“Oakotohpe 26–Nohpempe 1. ‘I Pahn Kawekala Ahr Nsensuwed Ohng Nsenamwahu’: Seremaia 31–33; 36–39; Koulen Kedepwidepw Kan 1; 3” Kohdo, Idawehn Ie—Ohng Tehnpesomwi oh Imwen Sarawi Kan: Kadehdeh Mering 2026 (2026)
“Oakotohpe 26–Nohpempe1. ‘I Pahn Kawekala Ahr Nsensuwed Ohng Nsenamwahu,’” Kohdo, Idawehn Ie: Kadehdeh Mering 2026
Seremaia Wie Nsensuwedki Kamwomwomwlahn Seruhsalem, sang Rembrandt van Rijn
Oakotohpe 26–Nohpempe 1: “I Pahn Kawekala Ahr Nsensuwed Ohng Ni Nsenamwahu”
Seremaia 31–33; 36–39; Koulen Kedepwidepw Kan 1; 3
Ansou me Kauno pilada Seremaia en wiahla Soukohp men, E padahkihieng me ih ah pwukoah en “usada oh kupwelidi” (Seremaia 1:10)—oh nan wein Seruhsalem, direki me suwed me anahne usuhsda oh kupwelidi. Ahpw met wiahte kisehn ahn Seremaia pwukoah—e pehker ehng en pil “kawada, oh poadokedi” (Seremaia 1:10). Dahme kak kokouda de poadidi nan wasa tehn me miehier pwehki wiewia suwed en Sapwelimen Kauno aramas akan? Idek ni ehu soangen mwohmw, ansou me dihp oh kahpwal kin kawehla atail mour, iamwomwen atail kak pilehu kawada oh poadokedi? Pasapengpe mihmi nan “Kokohp mehlel oh pwung” (Seremaia 33:15), inoupen Mesaiahu. E pahn ketkihdo “inou kapw ehu” (Seremaia 31:31)—emen me pahn kilkilangete mwomwen en aramas emen ah wiewia. Sapwelime kosonned udahn pahn mih “nan mas [loaletail] kan,” ntingdi “nan [atail] mohngiong kan.” Ih met me kasalehda me Kauno “iei atail Koht” oh kitail “iei Sapwelime aramas” (Seremaia 31:33). E wia kisehn mour, me kitail pahn kin wiahda sapwung oh kin ahneki nsensuwed ekei pak. Ahpw ansou me kitail pahn lelohng soahng pwukat, Kauno inoukidahr me E pahn ketin, “Kawekala ahr nsensuwed ohng ni nsenamwahu” (Seremaia 31:13).
Ohng oaralap pen Koul en Kedepwdepw Kan, kilang “Pwuken, Koul en Kedepwdepw Kan” nan mehn kaweid ohng pwuhk sarawi kan.
Mehn Kaskuhl Ohng Tehnpesomwi oh Wasahn Kaudok Kan
Seremaia 31; 33
Kauno pahn kapitala Sapwelime aramas en inou kan.
Nan Seremaia 31; 33 Kauno kupwurki “koul en kedepwdepw kan, oh sengiseng loal” (Seremaia 31:15) me mehn Isrehl akan pahn lelohng nan arail wie sensel. Ahpw, E pil ketkihdo mahsen en koaloalamwahu oh koapwoaroapwoar. Rapahki mepwukat ni omw wadewadek ire pwukat. Soangen inou da me ke diarada me ohng komwi?
Seremaia 31:31–34; 32:37–42
“Re pahn wiahla Nei Aramas, oh I pahn wiahla ahr Koht.”
Mendahte mehn Isrehl kan ahr kawelahr ahr inou sarawi kan, Seremaia kohpada me Kauno pahn pwurehng kawada ehu inou “kapw” oh “inou sarawi soutuk” ohng irail (Seremaia 31:31; 32:40). Ia inou en? Pil kilang kaweid sang nan mehn Kaweid sang Pwuhk Sarawi kan,, “Inou Kapw Ehu oh Inou Poatopot,” Gospel Library.
Ni omw pahn wadewadek Seremaia 31:31–34; 32:37–42, medemedewe:
-
Ia kesempwal pen wia Sapwelimen Koht aramas en inouo ohng komwi?
-
Ia wehwehn ken kolokol Sapwellimen Kauno inou Nan omw mohngiong.
-
Dahme Kauno onoukihiong komwi ansou me komwi pahn wiahda inou kan.
-
Ia mwomwen kolokol omw inou ohng Kauno ah wekidala omw mour.
Iahnge inou kan me ke wiahiong Kauno ni omw wiadahr omw inou sarawi kan? Ia mwomwen Ah kin kapwaiada Sapwelime inou kan ohng uhk?
Pil kilang David A. Bednar, “Ieiang Ie, oh I pahn ieiang Uhk; Eri iangie,” Liahona, Mei 2023, 123–26.
Seremaia 36
Pwuhk sarawi ahneki manaman en kasohpaiehsang me suwed kan.
Nin duwen kaweid en Seremaia 36:2–3, Dahme Kauno mahsanihkihong Seremaia en ntingiedi mepwukat?? Ni ahmw pahn wadek Seremaia 36, kilang ia mwomwen en aramas pwukat ahr pepehm ohng kokohp pwukat:
-
Kauno (tehk ire tikitik 1–3, 27–31)
-
Seremaia (kilang ire tikitik 4–7, 32)
-
Paruk (kilang ire tikitik 4, 8–10, 14–18)
-
Seudi oh Nahnmwarki Sehoiakim (kilang ire tikitik 20–26)
-
Elnadan, Delaia, oh Kemaraia (tehk ire tikitik 25)
Medemedewe omw pepehm duwen ire pwukat. Iamwomwen ahr seweseiuk en sohpeisang me suwed?
Seremaia 37–39
Loaloapwoationg omw idawehn soukohp en Koht kan.
Nan Seremaia 37:1–3, 15–21; 38:1–6, 14–28, dahme kasalehiong uhk me Nahnmwarki Sedekaia kamehlele mahsen en Sapwelimen Kauno soukohp mehlel Seremaia? Dahme Kasalehiong uhk me Sedekaia sohte kamehlele? Dahme ke esehsang nan Wasahn karasaras wet? Ni ahmw pahn wadek Seremaia 39, medewe ia pahn mwomwen ma Sedekaia oh nah aramas akan idawehn oh kolokol kosonned akan en Kauno. (Karasapene dahme wiawihieng Sedekaia ohng dahme wiawihieng en Lehi peneinei nan 1 Nihpai 1–2.)
Seremaia 38:6–13; 39:15–18
I kak ahneki pwung kehlail en kesihnen kihda me pwung.
Nein nahnmwarkio kaun en sounpei kan pehmada me kokohp en Seremaia kan kahrehiongehr neirail sounpei kan ahr solahr inangih mahwen, eri irail kesehiong Seremaia nan kelen mahn (see Seremaia 38:1–4). Nan Seremaia 38:6–13, Soangen kopwuriamwei da me en Ebed-melech me wia mehn Ethiopia men ah pasapengo wiahng uhk? Pil tehk mwahu kapai kan me Kauno ketkihong Eped-melek nan Seremaia 39:15–18.
Iamwomwen ahmw kak Idawehn en Eped-melek karasaras?
Kapakap en Seremaia
Koul Kedepwidepw Kan 1; 3
Kauno kak kihsang ahi pahtou en dihp kan.
Pwuken Koul en Kedepwdepw Kan audaudki soai en karasaras kan mwurin kamwomwlahn Serusalem oh tehnpas sarawio. Ke medewe dahme kahrehda e kesempwaliki mepwukat en wie kolokol? Medewe dahme soai kan nan Koul en Kedepwdepw Kan 1 oh 3 sewesehkinuhk pwe ken wehwehki uwen laud en pahtou me mehn Isrehl kan kehnehr. Soangen kaweid en koapwoaroapwoarki Krais da me ke diar? (mehlel kilang nan Koul en Kedepwdepw Kan 3:20–33; pil kilang Madiu 5:4; Semes4:8–10; Alma 36:17–20).
Presiden M. Russell Ballard kasalehda soangen ansou kei me kak kahrehda soukoapwoaroapwoar, oh ih sawaskihda iawasa kitail kak diar koapwoaroapwoar:
“Ekei kitail kin ahneki lingernger, Nsensuwed, oh pahtou. Me tohto kin sohla ahr koapwoaroapwoar en powehdi kahpwal en sampah pwukat. Ekei kin pwunodkihda arail peneinei kan me pwupwidier nan kasongsong, oh arail wiewia nan rahn akan solahr mwahu. Ekei kin mweidala pein irail pwe dene me suwed oh apwal en sampah sohte kak mwahula. Re aledahr koapwoaroapwoar. …
“Ekei kitail kakete sohla ahneki koapwoaroapwoar douluhl pwehki diparail oh wiewia sapwung kan. Aramas emen me dulahr nan pangoat en momour en sampah kin sohla kak kilangada iamwomwen arail kak pitsang oh kin sohla ahr koapwoaroapwoar. Ahi kaweid ohng koaros me lohdiong ehr nan kahpwal wet iei en dehr uhdihsang nananti en pitsang. Mendahte apwal en soahng koaros ansouwet de apwal me pahn kohdo, menlau kamehleleie, ke kak ansou koaros ahneki koapwoaroapwoar. Ansou koaros” (“Popohl en Koapwoaroapwoar Pweidahr,” Ensign, Nop. 1992, 31–32).
Pil kilang “Come, Ye Disconsolate,” Melkahka, nempe. 115.
Sewese mehteikan en nantihieng pein esehla. Ekei pak ihme mengei kitail en kin ndahiong tohn sukuhl kan dahme kitail medewe me re anahne ese. Ahpw, wiepe me mengeio sohte kin ansou koaros mwahu. Elder David A. Bednar padahngki: “Kitail sohte anahne medmedewehte ‘Dahme I pahn ndahng irail?’ Kalelapak me kitail kak wia iei ‘Dahme I kak lukehiengrail en wia? Soangen kalelapak mwahu da mei kak idek, ma irail men sapeng, me pahn tepda lukehiong Ngehn Sarawi nan arail mour?’” (kapokon ehu ohng emen lapalap en mwomwohdisoht nisoutik, Feb. 7, 2020, broadcasts.ChurchofJesusChrist.org; pil kilang Teaching in the Savior’s Way, 25). Soangen ahl tohto me kak sewese tohn sukuhl kan en pein pwukoahki arail esehla. Karasepe, nan kaweid wet tohn sukuhl kan luhkehng ren rapahki, medewe, ntingiedi ire kan, kilang kilel, patehng kasukuhl me doadoahngki dipwisou kan, mahlen, oh ehukihda oh kapwaiada dahme irail eselahr.
Mehn Kaskuhl Ohng Seri Kan
Seremaia 31:3
En Sahm Nanleng oh Sises “limpoak ohng Ie sohte Imwi.”
-
Ni amwail pahn wadek Seremaia 31:3, noumwail seri kan kak sewese kumwail en rapahkihda mehkot (de kilel en mehkot) me pahn mwamwahu werei, me duehte sent mete, de mehkot me sohte pahn werei, me duehte wahn tuhke. Kumwail kak kosoiapene ia wehwehn “soutuk” oh ehukipene ia mwomwen amwail kehnehr “limpoak soutuk” en Sahm Nanleng.” Kumwail pil kak koukipene koul me rasehng “God Is Watching Over All” (Pwuken Koul Ohng Seri kan, 229).
Seremaia 31:31–34; 32:38–41
Koht pahn seweseie ien kolokol ahi inou sarawi kan.
-
Noumwail seri kan kakete pereniki mahleniada ehu mohngiong nan ehu tehn daropwe oh ntingiedi nan mohngiongo dahme irail eselahr kan nan Seremaia 31:31–34 duwen wiahda inou sarawi kan ohng Koht. Kumwail pil kak ehukipene inou kan me irail wiadahr ansoun pepdais (kilang Mosia 18:10, 13) oh ia kesempwalpen en kolokol inou pwukat nan arail mohngiong kan.
Seremaia 36:1–4
Irehn pwuhk sarawi kan iei mahsen en Koht.
-
Mehn kaweid en kamwadong en nan wihket kak sewese noumwail seri kan en esehla duwen Seremaia, Baruch, oh nahnmwarki (kilang Seremaia 36). Irail pil kak wia mehkot me pahn rasohng mahsen kan nan Seremaia 36:4–10, me duehte nting nan pwuhk (kilang ire tikitik 4) oh wadek pwuhk sarawi kan ohng aramas (kilang ire tikitik 8, 10).
-
Kumwail oh noumwail seri kan kak kilangpene pwuhk ohng seri kan oh ehu pwuhk sarawi oh kosoiapene wekpeseng en pwuhk pwukat. Dahme wiahda pwuhk sarawi en kesempwal? Kumwail pil kak ehukipene iren pwuhk sarawi kan me kesempwal ohng Kumwail.
Seremaia 38:6–13
I kak kesihnenkihda me pwung.
-
Kumwail kak doadoahngki kilel me sansal ni imwin oaralap wet pwehn sewese noumwail seri kan en medewe duwen soai en Ebed-melech nan Seremaia 38:6–13. Mwein kumwail kak seweseirail en rapahki ehu ire me pid Ebed-melech ah wia mehkot apwal ehu pwehn sewese Sapwelimen Koht soukohp. Dahme kitail kak wia pwehn kasalehda me kitail ese me atail soukohp en rahnwet pilipildahr sang rehn Koht?
Koulen Kedepwidepw Kan1:1–2, 16; 3:22–26
Sounkomouro kahrehda ahi kak ale mahkepen dipei kan.
-
Pwehn kapehseh Koul en Kedepwdepw Kan, ke kak kawehwehiong seri kan me pwehki irail mehn isrehl kan ahr sohte koluhla, ihme kahrehda Serusalem ah ohla iangahki tehnpas sarawio. Kumwail kak kosoiapene ia pahn mwomwen amwail pepehm ma kumwail iang mihmi mwo ansou o (tehk Koulen Kedepwidepw Kan 1:1–2, 16). Iamwomwen iren kaweid kan en nan Koulen Kedepwidepw Kan 3:22–26 ah kihong komwi koapwoaroapwoar?
-
Kumwail pil kak kosoiapene ansou kan me kumwail kin nsensuwedkihla pilipil sapwung kan kumwail kin wiahda. Dahme kitail diar nan Koulen Kedepwidepw Kan 3:22–26 me seweseikitail en wehwehkihla duwen mahk me sang Sises Krais?
Kal;audpe, kilang makesihn en sounpwunget Friend.