Pasko

Ang Pasko nailhan isip usa ka malipayong panahon tungod sa hingpit nga kalipay nga gidala ni Jesukristo sa kalibotan. Gatosan ka mga tuig sa wala pa ang Manluluwas matawo, ang mga propeta sa Daang Tugon mibati usab sa hingpit nga kalipay samtang sila mihisgot kabahin sa pag-anhi sa Mesiyas. Basaha ang pipila sa mosunod nga mga tudling, ug hunahunaa kon nganong kini bililhon unta ngadto niadtong kinsa nagpaabot sa misyon sa Manluluwas: Salmo 35:9; Isaias 25:8–9; 44:21–24; 51:11; Sofonias 3:14–20; Moises 5:5–11. Nganong bilihon kini nga mga tudling nganha kanimo? Unsa nga mga rason ang gihatag niini nga mga tudling sa kasulatan nga mahimong magmalipayon?

Tan-awa usab sa Dallin H. Oaks, “Good Tidings of Great Joy” (Unang Kapangulohan nga Debosyonal sa Pasko, Dis. 4, 2022), Librarya sa Ebanghelyo; “Kalipay sa Kalibotan,” Mga Himno, nu 120.

Daghang mga tradisyon nga kauban sa Pasko makabaton og simbolikanhong mga kahulogan nga nagtudlo kanato ngadto ni Kristo. Sa imong pagtuon sa Daang Tugon niini nga tuig, tingali imong namatikdan ang daghang mga simbolo sa Manluluwas. Ang pipila gilista sa ubos. Hunahunaa ang pagtuon niini ug pagrekord sa unsay gitudlo niini kanimo mahitungod Kaniya.

• Bitoon (Numeros 24:17; Mateo 2:2; Pinadayag 22:16).

• Magbalantay sa Karnero (Salmo 23; Lucas 15:4–7; Juan 10:11)

• Nating Karnero (Genesis 22:8; Exodo 12:5; 1 Pedro 1:18–20).

• Tubig (Exodo 17:1–6; Jeremias 2:13; Ezequiel 47:1–12; Juan 4:7–14).

• Bato (1 Samuel 2:2; 2 Samuel 22:2–3; Salmo 118:22–23; Isaias 28:16; Mga Taga-Efeso 2:20).

• Sanga (Isaias 11:1–2; Jeremias 23:5; 33:15).

• Kahayag (Salmo 27:1; Isaias 9:2; 60:19; Miqueas 7:8; Juan 8:12).

Unsa ang ubang mga simbolo, mga tudling, ug mga asoy ang imong nakaplagan diha sa mga kasulatan nga nagpamatuod ni Jesukristo?

Tan-awa usab sa 2 Nephi 11:4; Mosiah 3:14–15; Moises 6:63; “Mga Matang o mga Simbolo ni Kristo” ug “Jesukristo,” ang duha anaa sa Giya ngadto sa mga Kasulatan (Librarya sa Ebanghelyo).

Gitawag si Jesukristo sa daghang nagkalain-laing mga ngalan ug mga titulo. Pangita og mga titulo sa mosunod nga mga bersikulo: Mga Salmo 23:1; 83:18; Isaias 7:14; 9:6; 12:2; 63:16; Amos 4:13; Zacarias 14:16; Moises 7:53. Unsa ang ubang mga titulo nga imong mahunahunaan? Tingali gani ikaw malingaw sa paglista og mga titulo ni Jesukristo nga imong makaplagan diha sa mga himno sa Pasko. Giunsa sa matag titulo pag-impluwensya ang paagi sa imong paghunahuna mahitungod Kaniya?

Hunahunaa ang pagpili og usa ka titulo o tahas sa Manluluwas nga motabang kanimo sa paghinumdom Kaniya sa tibuok tuig nga umaabot.

Tan-awa usab sa Quentin L. Cook, “Personal nga Kalinaw sa mga Panahon nga Mahagiton,” Liahona, Nob. 2021, 89–92; “Ang Anghel Paminawa; Mga Himno, nu. 128.

• Kamo ug ang inyong mga bata tingali adunay pipila ka dekorasyon sa Pasko nga kamo makagamit sa pagsugod og panagsultihanay mahitungod ni Jesukristo. Tingali kamo makahisgot mahitungod sa bitoon sa Pasko, mga suga, o usa ka regalo nga magpahinumdom kanato kabahin sa Manluluwas. Dayon kamo makapangita diha sa usa o sa uban pang mosunod nga mga kasulatan alang sa usa ka butang nga makasimbolo ni Jesukristo: Genesis 22:8; Numeros 24:17; Mga Salmo 23:1; 27:1. Tingali ang inyong mga bata makapataas og usa ka hulagway o dekorasyon nga mobagay sa matag bersikulo samtang ila kining basahon. Sa unsang paagi si Jesus sama sa usa ka nating karnero, bitoon, magbalantay sa karnero, o kahayag? Hunahunaa ang pagkanta og dungan sa usa ka awit sa Pasko; sama sa “Kabitoonan Misanag” (Songbook sa mga Bata, 24).

• Ang inyong mga bata makatan-aw usab diha sa hulagway sa kataposan niini nga latid samtang kamo nagbasa sa Isaias 9:6 ngadto kanila. Hangyoa ang inyong mga bata sa pagtudlo ngadto sa batang Jesus kon madungog nila ang hugpong sa mga pulong “usa ka bata natawo.” Ipakigbahin ang imong pagpamatuod nga ang mga propeta sa Daang Tugon nasayod nga matawo si Jesus.

• Samtang ikaw nag-andam sa pagtuon sa kinabuhi ni Jesukristo diha sa Bag-ong Tugon sa sunod tuig, ikonsiderar ang pagrebyo uban sa imong pamilya kon unsa ang ilang nakat-onan mahitungod Kaniya niini nga tuig diha sa Daang Tugon. Mahimo kang morebyo sa mga latid dinhi niini nga kapanguhaan ug bisan unsang personal nga tun-anan nga mugbong mga sinulat sa pagtabang kanimo sa paghinumdom kon unsay imong nakat-onan. Ang mas gagmay nga mga bata tingali makakuha og kaayohan gikan sa pagtan-aw pinaagi sa Mga Istorya sa Daang Tugon o sa mga hulagway dinhi sa Dali, Sunod Kanako. Unsa nga mga panagna o mga istorya ang mahinungdanon kanimo? Unsa ang atong nakat-onan mahitungod sa Manluluwas?

• Ang Israelita nga mga pamilya adunay mga tradisyon, sama sa Pagpalabay ug ubang mga kasaulogan, nga gituyo aron sa pagtudlo sa ilang mga kasingkasing ug mga hunahuna ngadto sa Ginoo (tan-awa sa Exodo 12). Unsa nga mga tradisyon ninyo ug sa inyong mga anak nga aduna sa panahon sa Pasko nga nagtabang kanimo sa pagpunting diha ni Jesukristo? Unsa nga mga tradisyon ang inyong nahibaloan gikan sa kasaysayan sa inyong pamilya? Mahimo ninyong hunahunaon ang paghisgot isip usa ka pamilya ang pipila ka mga tradisyon nga imong gusto nga sugdan. Ang pipila ka ideya mahimong mag-apil sa pagserbisyo sa usa ka tawo nga nanginahanglan, pagpili og usa ka butang nga inyong itanyag isip usa ka “gasa” ngadto sa Manluluwas, pagdapit og higala sa pagtan-aw sa [Debosyonal sa Unang Kapangulohan sa Pasko] uban kaninyo (broadcasts.ChurchofJesusChrist.org), pagsulat sa inyong kaugalingong awit sa Pasko, o sa pagpangita og mamugnaong paagi sa pagpakigbahin sa mensahe sa pagkatawo ni Kristo.

• Unsaon ninyo pagtabang sa inyong mga bata sa pagbati og ligdong nga pagtahod ug hingpit nga kalipay sa pagkatawo ni Kristo? Kamo mahimong motan-aw sa bidyo “The Christ Child” (Gospel Library) o magdungan og basa sa Mateo 1:18–25; 2:1–12: Lucas 1:26–38: 2:1–20. Ang matag sakop sa pamilya makapili og tawo gikan sa bidyo o asoy sa kasulatan ug ipakigbahin kon unsa ang gibati niana nga tawo mahitungod sa Manluluwas. Dayon makahimo kamong mopakigbahin sa usag usa sa inyong kaugalingon nga mga pagbati mahitungod Kaniya.

  

  17:57

• Tingali kamo ug ang inyong mga bata makahisgot mahitungod sa mga regalo nga inyong nahatag o nadawat sulod sa nanglabay nga mga tuig nga midala og hingpit nga kalipay. Dayon kamo makabasa sa Isaias 25:9 og dungan ug makahisgot mahitungod kon nganong kamo nagmaya nga ang Langitnong Amahan mipadala kanato og usa ka Manluluwas. Aron matabangan ang mga bata nga mas makasabot sa tahas ni Jesukristo isip atong Manluluwas, dapita sila sa pagbasa sa Isaias 25:8–9; 53:3–5; ug Oseas 13:14. Unsa ang gitudlo kanato niini nga mga kasulatan mahitungod kon giunsa kita pagluwas sa Ginoo?

• Kamo makakanta usab og dungan sa usa ka awit sa Pasko, sama sa “Didto sa Pasungan” (Songbook sa mga Bata, 124) o “Gamay nga Lungsod sa Bethlehem” (Mga Himno, nu. 126). Tabangi ang inyong mga bata sa pagpangita og mga hugpong sa mga pulong diha sa awit nga nagtabang kanila nga mahibalo nga ang Langitnong Amahan ug si Jesukristo nahigugma kanila.