“ວັນທີ 16–22 ເດືອນພະຈິກ. ‘ເຮົາຈະຮັກພວກເຂົາດ້ວຍສຸດໃຈ’: ໂຮເສອາ 1–6; 10–14; ໂຢເອນ,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 16–22 ເດືອນພະຈິກ. ‘ເຮົາຈະຮັກພວກເຂົາດ້ວຍສຸດໃຈ,’” ຈົ່ງຕາມເຮົາມາ: ພຣະຄຳພີເດີມ 2026

ວັນທີ 16–22 ເດືອນພະຈິກ: “ເຮົາຈະຮັກພວກເຂົາດ້ວຍສຸດໃຈ”

ໂຮເສອາ 1–6; 10–14; ໂຢເອນ

ພັນທະສັນຍາຂອງຊາວອິດສະຣາເອນກັບພຣະຜູ້ເປັນເຈົ້າຄົງເປັນເລື່ອງເລິກເຊິ່ງ ແລະ ມີຄວາມໝາຍທີ່ສຸດ ຈົນວ່າພຣະຜູ້ເປັນເຈົ້າໄດ້ປຽບທຽບມັນໃສ່ກັບການແຕ່ງງານ. ພັນທະສັນຍາ, ຄືກັນກັບການແຕ່ງງານ, ລວມທັງຄຳໝັ້ນສັນຍານິລັນດອນ, ການແບ່ງປັນປະສົບການ, ການສ້າງຊີວິດນຳກັນ, ຈົງຮັກພັກດີສະເໝີ, ແລະ, ຍິ່ງກວ່າທຸກສິ່ງ, ຮັກສຸດໃຈ. ໜ້າເສົ້າໃຈ, ຊາວອິດສະຣາເອນບໍ່ໄດ້ຊື່ສັດຕໍ່ພັນທະສັນຍາຂອງພວກເຂົາ. ແຕ່ຂ່າວສານຂອງພຣະຜູ້ເປັນເຈົ້າຕໍ່ພວກເຂົາບໍ່ແມ່ນວ່າ “ເຮົາຈະປະຕິເສດເຈົ້າຕະຫລອດໄປ.” ແຕ່ແມ່ນ “ເຮົາຈະເຊື້ອເຊີນເຈົ້າໃຫ້ກັບຄືນມາ” (ເບິ່ງ ໂຮເສອາ 2:14–15). “ເຮົາຈະໃຫ້ເຈົ້າເປັນເມຍຂອງເຮົາໃນຄວາມຊອບທຳ,” ພຣະອົງໄດ້ປະກາດຜ່ານທາງສາດສະດາໂຮເສອາ (ໂຮເສອາ 2:19). “ເຮົາຈະນຳປະຊາຊົນຂອງເຮົາຄືນມາ, ເຮົາຈະຮັກພວກເຂົາດ້ວຍສຸດໃຈ” (ໂຮເສອາ 14:4). ນີ້ເປັນຂ່າວສານອັນດຽວກັນທີ່ພຣະອົງໄດ້ມອບໃຫ້ເຮົາໃນທຸກວັນນີ້ ຂະນະທີ່ເຮົາສະແຫວງຫາທີ່ຈະດຳລົງຊີວິດຕາມພັນທະສັນຍາຂອງເຮົາດ້ວຍຄວາມຮັກ ແລະ ການອຸທິດຕົນ.

ໂຢເອນໄດ້ແບ່ງປັນຂ່າວສານທີ່ຄ້າຍຄືກັນນີ້ວ່າ: “ຈົ່ງກັບມາຫາພຣະຜູ້ເປັນເຈົ້າ ພຣະເຈົ້າຂອງເຈົ້າສາ: ພຣະອົງຊົງຄຸນຄວາມດີ ແລະ ເມດຕາເຕັມລົ້ນ, ພຣະອົງອົດທົນ ແລະ ເຮັດທຸກຢ່າງຕາມພຣະສັນຍາ ພ້ອມສະເໝີທີ່ຈະໃຫ້ອະໄພ ແລະ ຍົກໂທດໃຫ້” (ໂຢເອນ 2:13). ການອ່ານຖ້ອຍຄຳຂອງສາດສະດາເຫລົ່ານີ້ອາດກະຕຸ້ນທ່ານໃຫ້ໄຕ່ຕອງຄວາມສຳພັນຂອງທ່ານເອງກັບພຣະຜູ້ເປັນເຈົ້າ—ໃຫ້ຄິດກ່ຽວກັບວ່າ ຄວາມຊື່ສັດຂອງພຣະອົງຕໍ່ທ່ານ ດົນໃຈທ່ານໃຫ້ຊື່ສັດຕໍ່ພຣະອົງແນວໃດ.

ສຳລັບພາບລວມຂອງພຣະທຳໂຮເສອາ ແລະ ໂຢເອນ, ໃຫ້ເບິ່ງ “ໂຮເສອາ, ຫລື ໂຮເຊຢາ” ແລະ “ໂຢເອນ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ໂຮເສອາ 1–3; 14

ພຣະຜູ້ເປັນເຈົ້າເຊື້ອເຊີນເຮົາໃຫ້ຫັນມາຫາພຣະອົງສະເໝີ.

ນາງໂກເມ ເມຍຂອງໂຮເສອາບໍ່ຊື່ສັດຕໍ່ເພິ່ນ, ແລະ ພຣະເຈົ້າໄດ້ຊີ້ໄປທີ່ເລື່ອງທີ່ໂສກເສົ້ານີ້ ເພື່ອສິດສອນຊາວອິດສະຣາເອນວ່າ ພຣະອົງໄດ້ຮູ້ສຶກແນວໃດກ່ຽວກັບພວກເຂົາ ແລະ ກ່ຽວກັບພັນທະສັນຍາຂອງພວກເຂົາກັບພຣະອົງ. ຂະນະທີ່ທ່ານອ່ານ ໂຮເສອາ 1–3, ໃຫ້ໄຕ່ຕອງວິທີທີ່ພຣະຜູ້ເປັນເຈົ້າເບິ່ງຄວາມສຳພັນຂອງພຣະອົງກັບຜູ້ຄົນແຫ່ງພັນທະສັນຍາຂອງພຣະອົງແນວໃດ. ການເຮັດພັນທະສັນຍາກັບພຣະຜູ້ເປັນເຈົ້າເປັນເໝືອນການເຂົ້າສູ່ການແຕ່ງງານແນວໃດ? ການລົ້ມເຫລວທີ່ຈະຮັກສາພັນທະສັນຍານັ້ນເປັນເໝືອນການບໍ່ຊື່ສັດຕໍ່ຄູ່ຄອງແນວໃດ? (ເບິ່ງ ໂຮເສອາ 2:5–7, 13). ໂຮເສອາ 2:14–23 ສິດສອນທ່ານຫຍັງແດ່ກ່ຽວກັບຄວາມຮັກ ແລະ ຄວາມເມດຕາຂອງພຣະຜູ້ເປັນເຈົ້າ? ທ່ານຈະສະແດງໃຫ້ພຣະອົງເຫັນເຖິງຄວາມຮັກ ແລະ ຄວາມຈົງຮັກພັກດີຂອງທ່ານແນວໃດ?

ໃນ ໂຮເສອາ 14, ໃຫ້ຊອກຫາຄຳສັນຍາທີ່ສວຍງາມຢ່າງຫລວງຫລາຍທີ່ພຣະຜູ້ເປັນເຈົ້າກະທຳກັບຜູ້ຄົນທີ່ຫັນກັບມາຫາພຣະອົງ. ວະລີທີ່ວ່າ “ຮັກພວກເຂົາດ້ວຍສຸດໃຈ” ມີຄວາມໝາຍແນວໃດຕໍ່ທ່ານ? (ຂໍ້ທີ 4). ການປຽບທຽບຕົ້ນໄມ້ຢູ່ໃນ ຂໍ້ທີ 5–8 ສິດສອນທ່ານຫຍັງແດ່ກ່ຽວກັບພອນຂອງພຣະຜູ້ເປັນເຈົ້າ, ລວມທັງພອນຂອງການກັບໃຈ? ເພື່ອເປັນພາກສ່ວນຂອງການສຶກສາຂອງທ່ານ, ໃຫ້ພິຈາລະນາທີ່ຈະຮ້ອງເພງ ຫລື ຟັງເພງສວດກ່ຽວກັບຄວາມເມດຕາຂອງພຣະຜູ້ຊ່ວຍໃຫ້ລອດ, ເຊັ່ນ “ຂ້າຂໍຂອບພຣະໄທອົງບິດາ” (ເພງສວດ ແລະ ເພງຂອງເດັກນ້ອຍ, 67).

ຜູ້ຍິງທີ່ເສົ້າໃຈ — ນາງໂກເມ, ຜູ້ຊຶ່ງເປັນຕົວແທນໃຫ້ແກ່ຊາວອິດສະຣາເອນ ແລະ ພັນທະສັນຍາທີ່ແຕກສະຫລາຍ, ໄດ້ຮັບຂໍ້ສະເໜີການໄຖ່ໂດຍພຣະຜູ້ເປັນເຈົ້າ. ຮູບພາບໂດຍ ແດບ ມິນນາດ, ໄດ້ຮັບອະນຸຍາດຈາກ goodsalt.com

ໂຮເສອາ 6:4–7; ໂຢເອນ 2:12–13

ການອຸທິດຕົນຕໍ່ພຣະເຈົ້າຈະຕ້ອງຮູ້ສຶກຢູ່ພາຍໃນ, ບໍ່ແມ່ນການສະແດງອອກພາຍນອກເທົ່ານັ້ນ.

ຜູ້ຄົນໃນວັນເວລາຂອງໂຮເສອາໄດ້ຖວາຍສັດເປັນເຄື່ອງບູຊາ, ແຕ່ພວກເຂົາໄດ້ລະເມີດພຣະບັນຍັດທີ່ສຳຄັນກວ່າ. ທ່ານຄິດວ່າ ພຣະຜູ້ເປັນເຈົ້າ “ຕ້ອງການໃຫ້ພວກເຈົ້າຮັກເຮົາຢ່າງຈິງໃຈ, ບໍ່ແມ່ນນຳສັດມາຖວາຍບູຊາ; ເຮົາຢາກໃຫ້ປະຊາຊົນຂອງເຮົາຮູ້ຈັກເຮົາ ຫລາຍກວ່າທີ່ຈະເຜົາຖວາຍແກ່ເຮົາ” ໝາຍຄວາມວ່າແນວໃດ? (ໂຮເສອາ 6:6). ທ່ານຄິດວ່າການໃຫ້ຄວາມຊອບທຳເປັນຄືກ້ອນເມກ ຫລື ນ້ຳໝອກນັ້ນໝາຍຄວາມວ່າແນວໃດ? (ເບິ່ງ ໂຮເສອາ 6:4). ຄວາມຊອບທຳຂອງເຮົາຄວນເປັນແບບໃດ? (ເບິ່ງ ເອຊາຢາ 48:18; 1 ນີໄຟ 2:9–10).

ທ່ານກໍສາມາດອ່ານ ມັດທາຍ 9:10–13; 12:1–8 ນຳອີກ ເພື່ອຈະໄດ້ເຫັນວິທີທີ່ພຣະຜູ້ຊ່ວຍໃຫ້ລອດໄດ້ໃຊ້ ໂຮເສອາ 6:6 ລະຫວ່າງການປະຕິບັດສາດສະໜາກິດຂອງພຣະອົງ. ຂໍ້ພຣະຄຳພີເຫລົ່ານີ້ຊ່ວຍທ່ານໃຫ້ເຂົ້າໃຈຖ້ອຍຄຳຂອງໂຮເສອາແນວໃດ?

ເມື່ອອ່ານ ໂຢເອນ 2:12–13, ມັນອາດຊ່ວຍໄດ້ທີ່ຈະຮູ້ວ່າ ການສີກ ຫລື ການຈີກເສື້ອຜ້າຂອງຕົນເປັນສັນຍານພາຍນອກເຖິງການໄວ້ທຸກ ຫລື ການສຳນຶກຜິດ. ການສີກໃຈຂອງເຮົາແຕກຕ່າງຈາກການສີກເສື້ອຜ້າຂອງເຮົາແນວໃດ?

ໂຢເອນ 2

“ເຮົາຈະເທວິນຍານຂອງເຮົາແກ່ຄົນທັງປວງ.”

ທ່ານເຫັນຄວາມຄ້າຍຄືກັນຫຍັງແດ່ລະຫວ່າງວັນເວລາຂອງເຮົາ ແລະ ວັນເວລາທີ່ໂຢເອນໄດ້ເຫັນລ່ວງໜ້າ? (ເບິ່ງ ໂດຍສະເພາະ ໂຢເອນ 2:1–2, 11, 18–32). ແມ່ນຫຍັງທີ່ປະທັບໃຈທ່ານກ່ຽວກັບພອນທີ່ພຣະຜູ້ເປັນເຈົ້າໄດ້ສັນຍາໄວ້ ຢູ່ໃນ ຂໍ້ທີ 18–32? ເປັນຫຍັງພອນເຫລົ່ານີ້ອາດມີຄຸນຄ່າໂດຍສະເພາະໃນວັນເວລານີ້?

ມັນອາດເປັນເລື່ອງທີ່ໜ້າສົນໃຈ ທີ່ຈະອ່ານສິ່ງທີ່ໂມໂຣໄນໄດ້ກ່າວກ່ຽວກັບ ໂຢເອນ 2 ເມື່ອເພິ່ນໄດ້ມາຢ້ຽມຢາມໂຈເຊັບ ສະມິດ ໃນປີ 1823 (ເບິ່ງ ໂຈເຊັບ ສະມິດ—ປະຫວັດ 1:41). ທ່ານຮູ້ສຶກວ່າຄຳທຳນາຍຢູ່ໃນ ໂຢເອນ 2:28–32 ກຳລັງເກີດເປັນຈິງໃນວັນເວລາຂອງເຮົາແນວໃດ? (ເບິ່ງ ກິດຈະການ 2:1–21 ນຳອີກ). ທ່ານຄິດວ່າ ພຣະຜູ້ເປັນເຈົ້າຈະ “ເທວິນຍານ [ຂອງພຣະອົງ] ແກ່ຄົນທັງປວງ” ໝາຍຄວາມວ່າແນວໃດ? (ໂຢເອນ 2:28).

ທ່ານອາດໄຕ່ຕອງຖ້ອຍຄຳເຫລົ່ານີ້ຂອງ ປະທານຣະໂຊ ເອັມ ແນວສັນ ວ່າ: “ໃນອະນາຄົດ, ມັນເປັນໄປບໍ່ໄດ້ ທີ່ເຮົາຈະປອດໄພທາງວິນຍານ ຖ້າປາດສະຈາກການນຳພາ, ການຊີ້ນຳ, ການປອບໂຍນ, ແລະ ອິດທິພົນທີ່ບໍ່ເຄີຍຂາດຂອງພຣະວິນຍານບໍລິສຸດ” (“Revelation for the Church, Revelation for Our Lives,” Liahona, May 2018, 96). ເປັນຫຍັງການເປີດເຜີຍຈຶ່ງຈຳເປັນຕໍ່ຄວາມຢູ່ລອດທາງວິນຍານຂອງທ່ານ?

ທ່ານສາມາດເຮັດສິ່ງໃດໄດ້ແດ່ຖ້າຫາກທ່ານຮູ້ສຶກຄືວ່າທ່ານບໍ່ໄດ້ຮັບການຖອກເທພຣະວິນຍານນັ້ນ? ຕໍ່ໄປນີ້ແມ່ນບາງຕົວຢ່າງທີ່ອາດຊ່ວຍໄດ້. ຜູ້ຄົນໃນຂໍ້ພຣະຄຳພີເຫລົ່ານີ້ໄດ້ເຮັດຫຍັງແດ່ເພື່ອຈະໄດ້ຮັບການຖອກເທພຣະວິນຍານຂອງພຣະຜູ້ເປັນເຈົ້າ?

ຂະນະທີ່ທ່ານອ່ານຖ້ອຍຄຳເຫລົ່ານີ້ຈາກ ແອວເດີ ເດວິດ ເອ ແບ໊ດນາ, ໃຫ້ໄຕ່ຕອງວ່າ ມັນມີຄວາມໝາຍແນວໃດຕໍ່ທ່ານທີ່ຈະຮູ້ສຶກເຖິງການຖອກເທຂອງພຣະວິນຍານບໍລິສຸດໃນຊີວິດປະຈຳວັນຂອງທ່ານ:

“ເຮົາມັກຈະເຮັດໃຫ້ມັນຍາກແກ່ຕົວເອງທີ່ຈະໄດ້ຮັບການເປີດເຜີຍສ່ວນຕົວ. ໂດຍຄຳນັ້ນຂ້າພະເຈົ້າໝາຍຄວາມວ່າຄຳສັນຍາແຫ່ງພັນທະສັນຍາແມ່ນວ່າ ເຮົາໃຫ້ກຽດພັນທະສັນຍາຂອງເຮົາ, ເພື່ອວ່າເຮົາຈະມີພຣະວິນຍານບໍລິສຸດສະຖິດຢູ່ເປັນເພື່ອນຕະຫລອດເວລາ. ແຕ່ເຮົາກ່າວກ່ຽວກັບສິ່ງນັ້ນ ແລະ ເຮົາຖືມັນຄືກັບວ່າ ໄດ້ຍິນສຸລະສຽງຂອງພຣະຜູ້ເປັນເຈົ້າ ຜ່ານທາງພຣະວິນຍານຂອງພຣະອົງນັ້ນເປັນເຫດການທີ່ຫາໄດ້ຍາກ. … [ພຣະວິນຍານ] ຄວນສະຖິດຢູ່ນຳເຮົາຕະຫລອດເວລາ. ບໍ່ແມ່ນທຸກໆວິນາທີ, ແຕ່ຖ້າຫາກຜູ້ຄົນເຮັດໃຫ້ດີທີ່ສຸດ—ບໍ່ຈຳເປັນຕ້ອງດີພ້ອມ—ແຕ່ຖ້າຫາກທ່ານ ແລະ ຂ້າພະເຈົ້າກຳລັງເຮັດໃຫ້ດີທີ່ສຸດ ແລະ ບໍ່ລ່ວງລະເມີດທີ່ຮ້າຍແຮງ, ແລ້ວເຮົາສາມາດເພິ່ງອາໄສພຣະວິນຍານບໍລິສຸດໃຫ້ຊີ້ນຳເຮົາ. …

“… ເຮົາເບິ່ງຄືວ່າຈະເຊື່ອວ່າພຣະວິນຍານບໍລິສຸດແມ່ນໜ້າປະຫລາດໃຈ ແລະ ຍິ່ງໃຫຍ່ ແລະ ທັນທີທັນໃດ, ໃນເມື່ອມັນແຜ່ວເບົາ ແລະ ເພີ່ມຂຶ້ນຕາມໄລຍະເວລາ” (“Elder David A. Bednar Discussion” [ຄ່ຳຄືນກັບເຈົ້າໜ້າທີ່ຊັ້ນຜູ້ໃຫຍ່, ວັນທີ 7 ເດືອນກຸມພາ, 2020], broadcasts.ChurchofJesusChrist.org).

ເບິ່ງ Gary E. Stevenson, “Promptings of the Spirit,” Liahona, Nov. 2023, 42–45; “Enemy Territory” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສ້າງສະພາບແວດລ້ອມທາງວິນຍານ. “ທ່ານໄດ້ສັງເກດເຫັນຫຍັງແດ່ທີ່ມີສ່ວນຊ່ວຍໃຫ້ກັບສະພາບແວດລ້ອມທາງວິນຍານສໍາລັບການຮຽນຮູ້ພຣະກິດຕິຄຸນ? ແມ່ນຫຍັງທີ່ເຮັດໃຫ້ພຣະວິນຍານລົດນ້ອຍລົງ? … ຄິດກ່ຽວກັບສະພາບແວດລ້ອມບ່ອນທີ່ທ່ານສິດສອນເລື້ອຍໆ [ຫລື ຮຽນຮູ້]. ທ່ານຮູ້ສຶກແນວໃດຕອນທ່ານຢູ່ທີ່ນັ້ນ? ທ່ານຈະສາມາດເຊື້ອເຊີນໃຫ້ພຣະວິນຍານມາສະຖິດຢູ່ທີ່ນັ້ນຢ່າງມີປະສິດທິພາບໄດ້ແນວໃດ?” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 7).

ແນວຄິດສຳລັບການສິດສອນເດັກນ້ອຍ

ໂຮເສອາ 2:19–20

ເຮົາສາມາດຮັກສາພັນທະສັນຍາຂອງເຮົາໄດ້ຢ່າງຊື່ສັດ.

ໃນພຣະທຳໂຮເສອາ, ພຣະຜູ້ເປັນເຈົ້າໄດ້ປຽບທຽບພັນທະສັນຍາຂອງພຣະອົງກັບຜູ້ຄົນຂອງພຣະອົງໃສ່ກັບການແຕ່ງງານ. ເພື່ອຮຽນຮູ້ຈາກການປຽບທຽບນີ້, ທ່ານ ແລະ ລູກໆຂອງທ່ານສາມາດເບິ່ງຮູບພາບຂອງເຈົ້າສາວ ແລະ ເຈົ້າບ່າວ ແລະ ເວົ້າລົມກ່ຽວກັບວ່າ ພຣະບິດາເທິງສະຫວັນປະສົງໃຫ້ສາມີ ແລະ ພັນລະຍາປະຕິບັດຕໍ່ກັນແນວໃດ. ຊ່ວຍລູກໆຂອງທ່ານຊອກຫາຖ້ອຍຄຳຢູ່ໃນ ໂຮເສອາ 2:19–20 ທີ່ບັນຍາຍວ່າ ພຣະຜູ້ເປັນເຈົ້າຮູ້ສຶກແນວໃດກ່ຽວກັບເຮົາ. ເຮົາຈະສາມາດສະແດງໃຫ້ພຣະຜູ້ເປັນເຈົ້າເຫັນວ່າເຮົາຮັກພຣະອົງ ແລະ ຈະຊື່ສັດຕໍ່ພຣະອົງໄດ້ແນວໃດ?

ໂຮເສອາ 10:12

“ມັນເຖິງເວລາທີ່ຈະສະແຫວງຫາພຣະຜູ້ເປັນເຈົ້າ.”

ໂຮເສອາ 10:12 ອ້າງເຖິງການຫວ່ານ, ການເກັບກ່ຽວ, ເວລາ, ແລະ ຝົນ ເພື່ອເຊື້ອເຊີນເຮົາໃຫ້ສະແຫວງຫາພຣະຜູ້ເປັນເຈົ້າ. ຂະນະທີ່ທ່ານອ່ານຂໍ້ນີ້, ມີຄວາມຄິດສ້າງສັນຫຍັງແດ່ເຂົ້າມາສູ່ຄວາມຄິດ ທີ່ສາມາດດົນໃຈລູກໆຂອງທ່ານໃຫ້ສະແຫວງຫາພຣະອົງ? ຍົກຕົວຢ່າງ, ບາງທີລູກໆຂອງທ່ານສາມາດແຕ້ມຮູບນາລິກາ ແລະ ຂຽນວິທີທີ່ພວກເຂົາສາມາດສະແຫວງຫາພຣະຜູ້ເປັນເຈົ້າໃນຊ່ວງເວລາທີ່ຕ່າງກັນຕະຫລອດທັງວັນ. ເພງເຊັ່ນ “Anytime, Anywhere” (ຫ້ອງສະໝຸດພຣະກິດຕິຄຸນ) ສາມາດຊ່ວຍທ່ານສິດສອນວ່າ ມັນເປັນເວລາທີ່ດີສະເໝີທີ່ຈະສະແຫວງຫາພຣະຜູ້ເປັນເຈົ້າ.
ຫລື ລູກໆຂອງທ່ານສາມາດສະແດງທ່າທີທີ່ລຽບງ່າຍທີ່ເຂົ້າກັບຂໍ້ພຣະຄຳພີ, ເຊັ່ນການທຳທ່າປູກເມັດພືດ, ເກັບຜັກ, ຫລື ຢືນຢູ່ໃນຝົນ. ຊ່ວຍລູກໆຂອງທ່ານປຽບທຽບການປູກເມັດພືດ ແລະ ການເກັບກ່ຽວອາຫານທີ່ດີໃສ່ກັບການດຳລົງຊີວິດຢ່າງຊອບທຳ ແລະ ການໄດ້ຮັບພອນຂອງພຣະຜູ້ເປັນເຈົ້າ. ແລ້ວພວກທ່ານສາມາດບອກກັນແລະກັນກ່ຽວກັບພອນທີ່ພຣະຜູ້ເປັນເຈົ້າໄດ້ຖອກເທລົງມາໃຫ້ພວກທ່ານ ຂະນະທີ່ພວກທ່ານໄດ້ພະຍາຍາມສະແຫວງຫາພຣະອົງ.

ໂຮເສອາ 13:4, 14

ພຣະເຢຊູຄຣິດເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ.

ເພື່ອເນັ້ນຄວາມຈິງຢູ່ໃນ ໂຮເສອາ 13:4 ວ່າບໍ່ມີພຣະຜູ້ຊ່ວຍໃຫ້ລອດຍົກເວັ້ນພຣະເຢຊູຄຣິດ, ທ່ານສາມາດສະແດງໃຫ້ລູກໆຂອງທ່ານເຫັນຮູບພາບຂອງຫລາຍຄົນ, ລວມທັງພຣະເຢຊູ. ລູກໆຂອງທ່ານສາມາດປ່ຽນຜຽນກັນຊີ້ໄປຫາຜູ້ຄົນທີ່ມີອຳນາດຈະຊ່ວຍກູ້ເຮົາໃຫ້ລອດຈາກບາບ ແລະ ຄວາມຕາຍ. ແບ່ງປັນປະຈັກພະຍານຂອງທ່ານເຖິງພຣະເຢຊູຄຣິດ ແລະ ການຊົດໃຊ້ຂອງພຣະອົງ.
ລູກໆຂອງທ່ານສາມາດຊອກຫາຖ້ອຍຄຳຢູ່ໃນ ໂຮເສອາ 13:4, 14 ທີ່ບັນຍາຍເຖິງພຣະເຢຊູຄຣິດ. ຖ້ອຍຄຳເຫລົ່ານີ້ສິດສອນເຮົາຫຍັງແດ່ກ່ຽວກັບພຣະອົງ? ໃຫ້ພິຈາລະນາທີ່ຈະຊ່ວຍລູກໆຂອງທ່ານໃຫ້ໃຊ້ ຄູ່ມືພຣະຄຳພີ ເພື່ອຊອກຫາຂໍ້ພຣະຄຳພີອື່ນໆທີ່ສິດສອນວ່າ ພຣະເຢຊູຄຣິດເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ແບ່ງປັນນຳກັນວ່າ ພວກທ່ານຮູ້ສຶກແນວໃດກ່ຽວກັບພຣະເຢຊູຄຣິດ.

ໂຢເອນ 2:28–29

ພຣະວິນຍານບໍລິສຸດສາມາດນຳພາເຮົາ.

ບາງທີທ່ານສາມາດຊ່ວຍລູກໆຂອງທ່ານໃຫ້ເຂົ້າໃຈ ໂຢເອນ 2:28–29 ໂດຍການປ່ອຍໃຫ້ພວກເຂົາເທນ້ຳ ແລະ ແລ້ວໃຫ້ປຽບທຽບມັນໃສ່ກັບການຢອດນ້ຳ ຫລື ການຊິດນ້ຳ. ຄຳວ່າພຣະວິນຍານຈະຖືກ “ເທ” ໃສ່ເຮົາ ໝາຍຄວາມວ່າແນວໃດ?
ຂະນະທີ່ພວກທ່ານອ່ານ ໂຢເອນ 2:28–29 ນຳກັນ, ທ່ານອາດເຊື້ອເຊີນລູກໆຂອງທ່ານໃຫ້ເອົາຊື່ຂອງກັນແລະກັນໃສ່ແທນວະລີ “ລູກຊາຍ” ແລະ “ລູກຍິງ.” ແລ້ວຊ່ວຍພວກເຂົາໃຫ້ຄົ້ນຫາຂໍ້ພຣະຄຳພີເຊັ່ນ ໂຢຮັນ 14:16; ໂມໂຣໄນ 10:5; ຄຳສອນ ແລະ ພັນທະສັນຍາ 42:17 ເພື່ອພົບເຫັນວ່າພຣະວິນຍານສາມາດຊ່ວຍພວກເຂົາແນວໃດ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ພຣະເຢຊູກຳລັງກວັກມືເອີ້ນຢູ່ທີ່ປາກປະຕູ — Savior [ພຣະຜູ້ຊ່ວຍໃຫ້ລອດ], ໂດຍ ແຄວລີ ພິວ

ໜ້າກິດຈະກຳປະຖົມໄວ: ພຣະວິນຍານບໍລິສຸດສາມາດນຳພາເຮົາ — Savior [ພຣະຜູ້ຊ່ວຍໃຫ້ລອດ], ໂດຍ ແຄວລີ ພິວ