“ວັນທີ 26 ເດືອນຕຸລາ–ວັນທີ 1 ເດືອນພະຈິກ. ‘ເຮົາຈະເລົ້າໂລມໃຈຜູ້ໄວ້ທຸກໃຫ້ປິຕິຍິນດີ’: ເຢເຣມີຢາ 31–33; 36–39; ເພງຄ່ຳຄວນ 1; 3” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ວັນທີ 26 ເດືອນຕຸລາ–ວັນທີ 1 ເດືອນພະຈິກ. ‘ເຮົາຈະເລົ້າໂລມໃຈຜູ້ໄວ້ທຸກໃຫ້ປິຕິຍິນດີ,’” ຈົ່ງຕາມເຮົາມາ: ພຣະຄຳພີເດີມ 2026
Jeremiah Lamenting the Destruction of Jerusalem [ເຢເຣມີຢາຄ່ຳຄວນກັບນະຄອນເຢຣູຊາເລັມທີ່ຖືກທຳລາຍ], ໂດຍ ເຣັມບະແຣ້ນ ວານ ຣີນ
ວັນທີ 26 ເດືອນຕຸລາ–ວັນທີ 1 ເດືອນພະຈິກ: “ເຮົາຈະເລົ້າໂລມໃຈຜູ້ໄວ້ທຸກໃຫ້ປິຕິຍິນດີ”
ເຢເຣມີຢາ 31–33; 36–39; ເພງຄ່ຳຄວນ 1; 3
ເມື່ອພຣະຜູ້ເປັນເຈົ້າໄດ້ເອີ້ນເຢເຣມີຢາເທື່ອທຳອິດເພື່ອໃຫ້ເປັນສາດສະດາ, ພຣະອົງໄດ້ບອກເພິ່ນວ່າ ພາລະກິດຂອງເພິ່ນຈະ “ຖອນຮາກ, ແລະ ຮື້ຖິ້ມ” (ເຢເຣມີຢາ 1:10)—ແລະ ໃນນະຄອນເຢຣູຊາເລັມ, ມີຄວາມຊົ່ວຮ້າຍຢ່າງຫລວງຫລາຍທີ່ຈະຕ້ອງຖອນຮາກ ແລະ ຮື້ຖິ້ມ. ແຕ່ນີ້ເປັນພຽງພາກສ່ວນໜຶ່ງເທົ່ານັ້ນໃນພາລະກິດຂອງເຢເຣມີຢາ—ເພິ່ນຍັງໄດ້ຖືກເອີ້ນ “ເພື່ອໃຫ້ກໍ່ສ້າງ, ແລະ ປູກຝັງ” ນຳອີກ (ເຢເຣມີຢາ 1:10). ຈະສ້າງ ຫລື ປູກຝັງຫຍັງຂຶ້ນໄດ້ແດ່ໃນບ່ອນຮົກຮ້າງ ທີ່ຖືກປະຖິ້ມໂດຍການກະບົດຂອງຜູ້ຄົນແຫ່ງພັນທະສັນຍາ? ຖາມອີກໃນທາງໜຶ່ງ, ເມື່ອການບາບ ຫລື ຄວາມຍາກລຳບາກໄດ້ເຮັດໃຫ້ຊີວິດຂອງເຮົາຕົກຢູ່ໃນຄວາມຈິບຫາຍ, ເຮັດແນວໃດເຮົາຈຶ່ງຈະສາມາດສ້າງ ຫລື ປູກຝັງມັນຄືນໄດ້ອີກ? ຄຳຕອບແມ່ນຢູ່ໃນ “ຜູ້ຊອບທຳຄົນໜຶ່ງຈາກເຊື້ອສາຍອິດສະຣາເອນ” (ເຢເຣມີຢາ 33:15), ພຣະເມຊີອາທີ່ຖືກສັນຍາໄວ້. ພຣະອົງນຳເອົາ “ພັນທະສັນຍາໃໝ່” ມາໃຫ້ (ເຢເຣມີຢາ 31:31)—ພັນທະສັນຍາທີ່ຮຽກຮ້ອງຫລາຍກວ່າການອຸທິດຕົນທີ່ສະແດງອອກພາຍນອກເທົ່ານັ້ນ. ກົດຂອງພຣະອົງຈະຕ້ອງຢູ່ “ພາຍໃນ [ຂອງພວກເຮົາ],” ຖືກຂຽນໄວ້ “ໃນຫົວໃຈ [ຂອງພວກເຮົາ].” ນັ້ນຄືຄວາມໝາຍ ທີ່ພຣະຜູ້ເປັນເຈົ້າຈະໄດ້ “ເປັນພຣະເຈົ້າ [ຂອງພວກເຮົາ]” ແລະ ທີ່ເຮົາຈະໄດ້ “ເປັນຜູ້ຄົນ [ຂອງພຣະອົງ]” (ເຢເຣມີຢາ 31:33). ມັນເປັນຂະບວນການຕະຫລອດຊີວິດ, ແລະ ເຮົາຍັງຈະເຮັດຄວາມຜິດພາດ ແລະ ມີສາເຫດທີ່ຈະເປັນທຸກເປັນບາງຄັ້ງບາງຄາວຢູ່. ແຕ່ເມື່ອເຮົາເຮັດຜິດພາດ, ພຣະຜູ້ເປັນເຈົ້າສັນຍາວ່າ: “ເຮົາຈະເລົ້າໂລມໃຈຜູ້ໄວ້ທຸກໃຫ້ປິຕິຍິນດີ” (ເຢເຣມີຢາ 31:13).
ສຳລັບພາບລວມຂອງເພງຄ່ຳຄວນ, ໃຫ້ເບິ່ງ “ເພງຄ່ຳຄວນ, ພຣະທຳ” ໃນຄູ່ມືພຣະຄຳພີ.
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ເຢເຣມີຢາ 31; 33
ພຣະຜູ້ເປັນເຈົ້າຈະນຳຜູ້ຄົນແຫ່ງພັນທະສັນຍາຂອງພຣະອົງອອກມາຈາກການເປັນຊະເລີຍ.
ໃນ ເຢເຣມີຢາ 31; 33 ພຣະຜູ້ເປັນເຈົ້າໄດ້ຮັບຮູ້ “ສຽງຮ້ອງໄຫ້ຄວນຄາງ, ແລະ ລະທົມຂົມຂື່ນ” (ເຢເຣມີຢາ 31:15) ທີ່ຊາວອິດສະຣາເອນໄດ້ປະເຊີນ ໃນການເປັນຊະເລີຍ. ເຖິງຢ່າງໃດກໍຕາມ, ພຣະອົງກໍຍັງໄດ້ສະເໜີມອບຄຳປອບໂຍນ ແລະ ຄວາມຫວັງໃຫ້ຢູ່. ໃຫ້ຊອກຫາມັນຂະນະທີ່ທ່ານອ່ານບົດເຫລົ່ານີ້. ທ່ານພົບເຫັນຄຳສັນຍາໃດແດ່ທີ່ກ່ຽວຂ້ອງກັບທ່ານ?
ເຢເຣມີຢາ 31:31–34; 32:37–42
“ພວກເຂົາຈະເປັນປະຊາຊົນຂອງເຮົາ, ແລະ ເຮົາຈະເປັນພຣະເຈົ້າຂອງພວກເຂົາ.”
ເຖິງແມ່ນວ່າຊາວອິດສະຣາເອນໄດ້ລະເມີດພັນທະສັນຍາຂອງພວກເຂົາ, ເຢເຣມີຢາໄດ້ທຳນາຍວ່າ ພຣະຜູ້ເປັນເຈົ້າຈະສະຖາປະນາ “ພັນທະສັນຍາໃໝ່” ແລະ “ເປັນນິດ” ກັບພວກເຂົາອີກຄັ້ງ (ເຢເຣມີຢາ 31:31; 32:40). ແມ່ນຫຍັງຄືພັນທະສັນຍານັ້ນ? ໃຫ້ພິຈາລະນາທີ່ຈະຊອກຫາຄວາມຮູ້ແຈ້ງຢູ່ໃນຄູ່ມືພຣະຄຳພີ, “ພັນທະສັນຍາໃໝ່ ແລະ ເປັນນິດ,” ຫ້ອງສະໝຸດພຣະກິດຕິຄຸນ.
ຂະນະທີ່ທ່ານອ່ານ ເຢເຣມີຢາ 31:31–34; 32:37–42, ໃຫ້ໄຕ່ຕອງ:
-
ການເປັນພາກສ່ວນຂອງຜູ້ຄົນແຫ່ງພັນທະສັນຍາຂອງພຣະເຈົ້າມີຄວາມໝາຍແນວໃດຕໍ່ທ່ານ.
-
ການມີກົດຂອງພຣະອົງຖືກຂຽນໄວ້ຢູ່ໃນໃຈຂອງທ່ານໝາຍຄວາມວ່າແນວໃດ.
-
ພຣະຜູ້ເປັນເຈົ້າສັນຍາຫຍັງແດ່ ເມື່ອທ່ານເຮັດພັນທະສັນຍາກັບພຣະອົງ.
-
ຄວາມສຳພັນແຫ່ງພັນທະສັນຍາຂອງທ່ານກັບພຣະຜູ້ເປັນເຈົ້າປ່ຽນແປງທ່ານແນວໃດ.
ທ່ານໄດ້ເຮັດຄຳສັນຍາຫຍັງແດ່ກັບພຣະເຈົ້າ ຂະນະທີ່ທ່ານໄດ້ມີສ່ວນຮ່ວມໃນພິທີການສັກສິດ. ພຣະອົງກຳລັງບັນລຸຄຳສັນຍາຂອງພຣະອົງກັບທ່ານແນວໃດ?
ເບິ່ງ David A. Bednar, “Bear Up Their Burdens with Ease,” Liahona, May 2023, 123–26 ນຳອີກ.
ເຢເຣມີຢາ 36
ພຣະຄຳພີມີພະລັງທີ່ຈະຫັນເຮົາໃຫ້ໜີຈາກຄວາມຊົ່ວຮ້າຍ.
ອີງຕາມ ເຢເຣມີຢາ 36:2–3, ເປັນຫຍັງພຣະຜູ້ເປັນເຈົ້າຈຶ່ງບັນຊາເຢເຣມີຢາໃຫ້ບັນທຶກຄຳທຳນາຍຂອງເພິ່ນເອົາໄວ້? ຂະນະທີ່ທ່ານອ່ານ ເຢເຣມີຢາ 36, ໃຫ້ສັງເກດເບິ່ງວ່າ ຜູ້ຄົນດັ່ງຕໍ່ໄປນີ້ໄດ້ຮູ້ສຶກແນວໃດກ່ຽວກັບຄຳທຳນາຍເຫລົ່ານີ້:
-
ພຣະຜູ້ເປັນເຈົ້າ (ເບິ່ງ ຂໍ້ທີ 1–3, 27–31)
-
ເຢເຣມີຢາ (ເບິ່ງ ຂໍ້ທີ 4–7, 32)
-
ບາຣຸກ (ເບິ່ງ ຂໍ້ທີ 4, 8–10, 14–18)
-
ເຢຮູດີ ແລະ ກະສັດເຢໂຮຍອາກິມ (ເບິ່ງ ຂໍ້ທີ 20–26)
-
ເອນນາທານ, ເດລາອີຢາ, ແລະ ເກມາຣີຢາ (ເບິ່ງ ຂໍ້ທີ 25)
ໃຫ້ໄຕ່ຕອງວ່າ ທ່ານຮູ້ສຶກແນວໃດກ່ຽວກັບພຣະຄຳພີ? ມັນໄດ້ຊ່ວຍທ່ານໃຫ້ຫັນໜີຈາກຄວາມຊົ່ວຮ້າຍແນວໃດ?
ເຢເຣມີຢາ 37–39
ຈົ່ງຍຶດໝັ້ນໃນການຕິດຕາມສາດສະດາຂອງພຣະເຈົ້າ.
ໃນ ເຢເຣມີຢາ 37:1–3, 15–21; 38:1–6, 14–28, ທ່ານເຫັນຫລັກຖານໃດແດ່ວ່າ ກະສັດເຊເດກີຢາໄດ້ເຊື່ອວ່າ ເຢເຣມີຢາເປັນສາດສະດາທີ່ແທ້ຈິງຂອງພຣະຜູ້ເປັນເຈົ້າ? ມີຫລັກຖານໃດແດ່ທີ່ທ່ານເຫັນວ່າເຊເດກີຢາບໍ່ໄດ້ເຊື່ອ? ທ່ານຮຽນຮູ້ຫຍັງແດ່ຈາກການປຽບທຽບນີ້? ຂະນະທີ່ທ່ານອ່ານ ເຢເຣມີຢາ 39, ໃຫ້ໄຕ່ຕອງວ່າມັນຈະສ້າງຄວາມແຕກຕ່າງແນວໃດຖ້າຫາກເຊເດກີຢາ ແລະ ຜູ້ຄົນຂອງເພິ່ນໄດ້ຕິດຕາມສາດສະດາ ແລະ ໄດ້ຮັກສາພຣະບັນຍັດຂອງພຣະຜູ້ເປັນເຈົ້າ. (ໃຫ້ປຽບທຽບສິ່ງທີ່ໄດ້ເກີດຂຶ້ນກັບເຊເດກີຢາກັບສິ່ງທີ່ໄດ້ເກີດຂຶ້ນກັບຄອບຄົວຂອງລີໄຮໃນ 1 ນີໄຟ 1–2.)
ເຢເຣມີຢາ 38:6–13; 39:15–18
ເຮົາສາມາດເປັນຄົນກ້າຫານໃນການຢືນຢັດເພື່ອສິ່ງທີ່ຖືກຕ້ອງ.
ເຈົ້າໜ້າທີ່ຂອງກະສັດໄດ້ຮູ້ສຶກວ່າ ຄຳທຳນາຍຂອງເຢເຣມີຢາໄດ້ເຮັດໃຫ້ທະຫານຂອງພວກເພິ່ນບໍ່ເຕັມໃຈຈະຕໍ່ສູ້, ສະນັ້ນພວກເພິ່ນຈຶ່ງໄດ້ໂຍນເຢເຣມີຢາລົງນ້ຳສ້າງທີ່ສົກກະປົກ (ເບິ່ງ ເຢເຣມີຢາ 38:1–4). ໃນ ເຢເຣມີຢາ 38:6–13, ແມ່ນຫຍັງທີ່ປະທັບໃຈທ່ານກ່ຽວກັບການຕອບຮັບຂອງເອເບັດເມເຫລັກ ຊາວເອທີໂອເປຍ? ໃຫ້ສັງເກດເບິ່ງພອນທີ່ພຣະຜູ້ເປັນເຈົ້າໄດ້ປະທານໃຫ້ເອເບັດເມເຫລັກນຳອີກໃນ ເຢເຣມີຢາ 39:15–18.
ທ່ານຈະສາມາດເຮັດຕາມຕົວຢ່າງຂອງເອເບັດເມເຫລັກໄດ້ແນວໃດ?
ສຽງຮ້ອງໄຫ້ຂອງເຢເຣມີຢາ
ເພງຄ່ຳຄວນ 1; 3
ພຣະຜູ້ເປັນເຈົ້າສາມາດບັນເທົາຄວາມໂສກເສົ້າທີ່ເຮົາປະເຊີນເພາະການບາບໄດ້.
ພຣະທຳເພງຄ່ຳຄວນເປັນການຮວບຮວມບົດກະວີທີ່ຖືກຂຽນຫລັງຈາກນະຄອນເຢຣູຊາເລັມ ແລະ ພຣະວິຫານຂອງມັນໄດ້ຖືກທຳລາຍ. ທ່ານຄິດວ່າເປັນຫຍັງມັນຈຶ່ງສຳຄັນທີ່ມັນຖືກຮັກສາໄວ້? ໃຫ້ພິຈາລະນາຄຳປຽບທຽບຢູ່ໃນ ເພງຄ່ຳຄວນ 1 ແລະ 3 ທີ່ຊ່ວຍທ່ານໃຫ້ເຂົ້າໃຈກ່ຽວກັບຄວາມໂສກເສົ້າອັນໃຫຍ່ຫລວງທີ່ຊາວອິດສະຣາເອນໄດ້ຮູ້ສຶກ. ຂ່າວສານໃດແດ່ເຖິງຄວາມຫວັງໃນພຣະຄຣິດທີ່ທ່ານພົບເຫັນ? (ເບິ່ງ ໂດຍສະເພາະ ເພງຄ່ຳຄວນ 3:20–33; ເບິ່ງ ມັດທາຍ 5:4; ຢາໂກໂບ 4:8–10; ແອວມາ 36:17–20 ນຳອີກ).
ປະທານເອັມ ຣະໂຊ ບາເລີດ ໄດ້ກ່າວເຖິງຫລາຍສະຖານະການທີ່ອາດກໍ່ໃຫ້ເກີດການສູນເສຍຄວາມຫວັງ, ແລະ ເພິ່ນໄດ້ໃຫ້ຄຳແນະນຳກ່ຽວກັບບ່ອນທີ່ຈະພົບເຫັນຄວາມຫວັງ:
“ເຮົາບາງຄົນອາດພົບເຫັນວ່າຊີວິດຂອງເຮົາກໍເຕັມໄປດ້ວຍຄວາມອຸກອັ່ງ, ຄວາມຜິດຫວັງ, ແລະ ຄວາມໂສກເສົ້າ. ຫລາຍຄົນຮູ້ສຶກສິ້ນຫວັງທີ່ຈະຮັບມືກັບຄວາມວຸ້ນວາຍທີ່ເບິ່ງຄືວ່າຈະໄຊຊະນະຢູ່ໃນໂລກ. ອີກບາງຄົນກໍເຈັບປວດເປັນເພາະສະມາຊິກໃນຄອບຄົວ ຜູ້ທີ່ຖືກນຳພາອອກໄປໂດຍກະແສຄຸນນະທຳທີ່ອ່ອນແອ ແລະ ມາດຕະຖານທາງສິນທຳທີ່ລົດໜ້ອຍຖອຍລົງ. … ຫລາຍຄົນກໍແມ່ນແຕ່ໄດ້ຍອມຈຳນົນຕໍ່ການຍອມຮັບຄວາມຊົ່ວຮ້າຍ ແລະ ຄວາມໂຫດຮ້າຍຂອງໂລກວ່າແກ້ໄຂບໍ່ໄດ້. ເຂົາເຈົ້າໄດ້ຍອມສິ້ນຫວັງແລ້ວ. …
“… ບາງຄົນໃນບັນດາພວກເຮົາອາດໄດ້ສູນເສຍຄວາມຫວັງທັງໝົດແລ້ວເພາະຍ້ອນບາບ ແລະ ການລ່ວງລະເມີດ. ຄົນຄົນໜຶ່ງສາມາດຈົມເລິກຢູ່ໃນວິທີການຂອງໂລກຈົນວ່າເຂົາບໍ່ເຫັນທາງອອກເລີຍ ແລະ ສູນເສຍຄວາມຫວັງທັງໝົດ. ຄຳອ້ອນວອນຂອງຂ້າພະເຈົ້າຕໍ່ທຸກຄົນທີ່ໄດ້ຕົກຢູ່ໃນກັບດັກຂອງຜູ້ປໍລະປັກແມ່ນວ່າ ຢ່າຍອມແພ້! ບໍ່ວ່າສະຖານະການເບິ່ງຄືວ່າຈະໝົດຫວັງ ຫລື ວ່າມັນອາດຈະສິ້ນຫວັງຂະໜາດໃດກໍຕາມ, ກະລຸນາຈົ່ງເຊື່ອຂ້າພະເຈົ້າເຖີດ, ທ່ານສາມາດມີຄວາມຫວັງໄດ້ສະເໝີ. ສະເໝີ” (“The Joy of Hope Fulfilled,” Ensign, Nov. 1992, 31–32).
ເບິ່ງ “Come, Ye Disconsolate,” Hymns, no. 115 ນຳອີກ.
ຊ່ວຍໃຫ້ຜູ້ອື່ນຮັບຜິດຊອບຕໍ່ການຮຽນຮູ້ຂອງເຂົາເຈົ້າເອງ. ບາງເທື່ອມັນຈະເບິ່ງຄືວ່າວິທີທີ່ງ່າຍທີ່ສຸດທີ່ຈະສິດສອນແມ່ນທີ່ຈະບອກຜູ້ຮຽນສິ່ງທີ່ເຮົາຄິດວ່າເຂົາເຈົ້າຄວນຮູ້. ເຖິງຢ່າງໃດກໍຕາມ, ວິທີທີ່ງ່າຍທີ່ສຸດຈະບໍ່ແມ່ນວິທີທີ່ດີທີ່ສຸດສະເໝີໄປ. ແອວເດີ ເດວິດ ເອ ແບ໊ດນາ ໄດ້ສິດສອນວ່າ: “ຄວາມຕັ້ງໃຈຂອງເຮົາບໍ່ຄວນເປັນວ່າ ‘ເຮົາຈະບອກເຂົາເຈົ້າຫຍັງແດ່?’ ແທນນັ້ນ, ຄຳຖາມທີ່ຈະຖາມຕົວເອງແມ່ນ ‘ເຮົາຈະເຊື້ອເຊີນໃຫ້ເຂົາເຈົ້າເຮັດຫຍັງ? ມີຄຳຖາມທີ່ດົນໃຈໃດແດ່ທີ່ເຮົາສາມາດຖາມ, ຖ້າຫາກເຂົາເຈົ້າເຕັມໃຈທີ່ຈະຕອບ, ທີ່ຈະເລີ່ມເຊື້ອເຊີນໃຫ້ພຣະວິນຍານບໍລິສຸດເຂົ້າມາສູ່ຊີວິດຂອງເຂົາເຈົ້າ?’” (evening with a General Authority, Feb. 7, 2020, broadcasts.ChurchofJesusChrist.org; ເບິ່ງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 25 ນຳອີກ). ມີຫລາຍວິທີທີ່ຈະຊ່ວຍໃຫ້ຜູ້ຮຽນມີຄວາມຮັບຜິດຊອບຕໍ່ການຮຽນຮູ້ຂອງເຂົາເຈົ້າ. ຍົກຕົວຢ່າງ, ຢູ່ໃນໂຄງຮ່າງນີ້ຜູ້ຮຽນຖືກເຊື້ອເຊີນໃຫ້ຄົ້ນຫາ, ໄຕ່ຕອງ, ຈັດລາຍຊື່, ເບິ່ງຮູບພາບ, ມີສ່ວນຮ່ວມໃນບົດຮຽນທີ່ໃຊ້ສິ່ງຂອງ, ແຕ້ມຮູບ, ແລະ ແບ່ງປັນ ແລະ ນຳໃຊ້ສິ່ງທີ່ເຂົາເຈົ້າຮຽນຮູ້.
ແນວຄິດສຳລັບການສິດສອນເດັກນ້ອຍ
ເຢເຣມີຢາ 31:3
ພຣະບິດາເທິງສະຫວັນ ແລະ ພຣະເຢຊູ ຮັກເຮົາດ້ວຍ “ຄວາມຮັກອັນໝັ້ນຄົງ.”
-
ຂະນະທີ່ທ່ານອ່ານ ເຢເຣມີຢາ 31:3 ກັບລູກໆຂອງທ່ານ, ພວກເຂົາສາມາດຊ່ວຍທ່ານຊອກຫາສິ່ງຂອງ (ຫລື ຮູບພາບຂອງສິ່ງຂອງ) ທີ່ທົນທານໄດ້ດົນນານ, ດັ່ງເຊັ່ນເງິນຫລຽນໂລຫະ, ແລະ ບາງສິ່ງທີ່ບໍ່ທົນທານ, ເຊັ່ນໝາກໄມ້. ພວກທ່ານສາມາດເວົ້າລົມກ່ຽວກັບວ່າ “ໝັ້ນຄົງ” ໝາຍຄວາມວ່າຫຍັງ ແລະ ແບ່ງປັນນຳກັນວ່າ ພວກທ່ານໄດ້ຮູ້ສຶກເຖິງ “ຄວາມຮັກອັນໝັ້ນຄົງ” ຂອງພຣະບິດາເທິງສະຫວັນແນວໃດ. ພວກທ່ານກໍສາມາດຮ້ອງເພງ ເຊັ່ນ “ສອນເຮົາຍ່າງໃນແສງ” (ເພງສວດ ແລະ ເພງຂອງເດັກນ້ອຍ, 72) ນຳກັນ ນຳອີກ.
ເຢເຣມີຢາ 31:31–34; 32:38–41.
ພຣະເຈົ້າຈະຊ່ວຍໃຫ້ເຮົາຮັກສາພັນທະສັນຍາຂອງເຮົາ.
-
ລູກໆຂອງທ່ານອາດມັກແຕ້ມຮູບຫົວໃຈໃສ່ເຈ້ຍ ແລະ ແລ້ວຂຽນໃສ່ຫົວໃຈນັ້ນສິ່ງທີ່ພວກເຂົາຮຽນຮູ້ຈາກ ເຢເຣມີຢາ 31:31–34 ກ່ຽວກັບການເຮັດພັນທະສັນຍາກັບພຣະເຈົ້າ. ທ່ານອາດຢາກທົບທວນພັນທະສັນຍາທີ່ພວກເຂົາໄດ້ເຮັດຕອນຮັບບັບຕິສະມາ (ເບິ່ງ ໂມໄຊຢາ 18:10, 13) ແລະ ສົນທະນາຄວາມໝາຍຂອງການມີຄຳສັນຍາເຫລົ່ານີ້ຖືກຂຽນໄວ້ຢູ່ໃນໃຈຂອງພວກເຂົາ.
ເຢເຣມີຢາ 36:1–4
ພຣະຄຳພີເປັນພຣະຄຳຂອງພຣະເຈົ້າ.
-
ໜ້າກິດຈະກຳຂອງອາທິດນີ້ ສາມາດຊ່ວຍໃຫ້ລູກໆຂອງທ່ານຮຽນຮູ້ກ່ຽວກັບເຢເຣມີຢາ, ບາຣຸກ, ແລະ ກະສັດ (ເບິ່ງ ເຢເຣມີຢາ 36). ພວກເຂົາຍັງສາມາດສະແດງທ່າທີທີ່ເຂົ້າກັບຖ້ອຍຄຳທີ່ຢູ່ໃນ ເຢເຣມີຢາ 36:4–10, ເຊັ່ນ ການຂຽນໃສ່ປຶ້ມ (ເບິ່ງ ຂໍ້ທີ 4) ແລະ ການອ່ານພຣະຄຳພີໃຫ້ຜູ້ຄົນຟັງ (ເບິ່ງ ຂໍ້ທີ 8, 10).
-
ທ່ານ ແລະ ລູກໆຂອງທ່ານສາມາດເບິ່ງປຶ້ມຂອງເດັກນ້ອຍ ແລະ ພຣະຄຳພີ ແລະ ເວົ້າລົມກ່ຽວກັບວ່າປຶ້ມເຫລົ່ານີ້ແຕກຕ່າງກັນແນວໃດ. ແມ່ນຫຍັງເຮັດໃຫ້ພຣະຄຳພີພິເສດ? ມັນອາດເປັນສິ່ງທີ່ດົນໃຈທີ່ຈະແບ່ງປັນນຳກັນ ຂໍ້ພຣະຄຳພີທີ່ພິເສດຕໍ່ພວກທ່ານ.
ເຢເຣມີຢາ 38:6–13
ເຮົາສາມາດຢືນຢັດເພື່ອສິ່ງທີ່ຖືກຕ້ອງ.
-
ທ່ານສາມາດໃຊ້ຮູບພາບທີ່ຢູ່ທ້າຍໂຄງຮ່າງເພື່ອຊ່ວຍລູກໆຂອງທ່ານໃຫ້ນຶກເຖິງພາບໃນເລື່ອງລາວຂອງເອເບັດເມເຫລັກຢູ່ໃນ ເຢເຣມີຢາ 38:6–13. ບາງທີທ່ານສາມາດຊ່ວຍພວກເຂົາຊອກຫາຂໍ້ພຣະຄຳພີ ບ່ອນທີ່ເອເບັດເມເຫລັກໄດ້ເຮັດບາງສິ່ງທີ່ກ້າຫານ ເພື່ອຊ່ວຍສາດສະດາຂອງພຣະຜູ້ເປັນເຈົ້າ. ເຮົາສາມາດເຮັດຫຍັງແດ່ເພື່ອສະແດງໃຫ້ເຫັນວ່າເຮົາຮູ້ວ່າສາດສະດາຂອງເຮົາໃນວັນເວລານີ້ຖືກເອີ້ນຈາກພຣະເຈົ້າ.
ເພງຄ່ຳຄວນ 1:1–2, 16; 3:22–26
ພຣະຜູ້ຊ່ວຍໃຫ້ລອດໄດ້ເຮັດໃຫ້ເປັນໄປໄດ້ສຳລັບເຮົາທີ່ຈະໄດ້ຮັບການໃຫ້ອະໄພຈາກບາບຂອງເຮົາ.
-
ເພື່ອແນະນຳພຣະທຳເພງຄ່ຳຄວນ, ທ່ານອາດຢາກອະທິບາຍໃຫ້ລູກໆຂອງທ່ານຊາບວ່າ ເປັນເພາະຊາວອິດສະຣາເອນບໍ່ກັບໃຈ, ນະຄອນເຢຣູຊາເລັມ ແລະ ພຣະວິຫານຈຶ່ງຖືກທຳລາຍ. ພວກທ່ານສາມາດແບ່ງປັນນຳກັນວ່າ ພວກທ່ານອາດຮູ້ສຶກແນວໃດຖ້າຫາກພວກທ່ານມີຊີວິດຢູ່ທີ່ນັ້ນໃນຍຸກສະໄໝນັ້ນ (ເບິ່ງ ເພງຄ່ຳຄວນ 1:1–2, 16). ຂ່າວສານຢູ່ໃນ ເພງຄ່ຳຄວນ 3:22–26 ອາດໄດ້ໃຫ້ຄວາມຫວັງທ່ານແນວໃດ?
-
ພວກທ່ານຍັງສາມາດບອກກັນແລະກັນກ່ຽວກັບເວລາທີ່ພວກທ່ານໄດ້ຮູ້ສຶກເສຍໃຈກ່ຽວກັບການເລືອກທີ່ທ່ານໄດ້ເລືອກເຮັດ. ເຮົາພົບເຫັນຫຍັງແດ່ໃນ ເພງຄ່ຳຄວນ 3:22–26 ທີ່ຊ່ວຍເຮົາໃຫ້ເຂົ້າໃຈການໃຫ້ອະໄພທີ່ພຣະເຢຊູຄຣິດສະເໜີມອບໃຫ້?
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.