“ວັນທີ 5–11 ເດືອນຕຸລາ. ‘ທ່ານທົນຕໍ່ຄວາມທຸກທີ່ເປັນຂອງພວກເຮົາ ແລະ ທົນຄວາມເຈັບປວດທີ່ພວກເຮົາສົມຄວນໄດ້ຮັບ’: ເອຊາຢາ 50–57,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 5–11 ເດືອນຕຸລາ. ‘ທ່ານທົນຕໍ່ຄວາມທຸກທີ່ເປັນຂອງພວກເຮົາ ແລະ ທົນຄວາມເຈັບປວດທີ່ພວກເຮົາສົມຄວນໄດ້ຮັບ,’” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026

The Mocking of Christ [ການເຍາະເຍີ້ຍພຣະຄຣິດ], ໂດຍ ຄາລ ເຮັນຣິກ ບະລ໊ອກ

ວັນທີ 5–11 ເດືອນຕຸລາ: “ທ່ານທົນຕໍ່ຄວາມທຸກທີ່ເປັນຂອງພວກເຮົາ ແລະ ທົນຄວາມເຈັບປວດທີ່ພວກເຮົາສົມຄວນໄດ້ຮັບ”

ເອຊາຢາ 50–57

ຕະຫລອດການປະຕິບັດສາດສະໜາກິດຂອງເພິ່ນ, ເອຊາຢາໄດ້ກ່າວເຖິງການປົດປ່ອຍທີ່ຍິ່ງໃຫຍ່. ຄຳທຳນາຍເຫລົ່ານີ້ຄົງເປັນສິ່ງທີ່ລ້ຳຄ່າຢ່າງເປັນພິເສດຕໍ່ຊາວອິດສະຣາເອນຫລາຍສັດຕະວັດຕໍ່ມາ ເມື່ອພວກເຂົາຕົກເປັນຊະເລີຍໃນບາບີໂລນ. ຜູ້ທີ່ສາມາດພັງກຳແພງນະຄອນບາບີໂລນຄົງເປັນຜູ້ຊະນະທີ່ຍິ່ງໃຫຍ່ຢ່າງແນ່ນອນ. ແຕ່ນັ້ນບໍ່ແມ່ນພຣະເມຊີອາໃນແບບທີ່ເອຊາຢາໄດ້ບັນຍາຍໄວ້ໃນ ບົດທີ 52–53: “ພວກເຮົາດູໝິ່ນປະໝາດ ແລະ ປະຖິ້ມທ່ານໄປ; ທ່ານໄດ້ທົນທຸກນາໆ ແລະ ທົນຕໍ່ຄວາມເຈັບປວດ. ບໍ່ມີຜູ້ໃດແມ່ນແຕ່ຈະຫລຽວແລເບິ່ງທ່ານເລີຍ. … ຄວາມລຳບາກທີ່ທ່ານຮັບເອົານັ້ນພວກເຮົາຄິດຢູ່ສະເໝີ ວ່າເປັນການລົງໂທດມາຈາກພຣະເຈົ້າ” (ເອຊາຢາ 53:3–4).

ໂດຍການສົ່ງຜູ້ປົດປ່ອຍທີ່ຄາດບໍ່ເຖິງເຊັ່ນນັ້ນມາ, ພຣະເຈົ້າໄດ້ສິດສອນເຮົາກ່ຽວກັບການປົດປ່ອຍອັນແທ້ຈິງ. ເພື່ອຊ່ວຍກູ້ເຮົາຈາກການກົດຂີ່ ແລະ ຄວາມທຸກ, ພຣະເຈົ້າໄດ້ສົ່ງຜູ້ໜຶ່ງມາ ຜູ້ທີ່ໄດ້ “ຖືກທາລຸນໜັກ, ແຕ່ … ທົນເອົາ.” ເມື່ອບາງຄົນຄາດວ່າຈະເປັນສິງໂຕ, ແຕ່ພຣະອົງໄດ້ສົ່ງລູກແກະມາໃຫ້ (ເບິ່ງ ເອຊາຢາ 53:7). ແນ່ນອນ, ວິທີຂອງພຣະເຈົ້າບໍ່ຄືກັນກັບວິທີຂອງເຮົາ (ເບິ່ງ ເອຊາຢາ 55:8–9). ພຣະເຢຊູຄຣິດປົດປ່ອຍເຮົາໃຫ້ເປັນອິດສະລະ ບໍ່ແມ່ນພຽງແຕ່ໂດຍການເປີດປະຕູຄຸກເທົ່ານັ້ນ ແຕ່ແມ່ນໂດຍການເຂົ້າຄຸກແທນເຮົາ. ພຣະອົງປົດປ່ອຍເຮົາຈາກໂສ້ແຫ່ງຄວາມທຸກໂສກ ແລະ ຄວາມໂສກເສົ້າ ໂດຍການຮັບເອົາມັນດ້ວຍຕົວພຣະອົງເອງ (ເບິ່ງ ເອຊາຢາ 53:4–5, 12). ພຣະອົງບໍ່ໄດ້ຊ່ວຍກູ້ເຮົາຢູ່ຫ່າງໆ. ພຣະອົງທົນທຸກທໍລະມານກັບເຮົາ, ໃນການ “ສຳແດງຄວາມຮັກ … ສືບໄປ” ທີ່ “ໝັ້ນຄົງບໍ່ສິ້ນສຸດໄດ້” (ເອຊາຢາ 54:8, 10).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເອຊາຢາ 50–52

ອະນາຄົດກໍຮຸ່ງເຮືອງສຳລັບຜູ້ຄົນຂອງພຣະຜູ້ເປັນເຈົ້າ.

ເຖິງແມ່ນວ່າຊາວອິດສະຣາເອນໄດ້ຕົກເປັນຊະເລີຍເປັນເວລາຫລາຍປີ—ແລະ ເຖິງແມ່ນວ່າ ການເປັນຊະເລີຍຈະເປັນຜົນມາຈາກການເລືອກທີ່ຜິດໆຂອງພວກເຂົາເອງກໍຕາມ—ແຕ່ພຣະຜູ້ເປັນເຈົ້າກໍຍັງຢາກໃຫ້ພວກເຂົາເບິ່ງໄປທີ່ອະນາຄົດດ້ວຍຄວາມຫວັງ. ທ່ານພົບເຫັນຫຍັງແດ່ໃນຂ່າວສານຂອງເອຊາຢາທີ່ໃຫ້ຄວາມຫວັງແກ່ທ່ານ? ຕາຕະລາງດັ່ງຕໍ່ໄປນີ້ ອາດຊ່ວຍທ່ານໃນການສຶກສາໄດ້:

ສິ່ງທີ່ເຮົາຮຽນຮູ້ກ່ຽວກັບພຣະເຈົ້າ (ເບິ່ງ, ຍົກຕົວຢ່າງ, ເອຊາຢາ 50:2, 5–9; 51:3–8, 15–16; 52:3, 9–10)
ຂ່າວສານແຫ່ງຄວາມຫວັງ (ເບິ່ງ, ຍົກຕົວຢ່າງ, ເອຊາຢາ 50:9; 51:3–5, 11–12, 22–23; 52:9–10)
ສິ່ງທີ່ເຮົາສາມາດເຮັດໄດ້ ເພື່ອເຮັດໃຫ້ຄວາມຫວັງກາຍເປັນຈິງ (ເບິ່ງ, ຍົກຕົວຢ່າງ, ເອຊາຢາ 50:10; 51:1–2, 6–9; 52:1–3, 9–11)

ເບິ່ງ ໂມໄຊຢາ 12:20–24; 15:13–18; 3 ນີໄຟ 20:29–46; ຄຳສອນ ແລະ ພັນທະສັນຍາ 113:7–10; Russell M. Nelson, “Embrace the Future with Faith,” Liahona, Nov. 2020, 73–76 ນຳອີກ.

ພຣະເຢຊູກຳລັງແບກໄມ້ກາງແຂນ — Because of Love [ເປັນເພາະຮັກ], ໂດຍ ແອນຈີລາ ຈອນສັນ

ຊ່ວຍໃຫ້ຜູ້ຮຽນມາຫາພຣະເຢຊູຄຣິດ. “ບໍ່ມີສິ່ງໃດໃນຖານະຄູສອນທີ່ຈະເປັນພອນໃຫ້ແກ່ຜູ້ຮຽນໄດ້ຫລາຍກວ່າການຊ່ວຍໃຫ້ເຂົາເຈົ້າຮູ້ຈັກພຣະບິດາເທິງສະຫວັນ ແລະ ພຣະເຢຊູຄຣິດ ແລະ ຮູ້ສຶກເຖິງຄວາມຮັກຂອງພວກພຣະອົງ” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 8). ຂະນະທີ່ທ່ານກຽມທີ່ຈະສອນ ເອຊາຢາ 50–57 ແກ່ຄົນອື່ນ, ໃຫ້ພິຈາລະນາເຖິງວິທີທີ່ທ່ານຈະສາມາດຊ່ວຍໃຫ້ພວກເຂົາເຫັນການເຊື່ອມຕໍ່ລະຫວ່າງຄວາມທ້າທາຍຂອງອິດສະຣາເອນ, ຄຳທຳນາຍຂອງເອຊາຢາເຖິງພຣະຄຣິດ, ແລະ ການຮັບການຊ່ວຍເຫລືອຈາກສະຫວັນໃນການດີ້ນລົນຂອງພວກເຂົາເອງ.

ເອຊາຢາ 53

ພຣະເຢຊູຄຣິດໄດ້ຮັບເອົາບາບ ແລະ ຄວາມໂສກເສົ້າຂອງເຮົາໄວ້ກັບພຣະອົງ.

ສອງສາມບົດໃນພຣະຄຳພີບັນຍາຍເຖິງພາລະກິດແຫ່ງການໄຖ່ຂອງພຣະເຢຊູຄຣິດ ໄດ້ຢ່າງສວຍງາມກວ່າ ເອຊາຢາ 53. ໃຫ້ພິຈາລະນາກິດຈະກຳດັ່ງຕໍ່ໄປນີ້ ເພື່ອທີ່ຈະເຂົ້າໃຈດີຂຶ້ນ ແລະ ນຳໃຊ້ຄຳສອນອັນຊົງພະລັງເຫລົ່ານີ້:

ໄຕ່ຕອງ ຫລື ສົນທະນາເຖິງວິທີທີ່ເລື່ອງເລົ່າ ແລະ ຮູບເງົາມັກຈະພັນລະນາເຖິງວິລະຊົນທີ່ຊ່ວຍເຫລືອຜູ້ຄົນ. ປຽບທຽບການພັນລະນາເຫລົ່ານັ້ນກັບການພັນລະນາເຖິງພຣະຜູ້ຊ່ວຍໃຫ້ລອດໃນ ເອຊາຢາ 53.
ຫລັງຈາກທີ່ອ່ານແຕ່ລະຂໍ້ແລ້ວ, ໃຫ້ຢຸດບຶດໜຶ່ງເພື່ອຄິດໄຕ່ຕອງສິ່ງທີ່ພຣະຜູ້ຊ່ວຍໃຫ້ລອດໄດ້ຮັບທຸກທໍລະມານ—“ຄວາມທຸກໂສກ,” “ຄວາມໂສກເສົ້າ,” ແລະ “ການລ່ວງລະເມີດ” ທີ່ພຣະອົງໄດ້ຮັບເອົາ—ແທນທຸກຄົນ ແລະ ໂດຍສະເພາະແທນທ່ານ. ທ່ານສາມາດປ່ຽນແທນຄຳເຊັ່ນ “ພວກເຮົາ” ແລະ “ຂອງພວກເຮົາ” ເປັນຄຳວ່າ “ຂ້ອຍ” ແລະ “ຂອງຂ້ອຍ” ຂະນະທີ່ທ່ານອ່ານ. ທ່ານຮູ້ສຶກ ຫລື ຄິດວ່າ ຂໍ້ເຫລົ່ານີ້ດົນໃຈທ່ານແນວໃດແດ່?
ໃຫ້ພິຈາລະນາທີ່ຈະເບິ່ງວິດີໂອ “My Kingdom Is Not of This World” (ຫ້ອງສະໝຸດພຣະກິດຕິຄຸນ), ແລະ ໄຕ່ຕອງວິທີທີ່ຄຳທຳນາຍໃນ ເອຊາຢາ 53 ໄດ້ສຳເລັດຄົບຖ້ວນ. ຄວາມທຸກໂສກ ແລະ ຄວາມໂສກເສົ້າໃດແດ່ທີ່ພຣະຜູ້ຊ່ວຍໃຫ້ລອດແບກຮັບເພື່ອທ່ານ?

5:25
My Kingdom Is Not of This World
ຊອກຫາຮູບຂອງເຫດການຕ່າງໆທີ່ກ່ຽວຂ້ອງກັບການຊົດໃຊ້ຂອງພຣະເຢຊູຄຣິດ (ເບິ່ງ ປຶ້ມຮູບພຣະກິດຕິຄຸນ, ເລກທີ 56–60). ແລ້ວທ່ານກໍສາມາດຊອກຫາວະລີຕ່າງໆໃນ ເອຊາຢາ 53 ທີ່ບັນຍາຍເຫດການນັ້ນໆໃນຮູບ. ຄຳສອນເຫລົ່ານີ້ດົນໃຈທ່ານໃຫ້ເຮັດຫຍັງ?

ເບິ່ງ “ເບິ່ງເຖີດພຣະຜູ້ໄຖ່ຍິ່ງໃຫຍ່ມ້ວຍ,” ເພງສວດ ແລະ ເພງຂອງເດັກນ້ອຍ, 16 ນຳອີກ.

ເອຊາຢາ 54; 57:15–19

ພຣະເຢຊູຄຣິດປະສົງໃຫ້ເຮົາກັບຄືນມາຫາພຣະອົງ.

ເຮົາທຸກຄົນລ້ວນແຕ່ມີຊ່ວງເວລາທີ່ເຮົາຮູ້ສຶກຢູ່ຫ່າງໄກຈາກພຣະຜູ້ເປັນເຈົ້າ ຍ້ອນບາບ ຫລື ຄວາມອ່ອນແອຂອງເຮົາ. ບາງຄົນອາດໝົດຫວັງວ່າ ພຣະອົງຈະໃຫ້ອະໄພພວກເຂົາ. ເອຊາຢາ 54 ແລະ 57 ເປັນບົດທີ່ດີໃນການອ່ານເພື່ອສ້າງຄວາມໝັ້ນໃຈ ແລະ ກຳລັງໃຈໃນຊ່ວງເວລາເຊັ່ນນັ້ນ. ໂດຍສະເພາະໃນ ເອຊາຢາ 54:4–10; 57:15–19, ຄຳໃດທີ່ສິດສອນທ່ານເຖິງຄວາມຮູ້ສຶກທີ່ພຣະຜູ້ຊ່ວຍໃຫ້ລອດມີຕໍ່ທ່ານ? ແມ່ນຫຍັງທີ່ສ້າງຄວາມແຕກຕ່າງໃນຊີວິດຂອງທ່ານ ເມື່ອຮູ້ຈັກສິ່ງເຫລົ່ານີ້ກ່ຽວກັບພຣະອົງ?

ປະທານດີເດີ ແອັຟ ອຸກດອບ ໄດ້ສິດສອນວ່າ:

“ເຖິງແມ່ນຊີວິດຂອງເຮົາເບິ່ງຄືວ່າ ມັນຖືກທຳລາຍຫລາຍປານໃດກໍຕາມ. ເຖິງແມ່ນວ່າ ບາບຂອງເຮົາຈະແດງເຂັ້ມຫລາຍປານໃດກໍຕາມ, ຄວາມຂົມຂື່ນຂອງເຮົາຈະໜັກໜ່ວງ, ເປົ່າປ່ຽວ, ຖືກປະຖິ້ມ, ຫລື ເຈັບປວດໃຈຫລາຍປານໃດກໍຕາມ. ເຖິງແມ່ນຄົນທີ່ໝົດຫວັງ, ຄົນທີ່ຢູ່ໃນຄວາມສິ້ນຫວັງ, ຄົນທີ່ຖືກຫລອກຕົ້ມ, ຄົນທີ່ຖິ້ມຄວາມຊື່ສັດໄປ, ຫລື ຄົນທີ່ຫັນໜີຈາກພຣະເຈົ້າ ກໍຍັງສາມາດຖືກສ້ອມແຊມຄືນໃໝ່ໄດ້. …

“ຂ່າວປິຕິຍິນດີຂອງພຣະກິດຕິຄຸນແມ່ນ: ເພາະແຜນແຫ່ງຄວາມສຸກນິລັນດອນ ທີ່ພຣະບິດາເທິງສະຫວັນທີ່ຮັກໄດ້ຈັດໄວ້ໃຫ້ເຮົາ ແລະ ຜ່ານການເສຍສະລະທີ່ບໍ່ມີຂອບເຂດຂອງພຣະເຢຊູຄຣິດ, ເຮົາບໍ່ພຽງແຕ່ໄດ້ຮັບການໄຖ່ຈາກສະພາວະທີ່ຕົກໄປ ແລະ ຖືກສ້ອມແຊມສູ່ຄວາມບໍລິສຸດເທົ່ານັ້ນ, ແຕ່ເຮົາຈະສາມາດກ້າວໜ້າເກີນກວ່າມະນຸດສາມາດເຮັດໄດ້ ແລະ ກາຍເປັນຜູ້ຮັບມູນມໍລະດົກແຫ່ງຊີວິດນິລັນດອນ ແລະ ຮັບເອົາລັດສະໝີພາບຂອງພຣະເຈົ້າ ທີ່ເກີນກວ່າຈະບັນລະຍາຍໄດ້” (“He Will Place You on His Shoulders and Carry You Home,” Liahona, May 2016, 102).

ເບິ່ງ Patrick Kearon, “God’s Intent Is to Bring You Home,” Liahona, May 2024, 87–89 ນຳອີກ.

ເອຊາຢາ 55–56

ພຣະຜູ້ເປັນເຈົ້າເຊື້ອເຊີນທຸກຄົນໃຫ້ “ຮັກສາພັນທະສັນຍາຂອງເຮົາ.”

ເປັນເວລາຫລາຍລຸ້ນຄົນ, ຊາວອິດສະຣາເອນຖືກນັບວ່າເປັນຜູ້ຄົນແຫ່ງພັນທະສັນຍາຂອງພຣະເຈົ້າ. ເຖິງຢ່າງໃດກໍຕາມ, ແຜນຂອງພຣະເຈົ້າໄດ້ລວມຫລາຍກວ່າພຽງແຕ່ປະຊາຊາດດຽວສະເໝີ, ເພາະ “[ທຸກຄົນທີ່ຫິວນ້ຳ]” ຖືກເຊື້ອເຊີນໃຫ້ “ມາ … [ຫານ້ຳ]” (ເອຊາຢາ 55:1). ໃຫ້ເກັບສິ່ງນີ້ໄວ້ໃນຈິດໃຈ ຂະນະທີ່ທ່ານອ່ານ ເອຊາຢາ 55 ແລະ 56, ແລະ ໄຕ່ຕອງວ່າ ການເປັນຜູ້ຄົນຂອງພຣະເຈົ້ານັ້ນ ໝາຍຄວາມວ່າຫຍັງ. ຂ່າວສານຂອງພຣະເຈົ້າແກ່ຜູ້ທີ່ຮູ້ສຶກ “[ຖືກແຍກອອກຢ່າງສິ້ນເຊີງ]” ຈາກພຣະອົງຄືຫຍັງ? (ເອຊາຢາ 56:3). ໃຫ້ຄິດທີ່ຈະໝາຍຂໍ້ທີ່ບັນຍາຍເຖິງທັດສະນະ ແລະ ການກະທຳຂອງຜູ້ທີ່ “ຮັກສາພັນທະສັນຍາຂອງເຮົາ” (ເບິ່ງ ເອຊາຢາ 56:4–7).

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເອຊາຢາ 51–52

ພຣະຜູ້ເປັນເຈົ້າເຊື້ອເຊີນເຮົາໃຫ້ “ເຂັ້ມແຂງຍິ່ງໃຫຍ່.”

ມັນອາດມ່ວນສຳລັບລູກໆຂອງທ່ານທີ່ຈະຄົ້ນພົບວະລີເຊັ່ນ “ຕື່ນຂຶ້ນ,” “ຢືນຂຶ້ນ,” ແລະ “ເຂັ້ມແຂງຍິ່ງໃຫຍ່” ໃນ ເອຊາຢາ 51:9, 17; 52:1–2, 9 ແລະ ແລ້ວສະແດງທ່າທາງຕາມວະລີນັ້ນ. ຫລັງຈາກເຮັດເຊັ່ນນັ້ນ, ທ່ານສາມາດເວົ້າລົມກ່ຽວກັບວ່າ ການຕື່ນຂຶ້ນ, ຢືນຂຶ້ນ, ແລະ ເພີ່ມກຳລັງທາງວິນຍານນັ້ນ ໝາຍຄວາມວ່າຫຍັງ. ພຣະຜູ້ເປັນເຈົ້າໄດ້ຂໍໃຫ້ເຮົາເຮັດຫຍັງໃນຂໍ້ເຫລົ່ານີ້?
ລູກໆຂອງທ່ານຍັງສາມາດອ່ານ ເອຊາຢາ 51:1, 4, 7 ແລະ ລະບຸຜູ້ທີ່ພຣະຜູ້ເປັນເຈົ້າກຳລັງກ່າວນຳ ແລະ ສິ່ງທີ່ພຣະອົງຢາກໃຫ້ພວກເຂົາເຮັດ. ການ “ຟັງ” ພຣະຜູ້ເປັນເຈົ້ານັ້ນ ໝາຍຄວາມວ່າຫຍັງ? ເຮົາຈະສາມາດສະແດງໃຫ້ພຣະຜູ້ເປັນເຈົ້າເຫັນວ່າ ເຮົາ “ຟັງ” ພຣະອົງໄດ້ແນວໃດ?

ເອຊາຢາ 53:3–9

ພຣະເຢຊູຄຣິດໄດ້ຮັບເອົາບາບ ແລະ ຄວາມໂສກເສົ້າຂອງເຮົາໄວ້ກັບພຣະອົງ.

ທ່ານ ແລະ ລູກໆຂອງທ່ານສາມາດເບິ່ງສອງສາມຮູບທີ່ສະແດງເຖິງຄວາມທຸກທໍລະມານ ແລະ ຄວາມຕາຍຂອງພຣະເຢຊູຄຣິດ (ເບິ່ງ, ຍົກຕົວຢ່າງ, ປຶ້ມຮູບພຣະກິດຕິຄຸນ, ເລກທີ 56, 57, 58). ແລ້ວພວກທ່ານກໍສາມາດອ່ານ ເອຊາຢາ 53:3–6, 9 ນຳກັນ ແລະ ຊອກຫາຄຳທີ່ບັນຍາຍເຖິງສິ່ງທີ່ກຳລັງເກີດຂຶ້ນໃນຮູບ. ຊ່ວຍໃຫ້ລູກໆຂອງທ່ານເຂົ້າໃຈວ່າ ເອຊາຢາໄດ້ແບ່ງປັນຄວາມຈິງເຫລົ່ານີ້ເປັນເວລາຫລາຍຮ້ອຍປີກ່ອນທີ່ມັນໄດ້ເກີດຂຶ້ນ. ເປັນຫຍັງມັນຈຶ່ງສຳຄັນສຳລັບຜູ້ຄົນທີ່ຈະຮູ້ສິ່ງເຫລົ່ານີ້ຫລາຍໆປີລ່ວງໜ້າ? (ເບິ່ງ ແອວມາ 39:15–19).
ຫລັງຈາກທີ່ອ່ານຈາກ ເອຊາຢາ 53:4, “ທ່ານທົນຕໍ່ຄວາມທຸກທີ່ເປັນຂອງພວກເຮົາ ແລະ ທົນຄວາມເຈັບປວດທີ່ພວກເຮົາສົມຄວນໄດ້ຮັບ,” ລູກໆຂອງທ່ານສາມາດລອງຍົກວັດຖຸທີ່ໜັກ (ຫລື ທຳທ່າຍົກມັນ). ເວົ້າກ່ຽວກັບວ່າ “ຄວາມທຸກໂສກ” ແລະ “ຄວາມໂສກເສົ້າ” ຫລື ຄວາມເສຍໃຈສາມາດຮູ້ສຶກໜັກ ແລະ ແບກຍາກແນວໃດ. ເປັນຫຍັງພຣະເຢຊູຈຶ່ງແບກ “ຄວາມທຸກໂສກ,” “ຄວາມໂສກເສົ້າ,” ແລະ “ໂທດກຳ” ຫລື ບາບຂອງເຮົາ? (ເບິ່ງ ແອວມາ 7:11–12 ນຳອີກ).

ເອຊາຢາ 55:6

ເຮົາສາມາດສະແຫວງຫາພຣະຜູ້ເປັນເຈົ້າ ແລະ ເອີ້ນຫາພຣະອົງໄດ້.

ເພື່ອສິດສອນລູກໆຂອງທ່ານກ່ຽວກັບ ເອຊາຢາ 55:6, ທ່ານສາມາດເຊື່ອງຮູບຂອງພຣະເຢຊູໄວ້ບ່ອນໃດບ່ອນໜຶ່ງໃນຫ້ອງ. ທ່ານສາມາດເຊື້ອເຊີນລູກໆຂອງທ່ານໃຫ້ຊອກຫາຮູບ ແລະ ບອກວິທີໜຶ່ງທີ່ພວກເຂົາສາມາດ “ສະແຫວງຫາ … [ພຣະຜູ້ເປັນເຈົ້າ] ຂະນະທີ່ຈະພົບພຣະອົງໄດ້.” ເພງເຊັ່ນ “Seek the Lord Early” (Children’s Songbook, 108) ອາດໃຫ້ແນວຄິດກັບພວກເຂົາໄດ້. ແລ້ວທ່ານກໍສາມາດໃຫ້ລູກຄົນໜຶ່ງເຊື່ອງຮູບ ແລະ ເຮັດກິດຈະກຳນັ້ນຊໍ້າ.

ເອຊາຢາ 55:8–9

ວິທີຂອງພຣະຜູ້ເປັນເຈົ້ານັ້ນ ສູງກວ່າວິທີຂອງເຮົາ.

ຫລັງຈາກທີ່ອ່ານ ເອຊາຢາ 55:9, ມັນອາດມ່ວນສຳລັບລູກໆຂອງທ່ານທີ່ຈະຢືນຢູ່ເທິງຕັ່ງ ແລະ ເວົ້າກ່ຽວກັບວ່າ ສິ່ງຕ່າງໆເບິ່ງເປັນແນວໃດເມື່ອເຂົາຢືນຢູ່ “ສູງກວ່າ.” ຫລື ພວກເຂົາສາມາດແຕ້ມຮູບກ່ຽວກັບວ່າ ເອຊາຢາ 55:9 ມີຄວາມໝາຍແນວໃດສຳລັບພວກເຂົາ. ແລ້ວທ່ານກໍສາມາດສົນທະນາກ່ຽວກັບບາງວິທີຂອງພຣະຜູ້ເປັນເຈົ້າທີ່ສູງກວ່າວິທີຂອງເຮົາ. ຍົກຕົວຢ່າງ, ວິທີທີ່ພຣະອົງປະຕິບັດຕໍ່ຄົນບາບເປັນແນວໃດ? (ເບິ່ງ ມາຣະໂກ 2:15–17). ວິທີທີ່ພຣະອົງນຳພາຄົນອື່ນເປັນແນວໃດ? (ເບິ່ງ ມັດທາຍ 20:25–28). ແບ່ງປັນກັບລູກໆຂອງທ່ານວ່າ ທ່ານໄດ້ຮຽນຮູ້ທີ່ຈະໄວ້ວາງໃຈໃນວິທີ ແລະ ຄວາມຄິດທີ່ສູງກວ່າຂອງພຣະຜູ້ເປັນເຈົ້າແນວໃດ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຮູບພາບຂອງພຣະເຢຊູ — His Light [ຄວາມສະຫວ່າງຂອງພຣະອົງ], ໂດຍ ໄມໂກ ມອມ

ໜ້າກິດຈະກຳປະຖົມໄວ: ເຮົາສາມາດສະແຫວງຫາພຣະຜູ້ເປັນເຈົ້າ ແລະ ເອີ້ນຫາພຣະອົງໄດ້ — His Light [ຄວາມສະຫວ່າງຂອງພຣະອົງ], ໂດຍ ໄມໂກ ມອມ