“ວັນທີ 9–15 ເດືອນພະຈິກ. ‘ບໍ່ມີພະອື່ນໃດທີ່ສາມາດຊ່ວຍກູ້ເອົາໄດ້ຢ່າງນີ້’: ດານີເອນ 1–7,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 9–15 ເດືອນພະຈິກ. ‘ບໍ່ມີພະອື່ນໃດທີ່ສາມາດຊ່ວຍກູ້ເອົາໄດ້ຢ່າງນີ້,’” ຈົ່ງຕາມເຮົາມາ: ພຣະຄຳພີເດີມ 2026

Daniel Interprets Nebuchadnezzar’s Dream [ດານີເອນແປຄວາມຝັນຂອງເນບູກາດເນັດຊາ], ໂດຍ ແກຣ້ນ ຣອມນີ ຄລໍສັນ

ວັນທີ 9–15 ເດືອນພະຈິກ: “ບໍ່ມີພະອື່ນໃດທີ່ສາມາດຊ່ວຍກູ້ເອົາໄດ້ຢ່າງນີ້”

ດານີເອນ 1–7

ຄົງບໍ່ມີໃຜເວົ້າຂູ່ທ່ານວ່າຈະໂຍນທ່ານລົງໃນເຕົາໄຟ ຫລື ລົງໃນຖ້ຳສິງ ເພາະສັດທາຂອງທ່ານໃນພຣະເຢຊູຄຣິດ. ແຕ່ບໍ່ມີໃຜໃນພວກເຮົາທີ່ຈະຜ່ານຜ່າຊີວິດນີ້ໄປໄດ້ປາດສະຈາກການຖືກທົດລອງສັດທາ. ສະນັ້ນ ເຮົາທຸກຄົນສາມາດໄດ້ຮັບຜົນປະໂຫຍດຈາກຕົວຢ່າງຂອງຜູ້ຄົນເຊັ່ນ ດານີເອນ, ຊັດຣາກ, ເມຊາກ, ແລະ ອາເບັດເນໂກ, ຜູ້ຖືກພາໄປເປັນຊະເລີຍຕອນເປັນຊາຍໜຸ່ມ ໂດຍຈັກກະພັດບາບີໂລນທີ່ຍິ່ງໃຫຍ່ (ເບິ່ງ 2 ກະສັດ 24:10–16). ໂດຍທີ່ຖືກອ້ອມຮອບດ້ວຍວັດທະນະທຳທີ່ບໍ່ຄຸ້ນເຄີຍ ພ້ອມດ້ວຍຄຸນຄ່າທີ່ແຕກຕ່າງ, ພວກເຂົາໄດ້ປະເຊີນກັບການລໍ້ລວງຢ່າງໜັກເພື່ອໃຫ້ປະຖິ້ມຄວາມເຊື່ອ ແລະ ປະເພນີທີ່ຊອບທຳຂອງພວກເຂົາ. ແຕ່ພວກເຂົາໄດ້ຍຶດໝັ້ນຢູ່ກັບພັນທະສັນຍາຂອງພວກເຂົາ. ພວກເຂົາໄດ້ເຮັດແນວນັ້ນໄດ້ແນວໃດ? ໂດຍການເຮັດສິ່ງເລັກນ້ອຍ ແລະ ລຽບງ່າຍເຫລົ່ານັ້ນທີ່ພຣະເຈົ້າໄດ້ຂໍໃຫ້ເຮົາທຸກຄົນເຮັດ—ການອະທິຖານ, ການຖືສິນອົດເຂົ້າ, ການເລືອກໝູ່ເພື່ອນທີ່ດີ, ການໄວ້ວາງໃຈໃນພຣະອົງ, ແລະ ການເປັນແສງສະຫວ່າງໃຫ້ກັບຄົນອື່ນ. ຄືກັນກັບໂຢເຊັບໃນປະເທດເອຢິບ ແລະ ນາງເອສະເທີໃນປະເທດເປີເຊຍ, ດານີເອນ ແລະ ໝູ່ເພື່ອນຂອງລາວໃນນະຄອນບາບີໂລນໄດ້ຮັກສາສັດທາຂອງພວກເຂົາໃນພຣະເຈົ້າ, ແລະ ພຣະເຈົ້າກໍໄດ້ທຳການອັດສະຈັນທີ່ຍັງດົນໃຈຜູ້ທີ່ເຊື່ອໃນທຸກວັນນີ້ຢູ່.

ສຳລັບພາບລວມຂອງພຣະທຳດານີເອນ, ໃຫ້ເບິ່ງ “ດານີເອນ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ດານີເອນ 1; 3; 6

ເຮົາສາມາດໄວ້ວາງໃຈໃນພຣະຜູ້ເປັນເຈົ້າເມື່ອສັດທາຂອງເຮົາຖືກທົດລອງ.

ຖ້າຈະເວົ້າແລ້ວ, ເຮົາທຸກຄົນກໍມີຊີວິດຢູ່ໃນບາບີໂລນ. ເຮົາມັກຈະປະເຊີນໜ້າກັບການລໍ້ລວງໃຫ້ປະນີປະນອມມາດຕະຖານຂອງເຮົາ ແລະ ຫັນໜີໄປຈາກສັດທາໃນພຣະຄຣິດ. ຂະນະທີ່ທ່ານອ່ານ ດານີເອນ 1, 3, ແລະ 6, ໃຫ້ສັງເກດເບິ່ງວິທີທີ່ດານີເອນ, ຊັດຣາກ, ເມຊາກ, ແລະ ອາເບັດເນໂກຖືກກົດດັນໃຫ້ເຮັດສິ່ງທີ່ພວກເຂົາຮູ້ວ່າຜິດ. ພວກເຂົາໄດ້ຕອບຮັບຕໍ່ສະຖານະການເຫລົ່ານີ້ແນວໃດ? (ເບິ່ງ ດານີເອນ 1:10–13; 3:15–18; 6:10). ແມ່ນຫຍັງຄືຜົນຮັບຂອງສັດທາຂອງພວກເຂົາ? ທ່ານຮຽນຮູ້ຫຍັງແດ່ຈາກປະສົບການເຫລົ່ານີ້ ທີ່ສາມາດຊ່ວຍທ່ານໃຫ້ໄວ້ວາງໃຈໃນພຣະຜູ້ເປັນເຈົ້າ ເມື່ອທ່ານປະເຊີນກັບສິ່ງກົງກັນຂ້າມ? ໃຫ້ພິຈາລະນາຄຳຖາມດັ່ງຕໍ່ໄປນີ້ນຳອີກ:

ເມື່ອໃດແດ່ທີ່ທ່ານໄດ້ຮູ້ສຶກຖືກກົດດັນໃຫ້ເຮັດບາງສິ່ງທີ່ທ່ານຮູ້ວ່າຜິດ? ພຣະຜູ້ເປັນເຈົ້າໄດ້ອວຍພອນທ່ານເພາະການຮັກສາພຣະບັນຍັດຂອງພຣະອົງແນວໃດ?
ຖ້າຫາກສັດທາຂອງທ່ານບໍ່ນຳໄປສູ່ການອັດສະຈັນທີ່ທ່ານສະແຫວງຫາ ແລ້ວຈະເປັນແນວໃດ? (ສຳລັບຕົວຢ່າງ, ເບິ່ງ ແອວມາ 14:8–13). ອີງຕາມສິ່ງທີ່ທ່ານອ່ານຢູ່ໃນ ດານີເອນ 3:13–18, ທ່ານຄິດວ່າຊັດຣາກ, ເມຊາກ, ແລະ ອາເບັດເນໂກຈະຕອບຄຳຖາມນີ້ແນວໃດ? ຕົວຢ່າງຂອງພວກເຂົາມີຜົນກະທົບຕໍ່ວິທີທີ່ທ່ານປະເຊີນກັບການທົດລອງຂອງທ່ານແນວໃດ?
ທາງເລືອກທີ່ຊອບທຳຂອງທ່ານຈະນຳຄົນອື່ນໄປສູ່ສັດທາໃນພຣະຜູ້ເປັນເຈົ້າຫລາຍຂຶ້ນໄດ້ແນວໃດ? (ເບິ່ງ ດານີເອນ 2:47; 3:28–29). ໃຫ້ໄຕ່ຕອງເຖິງຜົນກະທົບທີ່ທາງເລືອກຂອງທ່ານ ອາດມີຕໍ່ຄົນອື່ນ.

ເບິ່ງ Dieter F. Uchtdorf, “Be Not Afraid, Only Believe,” Liahona, Nov. 2015, 76–79 ນຳອີກ.

ພະຍາຍາມໃຫ້ທຸກຄົນມີສ່ວນຮ່ວມ. ພຣະຜູ້ຊ່ວຍໃຫ້ລອດ “ເຊື້ອເຊີນ … ເຂົາທັງໝົດໃຫ້ເຂົ້າມາຫາພຣະອົງ ແລະ ຮັບສ່ວນພຣະກະລຸນາທິຄຸນຂອງພຣະອົງ” (2 ນີໄຟ 26:33). ຖ້າຫາກທ່ານສິດສອນຄອບຄົວຂອງທ່ານ ຫລື ຫ້ອງຮຽນ, ໃຫ້ໄຕ່ຕອງວິທີທີ່ທ່ານຈະສາມາດໃຫ້ໂອກາດທຸກຄົນເພື່ອໃຫ້ມີສ່ວນຮ່ວມໃນທາງໃດທາງໜຶ່ງ. ຍົກຕົວຢ່າງ, ທ່ານສາມາດເອົາຂໍ້ພຣະຄຳພີ, ຂ່າວສານຈາກກອງປະຊຸມໃຫຍ່ສາມັນພາກສ່ວນໜຶ່ງ, ຫລື ວັກໜຶ່ງຈາກເພງສວດໃຫ້ແກ່ທຸກຄົນເພື່ອໄຕ່ຕອງ ແລະ ໃຫ້ຄວາມຄິດເຫັນ. ຢ່າກົດດັນໃຜໃຫ້ມີສ່ວນຮ່ວມ, ແຕ່ໃຫ້ໂອກາດເຂົາເຈົ້າ.

ຊັດຣາກ, ເມຊາກ, ອາເບັດເນໂກ, ແລະ ບຸກຄົນທີສີ່ຢູ່ໃນເຕົາໄຟ — Shadrach, Meshach, and Abednego in the Fiery Furnace [ຊັດຣາກ, ເມຊາກ, ແລະ ອາເບັດເນໂກ ຢູ່ໃນເຕົາໄຟຮ້ອນ], ໂດຍ ວິວລຽມ ມໍແກນ

ດານີເອນ 2

ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເປັນອານາຈັກຂອງພຣະເຈົ້າຢູ່ເທິງແຜ່ນດິນໂລກ.

ຜ່ານທາງການເປີດເຜີຍ, ດານີເອນໄດ້ເຫັນວ່າຄວາມຝັນຂອງເນບູກາດເນັດຊາ ບອກລ່ວງໜ້າເຖິງອານາຈັກຢູ່ໃນໂລກໃນອະນາຄົດ, ຕະຫລອດທັງອານາຈັກຂອງພຣະເຈົ້າໃນອະນາຄົດ, ຊຶ່ງ “ຈະບໍ່ສູນຫາຍໄປຈັກເທື່ອ” (ດານີເອນ 2:44). “ສາດສະໜາຈັກນີ້ຄືອານາຈັກຍຸກສຸດທ້າຍທີ່ຖືກທຳນາຍໄວ້,” ແອວເດີ ດີ ທອດ ຄຣິດສະໂຕເຟີສັນ ໄດ້ສິດສອນ, “ທີ່ມະນຸດບໍ່ໄດ້ສ້າງຂຶ້ນມາ ແຕ່ຖືກຈັດຕັ້ງຂຶ້ນມາໂດຍພຣະເຈົ້າແຫ່ງສະຫວັນ ແລະ ຈະກິ້ງອອກໄປດັ່ງກ້ອນຫີນທີ່ແຕກອອກມາຈາກໜ້າຜາໂດຍບໍ່ມີຜູ້ໃດເຮັດ ຈົນເຕັມແຜ່ນດິນໂລກ” (“Why the Church,” Liahona, Nov. 2015, 111). ໃຫ້ຄິດກ່ຽວກັບອານາຈັກຂອງພຣະເຈົ້າໃນຍຸກສຸດທ້າຍ ຂະນະທີ່ທ່ານອ່ານຄຳບັນຍາຍກ່ຽວກັບກ້ອນຫີນ ຢູ່ໃນ ດານີເອນ 2:34–35, 44–45. ແມ່ນຫຍັງຄືບົດບາດຂອງທ່ານໃນການຊ່ວຍເຮັດໃຫ້ຄຳທຳນາຍນີ້ເກີດເປັນຈິງ?

ເບິ່ງ “Hark, All Ye Nations!,” Hymns, no. 264; “God Gave Them Knowledge” (ວິດີໂອ), ChurchofJesusChrist.org ນຳອີກ.

ດານີເອນ 2:1–30

ການໄດ້ຮັບການເປີດເຜີຍຮຽກຮ້ອງການກະກຽມທາງວິນຍານ.

ຂະນະທີ່ທ່ານທົບທວນ ດານີເອນ 2:1–15, ໃຫ້ພິຈາລະນາວ່າທ່ານຈະຮູ້ສຶກແນວໃດຖ້າທ່ານພົບເຫັນຕົວເອງຕົກຢູ່ໃນສະພາບຂອງດານີເອນ. ດານີເອນໄດ້ເຮັດຫຍັງ? (ເບິ່ງ ດານີເອນ 2:16–18). ທ່ານສາມາດຮຽນຮູ້ຫຍັງແດ່ຈາກ ດານີເອນ 1:17 ກ່ຽວກັບວ່າພຣະເຈົ້າໄດ້ກະກຽມດານີເອນແນວໃດ? ທ່ານສາມາດຮຽນຮູ້ຫຍັງແດ່ຈາກຖ້ອຍຄຳ ແລະ ການກະທຳຂອງດານີເອນຫລັງຈາກລາວໄດ້ຮັບຄວາມຊ່ວຍເຫລືອຈາກພຣະຜູ້ເປັນເຈົ້າ? (ເບິ່ງ ດານີເອນ 2:19–30).

ດານີເອນ 7:13–14

ພຣະເຢຊູຄຣິດເປັນພຣະບຸດຂອງພຣະບິດາຜູ້ສະຖິດນິລັນດອນ.

ລະຫວ່າງການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດຢູ່ເທິງໂລກ, ຊາວຢິວຫລາຍຄົນໄດ້ຖືວ່າຕຳແໜ່ງ “[ບຸດມະນຸດ]” ຈາກ ດານີເອນ 7:13 ນັ້ນອ້າງເຖິງພຣະເມຊີອາທີ່ຈະສະເດັດມາ. ທ່ານຮຽນຮູ້ຫຍັງແດ່ກ່ຽວກັບພຣະເມຊີອາຈາກ ດານີເອນ 7:13–14? (ເບິ່ງ ໂມເຊ 6:57 ນຳອີກ).

ພຣະຜູ້ຊ່ວຍໃຫ້ລອດມັກຈະອ້າງເຖິງພຣະອົງເອງວ່າ “ບຸດມະນຸດ.” ໃຫ້ພິຈາລະນາທີ່ຈະທົບທວນບາງຕົວຢ່າງ: ມັດທາຍ 25:31; ມາຣະໂກ 9:31; 10:45. ພຣະອົງກຳລັງສິດສອນຫຍັງແດ່ກ່ຽວກັບພຣະອົງເອງໃນຂໍ້ເຫລົ່ານີ້? ໃນ ມາຣະໂກ 14:61–64, ພຣະເຢຊູໄດ້ໃຊ້ຕຳແໜ່ງນີ້ໃນວັນສຸດທ້າຍຂອງພຣະຊົນຊີບໃນຊ່ວງມະຕະຂອງພຣະອົງ. ໃຫ້ສັງເກດເບິ່ງປະຕິກິລິຍາຈາກຜູ້ຄົນທີ່ໄດ້ຍິນການປະກາດຂອງພຣະອົງ. ຄຳທຳນາຍຂອງດານີເອນກ່ຽວກັບບຸດມະນຸດມີຜົນກະທົບຕໍ່ຄວາມຮູ້ສຶກຂອງທ່ານແນວໃດ ກ່ຽວກັບສິ່ງທີ່ໄດ້ເກີດຂຶ້ນກັບພຣະອົງຢູ່ໃນ ມາຣະໂກ 15?

ດັ່ງທີ່ພຣະເຢຊູຖືກກຽດຊັງເພາະໄດ້ປະກາດວ່າພຣະອົງເປັນ “ບຸດມະນຸດ,” ທ່ານກໍອາດປະເຊີນໜ້າກັບການຂົ່ມເຫັງເພາະການປະກາດຄວາມຈິງເຊັ່ນກັນ. ໃຫ້ປຽບທຽບຄຳທຳນາຍໃນ ດານີເອນ 7:13–14 ກັບຄຳສັນຍາໃນ ຄຳສອນ ແລະ ພັນທະສັນຍາ 121:29, 46.

ເບິ່ງ ຄຳສອນ ແລະ ພັນທະສັນຍາ 49:6; ຄູ່ມືພຣະຄຳພີ, “ບຸດມະນຸດ,” ຫ້ອງສະໝຸດພຣະກິດຕິຄຸນ ນຳອີກ.

ແນວຄິດສຳລັບການສິດສອນເດັກນ້ອຍ

ດານີເອນ 1; 3; 6

ພຣະເຢຊູຈະຊ່ວຍເຮົາເຮັດສິ່ງທີ່ຖືກຕ້ອງແມ່ນແຕ່ເມື່ອມັນຍາກ.

ເພື່ອຊ່ວຍລູກໆຂອງທ່ານໃຫ້ຮຽນຮູ້ຈາກເລື່ອງລາວທີ່ດົນໃຈຢູ່ໃນພຣະທຳດານີເອນ, ທ່ານສາມາດຊອກຫາຮູບຂອງເຫດການນັ້ນຢູ່ໃນ ດານີເອນ 1, 3, ແລະ 6 (ເບິ່ງໜ້າກິດຈະກຳຂອງອາທິດນີ້ ຫລື ປຶ້ມຮູບພຣະກິດຕິຄຸນ, ເລກທີ 23, 25, 26). ແລ້ວທ່ານສາມາດວາງຮູບນັ້ນຂວ້ຳໜ້າລົງ ແລະ ເຊື້ອເຊີນລູກຄົນໜຶ່ງໃຫ້ປີ້ນຮູບໜຶ່ງຂຶ້ນ ແລະ ເວົ້າລົມກ່ຽວກັບເລື່ອງລາວທີ່ມັນເປັນຕົວແທນໃຫ້ຫຍັງ. (ສຳລັບຄວາມຊ່ວຍເຫລືອ, ເບິ່ງ “ດານີເອນ ແລະ ໝູ່ຂອງລາວ,” “ຊັດຣາກ, ເມຊາກ, ແລະ ອາເບັດເນໂກ,” ແລະ “ດານີເອນ ແລະ ຖ້ຳສິງ” ໃນ ເລື່ອງພຣະຄຳພີເດີມ, 154–56, 160–62, 163–65.)

1:39
Daniel and His Friends

1:39
Shadrach, Meshach, and Abed-nego

1:45
Daniel and the Lions’ Den
ຊ່ວຍລູກໆຂອງທ່ານໃຫ້ຄິດເຖິງສະຖານະການເມື່ອພວກເຂົາອາດຖືກກົດດັນໃຫ້ເລືອກຜິດ, ເຊັ່ນດຽວກັບດານີເອນ ແລະ ໝູ່ຂອງລາວໃນ ດານີເອນ 1, 3, ແລະ 6. ແບ່ງປັນນຳກັນວ່າພວກທ່ານໄດ້ຮັບພອນເພາະການເລືອກທີ່ຖືກຕ້ອງແມ່ນແຕ່ເມື່ອມັນຍາກແນວໃດ. ພວກທ່ານຍັງສາມາດຮ້ອງເພງໜຶ່ງນຳກັນທີ່ກ່ຽວຂ້ອງກັບຫົວຂໍ້ນີ້ນຳອີກ, ເຊັ່ນ “ກ້າເຮັດສິ່ງຖືກ” (ເພງສວດ ແລະ ເພງຂອງເດັກນ້ອຍ, 70).

ພວກຊາຍໜຸ່ມກຳລັງປະຕິເສດທີ່ຈະກິນຊີ້ນ — ການໄວ້ວາງໃຈໃນພຣະວາຈາແຫ່ງປັນຍາ

ດານີເອນ 7:13–14

ພຣະບິດາເທິງສະຫວັນປະສົງໃຫ້ເຮົາດູແລຮ່າງກາຍຂອງເຮົາ.

ການອ່ານເລື່ອງລາວກ່ຽວກັບດານີເອນ ແລະ ໝູ່ຂອງລາວ ປະຕິເສດອາຫານ ແລະ ເຫລົ້າອະງຸ່ນຂອງກະສັດອາດດົນໃຈການສົນທະນາກ່ຽວກັບກົດແຫ່ງສຸຂະພາບທີ່ພຣະບິດາເທິງສະຫວັນໄດ້ປະທານໃຫ້ເຮົາໃນວັນເວລານີ້ (ເບິ່ງ ຄຳສອນ ແລະ ພັນທະສັນຍາ 89). ບາງທີທ່ານກໍສາມາດຊອກຫາພອນທີ່ດານີເອນ ແລະ ໝູ່ຂອງລາວໄດ້ຮັບ ແລະ ປຽບທຽບມັນກັບພອນທີ່ຖືກສັນຍາໄວ້ໃນພຣະວາຈາແຫ່ງປັນຍາ (ເບິ່ງ ດານີເອນ 1:15–17 ແລະ ຄຳສອນ ແລະ ພັນທະສັນຍາ 89:18–21).

ດານີເອນ 2

ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນອານາຈັກຂອງພຣະເຈົ້າຢູ່ເທິງແຜ່ນດິນໂລກ.

ຂະນະທີ່ທ່ານອ່ານ ດານີເອນ 2:31–35, 44–45 ກັບລູກໆຂອງທ່ານ, ທ່ານສາມາດເຊື້ອເຊີນພວກເຂົາໃຫ້ແຕ້ມຮູບຂອງຄວາມຝັນຂອງເນບູກາດເນັດຊາ. ຊ່ວຍພວກເຂົາໃຫ້ເຂົ້າໃຈວ່າ ກ້ອນຫີນທີ່ຢູ່ໃນຄວາມຝັນເປັນຕົວແທນໃຫ້ແກ່ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ເຮົາຮຽນຮູ້ຫຍັງແດ່ກ່ຽວກັບສາດສະໜາຈັກຈາກຄວາມຝັນນີ້? ລູກໆຂອງທ່ານສາມາດບອກຊື່ບາງສິ່ງທີ່ພຣະບິດາເທິງສະຫວັນໄດ້ເຮັດເພື່ອຈັດຕັ້ງສາດສະໜາຈັກຂອງພຣະອົງຂຶ້ນມາໃນຍຸກສຸດທ້າຍ. ຖ້າພວກເຂົາຕ້ອງການຄວາມຊ່ວຍເຫລືອ, ທ່ານກໍສາມາດສະແດງຮູບຂອງເຫດການຈາກການຟື້ນຟູສາດສະໜາຈັກ (ເບິ່ງ ປຶ້ມຮູບພຣະກິດຕິຄຸນ, ເລກທີ 90–95).

ດານີເອນ 6

ພຣະບິດາເທິງສະຫວັນປະສົງໃຫ້ເຮົາອະທິຖານເລື້ອຍໆ.

ເປັນຫຍັງການອະທິຖານຫາພຣະບິດາເທິງສະຫວັນຈຶ່ງສຳຄັນຫລາຍແທ້ໆຕໍ່ດານີເອນ? ບາງທີທ່ານ ແລະ ລູກໆຂອງທ່ານສາມາດເວົ້າລົມກ່ຽວກັບຄຳຖາມນັ້ນຂະນະທີ່ພວກທ່ານອ່ານ ດານີເອນ 6 ນຳກັນ. ແລ້ວພວກທ່ານສາມາດບອກກັນແລະກັນວ່າ ເປັນຫຍັງການອະທິຖານຈຶ່ງສຳຄັນຕໍ່ພວກທ່ານ. ລູກໆຂອງທ່ານອາດມັກແຕ້ມຮູບຂອງພວກເຂົາເອງກຳລັງອະທິຖານໃນສະຖານະການຕ່າງໆ. ພວກເຂົາສາມາດໃຊ້ຮູບແຕ້ມຂອງພວກເຂົາເພື່ອສິດສອນກັນແລະກັນວ່າ ເຮົາສາມາດອະທິຖານຫາພຣະບິດາເທິງສະຫວັນ ບໍ່ວ່າເຮົາຈະຢູ່ບ່ອນໃດ ຫລື ວ່າເຮົາຕ້ອງການຫຍັງກໍຕາມ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ດານີເອນກຳລັງຢືນຢູ່ຕໍ່ໜ້າຝູງສິງ — Daniel in the Lions’ Den [ດານີເອນຢູ່ໃນຖ້ຳສິງ], ໂດຍ ບຣິທັນ ຣີວີແອວ

ໜ້າກິດຈະກຳປະຖົມໄວ: ພຣະເຈົ້າຈະອວຍພອນເຮົາເມື່ອທີ່ເຮົາເລືອກທີ່ຈະຕິດຕາມພຣະເຢຊູຄຣິດ — Daniel in the Lions’ Den [ດານີເອນຢູ່ໃນຖ້ຳສິງ], ໂດຍ ບຣິທັນ ຣີວີແອວ