“Ohktopa 26–Nohfuhmpuh 1. ‘Nga Fah Ekulla Asor Lalos nuke Engan’: Jeremiah 31–33; 36–39; Lamentations 1; 3” Come, Follow Me—For Home and Church: Wuhlweacng Mahtuh 2026 (2026)
“Ohktopa 26–Nohfuhmpuh 1. ‘Nga Fah Ekuhllah Ahsor Lalos nuhke Engan’” Come, Follow Me: Wuhlweacng Mahtuh 2026
Jeremiah El Tuhngi Kuhnanuclac luhn Jerusalem, sel Rembrandt van Rijn
Ohktopa 26–Nohfuhmpuh 1: “Nga Fah Ekuhllah Ahsor Lalos nuhke Engan”
Jeremiah 31–33; 36–39; Eoksra 1; 3
Ke Leum el pahnglol Jeremiah in ekihn sie mwet pahluh, El fahk nuh sel lah orekma lal pa “in fuhswack, ac in ikorinyac” (Jeremiah 1:10)—ac fin acn Jerusalem, puhkantwen ma koluk ma enenuh in fwacfweyak ac ikorinyucki. Tuhsruhk ma se inge sie ip ke misin lal Jeremiah—pahng el “in muhsahi, ac in ukwiyac” (Jeremiah 1:10). Meac kuh in muhsahiyucklac kuh ukwiyucki ke acn ma muhsahllah ke srihpen fohs luhn mwet wuhlweacng ah? Siyuck ke siena atac, ke ma koluk ac Satan kuhnahoslah moul lasr uh, kuht ac kuh in sifilpac muhsahi ac ukwiyac sahk uh fuhkah? Top kac oasr ke “lah luhn Suwohswohs” (Jeremiah 33:15), Messiah se olwelah kac. El use “sie wuhlweacng sasuc” (Jeremiah 31:31)—Sie ma enenuh in yohk likina ma liyeyuck lihkihn luhlahlfongi uh. Masap Lal enenuh “in oasr [lun] ip ke mahnosr,” sihmlac “ke [lun] insiacsr.” Pa inge kalmeyac nuh sin Leum in “ekihn God [lasr] ” ac nuh sesr in “ekihn mwet [Lal] ” (Jeremiah 31:33). Ma se inge ma nuhke lusen moul lasr, ac kuht ac srackna tahfonglac suc pwenwacng in ahsor ke pacl nuhke pacl. Tuhsruhk ke kuht oruh uh, Leum el olwelah, “Nga fah ekulla asor lalos nu ke engan” (Jeremiah 31:13).
Ke sie ahkuhtweyac fototo ke Eoksra, liye “Puk luhn Eoksra” ke mwe Kahsruh nuhke Ma Suhmuhslah.
Mwe nuhnak nuhke Lutlut Lohm Sesr ac Alu
Jeremiah 31; 33
Leum el fah molwelah mwet wuhlweacng Lal liki srohoh.
Ke Jeremiah 31; 33 Leum el akihlen “sahsaho, ac tuhng” (Jeremiah 31:15) ma mwet Israel ac fah puhlakihn ke elos muhta ye kohs uh. Tuhsruhk el oacyacpac use kahs in ahkkweye ac finsrak. Suk ke ma inge ke kom riti sapta inge uh. Olwelah fuhkah kom konwacack tuh ma nuh sum uh?
Jeremiah 31:31–34; 32:37–42
“Elos fah mwet luhk, ac nga fah God lalos.”
Finne mwet Israel ah tuh kuhnahoslah wuhlweacng lalos, Jeremiah el palyei lah Leum el fah sifilpac orwaclah sie ma “sasuc” ac “wuhlweacng wacngihn sahflahiayc” nuh selos (Jeremiah 31:31; 32:40). Meac wuhlweacng se ingacn? Nuhnkuh in suk ke mwe kahsruh ke Guide to the Scriptures, “New and Everlasting Covenant,” Gospel Library.
Ke kom riti Jeremiah 31:31–34; 32:37–42, motko:
-
Meac kalmac nuh sum in ekihn mwet wuhlweacng luhn God.
-
Meac kalmac in eis masap Lal ac suhmuhslah ke insiom.
-
Meac Leum el olwelah nuh sum ke kom orwaclah wuhlweacng nuh Sel uh.
-
Kuhpahsr ke wuhlweacng lom nuh sin Leum fuhkah ekuhllah moul lom.
Olwelah fuhkah kom orwaclah nuh sin God ke kom wi oruh akwuck muhtahl? El ahkfalye fuhkah olwelah Lal nuh sum?
Liye pac David A. Bednar, “Abide in Me, and I in You; Therefore Walk with Me,” Liahona, Mei 2023, 123–26.
Jeremiah 36
Ma suhmuhslah uh oasr kuh kac in furokyuclac liki ma koluk.
Oacna ke Jeremiah 36:2–3, efuh Leum el sapkihn nuh sel Jeremiah in suhmuhslah kahs in pahluh lal? Ke kom riti Jeremiah 36, esam lah fuhkah puhla luhn mwet inge ke kahs in pahluh inge:
-
Leum (liye verses 1–3, 27–31)
-
Jeremiah (liye verses 4–7, 32)
-
Baruch (liye verses 4, 8–10, 14–18)
-
Jehudi ac Tohkohsrah Jehoiakim (liye verses 20–26)
-
Elnathan, Delaiah, ac Gemariah (liye verse 25)
Motko kac lah fuhkah puhla lom ke suhmuhslah. Ma suhmuhslah uh kahsrwekom in forlah liki ma koluk?
Jeremiah 37–39
Tu na kuh in ukwe mwet pahluh luhn God.
Ke Jeremiah 37:1–3, 15–21; 38:1–6, 14–28, meac mwe ahkpwacye kom liye Tohkohsrah Zedekiah el luhlahlfongi lah Jeremiah el mwet pahluh pwacye se luhn Leum? Meac mwe ahkpwacye kom liye muh Zedekiah el tiacna luhlahlfongi? Meac kom lotwelah ke kuhpahsr se inge? Ke kom riti Jeremiah 39, motko ke ma ac sikyak fin Zedekiah ac mwet lal tuh ukwoe mwet pahluh ac liyacacng masap luhn Leum. (Srihke kapsruh ma sikyak nuh sel Zedekiah nuhke ma sikyak nuh sin sucu lal Lehi ah ke 1 Nephi 1–2.)
Jeremiah 38:6–13; 39:15–18
Nga kuh in puhlaik in tuyak ke ma pwacye.
Mwet orekma luhn tohkohsrah elos puhla lah kahs in pahluh lal Jeremiah oruh solse lalos tilac ke mweun, pwacnwacng elos sisuhlah nuhke pokongo fohkfohk se (liye Jeremiah 38:1–4). Ke Jeremiah 38:6–13, meac kom luhngse ke top lal Ebed-melech fin acn Ethiopia? Srihke pac in akihlen ke mwe insewowo Leum el sang nuh sel Ebed-melech ke Jeremiah 39:15–18.
Kom ac ukwoe fuhkah srihkasrak wowo lal Ebed-melech?
Tuhng lal Jeremiah ah
Eoksrah 1; 3
Leum el kuh in ahkwoye ahsor nga puhla ke srihpen ma koluk.
Puk luhn Eoksrah pa puk ma orwacni poem(pohloh kahs ahkuhtweyac ke puhla ac nuhnak) ma sihmlac tukun kuhnanuclac luhn acn Jerusalem ac tempuhl we ah. Kom nuhnkuh tuh efuh yohk srihpac elos in moliyucklac? Nuhnkuh lah ma sihmlac ke Eoksrah 1 ac 3 kahsrwe kom in kahlwem ke ahsor upac ma mwet Israel puhlakihn. Mwe fahkwack fuhkah ke finsrak kacl Kraist kom konwacack uh? (liye Lamentations 3:20–33; liye pac Matthew 5:4; James 4:8–10; Alma 36:17–20).
Prestuhn M. Russell Ballard el sruhmuhn ke kuhtuh ohiyac ma kuh in pwacnwacng in wacngihnlac finsrak luhn kuhtuh mwet, ac el use kahs in kahsruh lah kuht ac konwacack finsrak oyac.
“Kuhtuh sesr kuh in konwacack moul lasr uh sesseslah ke nuwucrwucr, tiac pwacr, ac ahsor. Puhkantwen mwet puhla muh elos tiac kuh in kuhtanglah fohs upac ma oacna in kuhtanglah facluh se inge. Kuhtuh selos elyah sin sucu lalos suc sa in kuhflah liki inkacnek pwacye, muhnahslah luhn ohiyac wowo ac eklac nuhke elah koluk. Puhkantwen selos fuhlweack ac insese nuhke ma koluk ac kweok luhn facluh suc tiac kuh in ahkwoyeyucklac se. Elos fuhlweack finsrak. …
“… Kuhtuh sesr sahp fuhlweack nohfohn finsrak ke srihpen ma koluk ac tahfonglac ke tiac etuh. Sie mwet kuh in lohsrlah na upac ke ohiyac luhn facluh pwacnwacng el tiac liye inkacnek in tifoklac lal ac fuhlweack finsrak lal. Nguhsr luhk nuh sin nuhkwewa ma puhtatyang nuhke mwe sruhf luhn Satan pa in tiacna fuhlweack! Finne upac ma uh kuh atacn ac upaclah ke pacl fahsruh, nuhnak muhnahs luhlahlfongiyuc, pacl nuhkwewa kom kuh in eis finsrak. Pacl nuhkwewa” (“The Joy of Hope Fulfilled,” Ensign, Nov. 1992, 31–32).
Liye pac ”Come, Ye Disconsolate,” On in Alunempuh. 115.
Kahsruh mwet sahyac in sifacna orekma nuhke lutlut lalos. Kuhtuh pacl uh inkacnek se ma fihsrwacsr emet in luti uh pa in fahk nuh sin mwet lutlut ingacn ma elos enenuh in etuh. Tuhsruhktuh, inkacnek fihsrwacsr se ingacn tiac pa inkacnek se ma wo emet ke pacl nuhkwewa uh. Elder David A. Bednar el luti: “Kuht tiac enenuh in nuhnkuh ‘Meac nga ac fahk nuh selos uh?’ Tuhsruhk, kihsensiyuhk kuht enenuh in siyuhk sesr sifacna uh pa ‘Meac nga kuh in sulwaclos in oruh uh? Kihsensiyuhk fuhkah nga kuh in siyuhk ma, fin elos luhngse in topuk, ac suli Nguhn Muhtahl nuhke moul lalos uh?’” (evening with a General Authority, Feb. 7, 2020, broadcasts.ChurchofJesusChrist.org; see also Teaching in the Savior’s Way, 25). Puhkantwen inkacnek in kahsruh mwet lutlut uh in sifacna orekma nuhke lutlut lalos uh. Ke ma tahklah inge, mwet uh suliyuck in suk, motko, suhmuhslah ma elos konwacack, liye petsac, wi lutlut ke ohiyacn ma, sroal, ac akacsruhi ac orekmakihn ma elos lotwelah uh.
mwe nuhnak nuhke Luti Tuhlihk
Jeremiah 31:3
Pahpah Inkuhsrao ac Jisus luhngse nga “ke luhngse wacngihn sahflahiyac.”
-
Ke kom riti Jeremiah 31:3 nuhsin tuhlihk an, elos kuh in kahsrwekom sokwackk kuhtuh ma ah (kuh petsac ke ma) ma oan pahtlac in wacngihnlac, kain ses kohtoh, ac mam tiac oan pahtlac, oacna sie fukunsahk se. Kom kuh in sruhmuhn lah meac kalmacn “ma pahtpaht” ac akacsruhi nuh sin sie sin sie puhla lom ke “luhngse ma pahtpaht” luhn Pahpah Inkuhsrao. Kom kuh pac in yuck soko on oacna “God Is Watching Over All” (Children’s Songbook, 229).
Jeremiah 31:31–34; 32:38–41
God el ac kahsrweyuc in liyacacng wuhlweacng luhk.
-
Tuhlihk an ac luhngse sruhluh sie art ke sie pwepuh ac suhmuhslah lun art se ingacn ma elos lotwelah ke Jeremiah 31:31–34 ke orek wuhlweacng nuh sin God. Kom kuh in sifilpac luti ke wuhlweacng lalos elos orwaclah ke pacptais lalos (liye Mosiah 18:10, 13) ac sramsramkihn lah meac kalmac in suhmuhslah olwelah lalos inge in oan lun insiaclos.
Jeremiah 36:1–4
Ma suhmuhslah uh pa kahs luhn God.
-
Sra puk in actifiti ke wik se inge kuh in kahsruh tuhlihk an in lotwelah kacl Jeremiah, Baruch, ac tohkohsrah sac (liye Jeremiah 36). Elos kuh pac in oruh mukwikwi ma oacna kahs ke Jeremiah 36:4–10, oacna sihm ke puk se (liye verse 4) ac riti ma suhmuhslah nuh sin mwet ah (liye verses 8, 10).
-
Kom ac tuhlihk an kuh in liye puk luhn tuhlihk srihsrihk ac sie kapi ke ma suhmuhslah ac sramsramkihn lah puk inge tiac oacna sie fuhkah. Meac oruh ma suhmuhslah uh yohk srihpac uh? Ac kuh in mokle kowos in akacsruhi nuh sin sie sin sie kuhtuh pohloh kahs ke ma suhmuhslah ma yohk srihpac nuh sum.
Jeremiah 38:6–13
Nga kuh in tu kuh ke ma pwacye.
-
Kom kuh in orekmakihn petsac se ke sahflahiyacn ma tahklac inge in kahsruh tuhlihk an in petsacelah sramsram kacl Ebed-melech ke Jeremiah 38:6–13. Sahp kom kuh in kahsrwelos in konwacack sie fohs ma Ebed-melech sruhmuhn ke pacl se el oruh sie ma puhlaik in kahsruh mwet pahluh luhn Leum. Meac kuht kuh in oruh misenge in ahkkahlwemye lah mwet pahluh lasr misenge el ma pahng sin God?
Eoksra1:1–2, 16; 3:22–26
Mwet Lahngo el oruh nga kuh in eis nuhnak muhnahs ke ma koluk luhk.
-
In ikacslah ke Eoksra, kom kuh in ahkuhtweyac nuh sin tuhlihk an lah ke srihpen mwet Israel ah tiacna auliyak, acn Jerusalem ac tempuhl sac tuh kuhnanuhlac. Kom kuh in akacsruhi yurin sie sin sie lah fuhkah puhla lom fin kom moul ke pacl se ingacn (liye Eoksra 1:1–2, 16). Mwe fahk se ke Eoksra 3:22–26 usot fuhkah finsrak nuh sum?
-
Kom kuh pac in sruhmuhn nuh sin kais sie ke pacl kowos puhla suhpwacr ke sulaclah tahfonglac kowos orwaclah. Meac kuht konwacack ke Eoksra 3:22–26 ma kahsrwe kuht in kahlwem ke nuhnak muhnahs se Jisus el use nuh sesr uh?
Nuhke kuhtuh pac liye ma nuhke mahlwem inge ke Friend mackuhsin an.