Daniel 1–7

Në njëfarë mënyre, ne të gjithë jetojmë në Babiloni. Ne shpesh përballemi me tundime për t’i kompromentuar standardet tona dhe për t’u larguar nga besimi te Krishti. Ndërsa lexoni te Daniel 1, 3 dhe 6, vini re mënyrat sipas të cilave Danielit, Shadrakut, Meshakut dhe Abed‑negos iu bë presion për të bërë gjëra që e dinin se ishin të gabuara. Si u përgjigjën ata në këto situata? (Shihni te Daniel 1:10–13; 3:15–18; 6:10.) Cilat ishin rrjedhojat e besimit të tyre? Çfarë mësoni nga këto përvoja që mund t’ju ndihmojnë të mirëbesoni te Zoti kur përballeni me kundërshtimin? Gjithashtu merrni parasysh pyetjet e mëposhtme:

• Kur jeni ndier nën presion për të bërë diçka që e dinit se ishte e gabuar? Si ju ka bekuar Zoti për zbatimin e urdhërimeve të Tij?

• Po sikur besimi juaj të mos çojë drejt mrekullive që kërkoni? (Për një shembull, shihni tek Alma 14:8–13.) Bazuar tek ajo që lexuat te Daniel 3:13–18, si mendoni se do t’i ishin përgjigjur kësaj pyetjeje Shadraku, Meshaku dhe Abed-negoja? Si mund të ndikojë shembulli i tyre në mënyrën se si ju qaseni sprovave tuaja?

• Si mund t’i udhëheqin zgjedhjet tuaja të drejta njerëzit e tjerë drejt besimit më të madh te Zoti? (Shihni te Daniel 2:47; 3:28–29.) Përsiatni për efektet që zgjedhjet tuaja mund të kenë tek të tjerët.

Shihni gjithashtu te Diter F. Uhtdorf, “Mos Ki Frikë, Vetëm Ki Besim”, Liahona, nëntor 2015, f. 76–79.

Nëpërmjet zbulesës, Danieli pa se ëndrra e Nebukadnetsarit parashikoi mbretëritë e ardhshme të botës, si dhe mbretërinë e ardhshme të Perëndisë, e cila “nuk do të shkatërrohet kurrë” (Daniel 2:44). “Kisha është ajo mbretëri e profetizuar e ditëve të mëvonshme”, – dha mësim Plaku D. Tod Kristoferson, – “jo e krijuar nga njeriu, por e ngritur nga Perëndia i qiellit dhe që rrokulliset si guri që ‘shkëputet nga mali, jo nga dora e njeriut’ për të mbushur tokën” (“Përse Kisha”, Liahona, nëntor 2015, f. 111). Mendoni për mbretërinë e Perëndisë të ditëve të mëvonshme ndërsa lexoni përshkrimet për gurin te Daniel 2:34–35, 44–45. Cili është roli juaj për të ndihmuar që të përmbushet kjo profeci?

Shihni edhe te “Dëgjoni Kombe!”, Himne, nr. 171; “God Gave Them Knowledge” [“Perëndia Ju Dha Njohuri”] (material filmik), ChurchofJesusChrist.org.

13:49

Ndërsa shqyrtoni vargjet te Daniel 2:1–15, merreni parasysh se si do të ndiheshit po të gjendeshit në vendin e Danielit. Çfarë bëri Danieli? (Shihni te Daniel 2:16–18.) Çfarë mund të mësoni nga Daniel 1:17 rreth mënyrës se si Perëndia e përgatiti Danielin? Çfarë mund të mësoni nga fjalët dhe veprimet e Danielit pasi e mori ndihmën e Zotit? (Shihni te Daniel 2:19–30.)

Gjatë shërbesës së Shpëtimtarit në tokë shumë judenj menduan se titulli “Biri [i] njeriu[t]” nga Daniel 7:13 i drejtohej Mesias që do të vinte. Çfarë mësoni për Mesian nga Daniel 7:13–14? (Shihni edhe te Moisiu 6:57.)

Shpëtimtari shpesh iu referua vetes së Tij si “Biri [i] njeriu[t]”. Merreni parasysh që të shqyrtoni disa shembuj: Mateu 25:31; Marku 9:31; 10:45. Çfarë po na mëson Ai rreth vetes së Tij në këto vargje? Te Marku 14:61–64, Jezusi e përdori këtë titull në ditën e fundit të jetës së Tij në vdekshmëri. Vërini re reagimin e njerëzve që e dëgjuan deklaratën e Tij. Si ndikon profecia e Danielit rreth Birit të Njeriut në ndjenjat tuaja për atë që i ndodhi Atij te Marku 15?

Ashtu si Jezusin e urrenin ngaqë shpalli se Ai ishte “Biri [i] njeriu[t]”, edhe ju mund të përballeni me përndjekje sepse shpallni të vërtetën. Krahasojeni profecinë te Daniel 7:13–14 me premtimet te Doktrina e Besëlidhje 121:29, 46.

Shihni edhe te Doktrina e Besëlidhje 49:6; Udhëzuesi për Shkrimet e Shenjta, “Bir i Njeriut”, Gospel Library [Biblioteka e Ungjillit].

• Për t’i ndihmuar fëmijët tuaj që të mësojnë nga tregimet frymëzuese në librin e Danielit, mund të gjeni figura të ngjarjeve te Daniel 1, 3 dhe 6 (shihni faqen e veprimtarisë së kësaj jave ose te Libri i Figurave Artistike të Ungjillit, nr. 23, 25, 26). Më pas mund t’i vendosni figurat përmbys dhe të ftoni një fëmijë që të kthejnë njërën dhe të flasë për tregimin që paraqet ajo. (Për ndihmë, shihni mësimet “Danieli dhe Miqtë e Tij”, “Shadraku, Meshaku dhe Abed-negoja” dhe “Danieli dhe Gropa e Luanëve” tek Tregime nga Dhiata e Vjetër, f. 154–156, 160–162, 163–165.)

  

  1:39

  

  1:39

  

  1:45

• Ndihmojini fëmijët tuaj të mendojnë për situata kur mund të jenë në presion për të bërë një zgjedhje të gabuar, siç ishin Danieli dhe miqtë e tij te Daniel 1, 3 dhe 6. Tregojini njëri‑tjetrit se si jeni bekuar për bërjen e zgjedhjes së drejtë edhe kur ishte e vështirë. Gjithashtu mund të këndoni së bashku një këngë që lidhet me këtë temë, të tillë si “T’Drejtën Zgjidh” (Himne, nr. 150).

• Leximi i tregimit rreth Danielit dhe miqve të tij që refuzuan mishin dhe verën e mbretit, mund të frymëzojë një bashkëbisedim rreth ligjit të shëndetit që Ati Qiellor na e ka dhënë sot (shihni te Doktrina e Besëlidhje 89). Ndoshta mund t’i kërkoni bekimet që morën Danieli dhe miqtë e tij dhe t’i krahasoni ato me bekimet e premtuara në Fjalën e Urtësisë (shihni te Daniel 1:15–17 dhe Doktrina e Besëlidhje 89:18–21).

• Ndërsa lexoni me fëmijët tuaj te Daniel 2:31–35, 44–45, mund t’i ftoni të bëjnë një vizatim të ëndrrës së Nebukadnetsarit. Ndihmojini të kuptojnë se guri në ëndërr përfaqëson Kishën e Jezu Krishtit të Shenjtorëve të Ditëve të Mëvonshme. Çfarë mësojmë për Kishën nga kjo ëndërr? Fëmijët tuaj mund të përmendin disa gjëra që i bëri Ati Qiellor për të ngritur Kishën e Tij në ditët e mëvonshme. Nëse ju nevojitet ndihmë, mund të tregoni figura të ngjarjeve për Rivendosjen e Kishës (shihni te Libri i Figurave Artistike të Ungjillit, nr. 90–95).

• Përse ishte lutja ndaj Atit Qiellor kaq e rëndësishme për Danielin? Ndoshta ju dhe fëmijët tuaj mund të flisni rreth asaj pyetjeje ndërsa lexoni së bashku te Daniel 6. Më pas mund t’i tregoni njëri‑tjetrit se përse lutja është e rëndësishme për ju. Fëmijëve tuaj mund t’iu pëlqejë të vizatojnë veten duke u lutur në situata të ndryshme. Ata mund t’i përdorin vizatimet e tyre për t’i dhënë mësim njëri‑tjetrit se ne mund t’i lutemi Atit Qiellor pavarësisht se ku jemi ose çfarë na nevojitet.