi 20:29–46; Doktrina ken Katulagan 113:7–10; Russell M. Nelson, “Embrace the Future with Faith,” Liahona, Nob. 2020, 73–76.
Gapu iti Ayat, ni Angela Johnson
Tulongam dagiti Agad-adal nga umasideg ken ni Jesucristo. “Awan ti maaramidmo kas maysa a mannursuro nga ad-adda pay a mangbendisionto kadagiti agad-adal no di ti panagtulong kadakuada a mangam-ammo iti Nailangitan nga Ama ken ni Jesucristo ken mangrikna iti ayatda (Panangisuro iti Wagas ti Mangisalakan, 8). Bayat ti panagsaganam a mangisuro iti Isaias 50–57 kadagiti dadduma, ibilangmo no kasano a matulongam ida a makakita kadagiti koneksion iti nagbaetan dagiti karit ti Israel, dagiti padto ni Isaias maipapan ken Cristo, ken ti panangawat iti nadiosan a tulong kadagiti bukodda a pannakidangadang.
Isaias 53
Inawat ni Jesucristo iti Bagina dagiti basol ken ladingitko.
Sumagmamano a kapitulo iti nasantuan a kasuratan ti mangiladawan iti pangsubbot a mision ni Jesucristo a napimpintas ngem iti Isaias 53. Ibilangmo dagiti aktibidad a kas kadagitoy tapno ad-adda a maawatan ken mayaplikar dagitoy nabileg a pannursuro:
-
Utobem wenno paglilinnawagan no kasano a masansan nga iladawan dagiti estoria ken pelikula dagiti bannuar a mangispal kadagiti tao. Mabalinmo nga idasig dagita a panangiladawan kadagiti pangiladawan ti Mangisalakan iti Isaias 53.
-
Kalpasan ti panangbasam iti tunggal bersikulo, agsardeng tapno panunotem no ania ti sinagaba ti Mangisalakan—dagiti “ladingit,” liday,” ken “basbasol” nga imbaklayna—para iti amin a tao ken nangnangruna para kenka. Mabalinmo a sukatan dagiti balikas a kas “datayo” ken “dakami” iti “siak” bayat ti panagbasam. Ania dagiti rikna wenno kapanunotan nga iparegta kenka dagitoy a bersikulo?
-
Ibilang ti panangbuya iti video “My Kingdom Is Not of This World” (Gospel Library), ket utobem no kasano a natungpal dagiti padto iti Isaias 53 . Ania dagiti sumagmamano a ladingit ken liday nga ibaklay ti Mangisalakan para kadakayo?
5:25My Kingdom Is Not of This World
-
Mangsapul kadagiti ladawan ti paspasamak a nailikmut iti Pannubbot ni Jesucristo (kitaen iti Libro ti Arte ti Ebanghelio, dagiti num. 56–60). Kalpasanna mabalinmo ti mangsapul kadagiti ragup ti balikas iti Isaias 53 a mangiladawan iti paspasamak kadagiti ladawan. Ania ti iparegta nga aramidenyo dagitoy a pannursuro?
Kitaen met iti “Behold the Great Redeemer Die,” Hymns, no. 191.
Isaias 54; 57:15–19
Kayat ni Jesucristo nga agsubliak Kenkuana.
Addaantayo amin kadagiti panawen no mariknatayo nga adayotayo iti Apo gapu kadagiti basol wenno pagkapsutantayo. Sumagmamano ti naawanan iti namnama ket pakawanennanto ida. Ti Isaias 54 ken 57 ket dagiti dadakkel a kapitulo a basaen para iti pammatalged ken pammaregta kabayatan dagiti kasta a panawen. Nangnangruna kadagiti Isaias 54:4–10; 57:15–19, ania dagiti balikas a mangisuro kenka no ania ti rikna ti Mangisalakan maipapan kenka? Ania ti pakaidumaan nga aramidenna iti biagmo a mangammo kadagitoy a banag maipapan Kenkuana?
Insuro ni Presidente Dieter F. Uchtdorf:
“Saan a napateg no kasano man ti kadakkel ti mabalin a pannakadadael ti panagbiagtayo. Saan a napateg no kasano man ti mabalin a kadagsen dagiti basoltayo, no kasano man ti mabalin a kalaus ti sakit ti nakemtayo, no kasano man ti mabalin a kinaliday, pannakabaybay-an, wenno pannakapaay ti puspusotayo. Uray pay dagiti naawanan iti namnama, agbibiag iti pannakaupay, nagulbod, nangisuko iti integridadda, wenno timmalikud iti Dios ket mabalin a mabukel manen. …
“Daytoy ti naragsak a damag ti ebanghelio: gapu iti agnanayon a plano ti kinaragsak nga impaay ti managayat a Nailangitan nga Amatayo ken babaen ti awan inggana a sakripisio ni Jesus a Cristo, saantayo laeng a masubbot manipud iti natnag a kasasaadtayo ken mapatarnawtayo manen, no di ketdi mapadur-astayo pay iti wagas a di maipagarup ti tao ket agbalintayo nga agtawid ti agnanayon a biag ken makiranud iti gloria ti Dios a di mailadawan” (“He Will Place You on His Shoulders and Carry You Home,” Liahona, Mayo 2016, 102).
Kitaen met iti Patrick Kearon, “God’s Intent Is to Bring You Home,” Liahona, Mayo 2024, 87–89.
Isaias 55–56
Awisen ti Apo ti amin a “mangsalimetmet iti katulagak.”
Iti adu a henerasion, nabigbig ti Israel kas natulagan a tao ti Dios. Nupay kasta, kanayon a nairaman ti plano ti Dios iti ad-adu ngem maysa laeng a nasion, gapu ta maawis ti “tunggal mawaw” nga “umaykayo kadagiti dandanum” (Isaias 55:1). Laglagipem daytoy bayat ti panangbasam iti Isaias 55 ken 56, ket utobem no ania ti kaipapanan ti agbalin a tattao ti Dios. Ania ti mensahe ti Dios kadagiti makarikna a “naisina a di bumurong” manipud Kenkuana? (Isaias 56:3). Ibilangmo ti panangmarka kadagiti bersikulo a mangiladawan kadagiti ugali ken tignay dagiti “mangsalimetmet iti katulagak” (kitaen iti Isaias 56:4–7).
Para iti ad-adu pay, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.
Dagiti Kapanunotan para iti Panangisuro kadagiti Ubbing
Isaias 51–52
Awisennak ti Apo a “yusong[ko] ti kinabileg[ko].”
-
Mabalin a makaparagsak para kadagiti annakyo ti mangtakuat kadagiti ragup ti balikas a kas iti “agriingka,” “bumangonka,” ken “yusongmo ti kinablieg” iti Isaias 51:9, 17; 52:1–2, 9 ket kalpasanna yakemda dagita a ragup ti balikas. Kalpasan ti panangaramidyo iti dayta, mabalinyo a pagsasaritaan ti kaipapanan ti agriing, bumangon, ken yusong ti kinabileg a naespirituan. Ania ti idawdawat ti Apo nga aramidentayo kadagitoy a bersikulo?
-
Mabalin dagiti annakmo ti mangbasa iti Isaias 51:1, 4, 7 ket mangilasin no asino ti kasasao ti Apo ken no ania ti kayatna nga aramidenda. Ania ti kayat a sawen ti “dumngengkayo” iti Apo? Kasano a maipakitatayo iti Apo a “dumngegtayo” Kenkuana?
Isaias 53:3–9
Inawat ni Jesucristo iti Bagina dagiti basol ken ladingitko.
-
Mabalinmo ken dagiti annakmo ti mangkita iti sumagmamano a ladawan a mangipakpakita iti panagsagaba ken ipapatay ni Jesucristo (kitaen, kas pagarigan, iti Libro ti Arte ti Ebanghelio, nos. 56, 57, 58). Kalpasanna, mabalinyo ti aggigiddan a mangbasa iti Isaias 53:3–6, 9 ken mangsapul kadagiti balikas a mangiladawan iti mapaspasamak kadagiti ladawan. Tulongam dagiti annakmo a makaawat nga imbinglay ni Isaias dagitoy a kinapudno ginasut a tawen sakbay a napasamak dagitoy. Apay a napateg a maammuan dagiti tao dagitoy a banag iti adu unay a tawen a nasapsapa? (kitaen iti Alma 39:15–19).
-
Kalpasan ti panangbasa manipud iti Isaias 53:4, “Inturedna dagiti lidaytayo, inawitna dagiti ladingittayo,” mabalin a padasen dagiti annakmo nga ipangato ti nadagsen a banag (wenno agpammarangda nga ipangatoda ti maysa). Ilawlawag a ti “liday” ken “ladingit” wenno leddaang ket mangiparikna a nadagsen ken narigat nga awiten. Apay nga inawitna dagiti “liday,” “ladingit,” ken “basbasolyo”? (kitaen met iti Alma 7:11–12).
Isaias 55:6
Mabalinko a sapulen ti Apo ken umawag Kenkuana.
-
Tapno maisuro dagit annakmo maipapan iti Isaias 55:6, mabalinmo nga ikabil ti ladawan ni Jesus iti maysa a lugar iti siled. Mabalinmo nga awisen dagiti annakmo a mangsapul iti ladawan ken manginaganan iti maysa a wagas a mabalinda a “sapulen … ti Apo idinto a masarakan Isuna.” Ti panangkanta iti “Seek the Lord Early” (Children’s Songbook, 108) ket makaited kadakuada kadagiti kapanunotan. Kalpasanna, mabalinmo a bay-an nga ilemmeng ti maysa kadagiti ubbing ti ladawan ken ulitenna ti aktibidad.
Isaias 55:8–9
Nangatngato dagiti wagas ti Apo ngem dagiti wagasko.
-
Kalpasan ti panangbasa iti Isaias 55:9, mabalin a makaparagsak para kadagiti annakmo ti agtakder iti tugaw ket pagsaritaanda no kasano a naiduma ti langa dagiti bambanag no “nangatngatokayo.” Wenno mabalin nga agdrowingda iti maysa a ladawan ti no ania ti kaipapanan ti Isaias 55:9 kadakuada. Kalpasanna mabalinmo nga ilawlawag ti sumagmamano kadagiti wagas ti Apo a nangatngato ngem kadagiti wagastayo. Kas pagarigan, ania ti wagasna iti panangtrato kadagiti managbasol? (kitaen iti Marcos 2:15–17). Ania ti wagasna iti panangiturong kadagiti dadduma? (kitaen iti Mateo 20:25–28). Ibinglaymo kadagiti annakmo no kasano a nasursurom ti agtalek kadagiti nangatngato a wagas ken pampanunot ti Apo.
Para iti ad-adu pay, kitaen iti isyu ti magasin a Friend iti daytoy a bulan.