“ວັນທີ 2–8 ເດືອນພະຈິກ. ‘ເຮົາຈະໃຫ້ພວກເຂົາມີຄວາມຄິດໃໝ່’: ເອເຊກຽນ 1–3; 33–34; 36–37; 47,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 2–8 ເດືອນພະຈິກ. ‘ເຮົາຈະໃຫ້ພວກເຂົາມີຄວາມຄິດໃໝ່,’” ຈົ່ງຕາມເຮົາມາ: ພຣະຄຳພີເດີມ 2026

ວັນທີ 2–8 ເດືອນພະຈິກ: “ເຮົາຈະໃຫ້ພວກເຂົາມີຄວາມຄິດໃໝ່”

ເອເຊກຽນ 1–3; 33–34; 36–37; 47

ເອເຊກຽນເປັນສາດສະດາຜູ້ຖືກເນລະເທດ. ພ້ອມກັບຊາວອິດສະຣາເອນຄົນອື່ນໆ, ເພິ່ນໄດ້ຖືກຈັບໄປ ແລະ ຖືກສົ່ງໄປທີ່ບາບີໂລນ. ໃນເຢຣູຊາເລັມ, ເອເຊກຽນຄົງໄດ້ເປັນປະໂລຫິດຮັບໃຊ້ຢູ່ໃນພຣະວິຫານ. ໃນບາບີໂລນ, ເພິ່ນໄດ້ຢູ່ກັບບັນດາ “ພວກຊະເລີຍ,” ແລະ ເພິ່ນ “ໄດ້ພັກເຊົາຢູ່ທີ່ນັ້ນ” (ເອເຊກຽນ 3:15), ເປັນໄລຍະໄກຫລາຍຮ້ອຍກິໂລແມັດຈາກບ້ານທີ່ຮັກຫອມຂອງພຣະເຈົ້າ ແລະ ມີຄວາມຫວັງໜ້ອຍທີ່ຈະໄດ້ກັບຄືນ. ແລ້ວມື້ໜຶ່ງເອເຊກຽນໄດ້ມີພາບນິມິດ. ເພິ່ນໄດ້ເຫັນ “ສະຫງ່າລາສີຂອງພຣະຜູ້ເປັນເຈົ້າ” (ເອເຊກຽນ 1:28)—ບໍ່ແມ່ນຢູ່ໃນພຣະວິຫານທີ່ເຢຣູຊາເລັມ ແຕ່ໃນບາບີໂລນໃນບັນດາຜູ້ຖືກເນລະເທດ. ເພິ່ນໄດ້ເຫັນວ່າ ຄວາມຊົ່ວຢູ່ໃນເຢຣູຊາເລັມຮ້າຍແຮງທີ່ສຸດ ຈົນວ່າພຣະເຈົ້າບໍ່ປະທັບຢູ່ທີ່ນັ້ນອີກຕໍ່ໄປ (ເບິ່ງ ເອເຊກຽນ 8–11; 33:21).

ແຕ່ກໍຍັງມີບາງສິ່ງທີ່ໃຫ້ຄວາມຫວັງກ່ຽວກັບຂ່າວສານຂອງເອເຊກຽນ. ບໍ່ວ່າຜູ້ຄົນແຫ່ງພັນທະສັນຍາໄດ້ຕົກລົງຕ່ຳເທົ່າໃດກໍຕາມ, ພຣະເຈົ້າຍັງບໍ່ປະຖິ້ມພວກເຂົາຢ່າງສິ້ນເຊີງ. ຖ້າຫາກພວກເຂົາຈະ “ຮັບຟັງພຣະຄຳຂອງພຣະຜູ້ເປັນເຈົ້າ” (ເອເຊກຽນ 37:4), ແລ້ວ ສິ່ງທີ່ຄັ້ງໜຶ່ງເຄີຍຕາຍໄປ ຈະຄືນມີຊີວິດອີກ. “ໃຈແຂງດັ່ງຫີນ” ຂອງພວກເຂົາສາມາດປ່ຽນເປັນ “ຈິດໃຈໃໝ່” ໄດ້ (ເອເຊກຽນ 36:26). ແລະ ໃນອະນາຄົດ, ພຣະຜູ້ເປັນເຈົ້າຈະສະຖາປະນາພຣະວິຫານແຫ່ງໃໝ່ ແລະ ເຢຣູຊາເລັມໃໝ່ຂຶ້ນ, “ຕັ້ງແຕ່ນີ້ຕໍ່ໄປຊື່ຂອງນະຄອນນີ້ແມ່ນ, ພຣະຜູ້ເປັນເຈົ້າສະຖິດຢູ່ທີ່ນີ້” (ເອເຊກຽນ 48:35).

ສຳລັບພາບລວມຂອງພຣະທຳເອເຊກຽນ, ໃຫ້ເບິ່ງ “ເອເຊກຽນ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເອເຊກຽນ 3; 34

ພຣະຜູ້ເປັນເຈົ້າເຊື້ອເຊີນເຮົາໃຫ້ລ້ຽງແກະຂອງພຣະອົງ.

ໃນ ເອເຊກຽນ 3 ແລະ 34, ພຣະຜູ້ເປັນເຈົ້າອ້າງເຖິງບັນດາຜູ້ນຳຜູ້ຄົນຂອງພຣະອົງ ວ່າເປັນຄົນຍາມ ແລະ ຜູ້ລ້ຽງແກະ. ຂະນະທີ່ທ່ານອ່ານບົດເຫລົ່ານີ້, ໃຫ້ພິຈາລະນາສິ່ງທີ່ຫົວຂໍ້ເຫລົ່ານີ້ແນະນຳກ່ຽວກັບວ່າການເປັນຜູ້ນຳໝາຍຄວາມວ່າແນວໃດ.

ແມ່ນໃຜເປັນ “ຝູງແກະ” ທີ່ພຣະຜູ້ເປັນເຈົ້າປະສົງໃຫ້ທ່ານລ້ຽງດູ? ທ່ານພົບເຫັນຫຍັງແດ່ຢູ່ໃນ ເອເຊກຽນ 34 ທີ່ສາມາດຊ່ວຍບາງຄົນໃຫ້ກະກຽມທີ່ຈະຮັບໃຊ້ເຜີຍແຜ່, ລ້ຽງດູລູກໆ, ຫລື ບັນລຸການມອບໝາຍການປະຕິບັດສາດສະໜາກິດ? ທ່ານຈະເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດໃນຖານະຜູ້ລ້ຽງແກະໄດ້ແນວໃດ? (ເບິ່ງ ຂໍ້ທີ 11–31).

ທ່ານອາດໄຕ່ຕອງສັນຍາລັກທີ່ທ່ານພົບເຫັນຢູ່ໃນບົດນີ້ນຳອີກ. “ທົ່ງຫຍ້າຂຽວສົດ” ແລະ “ຝູງແກະ” ເປັນຕົວແທນໃຫ້ແກ່ສິ່ງໃດໃນ ຂໍ້ທີ 14? ແມ່ນຫຍັງຄືຄວາມແຕກຕ່າງລະຫວ່າງແກະໂຕທີ່ “ຫລົງເສຍໄປ” ແລະ ແກະໂຕທີ່ “ຊັດເຊພະເນຈອນໄປ”? (ຂໍ້ທີ 16). ທ່ານເຫັນສັນຍາລັກອື່ນໃດແດ່?

ເບິ່ງ ໂຢຮັນ 21:15–17; Gerrit W. Gong, “Ministering,” Liahona, May 2023, 16–19 ນຳອີກ.

ເອເຊກຽນ 33:10–19

ພຣະຜູ້ເປັນເຈົ້າປະສົງທີ່ຈະໃຫ້ອະໄພ.

“ຖ້າຫາກ … ບາບກຳຂອງພວກເຮົາຢູ່ເທິງພວກເຮົາ,” ຊາວອິດສະຣາເອນທີ່ເປັນຊະເລີຍຄິດສົງໄສ, “ເຮັດແນວໃດພວກເຮົາຈຶ່ງຈະມີຊີວິດຢູ່ໄດ້?” (ເອເຊກຽນ 33:10). ໃນການຕອບຄຳຖາມນັ້ນ, ພຣະຜູ້ເປັນເຈົ້າໄດ້ສິດສອນພວກເຂົາກ່ຽວກັບການກັບໃຈ ແລະ ການໃຫ້ອະໄພ. ຄຳຖາມເຫລົ່ານີ້ສາມາດຊ່ວຍໃຫ້ທ່ານໄຕ່ຕອງສິ່ງທີ່ພຣະອົງໄດ້ສິດສອນ:

ທ່ານຄິດວ່າທີ່ຈະ “ໄວ້ວາງໃຈໃນຄວາມຊອບທຳ [ຂອງທ່ານ] ເອງ” ໝາຍຄວາມວ່າແນວໃດ? (ເບິ່ງ ເອເຊກຽນ 33:12–13).
ທ່ານຈະເວົ້າແນວໃດກັບບາງຄົນທີ່ຮູ້ສຶກວ່າ ຜູ້ຄົນທີ່ຖືກບັນຍາຍຢູ່ໃນ ເອເຊກຽນ 33:12–19 ບໍ່ໄດ້ຖືກປະຕິບັດຕໍ່ຢ່າງຍຸດຕິທຳ? (ເບິ່ງ ມັດທາຍ 21:28–31; ລູກາ 18:9–14 ນຳອີກ).
ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ຊ່ວຍທ່ານໃຫ້ເຂົ້າໃຈຄວາມໝາຍຂອງການກັບໃຈ? ຄວາມຮູ້ເພີ່ມເຕີມຢ່າງໃດແດ່ທີ່ທ່ານພົບເຫັນຢູ່ໃນ ເອເຊກຽນ 36:26–27 ແລະ ແອວມາ 7:14–16?

ເອເຊກຽນ 37

ພຣະຜູ້ເປັນເຈົ້າກຳລັງເຕົ້າໂຮມຜູ້ຄົນຂອງພຣະອົງ ແລະ ມອບຊີວິດໃໝ່ໃຫ້ພວກເຂົາ.

ການເຕົ້າໂຮມອິດສະຣາເອນຖືກສະແດງໃຫ້ເຫັນຢູ່ໃນ ເອເຊກຽນ 37 ຜ່ານທາງສັນຍາລັກສອງຢ່າງ. ຂະນະທີ່ທ່ານອ່ານກ່ຽວກັບຢ່າງທີໜຶ່ງ—ກະດູກຫລ້ອນຖືກເຮັດໃຫ້ຄືນມີຊີວິດອີກ (ເບິ່ງ ຂໍ້ທີ 1–14)—ໃຫ້ໄຕ່ຕອງສິ່ງທີ່ມັນແນະນຳຕໍ່ທ່ານກ່ຽວກັບການເຕົ້າໂຮມອິດສະຣາເອນຢູ່ທັງສອງຟາກມ່ານ (ເບິ່ງ ເອເຊກຽນ 36:24–30 ນຳອີກ). ຄິດໄຕ່ຕອງຄຳຖາມແບບດັ່ງຕໍ່ໄປນີ້:

ພຣະຜູ້ເປັນເຈົ້າກຳລັງພະຍາຍາມຈະສຳເລັດຫຍັງຜ່ານທາງການເຕົ້າໂຮມອິດສະຣາເອນ?
ພຣະອົງຈະສຳເລັດມັນໄດ້ແນວໃດ?

ທ່ານສາມາດຖາມຕົວເອງຄຳຖາມອັນດຽວກັນເຫລົ່ານີ້ ຂະນະທີ່ທ່ານອ່ານກ່ຽວກັບສັນຍາລັກຢ່າງທີສອງ ຢູ່ໃນ ຂໍ້ທີ 15–28. ສັນຍາລັກນີ້ກ່ຽວພັນກັບໄມ້ສອງທ່ອນ, ຊຶ່ງນັກປາດອາຈານຫລາຍຄົນແປຄວາມໝາຍວ່າເປັນແຜ່ນໄມ້ສອງແຜ່ນທີ່ຕໍ່ເຂົ້າກັນດ້ວຍບານພັບ. ທ່ອນໄມ້ແຫ່ງຢູດາສາມາດເປັນຕົວແທນໃຫ້ແກ່ພຣະຄຣິສຕະທຳຄຳພີ (ເນື່ອງດ້ວຍວ່າພຣະຄຣິສຕະທຳຄຳພີສ່ວນຫລາຍຖືກຂຽນໂດຍລູກຫລານຂອງຢູດາ), ແລະ ທ່ອນໄມ້ຂອງໂຢເຊັບສາມາດເປັນຕົວແທນໃຫ້ພຣະຄຳພີມໍມອນ (ເນື່ອງດ້ວຍວ່າຄອບຄົວຂອງລີໄຮເປັນລູກຫລານຂອງໂຢເຊັບແຫ່ງເອຢິບ). ໂດຍທີ່ມີສິ່ງນີ້ຢູ່ໃນໃຈ, ຂໍ້ເຫລົ່ານີ້ສິດສອນທ່ານຫຍັງແດ່ກ່ຽວກັບບົດບາດຂອງພຣະຄຳພີໃນການເຕົ້າໂຮມອິດສະຣາເອນ?

ໃຫ້ຄິດກ່ຽວກັບວ່າ ພຣະຄຣິສຕະທຳຄຳພີ ແລະ ພຣະຄຳພີມໍມອນໄດ້ເຮັດວຽກຮ່ວມກັນແນວໃດໃນຊີວິດຂອງທ່ານ—ໂດຍສະເພາະ, ເພື່ອຊ່ວຍໃຫ້ທ່ານມາຫາພຣະຄຣິດ. ຂໍ້ພຣະຄຳພີໃດແດ່ໄດ້ມີຄວາມໝາຍຕໍ່ທ່ານໂດຍສະເພາະ?

ເບິ່ງ 2 ນີໄຟ 3:11–13; 29:14; “Israel, Israel, God Is Calling,” Hymns, no. 7; Topics and Questions, “Bible,” “Book of Mormon,” ຫ້ອງສະໝຸດພຣະກິດຕິຄຸນ; “The Book of Mormon Gathers Scattered Israel” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

The Book of Mormon Gathers Scattered Israel

ທະເລຕາຍຖືກອ້ອມຮອບໂດຍທະເລຊາຍ — ໃນພາບນິມິດ, ເອເຊກຽນໄດ້ເຫັນແມ່ນ້ຳທີ່ໄຫລອອກມາຈາກພຣະວິຫານ ແລະ ປິ່ນປົວທະເລຕາຍ.

ເອເຊກຽນ 47:1–12

ເຮົາສາມາດພົບການປິ່ນປົວທາງວິນຍານໄດ້ ໃນບ້ານຂອງພຣະຜູ້ເປັນເຈົ້າ.

ຂະນະທີ່ທ່ານອ່ານ ເອເຊກຽນ 47:1–12, ມັນອາດຊ່ວຍໄດ້ທີ່ຈະຮູ້ວ່າ ທະເລຕາຍເປັນທະເລທີ່ເຄັມທີ່ສຸດ ຈົນວ່າປາ ແລະ ພືດພັນບໍ່ສາມາດມີຊີວິດຢູ່ໃນນັ້ນໄດ້. ແມ່ນຫຍັງທີ່ປະທັບໃຈທ່ານກ່ຽວກັບສາຍນ້ຳທີ່ຖືກບັນຍາຍ ຢູ່ໃນ ຂໍ້ທີ 1–12? (ເບິ່ງ ພຣະນິມິດ 22:1 ນຳອີກ). ສາຍນ້ຳເຫລົ່ານີ້ອາດເປັນສັນຍາລັກໃຫ້ແກ່ສິ່ງໃດ? ຕົ້ນໄມ້ທີ່ຖືກບັນຍາຍຢູ່ໃນ ຂໍ້ທີ 12 ເປັນຕົວແທນໃຫ້ສິ່ງໃດ?

ຂ່າວສານຂອງແອວເດີ ແດວ ຈີ ເຣັນລັນ “Family History and Temple Work: Sealing and Healing” ເພີ່ມຄວາມເຂົ້າໃຈແກ່ທ່ານແນວໃດ? (ເບິ່ງ Liahona, May 2018, 47–48). ໃຫ້ໄຕ່ຕອງວິທີທີ່ທ່ານໄດ້ພົບຊີວິດທາງວິນຍານ ແລະ ການປິ່ນປົວເພາະພຣະວິຫານ.

ແນວຄິດສຳລັບການສິດສອນເດັກນ້ອຍ

ເອເຊກຽນ 3:17; 33:1–5

ສາດສະດາເປັນເໝືອນຄົນຍາມ ຜູ້ທີ່ເຕືອນເຮົາເຖິງອັນຕະລາຍ.

ລູກໆທີ່ນ້ອຍກວ່າອາດມັກສະແດງທ່າທີທີ່ເຂົ້າກັບ ເອເຊກຽນ 3:17. ຍົກຕົວຢ່າງ, ພວກເຂົາສາມາດຊີ້ໃສ່ຕາ, ຫູ, ແລະ ປາກຂອງພວກເຂົາເມື່ອທ່ານອ່ານຄຳວ່າ “ຄົນຍາມ,” “ໄດ້ຍິນ,” ແລະ “ປາກ.” ພວກເຂົາອາດມັກໄປຍ່າງປ່າ—ຂ້າງນອກ ຫລື ພຽງແຕ່ຍ່າງອ້ອມຫ້ອງ. ຂະນະທີ່ພວກເຂົາຍ່າງ, ເຕືອນພວກເຂົາກ່ຽວກັບສິ່ງທີ່ຢູ່ໃນເສັ້ນທາງ, ດັ່ງເຊັ່ນແມ່ນ້ຳທີ່ຕ້ອງເຕັ້ນຂ້າມ, ງ່າໄມ້ທີ່ຕ້ອງກົ້ມຜ່ານ, ຫລື ສັດທີ່ຕ້ອງຫລີກລ້ຽງ (ຕົວຈິງ ຫລື ການທຳທ່າ). ສິ່ງນີ້ອາດນຳໄປສູ່ການສົນທະນາກ່ຽວກັບວິທີທີ່ສາດສະດາຂອງພຣະຜູ້ເປັນເຈົ້າເຕືອນເຮົາເຖິງອັນຕະລາຍທີ່ເຮົາມອງບໍ່ເຫັນ.
ນີ້ຄືອີກວິທີທີ່ຈະສະແດງໃຫ້ເຫັນ ເອເຊກຽນ 3:17; 33:1–5. ລູກໆຂອງທ່ານຄົນໜຶ່ງສາມາດທຳທ່າເປັນ “ຄົນຍາມ” ໂດຍການຫລຽວອອກໄປທາງປ່ອງຢ້ຽມ ແລະ ບອກຄົນອື່ນໆວ່າ ມີຫຍັງກຳລັງເກີດຂຶ້ນຢູ່ຂ້າງນອກ. ພວກທ່ານກໍສາມາດເບິ່ງວິດີໂອ “Watchman on the Tower” (ChurchofJesusChrist.org) ນຳອີກ. ສາດສະດາທີ່ມີຊີວິດຢູ່ຂອງເຮົາເປັນຄືກັນກັບຄົນຍາມສຳລັບເຮົາແນວໃດ?

4:17
Watchman on the Tower

ເອເຊກຽນກຳລັງຈັບໜັງສືສອງມ້ວນ — The Prophet Ezekiel [ສາດສະດາເອເຊກຽນ], ໂດຍ ລາຍໂອ ແບແດສ໌

ເອເຊກຽນ 37:15–23

ພຣະຄຣິສຕະທຳຄຳພີ ແລະ ພຣະຄຳພີມໍມອນຊ່ວຍ “ເຕົ້າໂຮມ” ເຮົາເຂົ້າກັບພຣະເຢຊູຄຣິດ.

ຫລັງຈາກທີ່ອ່ານ ເອເຊກຽນ 37:15–23 ນຳກັນ, ທ່ານ ແລະ ລູກໆຂອງທ່ານສາມາດຊອກຫາໄມ້ສອງທ່ອນ ແລະ ຂຽນໃສ່ທ່ອນໜຶ່ງວ່າ ສຳລັບຢູດາ (ພຣະຄຣິສຕະທຳຄຳພີ) ແລະ ໃສ່ອີກທ່ອນໜຶ່ງວ່າ ສຳລັບໂຢເຊັບ (ພຣະຄຳພີມໍມອນ). ແລ້ວພວກທ່ານສາມາດແບ່ງປັນເລື່ອງເລົ່າ ຫລື ຂໍ້ພຣະຄຳພີຈາກພຣະຄຣິສຕະທຳຄຳພີ ແລະ ພຣະຄຳພີມໍມອນ ທີ່ຊ່ວຍພວກທ່ານໃຫ້ຮູ້ສຶກໃກ້ຊິດກັບພຣະຜູ້ຊ່ວຍໃຫ້ລອດ ແລະ ກາຍເປັນ “ຜູ້ຄົນ [ຂອງພຣະອົງ]” (ຂໍ້ທີ 23). ເປັນຫຍັງມັນຈຶ່ງເປັນການດີທີ່ຈະມີໜັງສືພຣະຄຳພີທັງສອງເຫລັ້ມ?

ຢ່າພະຍາຍາມສອນທຸກສິ່ງ. ທ່ານອາດບໍ່ສາມາດຄົ້ນພົບຄວາມຈິງທຸກຢ່າງໃນເອເຊກຽນກັບລູກໆຂອງທ່ານ. ໃຫ້ພິຈາລະນາດ້ວຍການອະທິຖານສິ່ງທີ່ພວກເຂົາຕ້ອງເຂົ້າໃຈ, ແລະ ໃຫ້ສະແຫວງຫາການນຳພາທາງວິນຍານ ເພື່ອຈະກຳນົດວ່າຈະສຸມໃຈໃສ່ສິ່ງໃດ. (ເບິ່ງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 17.)

ເອເຊກຽນ 47:1–12

ຫົວໃຈ ແລະ ຄອບຄົວຂອງເຮົາສາມາດພົບການປິ່ນປົວ ໃນບ້ານຂອງພຣະຜູ້ເປັນເຈົ້າ.

ເອເຊກຽນ 47 ບັນຍາຍພາບນິມິດຂອງເອເຊກຽນ ກ່ຽວກັບນ້ຳທີ່ໄຫລອອກມາຈາກພຣະວິຫານ ແລະ ປິ່ນປົວທະເລຕາຍ—ທະເລທີ່ເຄັມທີ່ສຸດ ຈົນວ່າປາ ແລະ ພືດພັນບໍ່ສາມາດມີຊີວິດຢູ່ໃນນັ້ນໄດ້. ບາງທີລູກໆຂອງທ່ານສາມາດແຕ້ມໜຶ່ງ ຫລື ສອງສິ່ງຂອງຈາກພາບນິມິດ, ດັ່ງເຊັ່ນພຣະວິຫານ, ແມ່ນ້ຳ, ທະເລຊາຍ, ທະເລຕາຍ, ຝູງປາ, ຫລື ຕົ້ນໝາກໄມ້. ແລ້ວ, ຂະນະທີ່ພວກທ່ານອ່ານ ຂໍ້ທີ 1 ນຳກັນ, ພວກເຂົາສາມາດແບ່ງປັນຮູບແຕ້ມຂອງພວກເຂົາ ເມື່ອສິ່ງຂອງນັ້ນຖືກກ່າວເຖິງ. ພອນຫຍັງແດ່ໄດ້ມາຈາກແມ່ນ້ຳໃນພາບນິມິດນີ້? ຊ່ວຍລູກໆໃຫ້ເຫັນວ່າພອນເຫລົ່ານີ້ຄືກັນກັບພອນທີ່ພຣະຜູ້ຊ່ວຍໃຫ້ລອດສະເໜີມອບໃຫ້ຜູ້ຄົນທີ່ຮັກສາພັນທະສັນຍາພຣະວິຫານແນວໃດ. ວິດີໂອ “And the River Will Grow” (ຫ້ອງສະໝຸດພຣະກິດຕິຄຸນ) ສາມາດຊ່ວຍໄດ້.

3:43
And the River Will Grow
ພວກທ່ານກໍສາມາດຮ້ອງເພງນຳກັນທີ່ບັນຍາຍເຖິງພອນພຣະວິຫານ, ເຊັ່ນ “ພຣະເຈົ້າມອບພຣະວິຫານແກ່ເຮົາ” (ເພງສວດ ແລະ ເພງຂອງເດັກນ້ອຍ, 68 ນຳອີກ). ເພງນີ້ສິດສອນຫຍັງແດ່ກ່ຽວກັບວິທີທີ່ພຣະຜູ້ເປັນເຈົ້າອວຍພອນເຮົາໃນບ້ານທີ່ສັກສິດຂອງພຣະອົງ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ແມ່ນ້ຳທີ່ໄຫລມາຈາກພຣະວິຫານເຢຣູຊາເລັມ — “ມີນ້ຳໄຫລອອກມາຈາກລຸ່ມທາງປະຕູເຂົ້າພຣະວິຫານ. … ແລະ ເມື່ອມັນໄຫລໄປທີ່ໃດ ກໍຈະນຳຊີວິດໄປສູ່ທີ່ນັ້ນ” (ເອເຊກຽນ 47:1, 9). ຮູບພາບໄດ້ຮັບອະນຸຍາດຈາກ goodsalt.com

ໜ້າກິດຈະກຳປະຖົມໄວ: ພຣະຄຳພີມໍມອນ ແລະ ພຣະຄຣິສຕະທຳຄຳພີ “ເຕົ້າໂຮມ” ເຮົາເຂົ້າກັບພຣະເຢຊູຄຣິດ — “ມີນ້ຳໄຫລອອກມາຈາກລຸ່ມທາງປະຕູເຂົ້າພຣະວິຫານ. … ແລະ ເມື່ອມັນໄຫລໄປທີ່ໃດ ກໍຈະນຳຊີວິດໄປສູ່ທີ່ນັ້ນ” (ເອເຊກຽນ 47:1, 9). ຮູບພາບໄດ້ຮັບອະນຸຍາດຈາກ goodsalt.com