Selemaia 31–33; 36–39; Tangilaulau ʻa Selemaia 1; 3

Naʻe ʻafioʻi ʻe he ʻEikí ʻi he Selemaia 31; 33 ʻa e “tangi, mo e tangilāulāu” (Selemaia 31:15) ʻe aʻusia ʻe he kakai ʻIsilelí ʻi heʻenau nofo pōpulá. Ka neongo ia, naʻá ne ʻomi foki ha ngaahi lea fakafiemālie mo e ʻamanaki lelei. Kumi kinautolu ʻi hoʻo lau ʻa e ngaahi vahe ko ʻení. Ko e hā ha ngaahi talaʻofa ʻokú ke maʻu ʻoku kaunga kiate koe?

Neongo naʻe maumauʻi ʻe he kakai ʻIsilelí ʻenau fuakava mo e ʻEikí, ka naʻe kikiteʻi ʻe Selemaia ʻe toe fokotuʻu ʻe he ʻEikí ha “fuakava foʻou” mo “taʻengata” mo kinautolu (Selemaia 31:31; 32:40). Ko e hā ʻa e fuakava ko iá? Fakakaukau ke kumi ha ngaahi fakakaukau ʻi he Fakahinohino ki he Ngaahi Folofolá, “Fuakava Foʻou mo Taʻengatá,” Gospel Library.

ʻI hoʻo lau ʻa e Selemaia 31:31–34; 32:37–42, fakalaulauloto:

• Ko e hā ʻene ʻuhinga kiate koe ke hoko ko ha konga ʻo e kakai fuakava ʻa e ʻOtuá.

• ʻOku ʻuhinga ki he hā ke tohi ʻEne fonó ʻi ho lotó.

• Ko e hā e meʻa ʻoku talaʻofa mai ʻe he ʻEikí ʻi he taimi ʻokú ke fai ai ha ngaahi fuakava mo Iá.

• Ko e founga ʻoku liliu ai koe ʻe hoʻo vā fetuʻutaki fuakava mo e ʻEikí.

Ko e hā ha ngaahi palōmesi kuó ke fai ki he ʻOtuá ʻi hoʻo kau ʻi he ngaahi ouau toputapú? ʻOkú Ne fakahoko fēfē ʻEne ngaahi talaʻofa kiate koé?

Vakai foki, David A. Bednar, “Nofo ʻiate Au, pea mo Au ʻiate Koe; Ko Ia Ke Ke ʻAʻeva mo Au,” Liahona, Mē 2023, 123–26.

Fakatatau ki he Selemaia 36:2–3, ko e hā e ʻuhinga naʻe fekau ai ʻe he ʻEikí ʻa Selemaia ke lekooti ʻene ngaahi kikité? ʻI hoʻo lau ʻa e Selemaia 36, fakatokangaʻi e anga e ongo ʻa e kakaí ni fekauʻaki mo e ngaahi kikité ni:

• Ko e ʻEikí (vakai, veesi 1–3, 27–31)

• Selemaia (vakai, veesi 4–7, 32)

• Paluki (vakai, veesi 4, 8–10, 14–18)

• Sēhuti mo e Tuʻi ko Sihoiakimí (vakai, veesi 20–26)

• ʻElinatani, Telaia, mo e Kemalia (vakai, veesi 25)

Fakalaulauloto ki he ongo ʻokú ke maʻu fekauʻaki mo e folofolá. Kuo nau tokoniʻi fēfē koe ke ke tafoki mei he koví?

ʻI he Selemaia 37:1–3, 15–21; 38:1–6, 14–28, ko e hā ha fakamoʻoni ʻokú ke sio ki ai naʻe tui ʻa e Tuʻi ko Setikiá ko Selemaiá ko e palōfita moʻoni ia ʻa e ʻEikí? Ko e hā ha fakamoʻoni ʻokú ke sio ki ai naʻe ʻikai ke tui ʻa Setikia? Ko e hā e meʻa ʻokú ke ako mei he fakafehoanaki ko ʻení? ʻI hoʻo lau ʻa e Selemaia 39, fakalaulauloto ki he faikehekehe naʻe mei hoko kapau naʻe muimui ʻa Setikia mo hono kakaí ki he palōfitá mo tauhi e ngaahi fekau ʻa e ʻEikí. (Fakafehoanaki e meʻa naʻe hoko kia Setikiá mo e meʻa naʻe hoko ki he fāmili ʻo Līhaí ʻi he 1 Nīfai 1–2.)

Naʻe ongoʻi ʻe he kau ʻōfisa ʻa e tuʻí naʻe hanga ʻe he ngaahi kikite ʻa Selemaiá ʻo fakalotosiʻi ʻa e loto fie tau ʻa e kau sōtiá, ko ia naʻa nau lī ai ʻa Selemaia ki ha fale fakapoʻuli (vakai, Selemaia 38:1–4). ʻI he Selemaia 38:6–13, ko e hā ha meʻa ʻokú ke mahuʻingaʻia ai ʻi he tali ʻa ʻIpetemeleki ko e tangata ʻItiopeá? Fakatokangaʻi ange foki ʻa e tāpuaki naʻe foaki ʻe he ʻEikí kia ʻIpetemelekí ʻi he Selemaia 39:15–18.

Te ke muimui fēfē ki he sīpinga ʻa ʻIpetemelekí?

Ko e tohi ʻo e Tangilaulau ʻa Selemaiá ko hano fakatahatahaʻi ia ʻo ha ngaahi maau ne tohi hili e fakaʻauha ʻo Selusalema mo hono temipalé. ʻOkú ke pehē ko e hā e ʻuhinga ʻoku mahuʻinga ai ke fakatolonga kinautolú? Fakakaukau ki he meʻa ʻoku tokoni ai e ngaahi heliaki ʻi he Tangilaulau ʻa Selemaia 1 mo e 3 ke mahino kiate koe fekauʻaki mo e mamahi lahi naʻe ongoʻi ʻe ʻIsilelí. Ko e hā ha ngaahi pōpoaki ʻo e ʻamanaki lelei ʻia Kalaisí ʻokú ke maʻu? (vakai tautautefito ki he Tangilaulau ʻa Selemaia 3:20–33vakai foki, Mātiu 5:4; Sēmisi 4:8–10; ʻAlamā 36:17–20).

Naʻe fakamatala ʻa Palesiteni M. Lāsolo Pālati ki ha ngaahi tūkunga ʻe niʻihi ʻe ala fakatupunga ai ha niʻihi ke mole ʻenau ʻamanaki leleí, pea naʻá ne fai ha faleʻi ki he feituʻu ke maʻu ai ʻa e ʻamanaki leleí:

“Mahalo ʻe ʻi ai hatau niʻihi ʻe femoʻuekina e moʻuí ʻi he moʻutāfuʻuá, siva e ʻamanakí, mo e loto-mamahí. Ko ha niʻihi tokolahi ʻoku nau ongoʻi feifeiavale ke fehangahangai mo e moveuveu ʻoku ngali ikuna ʻi he māmaní. Ko ha niʻihi ʻoku nau loto-ʻita ki ha kau mēmipa ʻo e fāmilí ʻoku nau fai ha ngaahi meʻa ke maumauʻi ai ʻa e tuʻunga ʻulungaanga maʻá koeʻuhí he ʻoku fakahikihikiʻi ia ʻi he māmaní. … Ko ha niʻihi kuo nau aʻu ʻo fakavaivaiʻi kinautolu ke tali ʻa e angahala mo e anga fakamamahi ʻo e māmaní ko ha meʻa ia ʻoku ʻikai lava ke toe fakaleleiʻi. Kuo nau foʻi he ʻamanaki leleí. …

“… ʻOku ʻi ai hatau niʻihi kuo siva ʻaupito pē e ʻamanakí koeʻuhí ko e faiangahalá mo e maumaufonó. ʻE lava ʻe ha taha ʻo femoʻuekina ʻi he ngaahi fakakaukau fakaemāmaní pea ʻikai ai ke ne toe ʻilo ha haoʻanga mei ai kae mole ʻaupito meiate ia ʻa e ʻamanaki leleí. Ko ʻeku kōlenga ki he kakai kotoa pē kuo nau tō ʻi he tauhele ko ʻeni ʻa e filí ke ʻoua naʻa mou teitei foʻi! ʻOku tatau ai pē pe ko e hā e tuʻunga vivili ʻoku hangē ʻokú ke ʻi aí pe ko e hā e tuʻunga vivili ʻe hoko ki aí, kātaki ʻo tui mai kiate au, te ke lava maʻu pē ʻo ʻamanaki lelei. Maʻu Pē” (“The Joy of Hope Fulfilled,” Ensign, Nov. 1992, 31–32).

Vakai foki, “ʻI he Māmaní mo e Faingataʻá,” Ngaahi Himí, fika 136.

• ʻI hoʻo lau mo hoʻo fānaú ʻa e Selemaia 31:3, te nau lava ʻo tokoni atu ke kumi ha ngaahi meʻa (pe fakatātā ʻo ha ngaahi meʻa) ʻoku tolonga fuoloa, hangē ko ha koini ukamea, mo ha meʻa ʻe niʻihi ʻoku ʻikai ke tolonga fuoloa, hangē ko e konga ʻo ha fuaʻiʻakau. Te ke lava ʻo talanoa fekauʻaki mo e ʻuhinga ʻo e “taʻengatá” pea fevahevaheʻaki ʻa e founga kuó ke ongoʻi ai e “ʻofa taʻengata” ʻa e Tamai Hēvaní. Te mou lava foki ʻo hivaʻi fakataha ha foʻi hiva hangē ko e “ʻOkú Ne Tokangaʻi” (Tohi Hiva ʻa e Fānaú, 142a).

• Mahalo ʻe fiefia hoʻo fānaú ke tā ha foʻi haati ʻi ha laʻipepa pea tohi ʻi he foʻi hātí ha ngaahi meʻa ʻoku nau ako mei he Selemaia 31:31–34 fekauʻaki mo hono fai ha ngaahi fuakava mo e ʻOtuá. Mahalo te ke loto ke toe vakaiʻi ʻa e fuakava ʻoku nau fai ʻi he papitaisó (vakai, Mōsaia 18:10, 13) pea aleaʻi e ʻuhinga hono tohi ʻo e ngaahi talaʻofá ni ʻi honau lotó.

• ʻE lava ke tokoni ʻa e peesi ʻekitivitī ʻo e uike ní ki hoʻo fānaú ke nau ako fekauʻaki mo Selemaia, Paluki, pea mo e tuʻí (vakai, Selemaia 36). Te nau lava foki ʻo fai ha ngaahi ngāue ʻokú ne fakatātaaʻi ʻa e ngaahi lea ʻi he Selemaia 36:4–10, hangē ko e tohi ʻi ha tohi (vakai, veesi 4) mo hono lau ʻo e folofolá ki he kakaí (vakai, veesi 8, 10).

• Te ke lava mo hoʻo fānaú ʻo sio ki ha tohi maʻá e fānaú mo ha tatau ʻo e folofolá pea talanoa ki he founga ʻoku faikehekehe ai e ongo tohí ni. Ko e hā e meʻa ʻoku makehe ai ʻa e folofolá? Mahalo ʻe fakalaumālie ke fevahevaheʻaki ha niʻihi ʻo e ngaahi potufolofola ʻoku makehe kiate koé.

• Te ke lava ʻo fakaʻaongaʻi ʻa e fakatātā ʻi he fakaʻosinga ʻo e fokotuʻutuʻu ko ʻení ke tokoni ki hoʻo fānaú ke nau fakakaukauloto ki he talanoa ʻo ʻIpetemeleki ʻi he Selemaia 38:6–13. Mahalo te ke lava ʻo tokoni ke nau kumi ha veesi naʻe fakahoko loto-toʻa ai ʻe ʻIpetemeleki ha meʻa ke tokoni ki he palōfita ʻa e ʻEikí. Ko e hā ha meʻa te tau lava ʻo fai ke fakahaaʻi ai ʻoku tau ʻiloʻi ʻoku uiuiʻi ʻe he ʻOtuá hotau palōfita he ʻaho ní?

• Ke fakafeʻiloaki e Tangilaulau ʻa Selemaiá, mahalo te ke loto ke fakamatalaʻi ki hoʻo fānaú naʻe fakaʻauha ʻa Selusalema mo e temipalé, koeʻuhí ko e teʻeki ai ke fakatomala ʻa e kau ʻIsilelí. Te mou lava ʻo fevahevaheʻaki ʻa e ongo naʻa mou mei maʻu kapau naʻa mou moʻui ʻi he kuonga ko iá (vakai, Tangilaulau ʻa Selemaia 1:1–2, 16). Ne ʻoatu fēfē nai ʻe he pōpoaki ʻi he Tangilaulau ʻa Selemaia 3:22–26 ha ʻamanaki lelei kiate koe?

• Te mou lava foki ʻo fetalanoaʻaki ki ha taimi naʻá ke ongoʻi loto-mamahi ai koeʻuhí ko ha fili hala naʻá ke fai. Ko e hā e meʻa ʻoku tau maʻu ʻi he Tangilaulau ʻa Selemaia 3:22–26 ʻoku tokoni ke mahino ai kiate kitautolu ʻa e fakamolemole ʻoku ʻomi ʻe Sīsū Kalaisí?