Miqueas; Nahum; Habacuc; Sofonias

Nagdapit si Miqueas kanato sa paghanduraw kon unsa kaha kini sama ang “moduol sa atubangan sa Ginoo, ug moyukbo … sa atubangan sa halangdon nga Dios” (Miqueas 6:6). Unsa ang gisugyot sa mga bersikulo 6–8 nganha kanimo mahitungod sa unsa ang importante ngadto sa Ginoo samtang Siya nagtimbang-timbang sa imong kinabuhi?

Tan-awa usab diha sa Dale G. Renlund, “Pagbuhat sa Kaangayan, Pagpakita sa Makanunayong Gugma, ug Pagkinabuhi diha sa Mapaubsanong Pakig-uban sa atong Dios,” Liahona, Nob. 2020, 109–12.

Ang misyon ni Nahum mao ang pagpanagna sa kalaglagan sa Ninevi—ang ulohan sa mapintas nga emperyo nga Asiria, nga mitibulaag sa Israel ug bangis nga mimaltratar sa Juda. Misugod si Nahum pinaagi sa paghulagway sa kasuko ug dili katupngan nga gahom sa Dios, apan siya usab namulong mahitungod sa kaluoy ug kaayo sa Dios. Pangita og mga bersikulo diha sa kapitulo 1 nga nagtabang kanimo sa pagsabot sa matag usa niini nga mga hiyas—ug sa ubang mga hiyas sa Dios nga imong namatikdan. Ngano kaha nga importante nga makahibalo sa matag usa niini nga mga butang mahitungod sa Ginoo?

Bisan ang mga propeta usahay adunay mga pangutana mahitungod sa mga palakaw sa Ginoo. Si Habacuc, kinsa nagpuyo sa panahon sa pagkaylap sa kadaotan sa Juda, misugod sa iyang rekord uban sa mga pangutana ngadto sa Ginoo (tan-awa sa Habacuc 1:1–4). Unsaon nimo sa pag-summarize sa mga kabalaka ni Habacuc? Unsa nga susamang mga pangutana ang ipangutana sa mga tawo karon mahitungod sa Dios? Ikaw sukad aduna bay susama nga mga pagbati? Mahimo usab nimong itandi ang iyang mga pangutana ngadto sa uban diha sa mga kasulatan, sama niadtong makit-an diha sa Marcos 4:37–38 ug sa Doktrina ug mga Pakigsaad 121:1–6.

Ang Ginoo mitubag ngadto sa mga pangutana ni Habacuc pinaagi sa pag-ingon nga Siya mopadala sa mga Caldeahanon (ang mga taga Babelonia) sa pagsilot sa Juda (tan-awa sa Habacuc 1:5–11). Apan si Habacuc sa gihapon nasamok, kay ingon dili makiangayon alang sa Ginoo sa dili pagtabang “sa diha nga ang tawong daotan [Babelonia] nagalamoy sa tawo nga labing matarong [Juda]” (tan-awa sa mga bersikulo 12–17). Unsa ang inyong makaplagan diha sa Habacuc 2:1–4 nga nagdasig kaninyo sa pagsalig sa Ginoo kon kamo adunay wala matubag nga mga pangutana? (tan-awa usab sa Marcos 4:39–40; Doktrina og mga Pakigsaad 121:7–8; “God Will Lift Us Up” [video], Gospel Library).

4:59

Kapitulo 3 mao ang pag-ampo sa pagdayeg ug hugot nga pagtuo ni Habacuc. Sa unsa nga paagi nga ang tono ni Habacuc sa kapitulo 3 lahi gikan sa kapitulo 1? Aniay usa ka ideya sa pagtabang kaninyo sa pagpamalandong sa mga bersikulo 17–19: Paghimo og usa ka lista sa temporal ug espirituhanong mga panalangin nga nahatag sa Dios kaninyo. Dayon handurawa nga nawala kaninyo ang temporal nga mga panalangin. Unsa kaha inyong bation mahitungod sa ubang mga panalangin? Ngano kaha nga kini malisod nga “magamaya diha sa Ginoo” (bersikulo 18) atol sa mga kalisod sama niadtong gihulagway diha sa bersikulo 17? Pamalandonga kon sa unsa nga paagi ikaw makapalambo og mas dako nga hugot nga pagtuo sa Dios, bisan og ang kinabuhi ingon og dili patas.

Tan-awa usab sa Gerrit W. Gong, “Ang Tanang mga Butang Alang sa Atong Kaayohan,” Liahona, Mayo 2024, 41–44; “Giyahi, Maloloy-on nga Kahayag,” Mga Himno, nu. 53; Topics and Questions, “Seeking Answers to Questions,” Gospel Library.

Samtang kamo nagbasa niini nga mga panagna, alinggati ang mga matang sa mga kinaiya ug mga pamatasan nga migiya ngadto sa pagkalaglag—tan-awa ilabi na sa Sofonias 1:4–6, 12; 2:8, 10, 15; 3:1–4. Dayon pangita alang sa mga kinaiya sa mga katawhan nga ipatunhay sa Dios—tan-awa sa Sofonias 2:1–3; 3:12–13, 18–19. Unsa nga mensahe sa inyong paminaw aduna ang Ginoo alang kaninyo dinhi niini nga mga bersikulo?

Human mabasa ang Sofonias 3:14–20, tan-awa kon pila ka mga paagi kamo makakompleto niini nga kapahayag: “Pagmalipayon ug pagmaya uban ang tibuok nga kasingkasing” tungod kay … Nganong kini importante nganha kaninyo nga mahibalo mahitungod niini nga mga rason sa pagmaya? Mahimo ninyong itandi kini nga mga bersikulo ngadto sa mga kasinatian nga gihulagway sa 3 Nephi 17 ug mamalandong kon giunsa ni Jesukristo pagbati ang mahitungod sa Iyang mga katawhan—lakip kaninyo.

• Ang inyong mga bata mahimong wala mahibalo nga kini usa ka panagna ni Miqueas nga mitabang sa Maalamong mga Tawo sa pagkakaplag sa batang Jesus didto sa Betlehem. Naggamit sa Miqueas 5:2 ug Mateo 2:1–6, tingali ang inyong mga kabataan makapasundayag og balik sa ilang kasinatian. Dayon kamo makahisgot mahitungod kon nganong ang pagkatawo ni Jesus hilabihan sa ka importante nga ang mga propeta nahibalo mahitungod niini sulod sa daghang katuigan sa wala pa Siya matawo.

• Human mabasa ang Nahum 1:7, ang inyong mga bata makatukod o makadrowing og usa ka yanong “malig-on nga dalangpanan” o kota ( adunay usa ka hulagway niini dinhi niini nga latid). Unsa ang pipila ka rason nga ang mga tawo mahimong magkinahanglan og usa ka kota? Unsay naghimo sa atong adlaw og usa ka “adlaw sa kasamok”? Sa unsang paagi si Jesukristo sama sa usa ka malig-ong dalangpanan alang kanato?

• Sa pagpaila sa Habacuc 2:3, kamo ug ang inyong mga bata makahisgot mahitungod sa mga butang nga mga maayo apan unya ra human sa atong paghulat—sama sa prutas nga nagkinahanglan nga pahinugon o sa minasa (dough) nga kinahanglang ihudno. Unsay mahitabo kon pugson nato pagkaon ang prutas o ang minasa sa dili pa kini angay nga kan-on? Dayon kamo makahisgot mahitungod ni propeta Habacuc, kinsa gusto nga mahibalo kon kanus-a hunongon sa Ginoo ang kadaotan sa kalibotan. Basaha ang tubag sa Ginoo diha sa Habacuc 2:3. Makatabang kamo sa inyong mga bata sa paghunahuna sa mga butang nga gisaad sa Dios. Sa matag ehemplo, mahimo kamo nga magdungan sa pagsulti, “Paabota kini; kay kini moabot gayod.”

• Sa paghulagway sa Habacuc 2:14, kamo ug ang inyong mga bata makapuno og usa ka garapon o laing sudlanan uban sa mga hulagway o mga pulong nga nagrepresentar sa mga butang nga gibuhat o gitudlo ni Jesus. Sa unsa nga paagi nga kita makatabang sa pagpuno sa kalibotan og kahibalo bahin sa Ginoo?

• Kamo makapakita usab sa inyong mga bata og usa ka mapa sa kalibotan. Tabangi sila sa pagpangita sa lugar diin sila nagpuyo ug sa mga lugar diin ang mga misyonaryo nga ilang kaila nakaserbisyo. Mahimo usab kamo nga manganta og dungan sa usa ka awit mahitungod sa pagpakigbahin sa ebanghelyo, sama sa “Among Dad-on sa Kalibotan ang Iyang Kamatuoran” (Songbook sa mga Bata, 92–93). Unsa ang atong ikaistorya sa uban mahitungod ni Jesukristo?

• Sa Sofonias 3:14–20, ang inyong mga bata makapangita alang sa usa ka butang nga maghimo kanila nga gustong “mokanta, … [‘mag]malipayon ug [mag]maya uban ang tibuok nga kasingkasing,” Tingali kamo makakanta og pipila ka malipayon nga mga himno o awit nga magdungan ug maghisgot mahitungod sa hingpit nga kalipay nga inyong makaplagan diha sa ebanghelyo ni Jesukristo.