“Oktoba 26–Nobōm̧ba 1. ‘Inaaj Ukōt Aer Liaajlọḷ n̄an Lan̄lōn̄’: Jeremaia 31–33; 36–39; Liaajlo̧ļ 1; 3” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)
“Oktoba 26–Nobōm̧ba 1. ‘Inaaj Ukōt Aer Liaajlọḷ n̄an Lan̄lōn̄,’” Itok, Ļoor Eō: Kallim̧ur M̧okta 2026
Jeremaia ej Liaajļōļ kōn Kakure eo an Jerusalem, jān Rembrandt van Rijn
Oktoba 26–Nobōm̧ba 1: “Inaaj Ukōt Aer Liaajlọḷ n̄an Lan̄lōn̄”
Jeremaia 31–33; 36–39; Liaajlo̧ļ 1; 3
Ke Irooj ekar kūr Jeremaia n̄an erom̧ rikanaan, E kar ba n̄an e bwe mijen in enaaj “n̄an tūm̧wi, im rupwe” (Jeremaia1:10)—im ilo Jerusalem, ekar lukkun lōn̄ jerawiwi ko n̄an wūjwūj im n̄an eoļo̧k. Ak en̄in ekar m̧ōttan eo wōt ilo mijen eo an Jeremaia—eo kar bar likūt bwe en “n̄an kalōk im ekkat” (Jeremaia 1:10). Ta eo emaron̄ ekkal ak ekkat ilo joreen ko kar waļo̧k jān jum̧ae ko an armej in bujen ro? Kajjitōk ilo bar juon wāween, n̄e jerawiwi im māllejon̄ ko rej likut mour ko ad ilo jorren, ewi wāween ad maron̄ bar kalōki im ekkati? Uwaak ko rej pād ilo “Ra e wānok” (Jeremaia 33:15eo ej Messaia eo kar kallim̧ur kake. E ej bōktok “juon bujen ekāāl” (Jeremaia 31:31)—juon eo me ej aikuj ļapļo̧k jān juon wūjlepļo̧k ejabwe ak niknik ilo paaktok wōt. Kien eo an ej aikuj pād “ilo [kōj],” im jeje “ioon [buruōd].” En̄in ej lukkuun meļeļe an Irooj “[erom̧] Anij [eo ad]” im n̄an kōj bwe jen erom̧ “armej ro [Doōn]” (Jeremaia 31:33). Ej juon jerbal ebōk kitien, im jenaaj baj wōt kōm̧m̧an bōd im en̄jake burom̧ōj jān iien n̄an iien. Ak n̄e jej kōm̧m̧ani, Irooj ej kallim̧ur, “Inaaj ukōt aer liajļo̧ļ n̄an lan̄lōn̄” (Jeremaia 31:13).
N̄an tukaduin kōmeļeļe ko an Liaajļo̧ļ, lale “Lamentations, Book of” ilo Unin Tōl eo n̄an Jeje Ko Rekwojarjar.
Ļōmņak ko n̄an Ekkatak ilo M̧weeo im ilo Kabun̄ in
Jeremaia 31; 33
Irooj enaaj kōrooltok armej in bujen ro An jān kōm̧akkoko.
Ilo Jeremaia 31; 33 Irooj ej kile “jan̄ im liaajļo̧ļ” (Jeremaia ,31:15,) bwe Riisrael ro renaaj en̄jake ilo aer kar pād ilo kōm̧akoko. Ijoke, E ej barāinwōt letok naan in kaenōm̧m̧an im kōjatdikdik. Kappukoti ilo am̧ riiti jepta kein. Kallim̧ur ta ko kwoj loe ke rej jerbal n̄an kwe?
Jeremaia 31:31–34; 32:37–42
“Er renaaj armej ro aō, im inaaj aer Anij.”
Men̄e Riisrael ro rekar rub bujen ko aer ippān Irooj, Jeremaia ekar kanaan bwe Irooj enaaj bar ejaake juon “bujen ekāāl” ippān armej ro An (Jeremaia 31:31; 32:40). Ta bujen eo? Kejōkļo̧kjen kōn ļōmņak ko ilo Unin Tōl n̄an Jeje ko Rekwojarjar, “New and Everlasting Covenant,” Gospel Library.
Ilo am riiti Jeremaia 31:31–34; 32:37–42, kejōkļo̧kjen:
-
Ta meļeļein n̄an kwe bwe kwōn m̧ōttan armej in bujen an Anij.
-
Ta meļeļein bwe kakien ko An ren jeje ilo būruōd.
-
Ta ko Irooj ej kallim̧ur kake n̄e kwoj kōm̧m̧an bujen Ippān.
-
Ekōjkan an bujen jemjera eo ippān Irooj ukōt eok.
Ta kallim̧ur ko kwar kōm̧m̧ani n̄an Anij ilo am̧ kar bōk ko̧ņaam ilo kain̄i ko rekwojarjar? Ekōjkan An kakūrm̧ool kallim̧ur ko An n̄an kwe?
Bar lale David A. Bednar, “Abide in Me, and I in You; Therefore Walk with Me,” Liahona, May 2023, 123–26.
Jeremaia 36
Eoon ko ewōr aer kajoor n̄an ukōt eō jān nana ko.
Ekkar n̄an Jeremaia 36:2–3, etke Irooj ear kakien Jeremaia n̄an rekooti kanaan ko an? Ilo am̧ riiti Jeremaia36, ļje ewi wāween an armej rein en̄jake kōn kanaan kein:
-
Irooj eo (lale eoon 1–3, 27–31)
-
Jeremaia (lale eoon 4–7, 32)
-
Baruch (lale eoon 4, 8–10, 14–18)
-
Jehudi im King Jehoiakim (lale eoon 20–26)
-
Elnathan, Delaiah, im Gemariah (lale eoon 25)
Ļōmņak kōn elmen en̄jake eo kōn jeje ko rekwojarjar. Ewi wāween aer kar jipan̄ eok bwe kwon kattoļo̧k eok make jān nana ko?
Jeremaia 37–39
Kijn̄en̄e ilo ļoor rikanaan ro an Anij.
Ilo Jeremaia 37:1–3, 15–21; 38:1–6, 14–28, ta kein kam̧ool ko kwoj loi me Kiin̄ Zedekaia ear tōmaki ke Jeremaia ear juon rikanaan em̧ool an Irooj? Ta kein kam̧ool ko kwoj loe me Zedekaia ear jab tōmak? Ta ko kwoj ekkatak jān men in keidi ippān? Ilo am̧ riiti Jeremaia 39, kejōkļo̧kjen kōn oktak eo enaaj kar bōk jikin n̄e Zedekaia im armej ro an raar ļoor rikanaan im kōjpārok kien ko an Irooj. (Keidi ta eo ekar waļo̧k n̄an Zedekaia ippān ta eo ekar waļo̧k n̄an baam̧le eo an Liai ilo 1 Nipa 1–2.)
Jeremaia 38:6–13; 39:15–18
Imaron̄ peran ilo jutak kōn ta eo ejim̧we.
Rijerbal ro reutiej an kiin̄ eo raar en̄jake ke kanaan ko an Jeremaia raar kōm̧m̧an an ritariņae ro jab kōņaan irre, innem raar joļo̧k Jeremaia ilo juon jikin kalbuuj ettoon (lale Jeremaia 38:1–4). Ilo Jeremaia 38:6–13, ta eo ej im̧we eok kōn men eo Ebed-melech ri Ethiopia ear kōm̧m̧ane? Bar lale kōjeraam̧m̧an ko Irooj ear leļo̧k n̄an Ebed-melech ilo Jeremaia 39:15–18.
Ekōjkan am̧ maron̄ ļoor waanjon̄ak eo an Ebed-melech?
Naan in kakōl eo jān Jeremaia
Liaajļo̧ļ 1; 3
Irooj emaron̄ joļo̧k būrom̧ōj eo ij en̄jake kōn wōt jerawiwi.
Bok in Liajļōļ ej kobain poem ko me kar je ālkin kakkure eo an Jerusalem im tampeļ eo ie. Etke kwoj ļōmņak eaorōk bwe ren kar pād ilo kōjpārok? Ļōmņak kōn ta waanjon̄ak ko ilo Liajaļōļ1 im 3 jipan̄ eok meļeļe kōn būrom̧ōj eļap me Riisrael ro rekar en̄jake. Ta ennaan in kōjatdikdik ko ilo Kraist me kwoj loi? (lale eļaptata Liajļōļ 3:20–33bar lale Matu 5:4; Jemes 4:8–10; Alma 36:17–20).
Būreejtōn M.Russell Ballard ekar kwaļo̧k jet jekjek ko me remaron̄ kōm̧m̧an bwe jet ren luuji kōjatdikdik, im ekar letok kapilōk eo kōn ia eo n̄an lo kōjatdikdik ie:
“Jet iaad remaron̄ lo mour ko ad robrak kōn illu, inepata, im būrom̧ōj. Elōn̄ rej en̄jake jab kōjatdikdik n̄an ņa mejļan kiojaļjaļ me āinwōt ej tōn anjo̧ ilo laļ in. Ro jet rej lukkuun inepata ioon ro uwaan baam̧le eo me rej kōm̧m̧an men ko me rej kakkure jon̄an ko rejim̧we, kōn ke laļ in ej watōki rem̧m̧an ak nōbari. … Em̧ool eļōn̄ em̧ōj aer kar errā er make n̄an bōk nana eo im kakkure eo enana an laļ in āinwōt ban bar kōm̧m̧ane. Em̧ōj aer ebbweer jān kōjatdikdik. …
“…Jet iaan ro ibwilijid remaron̄ kar luuji aolep kōjatdikdik kōn jerawiwi im bōd. Juon armej emaron̄ erom lukkuun jakoļo̧k ilo wāween ko an laļ in me ejjab lo jabdewōt wāween im luuji aolep kōjatdikdik. Akweļap eo aō n̄an aolep ro em̧ōj aer kar wōtlo̧k n̄an lowaan aujid in an rikapo eo ej n̄an jab ebbwer! Jekdo̧o̧n ta ewi jon̄an an men ko ejjeļo̧k kōjatdikdik ie remaron̄ in ak ewi jon̄an aer lukkuun maron̄ erom, jouj tōmak eō, kwomaron̄ iien otemjej wōr kōjatdikdik. IIen otemjej” (“The Joy of Hope Fulfilled,” Ensign, Nov. 1992, 31–32).
Bar lale “Come, Ye Disconsolate,” Hymns, no. 115.
Jipan̄ rūkkatak ro bōk eddo in ekkatak eo aer make. Jet iien āinwōt n̄e wāween eo epidodo tata n̄an katakin ej n̄e jej jiron̄ rukkatak ro ta eo jej ļōmņak rej aikuj kōm̧m̧ane. Ijoke, wāween eo epidodo tata ejjab wāween eo em̧m̧antata. Elder David A. Bednar ear katakin: “Jibadbad eo ad ejjab aikuj ‘Ta eo n̄aij ba n̄an er?’ Ijeļo̧kin, kajjitōk eo n̄an kajjitōk ippād make ej ‘Ta eo imaron̄ karuwainene er n̄an kōm̧m̧ane? Ta kajjitōk ko reim̧we imaron̄ kajjitōk kake, eļan̄n̄e rej m̧ōņōņō in uwaak, naaj jino karuwaineneitok Jetōb Kwojarjar eo n̄an mour ko aer?’” (evening with a General Authority, Feb. 7, 2020, broadcasts.ChurchofJesusChrist.org; see also Teaching in the Savior’s Way, 25). Elōn̄ wāween ko n̄an jipan̄ rukkatak bōk ko̧ņaer n̄an ekkatak eo aer. N̄an waanjon̄ak, ilo unin tōl ej karuwaneneik rukkatak ro n̄an etale, lin̄ūr, kōm̧m̧an laajrak, lale pija ko, bōk ko̧ņaer ilo kein ekkatak ko, jin̄a, im kwaļo̧k im mour kake ta ko rej ekkatak.
Ļōmņak ko n̄an Katakin Ajri ro
Jeremaia 31:3
Jemedwōj Ilan̄ im Jisōs rej iakwe eō “kōn iakwe ejjeļo̧k jem̧ļo̧kin.”
-
Ilo am̧ riiti Jeremaia 31:3 ippān ajri ro, remaron̄ jipan̄ eok kappukot men ko (ak pija in kein katak ko) me etto aer pād, āinwōt juon jāān metal, im men ko jet me ejjab to aer pād, āinwōt juon leen wōjke. Kom̧ maron̄ kōnono kōn ta meļeļein “ejjeļo̧k jem̧ļo̧kin” im kwaļo̧k n̄an doon ekōjkan am̧ kar en̄jake “iakwe ejjeļo̧k jem̧ļo̧kin” an Jemedwōj Ilan̄. Kom̧ maron̄ bar al juon al ippān doon āinwōt “God Is Watching Over All” (Children’s Songbook, 229).
Jeremaia 31:31–34; 32:38–41
Anij enaaj jipan̄ eō kōjpārok bujen ko aō.
-
Ajri ro remaron̄ itok limoer in jin̄aik juon ļoob ioon juon pepa innem jeje iloan ļoob eo men ko raar ekkatak jān Jeremaia 31:31–34 kōn kōm̧m̧an bujen ippān Anij. Komaron̄ kōnaan etale bujen eo rej kōm̧m̧ane ilo iien peptaij (lale Mosaia 18:10, 13) im kōnono kōn ta meļeļein n̄e kallim̧ur kein rej pād ilo būruōd.
Jeremaia 36:1–4
Jeje ko rekwojarjar rej naan an Anij.
-
Peij in m̧akutkut eo an wiik in emaron̄ jipan̄ ajri ro ekkatak kōn Jeremaia, Baruch, im kiin̄ eo (lale Jeremaia 36). Remaron̄ bar kōm̧m̧ane makutkut ko me rej ekkeijel ippān naan ko ilo Jeremaia 36:4–10, āinwōt jeje ilo juon bok (lale eoon 4) im riit jeje ko rekwojarjar n̄an armej (lale eoon 8, 10).
-
Kwe im ajri ro maron̄ lale juon an ajri bok im juon kape in jeje ko rekwojarjar im kōnono kōn elmen an bok kein oktak. Ta eo ekōm̧m̧an bwe jeje ko rekwojarjar ren jenoļo̧k? Emaron̄ kōketak n̄an kwaļo̧k ippān doon jet eoon ko ilo jeje ko rekwojarjar me rem̧m̧an ippami.
Jeremaia 38:6–13
Imaron̄ jutak kōn ta eo ejim̧we.
-
Komaron̄ kōjerbal pija eo ilo jem̧ļo̧kin unin tōl in n̄an an ajri ro pijaikļo̧k bwebwenato in Ebed-melech ilo Jeremaia 38:6–13. Bōlen komaron̄ jipan̄ er kappukot juon eoon eo me Ebed-melech ear kōm̧m̧ane juon men peran n̄an jipan̄ rikanaan eo an Irooj. Ta ko jemaron̄ kōm̧m̧ani n̄an kwaļo̧k ke jejeļā ke rikanaan eo ad rainin ej kūr jān Anij?
Liaajlo̧ļ 1:1–2, 16; 3:22–26
Rilo̧mo̧o̧r ekar kōm̧m̧ane bwe en ekkar n̄an eō bwe in jeo̧rļo̧k jerawiwi ko aō.
-
N̄an kwaļo̧k kadkadin Liaajļo̧l, komaron̄ kōņaan kōmeļeļe n̄an ajri ro ke kōn ke ri Israel ro raar jab ukweļo̧k, kar kakure Jerusalem im tampeļ eo. Kom̧ maron̄ kwaļo̧k n̄an doon ekōjkan ami maron̄ en̄jake n̄e kom enkar jokwe ilo iien eo (lale Liaajlo̧ļ 1:1–2, 16). Elmen an ennan in ilo Liaajlo̧ļ 3:22–26 kar lewaj n̄an eok kōjatdikdik?
-
Komaron̄ bar jiron̄ ajri ro kōn iien ko kwar būrom̧ōj kōn juon kāālet enana kwar kōm̧m̧ane. Ta eo jej loe ilo Liaajlo̧ļ 3:22–26 me ej jipan̄ kōj meļeļe kōn jeorļo̧k bōd eo Jisōs Kraist ej letok.
N̄an eļapļo̧k, lale ennaan eo an allōn̄ in ilo eo Jera māākjiin.