Ezekiel 1–3; 33–34; 36–37; 47

Tek Ezekiel 3 dhe 34, Zoti u drejtohet udhëheqësve të popullit të Tij si roje dhe barinj. Ndërsa i lexoni këta kapituj, merrni parasysh se çfarë sugjerojnë këta tituj lidhur me atë se çfarë do të thotë të jeni udhëheqës.

Kush janë “delet” që Zoti dëshiron që ju t’i ushqeni? Çfarë gjeni tek Ezekiel 34 që mund ta ndihmonte dikë për t’u përgatitur që të shërbejë në një mision, të rritë fëmijët apo të përmbushë një detyrë për dhënie shërbese? Si mund ta ndiqni shembullin e Shpëtimtarit si bariu ynë? (Shihni vargjet 11–31.)

Gjithashtu mund të përsiatni për simbolikën që gjeni në këtë kapitull. Çfarë mund të përfaqësojnë “kullota [e] mir[ë]” dhe “vatha” e mirë te vargu 14? Cili është ndryshimi midis një deleje që është e “humbur” dhe asaj që është e “hutuar”? (Vargu 16.) Çfarë simbolesh të tjera gjeni?

Shihni edhe te Gjoni 21:15–17; Gerit W. Gong, “Dhënia e Shërbesës”, Liahona, maj 2023, f. 16–19.

“Në rast se … mëkatet tona janë mbi ne”, – pyetën veten izraelitët e robëruar, “si do të mund të jetojmë?” (Ezekiel 33:10.) Si përgjigje, Zoti u mësoi atyre rreth pendimit dhe faljes. Këto pyetje mund t’ju ndihmojnë të përsiatni për atë që dha mësim Ai:

• Çfarë mendoni se do të thotë të “k[esh] besim në drejtësinë [tënde]”? (Shihni tek Ezekiel 33:12–13.)

• Çfarë do t’i thoshit dikujt që mendon se njerëzit të cilët përshkruhen tek Ezekiel 33:12–19, nuk po trajtohen në mënyrë të drejtë? (Shihni edhe te Mateu 21:28–31; Lluka 18:9–14.)

• Çfarë gjeni në këto vargje që ju ndihmon të kuptoni se çfarë do të thotë të pendohesh? Çfarë pikëpamjesh të tjera gjeni tek Ezekiel 36:26–27 dhe Alma 7:14–16?

Mbledhja e Izraelit portretizohet tek Ezekiel 37 nëpërmjet dy simboleve. Ndërsa lexoni rreth simbolit të parë – kocka të vdekura që rikthehen në jetë (shihni vargjet 1–14) – përsiatni se çfarë ju sugjeron rreth mbledhjes së Izraelit në të dyja anët e velit (shihni edhe tek Ezekiel 36:24–30). Merrni parasysh pyetje si këto:

• Çfarë po përpiqet të përmbushë Zoti nëpërmjet mbledhjes së Izraelit?

• Si po e përmbush Ai këtë gjë?

Mund t’i bëni vetes po të njëjtat pyetje ndërsa lexoni rreth simbolit të dytë te vargjet 15–28. Simboli i dytë përfshin dy drurë, të cilët shumë studiues i interpretojnë si tabela druri për shkrim të bashkuara nga një menteshë. Druri i Judës mund të përfaqësojë Biblën (duke qenë se një pjesë e madhe e Biblës u shkrua nga pasardhësit e Judës) dhe druri i Jozefit mund të përfaqësojë Librin e Mormonit (duke qenë se pjesëtarët e familjes së Lehit ishin pasardhës të Jozefit të Egjiptit). Duke pasur këtë në mendje, çfarë ju mësojnë këto vargje rreth rolit të shkrimeve të shenjta në mbledhjen e Izraelit?

Mendoni se si Bibla dhe Libri i Mormonit kanë vepruar së bashku në jetën tuaj, veçanërisht për t’ju ndihmuar që të vini te Krishti. Cilat fragmente kanë qenë veçanërisht kuptimplota për ju?

Shihni edhe te 2 Nefi 3:11–13; 29:14; “Izrael, Per’ndia po Th’rret”, Himne, nr. 7; Tema dhe Pyetje, “Bible” [“Bibla”], “Book of Mormon” [“Libri i Mormonit”], Gospel Library [Biblioteka e Ungjillit]; “The Book of Mormon Gathers Scattered Israel” [“Libri Mormonit Mbledh Izraelin e Shpërndarë”] (material filmik), Gospel Library [Biblioteka e Ungjillit].

1:31

Ndërsa lexoni tek Ezekiel 47:1–12, mund t’ju ndihmojë njohuria se Deti i Vdekur është kaq i kripur saqë peshqit dhe bimët nuk mund të jetojnë në të. Çfarë ju bën përshtypje rreth ujërave të përshkruara te vargjet 1–12? (Shihni edhe te Zbulesa 22:1.) Çfarë mund të simbolizojnë këta ujëra? Çfarë mund të përfaqësojnë pemët e përshkruara te vargu 12?

Çfarë kuptueshmërie shtesë merrni nga mesazhi i Plakut Dejll G. Renland “Historia Familjare dhe Puna në Tempull: Vulosja dhe Shërimi”? (Shihni te Liahona, maj 2018, f. 46–49.) Përsiatni se si keni gjetur jetë dhe shërim shpirtëror për shkak të tempullit.

• Fëmijëve të vegjël mund t’iu pëlqejë të bëjnë veprime që përshtaten me vargun tek Ezekiel 3:17. Për shembull, ata mund të tregojnë me gisht sytë, veshët dhe gojën e tyre kur të lexoni fjalët “roje”, “dëgjosh” dhe “goja”. Gjithashtu mund t’u pëlqejë të shkojnë për një shëtitje jashtë ose thjesht nëpër dhomë. Ndërkohë që ecin, paralajmërojini për gjërat përgjatë shtegut, si lumenj për t’i kapërcyer, degë për të kaluar nën to ose kafshë për t’i shmangur (të vërteta ose të imagjinuara). Kjo mund të çojë drejt një bashkëbisedimi rreth mënyrës se si profeti i Zotit na paralajmëron për rreziqe që nuk mund t’i shohim.

• Këtu është një mënyrë tjetër për të ilustruar vargjet tek Ezekiel 3:17; 33:1–5. Njëri nga fëmijët tuaj mund të bëjë sikur është një “roj[ë]” duke parë nga dritarja dhe duke u treguar gjithë të tjerëve se çfarë po ndodh jashtë. Ju gjithashtu mund të shihni materialin filmik “Watchman on the Tower” [“Roja në Kullë”] (ChurchofJesusChrist.org). Si është profeti ynë i gjallë si një rojë për ne?

  

  4:17

• Pasi të lexoni së bashku vargjet tek Ezekiel 37:15–23, ju dhe fëmijët tuaj mund të gjeni dy drurë dhe të shkruani tek njëri Për Judën (Biblën) dhe tek tjetri Për Jozefin (Librin e Mormonit). Më pas mund të tregoni histori ose shkrime të shenjta nga Bibla dhe Libri i Mormonit që ju ndihmojnë të ndiheni më afër Shpëtimtarit dhe të bëheni “populli [i Tij]” (vargu 23). Pse është mirë që t’i kemi të dy këta libra të shkrimit të shenjtë?

• Ezekiel 47 përshkruan vegimin e Ezekielit për ujin që rrjedh nga tempulli dhe shëron Detin e Vdekur, një det aq i kripur saqë peshqit dhe bimët nuk mund të jetojnë në të. Ndoshta secili nga fëmijët tuaj mund të vizatojë një ose dy sende nga vegimi, të tillë si një tempull, një lumë, një shkretëtirë, Detin e Vdekur, një mori peshqish apo një pemë me fruta. Më pas, ndërsa lexoni së bashku vargjet 1–12, ata mund të tregojnë vizatimin e tyre ku të përmendet ai send. Çfarë bekimesh erdhën prej lumit në këtë vegim? Ndihmojini fëmijët të kuptojnë se si këto bekime janë si bekimet që Shpëtimtari ua ofron atyre që i mbajnë besëlidhjet e tempullit. Mund të ndihmojë materiali filmik “And the River Will Grow” [“Dhe Lumi do të Mbushet”].

  

  3:43

• Gjithashtu mund të këndoni së bashku një këngë që përshkruan bekimet e tempullit, të tillë si “Familjet Mund të Jen’ Bashk’ Përgjithmon’” (Libri i Këngëve të Fëmijëve, f. 98). Çfarë na mëson kjo këngë për mënyrën se si Zoti na bekon në shtëpinë e Tij të shenjtë?