“ວັນທີ 19–25 ເດືອນຕຸລາ. ‘ກ່ອນເຈົ້າໄດ້ເກີດມາ ເຮົາໄດ້ເລືອກເອົາເຈົ້າໄວ້ແລ້ວ’: ເຢເຣມີຢາ 1–3; 7; 16–18; 20,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 19–25 ເດືອນຕຸລາ. ‘ກ່ອນເຈົ້າໄດ້ເກີດມາ ເຮົາໄດ້ເລືອກເອົາເຈົ້າໄວ້ແລ້ວ,’” ຈົ່ງຕາມເຮົາມາ: ພຣະຄຳພີເດີມ 2026

Jeremiah [ເຢເຣມີຢາ], ໂດຍ ວາວເຕີ ເຣນ

ວັນທີ 19–25 ເດືອນຕຸລາ: “ກ່ອນເຈົ້າໄດ້ເກີດມາ ເຮົາໄດ້ເລືອກເອົາເຈົ້າໄວ້ແລ້ວ”

ເຢເຣມີຢາ 1–3; 7; 16–18; 20

ທຳອິດ, ເຢເຣມີຢາບໍ່ໄດ້ຄິດວ່າເພິ່ນຈະເປັນສາດສະດາທີ່ດີ. “ຂ້ານ້ອຍບໍ່ຮູ້ຈັກວ່າຈະກ່າວຢ່າງໃດ,” ເພິ່ນໄດ້ຕໍ່ຕ້ານ (ເຢເຣມີຢາ 1:6). ແຕ່ພຣະຜູ້ເປັນເຈົ້າໄດ້ເຮັດໃຫ້ເພິ່ນໝັ້ນໃຈວ່າ, “ເຮົາພວມເອົາຖ້ອຍຄຳຂອງເຮົາໃສ່ເຂົ້າໄປໃນປາກເຈົ້າ” (ຂໍ້ທີ 9). ເຢເຣມີຢາໄດ້ຮູ້ສຶກວ່າເພິ່ນ “ຍັງໜຸ່ມ” ບໍ່ມີປະສົບການ (ຂໍ້ທີ 6), ແຕ່ພຣະຜູ້ເປັນເຈົ້າໄດ້ອະທິບາຍວ່າ ເພິ່ນໄດ້ກຽມພ້ອມຫລາຍກວ່າທີ່ເພິ່ນຮູ້—ເພິ່ນໄດ້ຖືກແຕ່ງຕັ້ງສູ່ການເອີ້ນນີ້ກ່ອນເພິ່ນໄດ້ມາເກີດ (ເບິ່ງ ຂໍ້ທີ 5). ສະນັ້ນເຢເຣມີຢາຈຶ່ງໄດ້ປະຖິ້ມຄວາມຢ້ານກົວຂອງເພິ່ນ ແລະ ໄດ້ຮັບເອົາການເອີ້ນ. ເພິ່ນໄດ້ເຕືອນກະສັດຂອງນະຄອນເຢຣູຊາເລັມ ແລະ ພວກປະໂລຫິດວ່າ ການທຳທ່າເປັນຄົນມີສິນທຳຂອງເຂົາເຈົ້າຈະບໍ່ຊ່ວຍຊີວິດເຂົາເຈົ້າໄດ້. “ຊາຍໜຸ່ມ” ຜູ້ຄິດວ່າຕົວເອງບໍ່ສາມາດກ່າວ ໄດ້ຮູ້ສຶກເຖິງພຣະຄຳຂອງພຣະເຈົ້າວ່າ “ຮ້ອນຮົນຢູ່ພາຍໃນ [ເພິ່ນ] ດັ່ງໄຟລຸກໄໝ້ເຜົາຜານຈິດໃຈ” ແລະ ບໍ່ສາມາດມິດງຽບຢູ່ (ເຢເຣມີຢາ 20:9).

ເລື່ອງລາວຂອງເຢເຣມີຢາກໍເປັນເລື່ອງລາວຂອງທ່ານຄືກັນ. ພຣະເຈົ້າກໍຮູ້ຈັກທ່ານຄືກັນ, ກ່ອນທ່ານໄດ້ມາເກີດ ແລະ ໄດ້ກະກຽມທ່ານໄວ້ສຳລັບພາລະກິດຂອງທ່ານໃນຊີວິດ. ໃນບັນດາສິ່ງອື່ນໆ, ພາລະກິດນັ້ນແມ່ນລວມທັງບາງສິ່ງທີ່ເຢເຣມີຢາໄດ້ເຫັນລ່ວງໜ້າ: ການເຕົ້າໂຮມຜູ້ຄົນຂອງພຣະເຈົ້າ, ເທື່ອລະຄົນ, ເພື່ອ “ນຳ [ພວກເຂົາ] ກັບຄືນມາສູ່ຊີໂອນ” (ເຢເຣມີຢາ 3:14). ແລະ ເຖິງແມ່ນຖ້າຫາກທ່ານບໍ່ຮູ້ຈັກແນ່ນອນວ່າຈະເຮັດ ຫລື ກ່າວສິ່ງໃດ, ທ່ານກໍ “ຢ່າສູ່ຢ້ານກົວ … ; ເພາະເຮົາຈະຢູ່ກັບເຈົ້າ, ພຣະຜູ້ເປັນເຈົ້າໄດ້ກ່າວ” (ເຢເຣມີຢາ 1:8, 19).

ສຳລັບພາບລວມຂອງພຣະທຳເຢເຣມີຢາ, ໃຫ້ເບິ່ງ “ເຢເຣມີຢາ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເຢເຣມີຢາ 1:4–19; 7:1–7; 20:8–9

ບັນດາສາດສະດາໄດ້ຖືກເອີ້ນໃຫ້ກ່າວພຣະຄຳຂອງພຣະເຈົ້າ.

ໃຫ້ຈິນຕະນາການວ່າທ່ານກຳລັງເວົ້າລົມກັບໝູ່ຄົນໜຶ່ງ ທີ່ບໍ່ເຄີຍໄດ້ຍິນກ່ຽວກັບສາດສະດາ, ແລະ ທ່ານຕັດສິນໃຈຈະອະທິບາຍຄວາມຄິດນີ້ໂດຍການໃຊ້ການເອີ້ນຂອງເຢເຣມີຢາໃຫ້ເປັນສາດສະດາ ເຢເຣມີຢາ 1:4–19. ທ່ານພົບເຫັນຫຍັງແດ່ຢູ່ໃນຂໍ້ເຫລົ່ານີ້ ທີ່ສິດສອນບາງຢ່າງກ່ຽວກັບສາດສະດາຂອງພຣະເຈົ້າ? ທ່ານຍັງສາມາດຊອກຫາຢູ່ໃນ ເຢເຣມີຢາ 7:1–7; 20:8–9 ແລະ ເພງສວດເຊັ່ນ “We Listen to a Prophet’s Voice” (Hymns, no. 22) ນຳອີກ.

ທ່ານອາດຍັງຢາກສິດສອນໝູ່ຂອງທ່ານກ່ຽວກັບສາດສະດາທີ່ມີຊີວິດຢູ່ໃນວັນເວລານີ້ນຳອີກ. ມີຫຍັງແດ່ຢູ່ໃນຂໍ້ເຫລົ່ານີ້ທີ່ອາດຊ່ວຍໄດ້? ຍົກຕົວຢ່າງ, ສາດສະດາໃນວັນເວລາຂອງເຮົາ “ຖອນຮາກ” ຫລື “ຮື້ຖິ້ມ” ຫຍັງແດ່? ພວກເພິ່ນ “ກໍ່ສ້າງ” ແລະ “ປູກຝັງ”ຫຍັງ? (ເຢເຣມີຢາ 1:10). ທ່ານໄດ້ມາຮູ້ຈັກໄດ້ແນວໃດວ່າ ສາດສະດາທີ່ມີຊີວິດຢູ່ຂອງເຮົາຖືກເອີ້ນຈາກພຣະເຈົ້າ?

ເບິ່ງ ຫລັກແຫ່ງຄວາມເຊື່ອ 1:6, 9; “Why Do We Have Prophets?” (ວິດີໂອ) ນຳອີກ, ChurchofJesusChrist.org.

ເຢເຣມີຢາ 1:5

ພຣະເຈົ້າຮູ້ຈັກເຮົາກ່ອນເຮົາໄດ້ມາເກີດ.

ເຢເຣມີຢາໄດ້ຮຽນຮູ້ຫຍັງແດ່ກ່ຽວກັບຕົວເພິ່ນເອງຢູ່ໃນ ເຢເຣມີຢາ 1:5? ໃນຖານະສາດສະດາທີ່ຖືກເອີ້ນຄົນໃໝ່, ເປັນຫຍັງຂໍ້ມູນນັ້ນຈຶ່ງສຳຄັນສຳລັບເພິ່ນທີ່ຈະຮູ້?

ຫລາຍສິ່ງທີ່ເຢເຣມີຢາໄດ້ຮຽນຮູ້ກ່ຽວກັບຕົວເພິ່ນເອງຢູ່ໃນ ເຢເຣມີຢາ 1:5 ກໍເປັນຄວາມຈິງກ່ຽວກັບທ່ານຄືກັນ. ພຣະເຈົ້າກໍຮູ້ຈັກທ່ານຄືກັນ ກ່ອນທ່ານໄດ້ມາເກີດ ແລະ ໄດ້ກະກຽມທ່ານໄວ້ສຳລັບຄວາມຮັບຜິດຊອບຂອງທ່ານໂດຍສະເພາະ. ເພື່ອຮຽນຮູ້ເພີ່ມເຕີມກ່ຽວກັບຊີວິດຂອງທ່ານກ່ອນທ່ານໄດ້ມາເກີດ, ໃຫ້ອ່ານ ແອວມາ 13:1–4; ຄຳສອນ ແລະ ພັນທະສັນຍາ 138:53–56; ແລະ ອັບຣາຮາມ 3:22–23. ທ່ານອາດຂຽນລາຍການຂອງຄວາມຈິງທີ່ທ່ານຄົ້ນພົບ. ເປັນຫຍັງຂໍ້ມູນນີ້ຈຶ່ງສຳຄັນສຳລັບທ່ານທີ່ຈະຮູ້ຂໍ້ມູນນີ້?

ເພື່ອຮຽນຮູ້ກ່ຽວກັບວ່າຄວາມຈິງເຫລົ່ານີ້ໄດ້ມີຜົນກະທົບຕໍ່ຊີວິດຂອງ ແອວເດີ ອາມັດ ແອັສ ຄໍບິດ ແນວໃດ, ໃຫ້ສຶກສາຂ່າວສານຂອງເພິ່ນ “You Can Gather Israel!” (Liahona, May 2021, 63–63). ການຮູ້ຈັກກ່ຽວກັບຊີວິດກ່ອນມະຕະຂອງທ່ານມີຜົນກະທົບຕໍ່ວິທີທີ່ທ່ານດຳລົງຊີວິດໃນຊ່ວງມະຕະຂອງທ່ານແນວໃດ?

ຕໍ່ໄປນີ້ຄືສິ່ງທີ່ປະທານຣະໂຊ ເອັມ ແນວສັນ ໄດ້ກ່າວກ່ຽວກັບຊີວິດກ່ອນມະຕະຂອງທ່ານ:

“ພຣະບິດາເທິງສະຫວັນຂອງທ່ານໄດ້ຮູ້ຈັກທ່ານເປັນເວລາດົນນານ. ທ່ານ, ໃນຖານະທີ່ເປັນບຸດ ແລະ ທິດາຂອງພຣະອົງ, ໄດ້ຖືກເລືອກໂດຍພຣະອົງໃຫ້ມາສູ່ໂລກໃນເວລານີ້ໂດຍສະເພາະ, ເພື່ອເປັນຜູ້ນຳໃນວຽກງານອັນຍິ່ງໃຫຍ່ຂອງພຣະອົງຢູ່ໃນໂລກ. ທ່ານໄດ້ຖືກເລືອກ ບໍ່ ພຽງແຕ່ບຸກຄະລິກລັກສະນະຂອງຮ່າງກາຍຂອງທ່ານເທົ່ານັ້ນ, ແຕ່ໄດ້ຖືກເລືອກເພາະຄຸນສົມບັດທາງ ວິນຍານ ຂອງທ່ານນຳອີກ, ເຊັ່ນຄວາມອົງອາດ, ຄວາມກ້າຫານ, ຄວາມຊື່ສັດຂອງໃຈ, ຄວາມກະຫາຍຢາກຮູ້ຄວາມຈິງ, ຄວາມຫິວຢາກໄດ້ສະຕິປັນຍາ, ແລະ ຄວາມປາດຖະໜາທີ່ຈະຮັບໃຊ້ຄົນອື່ນ.

“ທ່ານໄດ້ພັດທະນາຄຸນສົມບັດບາງຢ່າງເຫລົ່ານີ້ກ່ອນທ່ານມາສູ່ໂລກ. ສ່ວນຢ່າງອື່ນໆ ທ່ານພັດທະນາມັນຢູ່ໃນໂລກນີ້ ເມື່ອທ່ານສະແຫວງຫາມັນຢ່າງບໍ່ລົດລະ” (“Decisions for Eternity,” Liahona, Nov. 2013, 107).

ໃຫ້ຄິດເຖິງບາງສະພາບການທີ່ທ່ານອາດປະເຊີນ ຊຶ່ງໃນນັ້ນມັນຈຶ່ງສຳຄັນທີ່ຈະຈື່ຈຳຄວາມຈິງເຫລົ່ານີ້ ກ່ຽວກັບຊີວິດກ່ອນມະຕະຂອງທ່ານ. ທ່ານສາມາດເຮັດຫຍັງໄດ້ແດ່ເພື່ອເຕືອນໃຈທ່ານເອງເຖິງຄວາມຈິງເຫລົ່ານີ້?

ເບິ່ງ Russell M. Nelson, “Decisions for Eternity,” Liahona, Nov. 2013, 106–9; Topics and Questions, “Foreordination,” “Premortal Life,” ຫ້ອງສະໝຸດພຣະກິດຕິຄຸນ ນຳອີກ.

ຢູ່ດ້ານຊ້າຍ, ຄົນໜຶ່ງກຳລັງຢືນຢູ່ໃນອ່າງໃຫຍ່ທີ່ວ່າງເປົ່າ; ຢູ່ດ້ານຂວາ, ແມ່ນນ້ຳຕົກ — ໃນ ເຢເຣມີຢາ 2:13, ພຣະຜູ້ເປັນເຈົ້າໄດ້ປຽບທຽບສະພາບການທາງວິນຍານຂອງຜູ້ຄົນໃສ່ກັບ “ອ່າງແຕກ” ແລະ ໄດ້ປຽບທຽບພຣະອົງເອງໃສ່ກັບ “ນ້ຳພຸແຫ່ງຊີວິດ.”

ເຢເຣມີຢາ 2; 7

“ພວກເຂົາໄດ້ຫັນໜີຈາກເຮົາ ຜູ້ເປັນບໍ່ນ້ຳພຸແຫ່ງຊີວິດ.”

ໃນພາກພື້ນແຫ້ງແລ້ງບ່ອນທີ່ຊາວອິດສະຣາເອນໄດ້ອາໄສຢູ່, ຜູ້ຄົນໄດ້ເກັບນ້ຳທີ່ມີຄ່າໄວ້ໃນບ່ອນເກັບນ້ຳໃຕ້ດິນທີ່ເອີ້ນວ່າ ອ່າງ. ທ່ານຄິດວ່າ “ອ່າງແຕກ” ທີ່ກ່າວເຖິງຢູ່ໃນ ເຢເຣມີຢາ 2:13 ອາດເປັນສັນຍາລັກເຖິງສິ່ງໃດ? ການໄດ້ນ້ຳຈາກບໍ່ນ້ຳພຸ ກໍດີກວ່າການເພິ່ງອາໄສອ່າງນ້ຳແນວໃດ? ການຫັນປະຖິ້ມ “ບໍ່ນ້ຳພຸແຫ່ງຊີວິດ” ໝາຍຄວາມວ່າແນວໃດ? ຂະນະທີ່ທ່ານອ່ານ ເຢເຣມີຢາ 2 ແລະ 7, ໃຫ້ສັງເກດເບິ່ງວິທີທີ່ຜູ້ຄົນໄດ້ປະຖິ້ມນ້ຳພຸແຫ່ງຊີວິດຂອງພຣະຜູ້ເປັນເຈົ້າ (ເບິ່ງ, ຍົກຕົວຢ່າງ, ເຢເຣມີຢາ 2:26–28; 7:2–11). ເປັນຫຍັງ “ນ້ຳແຫ່ງຊີວິດ” ຈຶ່ງເປັນສັນຍາລັກທີ່ດີສຳລັບສິ່ງທີ່ພຣະຜູ້ຊ່ວຍໃຫ້ລອດປະທານໃຫ້ແກ່ທ່ານ? ໃຫ້ຄິດກ່ຽວກັບວ່າ ທ່ານກຳລັງໄດ້ຮັບນ້ຳພຸແຫ່ງຊີວິດແນວໃດ.

ເຢເຣມີຢາ 7 ແມ່ນກ່າວຕໍ່ຜູ້ຄົນທີ່ກຳລັງເຂົ້າໄປໃນ “ວິຫານຂອງ [ພຣະຜູ້ເປັນເຈົ້າ] … ເພື່ອນະມັດສະການ [ພຣະຜູ້ເປັນເຈົ້າ],” ແຕ່ການກະທຳຂອງພວກເຂົາບໍ່ໄດ້ເຂົ້າກັບການອຸທິດຕົນພາຍນອກຂອງພວກເຂົາ (ເບິ່ງ ຂໍ້ທີ 2–11). ຂ່າວສານໃດແດ່ທີ່ທ່ານຮູ້ສຶກວ່າພຣະຜູ້ເປັນເຈົ້າອາດມີໃຫ້ທ່ານ ຢູ່ໃນ ຂໍ້ທີ 21–23?

ໃຊ້ບົດຮຽນທີ່ໃຊ້ສິ່ງຂອງ. ສາດສະດາຂອງພຣະຜູ້ເປັນເຈົ້າມັກຈະປຽບທຽບຄວາມຈິງທາງວິນຍານໃສ່ກັບສິ່ງຂອງທີ່ຄຸ້ນເຄີຍ. ໃຫ້ຄິດທີ່ຈະເຮັດເຊັ່ນດຽວກັນຂະນະທີ່ທ່ານຮຽນຮູ້ ແລະ ສິດສອນພຣະກິດຕິຄຸນ. ຍົກຕົວຢ່າງ, ເພື່ອຈະວາດພາບ ເຢເຣມີຢາ 2:13, ທ່ານສາມາດເອົານ້ຳໃສ່ໃນຖັງທີ່ມີຮອຍແຕກ ຫລື ແຕກຫັກ ຫລື ດື່ມຈາກນ້ຳພຸ. ພຣະເຢຊູຄຣິດເປັນເໝືອນດັ່ງ “ບໍ່ນ້ຳພຸແຫ່ງຊີວິດ” ແນວໃດ? (ເຢເຣມີຢາ 2:13). ເຮົາຈະດື່ມຈາກນ້ຳພຸແຫ່ງຊີວິດຂອງພຣະອົງໄດ້ແນວໃດ?

ເຢເຣມີຢາ 3:14–18; 16:14–21

ພຣະຜູ້ເປັນເຈົ້າຈະເຕົ້າໂຮມຜູ້ຄົນຂອງພຣະອົງ.

ໃນ ເຢເຣມີຢາ 16:14–15, ເຢເຣມີຢາໄດ້ປຽບທຽບການເຕົ້າໂຮມອິດສະຣາເອນໃນວັນເວລາສຸດທ້າຍໃສ່ກັບການອົບພະຍົບຂອງຊາວອິດສະຣາເອນຈາກປະເທດເອຢິບ. ໃນຄວາມຄິດເຫັນຂອງທ່ານ, ເປັນຫຍັງການເຕົ້າໂຮມຈຶ່ງສຳຄັນຕໍ່ຜູ້ຄົນຂອງພຣະເຈົ້າຫລາຍກວ່າການອົບພະຍົບ.

ເຢເຣມີຢາ 3:14–18; 16:14–21 ແນະນຳຫຍັງແດ່ກ່ຽວກັບວ່າການເຕົ້າໂຮມຈະເກີດຂຶ້ນແນວໃດ?

ໃນຂ່າວສານຂອງເພິ່ນ “Hope of Israel,” ປະທານຣະໂຊ ເອັມ ແນວສັນ, ຄືກັນກັບເຢເຣມີຢາ, ໄດ້ສິດສອນວ່າ ການເຕົ້າໂຮມອິດສະຣາເອນວ່າ “ເປັນສິ່ງທີ່ສຳຄັນທີ່ສຸດທີ່ເກີດຂຶ້ນຢູ່ໃນໂລກທຸກມື້ນີ້” (ລາຍການໃຫ້ຄຳດົນໃຈສຳລັບຊາວໜຸ່ມທົ່ວໂລກ, ວັນທີ 3 ເດືອນມິຖຸນາ, 2018, ຫ້ອງສະໝຸດພຣະກິດຕິຄຸນ). ອ່ານ ຫລື ຟັງຂ່າວສານຂອງເພິ່ນ, ແລະ ໃຫ້ເບິ່ງຖ້າຫາກວ່າທ່ານສາມາດຄົ້ນພົບ (ກ) ວ່າ ປະທານແນວສັນໃຫ້ນິຍາມການເຕົ້າໂຮມອິດສະຣາເອນແນວໃດ, (ຂ) ວ່າເພິ່ນບັນຍາຍຄວາມສຳຄັນຂອງມັນແນວໃດ, ແລະ (ຄ) ວ່າທ່ານສາມາດເປັນພາກສ່ວນຂອງການເຕົ້າໂຮມໄດ້ແນວໃດ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເຢເຣມີຢາ 1:5

ພຣະບິດາເທິງສະຫວັນໄດ້ຮູ້ຈັກເຮົາກ່ອນເຮົາໄດ້ມາເກີດ.

ເພື່ອແນະນຳຄວາມຈິງທີ່ສຳຄັນທີ່ຖືກສິດສອນຢູ່ໃນ ເຢເຣມີຢາ 1:5, ທ່ານສາມາດເອົາຮູບຂອງແອນ້ອຍໃຫ້ລູກທ່ານເບິ່ງ (ຫລື, ຖ້າເປັນໄປໄດ້, ທ່ານສາມາດເບິ່ງຮູບຂອງລູກໆຂອງທ່ານຕອນພວກເຂົາເປັນແອນ້ອຍ). ຖາມລູກໆຂອງທ່ານຖ້າຫາກວ່າພວກເຂົາຮູ້ວ່າພວກເຂົາໄດ້ມີຊີວິດຢູ່ກ່ອນທີ່ພວກເຂົາໄດ້ມາເກີດ. ພວກທ່ານກໍສາມາດຮ້ອງເພງນຳກັນ ເພງທີ່ສິດສອນກ່ຽວກັບຊີວິດກ່ອນມະຕະຂອງເຮົາ, ເຊັ່ນ “I Lived in Heaven” (Children’s Songbook, 4).
ຖ້າຫາກລູກໆຂອງທ່ານຢາກຮຽນຮູ້ເພີ່ມເຕີມ, ທ່ານສາມາດຊ່ວຍພວກເຂົາຊອກຫາ “ຊີວິດກ່ອນເກີດ” ໃນ ຄູ່ມືພຣະຄຳພີ. ພວກເຂົາສາມາດຊອກຫາຄຳຕອບຕໍ່ຄຳຖາມວ່າ “ໃຜ,” “ເມື່ອໃດ,” ແລະ “ແມ່ນຫຍັງ” ກ່ຽວກັບຊີວິດກ່ອນເກີດ.

ເຢເຣມີຢາ 1:4–19

ບັນດາສາດສະດາໄດ້ຖືກເອີ້ນໃຫ້ກ່າວພຣະຄຳຂອງພຣະຜູ້ເປັນເຈົ້າ.

ໃຫ້ພິຈາລະນາທີ່ຈະສະແດງຮູບຂອງສາດສະດາທີ່ມີຊີວິດຢູ່ ຫລື ສາດສະດາຈາກພຣະຄຳພີ (ທ່ານສາມາດພົບເຫັນບາງຮູບຢູ່ໃນ Church magazines, ປຶ້ມຮູບພຣະກິດຕິຄຸນ, ແລະ ຈົ່ງຕາມເຮົາມາ). ຖາມລູກໆຂອງທ່ານວ່າພວກເຂົາຮູ້ຫຍັງແດ່ກ່ຽວກັບສາດສະດາເຫລົ່ານີ້.
ເພື່ອສິດສອນກ່ຽວກັບສິ່ງທີ່ສາດສະດາເຮັດ, ທ່ານອາດເລືອກຂໍ້ທີ່ເປັນປະໂຫຍດຈາກ ເຢເຣມີຢາ 1, ດັ່ງເຊັ່ນ ຂໍ້ທີ 5, 7, 10, ແລະ 19. ລູກໆຂອງທ່ານສາມາດເລືອກໜຶ່ງຂໍ້ໃນຈຳນວນຫລາຍຂໍ້, ອ່ານມັນ, ແລະ ແບ່ງປັນສິ່ງທີ່ພວກເຂົາຮຽນຮູ້ກ່ຽວກັບສາດສະດາ.

ເຢເຣມີຢາ 16:14–16

ເຮົາສາມາດຊ່ວຍລູກໆຂອງພຣະບິດາເທິງສະຫວັນກັບມາຫາພຣະອົງ.

ໃນຂະນະທີ່ທ່ານອ່ານ ເຢເຣມີຢາ 16:16, ລູກໆຂອງທ່ານສາມາດທຳທ່າ “ຈັບປາ” ຫລື “[ຊອກ]” ຫາສິ່ງຂອງຢູ່ໃນຫ້ອງ. ປະທານຣະໂຊ ເອັມ ແນວສັນ ໄດ້ປຽບທຽບຄົນຫາປາ ແລະ ນາຍພານໃນຂໍ້ນີ້ໃສ່ກັບຜູ້ສອນສາດສະໜາ (ເບິ່ງ “The Gathering of Scattered Israel,” Liahona, Nov. 2006, 81). ຜູ້ສອນສາດສະໜາເຮັດຫຍັງແດ່? ເຮົາຈະສາມາດຊ່ວຍ “ຕຶກປາ” ແລະ “[ຊອກ]” ຫາອິດສະຣາເອນທີ່ຖືກກະຈັດກະຈາຍແນວໃດ? (ເບິ່ງ “A Message for Children from President Russell M. Nelson” [ວິດີໂອ], ChurchofJesusChrist.org).

3:30
Video: A Message for Children from President Russell M. Nelson

ເຢເຣມີຢາ 18:1–6

ເຮົາສາມາດປ່ອຍໃຫ້ພຣະຜູ້ເປັນເຈົ້າຊີ້ນຳຊີວິດເຮົາ, ດັ່ງເຊັ່ນຊ່າງປັ້ນໝໍ້ຫລໍ່ຫລອມດິນໜຽວ.

ເພື່ອຄົ້ນຄວ້າຂໍ້ເຫລົ່ານີ້, ທ່ານສາມາດສົນທະນາ ຫລື ສະແດງວິທີປັ້ນໝໍ້ (ເບິ່ງຮູບພາບຢູ່ທ້າຍໂຄງຮ່າງນີ້). ແມ່ນຫຍັງຄືຂ່າວສານທີ່ພຣະຜູ້ເປັນເຈົ້າມີໃຫ້ພວກເຮົາໃນ ເຢເຣມີຢາ 18:1–6? ການເປັນດິນໜຽວໃນພຣະຫັດຂອງພຣະຜູ້ເປັນເຈົ້າໝາຍຄວາມວ່າແນວໃດ? (ເບິ່ງ ເອຊາຢາ 64:8 ນຳອີກ). ສຳລັບອີກເລື່ອງລາວທີ່ປຽບທຽບພວກເຮົາໃສ່ກັບດິນໜຽວຂອງຊ່າງປັ້ນໝໍ້, ເບິ່ງຂ່າວສານຂອງ ແອວເດີ ຣິເຈີດ ເຈ ເມນສ໌ “The Joy of Living a Christ-Centered Life” (Liahona, Nov. 2015, 27–30).

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ມືທີ່ກຳລັງປັ້ນໝໍ້ຢູ່ທີ່ວົງຈັກ — “ດິນໜຽວຢູ່ໃນມືຂອງຊ່າງປັ້ນໝໍ້ສັນໃດ, ພວກເຈົ້າກໍຢູ່ໃນກຳມືຂອງເຮົາສັນນັ້ນ, ໂອ ເຊື້ອສາຍອິດສະຣາເອນ” (ເຢເຣມີຢາ 18:6).

ໜ້າກິດຈະກຳປະຖົມໄວ: ເຮົາສາມາດຊ່ວຍລູກໆຂອງພຣະບິດາເທິງສະຫວັນກັບມາຫາພຣະອົງ — “ດິນໜຽວຢູ່ໃນມືຂອງຊ່າງປັ້ນໝໍ້ສັນໃດ, ພວກເຈົ້າກໍຢູ່ໃນກຳມືຂອງເຮົາສັນນັ້ນ, ໂອ ເຊື້ອສາຍອິດສະຣາເອນ” (ເຢເຣມີຢາ 18:6).