Amos; Abdias; Jonas

Sa Amos 3:3–6, si propeta Amos mihatag og mga ehemplo sa mga panapos nga atong makuha gikan sa mga timailhan nga atong madungog o makita: kon ang usa ka leon mongulob, kini tingali nakadakop og tukbonon; kon ang usa ka langgam nalit-ag, tingali dihay paon didto. Sa mga bersikulo 7–8, si Amos migamit niini nga pangatarongan ngadto sa mga propeta. Unsa nga mga panapos ang atong makuha kon ang usa ka propeta managna? Unsa pa ang inyong makat-onan mahitungod sa mga propeta gikan sa Amos 7:10–15?

Unsa ang gipadayag sa Ginoo nganha kaninyo pinaagi sa Iyang mga propeta?

Miingon si Elder Soares nga ang “pagkaadunay mga propeta usa ka timaan sa gugma sa Dios” (Ang mga Propeta Namulong pinaagi sa Gahom sa Espiritu Santo,” Liahona, Mayo 2018, 99). Hunahunaa kon unsaon ninyo sa pagkompleto kini nga kapahayag: “Ako nahibalo nga ang Dios nahigugma kanako, tungod kay Siya nagpadala og mga propeta kinsa …” Aniay pipila ka kasulatan nga makatabang: Deuteronomio 18:18; Ezequiel 3:16–17; Mga Taga–Efeso 4:11–14; 1 Nephi 22:2; Doktrina ug mga Pakigsaad 21:4–6; 84:36–38; 107:91–92.

Unsa ang inyong isulti ngadto sa usa ka tawo kinsa nagtuo nga ang mga propeta wala kinahanglana karon?

Tan-awa usab sa Topics and Questions [Mga Hilisgotan ug mga Pangutana], “Prophets [Mga Propeta]” Gospel Library.

Sumala sa Amos 4:6–13, unsa ang gilauman sa Ginoo nga mahitabo human ang mga Israelita nakasinati og mga pagsulay? (tan-awa usab sa Helaman 12:3). Samtang ang inyong pagsulay dili pinadala sa Dios, giunsa niini paghatag kaninyo og mga oportunidad sa pagduol ngadto Kaniya?

Samtang inyong basahon ang Amos 5:4, 14–15, pamalandonga kon unsa ka maloloy-on ang Ginoo nganha kaninyo. Sa unsang paagi nga ang pagpangita Kaniya nagdala kaninyo og kinabuhi?

Samtang kamo nagbasa sa Amos 8:11–12, paghunahuna mahitungod kon ngano ang kagutom usa ka maayong pagtandi sa pagpuyo nga walay pulong sa Dios. (tan-awa usab sa Juan 6:26–35; 2 Nephi 9:50–51; 32:3; Enos 1:4–8). Unsaon ninyo pagkahibalo nga kamo gutom sa espirituhanon nga paagi?

Kini nga mga bersikulo mahimo usab nga magamit ngadto sa Dakong Apostasiya (tan-awa sa Topics and Questions [Mga Hilisgotan ug mga Pangutana], “Apostasy [Apostasiya],” Gospel Library). Giunsa nianang espirituhanong “kagutom” pag-apekto sa mga anak sa Dios? Sa unsa nga paagi nga ang Pagpahiuli mitagbaw sa inyong espirituhanong kagutom?

Tan-awa usab sa “The Great Apostasy” (bidyo), Gospel Library.

16:36

Nagpasabot ngadto sa Abdias 1:21, gipasabot ni Presidente Gordon B. Hinckley nga kita mahimong mga manluluwas diha sa Bungtod sa Zion kon atong madawat ang mga ordinansa alang sa patay diha sa templo (tan-awa sa “Panapos nga mga Pakigpulong,” Liahona, Nob. 2004, 105). Sa unsang paagi nga ang pagbuhat niana nga buluhaton sama—bisan sa usa ka gamay lamang nga paagi—ngadto sa unsay nabuhat sa Manluluwas alang kanato? Sa unsang paagi ang pagbuhat niini nga buluhaton mitabang kaninyo sa pagbati nga mas naduol ngadto sa Manluluwas?

Tan-awa usab sa “Kanindot sa Templo Mo Ginoo,” Mga Himno, nu. 180.

Ang Ninive kanhi kaaway sa Israel nga nailhan tungod sa kapintas ug kabangis niini. Ngadto ni Jonas, kini ingon og dili tinud-anay nga sila andam sa paghinulsol. Kini tingali makapaikag sa pagtandi sa kinaiya ni Jonas (tan-awa sa Jonas 1; 3–4) ngadto sa mga pagbati ni Alma ug sa anak nga mga lalaki ni Mosiah (tan-awa sa Mosiah 28:1–5; Alma 17:23–25). Unsa ang inyong nakat-onan gikan sa Jonas 3 nga nagdasig kaninyo sa pagpakigbahin sa ebanghelyo bisan niadtong mga tawo kinsa ingon og dili andam sa pag-usab?

Samtang kamo magbasa sa Jonas, pangita og mga ehemplo sa kaluoy sa Ginoo. Ngano sa inyong paminaw si Jonas “nahiubos” ug “nasuko uyamot” (Jonas 4:1) sa dihang ang Ginoo milugway og kaluoy ngadto sa mga tawo sa Ninive? Unsay inyong gibati nga gitinguha sa Ginoo nga itudlo kaniya diha sa kapitulo 4? Pamalandonga kon giunsa ninyo pagsinati ang Iyang kaluoy diha sa inyong kinabuhi. Unsa ang inyong nakat-onan gikan ni Jonas nga makatabang kaninyo nga mahimong mas maluloy-on?

• Sa pagtabang sa inyong mga bata sa pagsabot sa Amos 3:7, kamo makahagawhaw og usa ka yanong mensahe ngadto sa usa kanila ug makahangyo kanila sa pagpakigbahin sa mensahe ngadto sa ubang mga bata. Sa unsang paagi nga ang mensahero niini nga kalihokan sama sa usa ka propeta? Ngano nga ang Ginoo naghatag kanato og mga propeta?

• Sa pagkat-on pa og dugang mahitungod kon unsa ang buhaton sa mga propeta, kamo ug ang inyong mga bata makarebyo og bag-o nga mga mensahe gikan sa karon nga Presidente sa Simbahan. Mahimong manganta usab kamo og dungan sa usa ka awit mahitungod sa mga propeta, sama sa “Sunda ang Propeta” (Songbook sa mga Bata, 58–59). Pakigbahin sa usag usa kon nganong kamo magpili sa pagsunod sa propeta sa Dios.

• Dapita ang inyong mga bata sa pagpakaaron ingnon samtang kamo nagbasa sa Amos 8:11–12. Sama sa unsa ang bation kon kamo gigutom alang sa pulong sa Dios? Tingali ang inyong mga bata makahimo sa pagpakaaron-ingnon nga nagkaon samtang kamo makigbahin sa usag usa sa pipila sa inyong kinaham nga mga kasulatan.

• Makagamit kamo sa Giya ngadto sa mga Kasulatan, “Apostasiya” (Gospel Library), o “Human sa Bag-ong Tugon” (sa Mga Istorya sa Bag-ong Tugon, 167–70) sa pagtabang sa inyong mga bata sa pagsabot sa “kagutom” nga midangat gikan sa Dakong Apostasiya ug giunsa pagtapos niini uban sa Pagpahiuli. Pakigbahin sa usag usa og mga rason nga ikaw mapasalamaton nga gipahiuli sa Ginoo ang Iyang ebanghelyo sa atong panahon.

  

  2:52

• Sa pagtabang sa inyong mga bata sa pagkat-on sa istorya ni Jonas, kamo makarebyo sa “Jonas ang Propeta” diha sa Mga Istorya sa Daang Tugon; tan-awa usab ang pahina sa kalihokan niini nga semana). Mahimo dayon kang mangutana:

  • Unsay nahitabo sa dihang wala mosunod si Jonas sa Ginoo? (tan-awa sa Jonas 1:4–17).

  • Unsay gibuhat ni Jonas sa paghinulsol? (tan-awa sa Jonas 1:10–12; 2:1–4, 9; 3:1–4).

  • Unsay nahitabo sa dihang misunod si Jonas? (tan-awa sa Jonas 3:5).

  

  2:30

• Ang inyong mga bata tingali malingaw sa pag-istorya og balik sa istorya ni Jonas og sa pag-akting niini. Pakigbahin sa usag usa og pipila ka kasinatian sa dihang ang Ginoo gusto kanimo nga mobuhat og usa ka butang nga malisod alang kanimo. Giunsa Niya pagtabang kaninyo nga mosunod Kaniya?

• Tingali ang inyong mga bata magpakaaron-ingnon nga sila nag-interbiyo ni Jonas mahitungod sa iyang kasinatian. Unsa nga mga pangutana ang ilang ipangutana kaniya? Awhaga sila sa pagpangutana aron mahibaloan kon unsay nakat-onan ni Jonah mahitungod sa Ginoo. Unsa kaha ang isulti ni Jonas, sama pananglit, mahitungod sa kaluoy sa Ginoo? (tan-awa, sama pananglit sa, Jonas 2:7–10; 3:10; 4:2).

• Tabangi ang inyong mga bata nga maghunahuna og mga ehemplo sa dihang ang Manluluwas mipakita og kaluoy ngadto sa uban, sama sa Marcos 2:3–12; Lucas 23:33–34; ug Juan 8:1–11. Kamo ug ang inyong mga bata makasiksik alang sa mga hulagway niini nga mga ehemplo. Unsa nga mga oportunidad kita aduna nga mahimong maluloy-on ngadto sa uban?