Jeremias 31–33; 36–39; Lamentations 1; 3

Sa Jeremias 31; 33 giila sa Ginoo ang “pagminatay, ug ang mapait nga paghilak” (Jeremias 31:15) nga sination sa mga Israelita diha sa pagkabihag. Bisan pa niana, mitanyag Siya og mga pulong sa paghupay ug paglaom. Pangita niini samtang inyong basahon kini nga mga kapitulo. Unsa nga mga saad ang inyong nakit-an nga magamit diha kaninyo?

Bisan og ang mga Israelita wala motuman sa ilang mga pakigsaad, gipanagna ni Jeremias nga ang Ginoo magbuhat pag-usab og usa ka “bag-o ug walay kataposan nga pakigsaad” uban kanila (Jeremias 31:31; 32:40). Unsa kana nga pakigsaad? Hunahunaa ang pagpangita og mga panabot diha sa Ang Giya ngadto sa mga Kasulatan, “Bag-o ug Walay Kataposan nga Pakigsaad,” Librarya sa Ebanghelyo.

Samtang kamo magbasa sa Jeremias 31:31–34; 32:37–42, palandonga:

• Unsay kahulogan niini diha kaninyo nga mahimong kabahin sa mga tawo sa pakigsaad sa Dios.

• Unsay kahulogan sa pagbaton sa Iyang balaod nga nakasulat diha sa inyong kasingkasing.

• Unsay gisaad sa Ginoo kon kamo maghimo og pakigsaad uban Kaniya.

• Giunsa sa inyong pakigsaad nga relasyon ngadto sa Dios pag-usab kaninyo.

Unsa nga mga saad ang inyong nahimo ngadto sa Dios samtang kamo naapil sa sagradong mga ordinansa? Sa unsang paagi Siya nagtuman sa Iyang mga saad nganha kaninyo?

Tan-awa usab sa David A. Bednar, “Magpuyo ngari Kanako, ug Ako nganha Kanimo; Busa, Maglakaw uban Kanako,” Liahona, Mayo 2023, 123–26.

Sumala sa Jeremias 36:2–3, nganong ang Ginoo mimando ni Jeremias sa pagparekord sa iyang mga panagna? Samtang kamo nagbasa sa Jeremias 36, timan-i kon giunsa sa mosunod nga mga tawo pagbati mahitungod niini nga mga panagna:

• Ang Ginoo (tan-awa sa mga bersikulo 1–3, 27–31)

• Jeremias (tan-awa sa mga bersikulo 4–7, 32)

• Baruc (tan-awa sa mga bersikulo 4, 8–10, 14–18)

• Jehudi ug Hari Jehoiakim (tan-awa sa mga bersikulo 20–26)

• Elnathan, Delaias, ug Gemarias (tan-awa sa bersikulo 25)

Pamalandonga kon unsa ang inyong gibati mahitungod sa mga kasulatan. Giunsa niini pagtabang kanimo sa pagpalayo gikan sa daotan?

Sa Jeremias 37:1–3, 15–21; 38:1–6, 14–28, unsa nga ebidensya ang inyong nakita nga si Hari Sedechias mituo ni Jeremias nga mao ang tinuod nga propeta sa Ginoo? Unsa nga ebidensya ang inyong nakita nga si Sedechias wala motuo? Unsay inyong nakat-onan gikan niini nga pagtandi? Samtang kamo nagbasa sa Jeremias 39, pamalandonga ang kalainan nga mahimo unta kon si Sedechias ug ang iyang katawhan misunod pa sa propeta ug mihupot sa mga sugo sa Ginoo. (Itandi kon unsa ang nahitabo ni Sedechias ngadto sa unsay nahitabo sa pamilya ni Lehi sa 1 Nephi 1–2.)

Ang mga opisyales sa hari mibati nga ang mga panagna ni Jeremias mihimo sa ilang mga sundalo nga dili kaayo andam sa pakig-away, busa ilang gibalhog si Jeremias ngadto sa hugaw nga bilanggoan (tan-awa sa Jeremias 38:1–4). Sa Jeremias 38:6–13, unsa ang nagdani kaninyo mahitungod sa tubag ni Ebedmelec nga Etiopianhon? Alinggati usab ang panalangin nga gihatag sa Ginoo ni Ebedmelec sa Jeremias 39:15–18.

Unsaon ninyo sa pagsunod ang ehemplo ni Ebedmelec?

Ang basahon sa Lamentaciones maoy usa ka katigoman sa mga balak nga gisulat human sa pagkalaglag sa Jerusalem ug sa templo niini. Ngano kahang importante nga kini ipatunhay? Hunahunaa unsa ang mga pasumbingay diha sa Lamentaciones 1 ug 3 ang nagtabang kaninyo sa pagsabot mahitungod sa dakong kasubo nga gibati sa Israel. Unsa nga mga mensahe sa paglaom diha ni Kristo ang inyong nakaplagan? (tan-awa ilabi na sa Lamentaciones 3:20–33; tan-awa usab sa Mateo 5:4; Santiago 4:8–10; Alma 36:17–20).

Si Presidente M. Russell Ballard mihisgot og pipila ka sitwasyon nga mahimong maoy hinungdan sa pipila nga mawad-an og paglaom, ug siya mitanyag og tambag mahitungod kon asa makaplagan ang paglaom:

“Ang pipila kanato mahimong makaamgo nga ang atong mga kinabuhi napuno sa kapakyasan, kasagmuyo, ug kaguol. Daghan ang mobati nga walay mahimo sa pag-atubang sa kasamok nga ingon og mopatigbabaw dinhi sa kalibotan. Ang uban naguol sa mga sakop sa pamilya kinsa nadala paubos, sa kusog nga sulog sa nagkaluya nga mga hiyas ug nagkaubos nga mga moral nga sumbanan. … Gani daghan ang mipanunot sa ilang kaugalingon sa pagdawat sa kadaotan ug kabangis sa kalibotan ingon nga wala nay pagkaayo. Sila nawad-an og paglaom. …

“… Pipila kanato mahimong nawad-an sa tanang paglaom tungod sa sala ug kalapasan. Ang usa ka tawo mahimong maunlod pag-ayo diha sa mga paagi sa kalibotan nga siya wala nay paagi sa paggawas ug mawad-an sa tanang paglaom. Akong pangamuyo sa tanan kinsa nahulog ngadto niini nga laang sa kaaway mao ang dili gayod molunga [give up]! Bisan unsa pa ka ingon og desperado ang kahimtang o bisan unsa pa ka desperado ang mahimong mahitabo, palihog tuohi ako, kamo makabaton kanunay og paglaom. Sa kanunay” (“The Joy of Hope Fulfilled,” Ensign, Nob. 1992, 31–32).

Tan-awa usab sa “Duol, Mong Naguol,” Mga Himno, nu. 72.

• Samtang kamo nagbasa sa Jeremias 31:3 uban sa inyong mga bata, sila makatabang kaninyo sa pagpangita og mga butang (o mga hulagway sa mga butang) nga molungtad og dugay nga panahon, sama sa usa ka metal nga sinsilyo, ug pipila nga dili mahimong molungtad, sama sa usa ka buok nga prutas. Kamo mahimong makahisgot mahitungod sa unsay kahulogan sa “walay kataposan” ug makigbahin sa usag usa kon giunsa ninyo pagbati ang “walay kataposang gugma” sa Langitnong Amahan. Mahimo kamong mag-uban sa pagkanta sa usa ka awit sama sa “Gihigugma Ako sa Langitnong Amahan” (Songbook sa mga Bata, 12).

• Ang inyong mga bata tingali malingaw sa pagdrowing og kasingkasing diha sa usa ka papel ug unya pagsulat diha sa kasingkasing og mga butang nga ilang nakat-onan gikan sa Jeremias 31:31–34 mahitungod sa paghimo og mga pakigsaad uban sa Dios. Mahimo ninyong rebyohon ang pakigsaad nga ilang gihimo sa bunyag (tan-awa sa Mosiah 18:10, 13) ug sa paghisgot kon unsa ang kahulogan sa pagbaton niini nga mga saad nga isulat diha sa ilang mga kasingkasing.

• Ang pahina sa kalihokan niini nga semana makatabang sa inyong mga bata sa pagkat-on mahitungod ni Jeremias, Baruc, ug sa hari (tan-awa sa Jeremias 36). Makahimo usab sila og mga aksiyon nga mobagay uban sa mga pulong sa Jeremias 36:4–10, sama sa pagsulat diha sa usa ka basahon (tan-awa sa bersikulo 4) ug sa pagbasa sa mga kasulatan ngadto sa mga tawo (tan-awa sa mga bersikulo 8, 10).

• Kamo ug ang inyong mga bata makatan-aw og usa ka basahon sa mga bata ug kopya sa kasulatan ug maghisgot mahitungod kon sa unsang paagi kini nga mga basahon managlahi. Unsay nakapahimong espesyal sa mga kasulatan? Kini mahimong makadasig ang pagpakigbahin sa usag usa sa pipila ka tudling sa kasulatan nga espesyal nganha kaninyo.

• Kamo makagamit sa mga hulagway diha sa kataposan sa latid sa pagtabang sa mga bata sa paghanduraw sa istorya kabahin ni Ebedmelec sa Jeremias 36:6–13. Tingali kamo makatabang kanila sa pagpangita og usa ka bersikulo diin si Ebedmelec mihimo og usa ka butang nga maisugon sa pagtabang sa propeta sa Ginoo. Unsay atong mabuhat sa pagpakita nga kita nahibalo sa atong propeta karon nga tinawag sa Dios?

• Sa pagpaila sa Lamentaciones, mahimo kamong gusto nga mopasabot ngadto sa inyong mga bata nga tungod kay ang mga Israelita wala maghinulsol, ang Jerusalem ug ang templo gilaglag. Kamo mahimong makigbahin sa usag usa kon sa unsang paagi kaha inyong bation kon kamo nagpuyo didto niana nga panahon (tan-awa sa Lamentaciones 1:1–2, 16). Sa unsang paagi kaha ang mensahe sa Lamentaciones 3:22–26 naghatag kaninyo og paglaom?

• Makasulti usab kamo sa usag usa mahitungod sa mga panahon nga mibati kamo og kaguol mahitungod sa usa ka dili maayo nga pagpili nga inyong nahimo. Unsay atong makaplagan sa Lamentaciones 3:22–26 nga nagtabang kanato sa pagsabot sa kapasayloan nga gitanyag ni Jesukristo?