Daniel 1–7

Kon hunahunaon, tanan kita nagpuyo sa Babelonia. Kasagaran kita nag-atubang og mga tentasyon sa pag-uyon-uyon sa atong mga sumbanan ug mosalikway gikan sa pagtuo diha ni Kristo. Samtang kamo magbasa sa Daniel 1, 3, ug 6, timan-i ang mga paagi nga si Daniel, Sadrach, Mesach, ug Abed-nego gipugos sa pagbuhat og mga butang nga sila nahibalo nga sayop. Giunsa nila pag-atubang ngadto niini nga mga sitwasyon? (tan-awa sa Daniel 1:10–13; 3:15–18; 6:10). Unsa ang mga resulta sa ilang hugot nga pagtuo? Unsa ang inyong nakat-onan gikan niini nga mga kasinatian nga makatabang kaninyo sa pagsalig diha sa Ginoo kon kamo mag-atubang og oposisyon? Hunahunaa usab ang mosunod nga mga pangutana:

• Kanus-a kamo mibati nga napugos sa pagbuhat og usa ka butang nga inyong nahibaloan nga sayop? Sa unsa nga paagi kamo napanalanginan sa Ginoo tungod sa pagsunod sa Iyang mga sugo?

• Unsa kaha kon ang inyong hugot nga pagtuo dili mogiya ngadto sa mga milagro nga inyong gitinguha? (tan-awa, sama pananglit, sa Alma 14:8–13). Pinasikad sa unsay inyong nabasa sa Daniel 3:13–18, unsaon kaha unta ni Sadrach, Mesach, ug Abed-nego pagtubag kini nga pangutana? Sa unsang paagi nga ang ilang ehemplo nag-apekto sa paagi sa inyong pag-atubang sa inyong mga pagsulay?

• Unsaon sa inyong matarong nga mga pagpili paggiya sa uban ngadto sa mas dakong hugot nga pagtuo diha sa Ginoo? (tan-awa sa Daniel 2:47; 3:28–29). Palandonga ang mga epekto nga ang inyong mga pagpili aduna diha sa uban.

Tan-awa usab ang Dieter F. Uchtdorf, “Ayaw Kahadlok, Sumalig Ka Lamang,” Liahona, Nob. 2015, 76–79.

Pinaagi sa pagpadayag, nakita ni Daniel nga ang damgo ni Nabucodonosor nagtagna sa umaabot nga kalibotanong mga gingharian, ingon man sa umaabot nga gingharian sa Dios, nga “dili gayod malumpag” (Daniel 2:44). “Ang Simbahan mao ang gipanagna nga gingharian sa ulahing mga adlaw,” mitudlo si Elder D.Todd Christofferson, “wala gilalang og tawo apan gitukod sa Dios sa langit ug mikaylap sama sa bato nga ‘gisapsap nga walay kamot gikan sa bukid’ nga mopuno sa yuta” (“Nganong Anaa ang Simbahan,” Liahona, Nob. 2015, 111). Paghunahuna mahitungod sa gingharian sa Dios sa ulahing mga adlaw samtang kamo nagbasa sa mga paghulagway sa bato diha sa Daniel 2:34–35, 44–45. Unsa ang inyong tahas sa pagtabang niini nga panagna nga mahinabo?

Tan-awa usab sa “Paminaw, Tanang Kanasuran!,” Mga Himno, nu.164; “God Gave Them Knowledge” (video), ChurchofJesusChrist.org.

13:49

Samtang kamo magrebyo sa Daniel 2:1–15, hunahunaa kon unsay inyong bation kon makaplagan ninyo ang inyong kaugalingon sa lugar ni Daniel. Unsay gibuhat ni Daniel? (tan-awa sa Daniel 2:16–18). Unsa ang atong makat-onan gikan sa Daniel 1:17 mahitungod kon giunsa sa Dios sa pag-andam si Daniel? Unsa ang inyong makat-onan gikan sa mga pulong ug mga lihok ni Daniel human niya nadawat ang tabang sa Ginoo? (tan-awa sa Daniel 2:19–30).

Atol sa yutan-ong pangalagad sa Manluluwas, daghang mga Judeo naghunahuna sa titulo nga “Anak sa tawo” gikan sa Daniel 7:13 sa pagpasabot ngadto sa pag-anhi sa Mesiyas. Unsay inyong nakat-onan mahitungod sa Mesiyas gikan sa Daniel 7:13–14? (tan-awa usab Moises 6:57).

Ang Manunubos kasagaran nagpasabot sa iyang kaugalingon isip “ang Anak sa tawo.” Hunahunaa ang pagrebyo sa pipila ka mga ehemplo: Mateo 25:31; Marcos 9:31; 10:45. Unsa ang gitudlo Niya mahitungod sa Iyang Kaugalingon niini nga mga bersikulo? Sa Marcos 14:61–64, gigamit ni Jesus kini nga titulo diha sa kataposang adlaw sa Iyang mortal nga kinabuhi. Timan-i ang reaksyon gikan sa mga tawo kinsa nakadungog sa Iyang pahayag. Giunsa sa panagna ni Daniel mahitungod sa Anak sa Tawo pag-apekto sa inyong mga pagbati mahitungod sa unsay nahitabo Kaniya sa Marcos 15?

Ingon nga si Jesus gikasilagan tungod sa pagpahayag nga Siya mao “ang Anak sa tawo,” kamo mahimong moatubang usab og pagpanggukod tungod sa pagpahayag sa kamatuoran. Itandi ang panagna sa Daniel 7:13–14 ngadto sa mga saad diha sa Doktrina ug mga Pakigsaad 121:29, 46.

Tan-awa usab sa Doktrina ug mga Pakigsaad 49:6; Giya ngadto sa mga Kasulatan, “Anak sa Tawo,” Librarya sa Ebanghelyo.

• Sa pagtabang sa inyong mga bata sa pagkat-on gikan sa makadasig nga mga istorya diha sa basahon ni Daniel, kamo makakaplag og mga hulagway sa mga panghitabo diha sa Daniel 1, 3, ug 6 (tan-awa ang pahina sa kalihokan niini nga semana o ang Libro sa mga Hulagway sa Ebanghelyo, nus. 23, 25, 26). Dayon kamo makabutang sa mga hulagway nga ikulob ug makadapit og usa ka bata sa pagbali og usa ug sa paghisgot mahitungod sa istorya nga kini nagrepresentar. (Alang sa tabang, tan-awa ang “Daniel ug Iyang mga Higala,” “Sadrach, Mesach, ug Abed-nego,” ug “Daniel ug ang Dugmonan sa mga Leon” sa Mga Istorya sa Daang Tugon, 154–56, 160–62, 163–65.)

  

  1:39

  

  1:39

  

  1:45

• Tabangi ang inyong mga bata sa paghunahuna og mga sitwasyon sa dihang sila nahimong napugos sa paghimo og sayop nga pagpili, sama ni Daniel ug sa iyang mga higala diha sa Daniel 1, 3, ug 6. Pakigbahin sa usag usa kon giunsa kamo sa pagpanalangin tungod sa paghimo og matarong nga pagpili bisan kon kini malisod. Makahimo usab kamo sa pagkanta og dungan sa usa ka awit nga may kalabotan niini nga hilisgotan, sama sa “Pilia ang Matarong” (Mga Himno, nu. 146).

• Ang pagbasa sa istorya mahitungod ni Daniel ug sa iyang mga higala nga midumili sa karne ug bino sa hari mahimong modasig og usa ka panagsultihanay mahitungod sa balaod sa panglawas nga gihatag sa Langitnong Amahan kanato karon (tan-awa sa Doktrina ug mga Pakigsaad 89). Tingali kamo makapangita alang sa mga panalangin nga nadawat ni Daniel ug sa iyang mga higala ug sa pagtandi niini ngadto sa mga panalangin nga gisaad diha sa Pulong sa Kaalam (tan-awa sa Daniel 1:15–17 ug Doktrina ug mga Pakigsaad 89:18–21).

• Samtang inyong basahon ang Daniel 2:31–35, 44–45 uban sa inyong mga bata, makadapit kamo kanila sa pagdrowing og usa ka hulagway sa damgo ni Nabucodonosor. Tabangi sila sa pagsabot nga ang bato diha sa damgo nagrepresentar sa Ang Simbahan ni Jesukristo sa mga Santos sa Ulahing mga Adlaw. Unsay atong nakat-onan mahitungod sa Simbahan gikan niini nga damgo? Ang inyong mga bata makahingalan og pipila ka butang nga gibuhat sa Langitnong Amahan sa pagtukod sa Iyang Simbahan sa ulahing mga adlaw. Kon sila nagkinahanglan og tabang, kamo makapakita og mga hulagway sa mga panghitabo gikan sa Pagpahiuli sa Simbahan (tan-awa sa Libro sa mga Hulagway sa Ebanghelyo, nus. 90–95).

• Ngano nga ang pag-ampo ngadto sa Langitnong Amahan importante kaayo ngadto ni Daniel? Tingali kamo ug ang inyong mga bata makahisgot mahitungod sa pangutana samtang kamo nagbasa sa Daniel 6 og dungan. Dayon kamo makasulti sa usag usa kon nganong ang pag-ampo importante nganha kanimo. Ang inyong mga bata mahimong malingaw sa pagdrowing og mga hulagway sa ilang mga kaugalingon nga nag-ampo sa lainlaing mga sitwasyon. Makagamit sila sa ilang mga drowing sa pagtudlo sa usag usa nga kita makaampo ngadto sa Langitnong Amahan sa walay pagsapayan hain kita o unsay atong gikinahanglan.