Ezequiel 1–3; 33–34; 36–37; 47

Sa Ezequiel 3 ug 34, ang Ginoo nagpasabot ngadto sa mga lider sa iyang mga katawhan isip “mga gwardiya ug mga magbalantay sa karnero. Samtang kamo magbasa niini nga mga kapitulo, hunahunaa kon unsa ang gisugyot niini nga mga ulohan mahitungod sa unsay gipasabot nga mahimong usa ka lider.

Kinsa ang mga “karnero” nga gusto sa Ginoo nga inyong pakan-on? Unsa ang inyong makaplagan sa Ezequiel 34 nga makatabang sa usa ka tawo nga mangandam sa pagserbisyo og usa ka misyon, pagpadako sa mga anak o pagtuman og usa ka buluhaton sa pagpangalagad? Unsaon nimo pagsunod sa ehemplo sa Manluluwas isip atong magbalantay? (tan-awa sa mga bersikulo 11–31).

Kamo mahimong mamalandong sa simbolismo nga inyong makaplagan dinhi niini nga kapitulo. Unsa kaha ang girepresentar sa “maayong sibsibanan” ug “maayong toril” diha sa bersikulo 14? Unsa ang kalainan tali sa usa ka karnero kinsa “nawala” ug sa usa kinsa “nahisalaag”? (bersikulo 16). Unsay uban nga mga simbolo ang inyong nakaplagan?

Tan-awa usab sa Juan 21:15–17; Gerrit W. Gong, “Pagpangalagad,” Liahona, Mayo 2023, 16–19.

“Kon ang atong … mga sala ania kanato,” ang bihag nga mga Israelita natingala, “unsaon ta man pagpangabuhi?” (Ezequiel 33:10). Agi og tubag, mitudlo ang Ginoo kanila mahitungod sa paghinusol ug pagpasaylo. Kini nga mga pangutana makatabang kaninyo sa pagpamalandong kon unsay Iyang gitudlo:

• Unsa kaha ang gipasabot sa “mosalig sa [imong] kaugalingong pagkamatarong”? (tan-awa sa Ezequiel 33:12–13).

• Unsa ang inyong isulti ngadto sa usa ka tawo kinsa mibati nga ang tawo nga gihulagway sa Ezequiel 33:12–19 gitratar nga dili patas? (tan-awa usab sa Mateo 21:28–31; Lucas 18:9–14).

• Unsa ang inyong makita niini nga mga bersikulo nga nagtabang kaninyo sa pagsabot kon unsa ang gipasabot sa paghinulsol? Unsang dugang nga mga panabot ang inyong nakaplagan sa Ezequiel 36:26–27 ug Alma 7:14–16?

Ang pagpundok sa Israel gihulagway sa Ezequiel 37 pinaagi sa duha ka mga simbolo. Samtang inyong basahon ang mahitungod sa usa nga nag-una—patay nga mga bukog nga nangabuhi (tan-awa sa mga bersikulo 1–14)—palandonga kon unsa ang gisugyot nganha kaninyo mahitungod sa pagpundok sa Israel sa luyog-luyo sa tabil (tan-awa usab sa Ezequiel 36:24–30). Hunahunaa ang mga pangutana sama niini:

• Unsa ang gipaningkamotan sa Ginoo nga matuman pinaagi sa pagpundok sa Israel?

• Sa unsang paagi nga Siya nagtuman niini?

Kamo makapangutana sa inyong kaugalingon niini nga samang mga pangutana samtang kamo magbasa mahitungod sa ikaduhang simbolo, diha sa mga bersikulo 15–28. Kini nga simbolo naglakip og duha ka sungkod, nga daghang mga iskolar naghubad isip kahoy nga papan nga sulatanan gidugtong pinaagi sa usa ka bisagra. Ang sungkod ni Juda makarepresentar sa Biblia (gumikan nga daghan sa Biblia gisulat sa mga kaliwat ni Juda), ug ang sungkod ni Jose makarepresentar sa Basahon ni Mormon (gumikan nga ang pamilya ni Lehi mga kaliwat ni Jose sa Ehipto). Tungod niana, unsay gitudlo niini nga mga bersikulo kaninyo mahitungod sa tahas sa mga kasulatan diha sa pagpundok sa Israel?

Hunahunaa ang mahitungod kon sa unsang paagi ang Biblia ug ang Basahon ni Mormon pagtambayayong og lihok diha sa inyong kinabuhi—ilabi na, sa pagtabang kaninyo sa pagduol ngadto ni Kristo. Unsa nga mga tudling ang makahuloganon kaayo nganha kaninyo?

Tan-awa usab sa 2 Nephi 3:11–13; 29:14; “Israel, Israel, Dios Nagtawag,” Mga Himno, nu. 7; Mga Hilisgotan ug mga Pangutana, “Biblia,” “Basahon ni Mormon,” Librarya sa Ebanghelyo; “The Book of Mormon Gathers Scattered Israel” (video), Gospel Library.

1:31

Samtang kamo magbasa sa Ezequiel 47:1–12, tingali makatabang ang pagkahibalo nga ang Patay nga Dagat hilabihan sa kaparat nga ang isda ug mga tanom dili mabuhi diha niini. Unsa ang nagdani kaninyo mahitungod sa katubigan nga gihulagway sa mga bersikulo 1–12? (tan-awa usab sa Pinadayag 22:1). Unsa kaha ang gisimbolo niini nga mga tubig? Unsa kaha ang girepresentar sa mga kahoy nga gihulagway diha sa bersikulo 12?

Unsa ang ikadugang sa inyong pagsabot sa mensahe ni Elder Dale G. Renlund nga “Buhat sa Family History ug sa Templo: Pagsilyo ug Pagkaayo”? (tan-awa sa Liahona, Mayo 2018, 47–48). Palandonga kon giunsa ninyo pagkakaplag og espirituhanong kinabuhi ug pagkaayo tungod sa templo.

• Gagmay nga mga bata tingali malingaw sa pagbuhat og mga aksiyon nga angay sa Ezequiel 3:17. Sama pananglit, sila makatudlo sa ilang mga mata, mga dunggan, ug ba-ba kon inyong basahon ang mga pulong nga “gwardiya,” “makadungog,” ug “ba-ba.” Tingali gusto usab sila nga magbaktas—sa gawas o tuyok lamang sa kwarto. Samtang sila maglakaw, pasidan-i sila kabahin sa mga butang sa agianan sama sa mga suba nga luksoan, mga sanga nga hup-an, o mga hayop nga likayan (tinuod o magpakaaron-ingnon). Kini makagiya ngadto sa usa ka panagsultihanay mahitungod kon sa unsang paagi ang propeta sa Ginoo nagpasidaan kanato sa mga kuyaw nga dili nato makita.

• Ania ang laing paagi sa paghulagway sa Ezequiel 3:17; 33:1–5. Usa sa inyong mga bata makahimo sa pagpakaaron-ingnon nga usa ka “gwardiya” pinaagi sa paglantaw sa bintana ug pagsulti sa tanan kon unsa ang panghitabo sa gawas. Makahimo usab kamong motan-aw sa bidyo nga “Watchman on the Tower”(ChurchofJesusChrist.org). Sa unsa nga paagi ang atong buhing propeta sama sa usa ka gwardiya alang kanato?

  

  4:17

• Human mabasa ang Ezequiel 37:15–23 og dungan, kamo ug ang inyong mga bata makapangita og duha ka sungkod ug sulatan ang usa og Alang ni Juda (Biblia) ug diha sa lain Alang ni Joseph (Basahon ni Mormon). Makapakigbahin dayon kamo og mga istorya o mga kasulatan gikan sa Biblia ug sa Basahon ni Mormon nga nagtabang kaninyo nga mobati nga mas duol ngadto sa Manluluwas ug mahimong “[Iyang] mga katawhan” (bersikulo 23). Nganong maayo nga aduna niining duha ka mga basahon sa kasulatan?

• Ezequiel 47 naghulagway sa panan-awon ni Ezequiel sa tubig nga nagdagayday gikan sa templo ug nag-ayo sa Patay nga Dagat—usa ka dagat nga hilabihan sa ka parat nga ang mga isda ug mga tanom dili mabuhi diha niini. Tingali ang inyong matag mga bata makadrowing og usa o duha ka butang gikan sa panan-awon, sama sa templo, usa ka suba, usa ka kamingawan, sa Patay nga Dagat, usa ka panon sa mga isda, o usa ka kahoy nga puno sa bunga. Dayon, samtang inyong basahon ang mga bersikulo 1–12 nga magdungan, sila mahimo nga makigbahin sa ilang drowing kon kana nga butang gihinganlan. Unsa nga mga panalangin ang naggikan sa suba niini nga panan-awon? Tabangi ang mga bata nga makakita kon sa unsang paagi kini nga mga panalangin sama sa mga panalangin nga gitanyag sa Manluluwas niadtong kinsa motuman sa mga pakigsaad sa templo. Ang bidyo “And the River Will Grow” (Gospel Library) makatabang.

  

  3:43

• Makaawit usab kamo og dungan sa usa ka awit nga naghulagway sa mga panalangin sa templo, sama sa “Mga Pamilya Mahimong Manag-uban sa Hangtud” (Songbook sa mga Bata, 98). Unsa ang gitudlo niini nga awit mahitungod kon giunsa sa Ginoo pagpanalangin kanato diha sa Iyang balaan nga balay?