Isaias 58–66

Apay nga agboluntario ti asino man a saan a mangan idinto nga adda taraon a makan? Bayat ti panangadalmo iti Isaias 58:3–12, mabalin a panunotem maipapan dagiti rasonmo iti panagayuno—ken kasta met dagiti rason ti Apo iti panangtedna iti daytoy a linteg. Adtoy dagiti sumagmamano a dadduma pay a saludsod nga utoben:

• Apay a no dadduma a mabalin a maawatan a ti panagayuno ket kasla ad-adda a dadagsen ngem maysa a bendision? (kitaen iti Isaias 58:3–5). Kasano a balbaliwan dagiti pannursuro ti Apo iti daytoy a kapitulo dayta a pannakaawat kenka?

• Ania ti mabalin a kaipapananna ti “pangketta kadagiti galut ti kinadangkes” ken “pangwarwar kadagiti patapat ti sangol”? (Isaias 58:6). Kasano a makabendision ti panagayuno kadagiti dadduma? (kitaen iti bersikulo 7).

• Kasano a nangisangbay ti panagayuno kenka kadagiti bendision a nailadawan iti Isaias 58:8–12?

Iti mensahena a “Is Not This the Fast That I Have Chosen?” (Liahona, Mayo 2015, 22–25), imbinglay ni Presidente Henry B. Eyring ti sumagmamano a pagarigan ti no kasano a nabendisionan dagiti tao babaen ti panagayuno ken dagiti daton iti panagayuno. Kasano a nasaksiamon dagiti isu met la a bendision iti biagmo?

Kitaen met iti “Bless Our Fast, We Pray,” Hymns, no. 138; Topics and Questions, “Fasting and Fast Offerings,” Gospel Library.

Ti kadi aldaw ti Sabbath ti “ragsak” para kenka? Bayat ti panagadalmo iti Isaias 58:13–14, ibilangmo no kasano a makasarakka iti ad-adu pay a ragsak iti aldaw ti Apo. Kas pagarigan, ania ti mabalin a kaipapanan ti panagtallikud “manipud iti panangaramid iti ragsakmo iti nasantuan nga aldaw[na]”? Ania ti nagdumaan ti “[panagragsak] iti Apo” ken “aramiden dagiti daldalanmo met laeng”?

Kitaen iti Russell M. Nelson, “The Sabbath Is a Delight,” Liahona, Mayo 2015, 129–32.

TiIsaias 58–66 ket aduan iti reperensia iti pangsubbot a mision ni Jesucristo. Sapulem dagitoy bayat ti panagadalmo. Nangnangruna a, kitaen dagiti pangawag ken balikas a naaramat a mangiladawan iti Mangisalakan. Kas pagarigan:

• Ania ti makaawis iti riknam maipapan iti panangiladawan iti “mangibabaet” iti Isaias 59:16–21? Kasano a parmeken ti Mangisalakan dagiti kasasaad kadagiti bersikulo 9–15?

• Idi impakaammo ni Jesucristo kadagiti tao ti Nazaret nga Isu ti Mesias, inadawna manipud iti Isaias 61:1–3 (kitaen iti Lucas 4:16–21; kitaen met iti video a “Jesus Declares He Is the Messiah,” Gospel Library). Kasano a nabendisionannaka ken dagiti dadduma ni Jesucristo kadagiti wagas a nailadawan kadagitoy a bersikulo? Kasano nga intedna kenka ti kinapintas a kasukat dagiti dapu?

  

  3:24

• Ania ti “kinamanagayat ti Apo” a mabalinmo a “dakamaten”? (kitaen iti Isaias 63:7–9).

• Ania dagiti dadduma pay a reperensia iti Mangisalakan a masarakam iti Isaias 58–66?

Kitaen met iti Mosiah 3:7; Doktrina ken Katulagan 133:46–53.

Isaias 60 ken62 isaritada ti maipapan iti lawag ken sipnget, mata ken panagkita a mangisuro maipapan iti no kasano a mangbendisionto ti ebanghelio ni Jesucristo iti lubong kadagiti maudi nga aldaw. Sapulem dagitoy a konsepto nangnangruna iti Isaias 60:1–5, 19–20; 62:1–2. Bayat ti panangbasam kadagitoy a kapitulo, utobem no kasano nga um-ummongen ti Dios dagiti annakna nga iruar iti kasipngetan nga agturong iti lawag. Ania ti akemmo iti daytoy nga aramid?

Kitaen met iti 1 Nephi 22:3–12; 3 Nephi 18:24; Doktrina ken Katulagan 14:9; Bonnie H. Cordon, “That They May See,” Liahona, Mayo 2020, 78–80.

Nagsao ni Isaias maipapan iti maysa nga aldaw no “dagiti riribuk iti napalabas malipatandanton” (Isaias 65:16). Idinto nga addaan daytoy a padto iti sumagmamano a pannakaipatungpal, iti kangrunaan a kaipapanan, dumtengto pay laeng dayta nga aldaw—no agsublinto ni Jesucristo. Inladawan ni Isaias daytoy a masakbayan nga aldaw iti Isaias 64:1–5; 65:17–25; 66. Kitaen no kasano ti kasansan nga inusarna dagiti balikas a kas “agrag-o” ken “agragragsak.” Utobem no apay a ti panagsubli ti Mangisalakan agbalinto nga aldaw a panagrag-o para kenka? Ania ti maaramidmo tapno maisaganam ti yaayna?

Kitaen met iti pagannurotan ti Pammati 1:10; Russell M. Nelson, “The Future of the Church: Preparing the World for the Savior’s Second Coming,” Ensign, Abr. 2020, 13–17.

• Nalabit ti kasayaatan a wagas a panangparegta kadagiti annakmo nga agayuno—no nakasaganadan—ket ti panangtulong kadakuada a makaawat kadagiti panggep ti Apo para iti daytoy a linteg. Ibilang ti aggigiddan a panangbasa iti Isaias 58:6–11 tapno mangsapul kadagiti sungbat kadagitoy a saludsod: Apay nga agayunotayo? Kasano nga agayunotayo? Mabalinmo pay a sukisoken iti “Agayuno, Panagayuno” iti Pangiwanwan iti Nasantuan a Kasuratan.

• No naaddaanka iti napnuan kaipapanan a padas iti panagayuno, ibinglaymo kadagiti annakmo. Mabalinmo pay a damagen kadakuada no kasano nga ilawlawagda iti maysa a gayyem no apay nga inted kadatayo ti Apo daytoy a linteg.

• Kalpasan ti panangbasa iti Isaias 58:13–14, mabalinmo nga itudo dagiti aldaw ti lawas iti kalendario ken awisem dagiti annakmo a mangibaga kadagiti aldaw kenka. No madanonda ti Sabbath, idawatmo kadakuada a mangawag iti dayta nga aldaw iti “ragsak.” Ibagam kadakuada no apay a rag-o ti Sabbath kenka.

• Ibinglayyo iti tunggal maysa dagiti wagas a mabalinyo nga “agrag-okayto iti Apo” iti Sabbath. Nalabit mabalin nga idrowing dagiti annakmo dagiti kapanunotanda ket ipan dagitoy iti “kahon dagiti pagragsakan iti Sabbath.” Kalpasanna, no kasapulanda dagiti kapanunotan maipapan kadagiti banag nga aramidenda iti Sabbath, mabalinda ti mangala iti maysa a kapanunotan manipud iti kahon.

• Mabalinmo nga awisen dagiti annakmo nga agkidem bayat ti panangbasam iti Isaias 60:1–3. Idawatmo kadakuada nga agmulagat no mangngeganda ti balikas a “silaw” ken agkidemda manen no mangngeganda ti balikas a “kasipngetan.” Ilawlawag a maipada ni Jesucristo ken ti ebangheliona iti maysa a silaw a mangtulong kadatayo a mangkita iti dalan nga agsubli iti Nailangitan nga Ama.

• Iladawan tiIsaias 65:17–25 no anianto ti langa ti daga inton umay manen ti Mangisalakan. Bayat ti panangbasam kadagitoy a bersikulo a kaduam dagiti annakmo, tulongam ida a mangsapul no kasano a naiduma ti biag iti “baro a daga” nga inladawan ni Isaias. Apay nga agbalinto daytoy a maysa a panawen ti “ragsak ken rag-o iti agnanayon”? (bersikulo 18).

• Mabalinyo pay ti aggigiddan a mangkansion iti kanta maipapan iti Maikadua a Yaay, kas iti “When the Savior Comes Again” (Gospel Library). Ibinglayyo iti tunggal maysa no ania ti paspasungadenyo maipapan iti panagsubli ti Mangisalakan. Ania ti maaramidtayo tapno makapagsagana para iti dayta nga aldaw?