Oseas 1–6; 10–14; Joel

Ang asawa ni Oseas, si Gomer, nagluib kaniya, ug ang Dios mitudlo ngadto niining subo nga hitabo sa pagtudlo sa mga Israelita kon unsa ang Iyang gibati mahitungod kanila ug sa ilang mga pakigsaad uban Kaniya. Samtang ikaw magbasa sa Oseas 1–3, palandonga kon giunsa sa Ginoo pagtan-aw ang Iyang relasyon ngadto sa Iyang mga katawhan sa pakigsaad. Sa unsang paagi ang paghimo og usa ka pakigsaad uban sa Ginoo sama sa pagsulod ngadto sa kaminyoon? Sa unsang paagi nga ang pagkapakyas sa pagsunod niana nga pakigsaad sama sa pagluib ngadto sa kapikas? (tan-awa sa Oseas 2:5–7, 13). Unsa ang gitudlo sa Oseas 2:14–23 kaninyo mahitungod sa gugma ug kaluoy sa Ginoo? Giunsa nimo pagpakita Kaniya ang imong gugma ug pagkamaunongon?

Sa Oseas 14, pangita alang sa daghang nindot nga mga saad nga gihimo sa Ginoo ngadto niadtong kinsa mibalik Kaniya. Unsa ang gipasabot sa hugpong sa mga pulong nga “higugmaon ko sila sa walay bayad” nganha kanimo? (bersikulo 4). Unsa ang gitudlo ngari kanato sa sambingay nga tanom diha sa mga bersikulo 5–8 mahitungod sa mga panalangin sa Ginoo, lakip ang mga panalangin sa paghinulsol? Isip kabahin sa inyong pagtuon, hunahunaa ang pagkanta o pagpaminaw sa usa ka himno mahitungod sa kaluoy sa Manluluwas, sama sa “Duol Kang Jesus” (Mga Himno, nu 66).

Ang katawhan sa panahon ni Oseas naghalad og mga sakripisyo nga hayop, apan sila naglapas og mas importante nga mga sugo. Unsa kaha sa inyong hunahuna ang gipasabot nga ang Ginoo “kalolot maoy gikinahanglan, ug dili ang halad; ug ang kahibalo kabahin sa Dios labaw kaysa sinunog nga mga halad”? (Oseas 6:6). Unsa kaha sa inyong hunahuna ang gipasabot sa pagkamatarong nga mahimong sama sa panganod o sama sa yamog? (tan-awa sa Oseas 6:4). Kinahanglan sama sa unsa ang atong pagkamatarong? (tan-awa sa Isaias 48:18; 1 Nephi 2:9–10).

Makabasa usab kamo sa Mateo 9:10–13; 12:1–8 aron sa pagtan-aw kon giunsa sa Manluluwas paggamit ang Oseas 6:6 sa panahon sa Iyang pagpangalagad. Giunsa niini nga mga tudling pagtabang kaninyo sa pagsabot sa mga pulong ni Oseas?

Kon magbasa sa Joel 2:12–13, kini tingali magtabang kaninyo nga mahibalo nga ang pagwatas-watas o paggisi-gisi sa sapot usa ka gawas nga timaan sa pagbangutan o pagmahay. Sa unsang paagi nga ang pagwatas-watas sa atong mga kasingkasing lahi gikan sa pagwatas-watas sa atong mga sapot?

Unsa nga mga pagkasusama ang inyong makita tali sa atong panahon ug sa panahon nga nakita nang daan ni Joel? (tan-awa ilabi na sa Joel 2:1–2, 11, 18–32). Unsa ang nakapadani kaninyo mahitungod sa mga panalangin nga gisaad sa Ginoo diha sa mga bersikulo 18–32? Nganong kini nga mga panalangin mahimong hilabihan ka bililhon karon?

Kini tingali makapaikag nga basahon kon unsay gisulti ni Moroni mahitungod sa Joel 2 sa dihang iyang gibisitahan si Joseph Smith sa 1823 (tan-awa sa Joseph Smith—Kasaysayan 1:41). Sa unsang paagi sa imong hunahuna ang mga panagna sa Joel 2:28–32 mangatuman sa atong panahon? (tan-awa usab sa Mga Buhat 2:1–21). Unsa kaha ang ipasabot nga ang Ginoo “igabu-bo ang [Iyang] Espiritu ibabaw sa tanang unod”? (Joel 2:28).

Mahimo kang mamalandong niining mga pulong gikan ni Presidente Russell M. Nelson “Sa umaabot nga mga adlaw, dili na posible ang espirituhanong pagsugakod kon wala ang giya, direksiyon, makahupay, ug makanunayon nga impluwensiya sa Espiritu Santo” (“Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 96). Ngano nga ang pagpadayag mahinungdanon sa inyong espirituhanong pagsugakod?

Unsa ang inyong mahimo kon inyong bation nga kamo wala magdawat niana nga pagbu-bo? Ania ang pipila ka ehemplo nga tingali makatabang. Unsa ang gibuhat sa mga tawo dinhi niini nga mga kasulatan aron makadawat og pagbu-bo sa Espiritu sa Ginoo?

• Mosiah 4:1–3, 19–20; 18:7–11

• Helaman 6:34–36

• Doktrina ug mga Pakigsaad 19:37–41

Samtang kamo magbasa niini nga mga pulong gikan ni Elder David A. Bednar, palandonga kon unsa ang gipasabot nganha kaninyo ang pagbati og pagbu-bo sa Espiritu Santo diha sa inyong inadlaw nga kinabuhi:

“Kasagaran gihimo natong malisod diha sa atong mga kaugalingon ang pagdawat og personal nga pagpadayag. Akong gipasabot niana mao ang saad sa pakigsaad mao nga kon kita motuman sa atong mga pakigsaad, kita mahimong kanunay nga makabaton sa Espiritu Santo nga mahimo natong kanunay nga kauban. Apan naghisgot kita mahitungod niini ug kita nagtagad niini ingon og nakadungog sa tingog sa Ginoo pinaagi sa Iyang Espiritu mao ang talagsaong hitabo. … [Ang Espiritu] kinahanglang nag-uban kanato sa tanang panahon. Dili sa tanang mubo kaayong panahon, apan kon ang usa ka tawo naghimo sa iyang labing maayo—dili kamo kinahanglan nga perpekto—apan kon kamo ug ako naghimo sa atong labing maayo, ug wala kita makahimo og seryoso nga kalapasan, niana kita makalaom sa Espiritu Santo nga maggiya kanato. …

“… Kita ingon og nagtuo nga ang Espiritu Santo maukyabon ug dako ug kalit, apan kini hinay ug hagawhaw ug magkakusog sa ngadto-ngadto” (“Elder David A. Bednar Discussion” (evening with a General Authority, [gabii uban sa usa ka General Authority, Feb. 7, 2020], broadcasts.ChurchofJesusChrist.org).

Tan-awa usab sa Gary E. Stevenson, “Mga Pag-aghat sa Espiritu,” Liahona, Nob. 2023, 42–45; “Enemy Territory” (bidyo), Gospel Library.

3:38

• Sa basahon sa Oseas, gitandi sa Ginoo ang Iyang mga pakigsaad ngadto sa Iyang katawhan sa usa ka kaminyoon. Sa pagkat-on gikan niini nga pagtandi, kamo ug ang inyong mga bata makatan-aw og usa ka hulagway sa usa ka pangasaw-on ug pamanhonon ug maghisgot mahitungod ko unsay gusto sa Langitnong Amahan sa bana ug asawa nga tagdon ang usag usa. Tabangi ang inyong mga bata sa pagpangita og mga pulong diha sa Oseas 2:19–20 nga naghulagway kon unsa ang pagbati sa Ginoo mahitungod kanato. Sa unsang paagi kita makapakita sa Ginoo nga kita nahigugma Kaniya ug magmatinud-anon ngadto Kaniya?

• Oseas 10:12 nagpasabot sa pagpugas, pag-ani, panahon, ug ulan aron sa pagdapit kanato sa pagpangita sa Ginoo. Samtang inyong basahon kini nga bersikulo, unsa nga mamugnaong mga ideya ang moabot sa hunahuna nga makadasig sa mga bata sa pagpangita Kaniya? Sama pananglit, ang inyong mga bata tingali makadrowing og usa ka orasan ug makasulat og mga paagi nga sila makapangita sa Ginoo sa lain-laing mga takna sa tibuok adlaw. Ang usa ka awit sama sa “Anytime, Anywhere” [Bisan Kanus-a, Bisan Asa] (Gospel Library) makatabang kaninyo sa pagtudlo nga kini kanunay usa ka maayong panahon sa pagpangita sa Ginoo.

• O ang inyong mga bata makahimo og yanong mga aksiyon nga mobagay sa bersikulo, sama sa magpakaaron-ingnon nga nagtanom og liso, mamu-po og mga utanon, o magtindog diha sa ulan. Tabangi ang inyong mga bata sa pagtandi sa pagtanom og liso ug sa pag-ani og maayo nga pagkaon ngadto sa matarong nga pagpuyo ug sa pagdawat sa mga panalangin sa Ginoo. Dayon kamo makasulti sa usag usa mahitungod sa mga panalangin nga gipaulan sa Ginoo diha kaninyo samtang kamo naningkamot sa pagpangita Kaniya.

• Sa paghatag og importansya sa kamatuoran sa Oseas 13:4 nga walay Manluluwas gawas ni Jesukristo, makapakita kamo sa inyong mga bata og mga hulagway sa daghang tawo, lakip ni Jesus. Ang inyong mga bata makapuli-puli og tudlo ngadto sa tawo kinsa adunay gahom sa pagluwas kanato gikan sa sala ug kamatayon. Pakigbahin sa imong pagpamatuod kang Jesukristo ug sa Iyang Pag-ula.

• Ang inyong mga bata makapangita alang sa mga pulong diha sa Oseas 13:4, 14 nga naghulagway ni Jesukristo. Unsa ang gitudlo niini nga mga pulong kanato mahitungod Kaniya? Hunahunaa ang pagtabang sa inyong mga bata sa paggamit sa Giya ngadto sa mga Kasulatan sa pagpangita og ubang mga kasulatan nga nagtudlo nga si Jesus mao ang atong Manluluwas ug Manunubos. Pakigbahin sa usag usa kon unsa ang inyong gibati mahitungod ni Jesukristo.

• Tingali kamo makatabang sa inyong mga bata sa pagsabot sa Joel 2:28–29 pinaagi sa pagpabu-bo kanila og likido ug dayon sa pag-indig niini sa usa ka tulo o dagayday. Unsa ang ipasabot nga ang Espiritu “igabu-bo” diha kanato?

• Samtang kamo magbasa sa Joel 2:28–29 og dungan, mahimong inyong dapiton ang inyong mga bata sa pagsal-ot sa usag usa nga mga ngalan ilis sa hugpong sa mga pulong “inyong anak nga mga lalaki” ug “inyong anak nga mga babaye.” Dayon tabangi sila sa pagsiksik sa mga kasulatan sama sa Juan 14:16; Moroni 10:5; Doktrina ug mga Pakigsaad 42:17 aron mahibaloan kon sa unsa nga paagi ang Espiritu makatabang kanila.