Jeremía 31–33; 36–39; Harmljóðin 1; 3

Í Jeremía 31; 33 staðfesti Drottinn „harmakveinin [og hinn] beiska grát“ (Jeremía 31:15) sem Ísraelsmenn myndu upplifa í ánauð. Hann veitti þeim þó líka orð huggunar og vonar. Gætið að þeim við lestur þessara kafla. Hvaða loforð finnið þið sem eiga við um ykkur?

Þótt Ísraelsmenn hefðu brotið sáttmála sinn, þá spáði Jeremía að Drottinn myndi aftur gera „nýjan“ og „ævarandi sáttmála“ við þá (Jeremía 31:31; 32:40). Hver var sá sáttmáli? Íhugið að leita að skilningi í Leiðarvísi að ritningunum, „Nýr og ævarandi sáttmáli,“ Gospel Library.

Þegar þið lesið Jeremía 31:31–34; 32:37–42, íhugið þá:

• Hvað það merkir fyrir ykkur að tilheyra sáttmálslýð Guðs.

• Hver merking þess er að hafa lögmál hans ritað á hjarta sitt.

• Hverju Drottinn lofar þegar þið gerið sáttmála við hann.

• Hvernig sáttmálssamband ykkar við Drottin breytir ykkur.

Hvaða loforð þið hafið gefið Guði þegar þið hafið tekið þátt í helgiathöfnum? Hvernig er hann að uppfylla þau loforð sem hann gefur ykkur?

Sjá einnig David A. Bednar, „Þú munt vera í mér og ég í þér. Gakk þess vegna með mér,“ aðalráðstefna, apríl 2023.

Af hverju bauð Drottinn Jeremía að skrá spádóma sína, samkvæmt Jeremía 36:2–3? Þegar þið lesið Jeremía 36, gætið þá að því hvað eftirtöldum einstaklingum fannst um þessa spádóma:

• Drottni (sjá vers 1–3, 27–31)

• Jeremía (sjá vers 4–7, 32)

• Barúk (sjá vers 4, 8–10, 14–18)

• Jahúdí og Jójakím konungi (sjá vers 20–26)

• Elnatan, Delaja og Gemaría (sjá vers 25)

Íhugið hvað ykkur finnst um ritningarnar. Hvernig hafa þær hjálpað ykkur að segja skilið við hið illa?

Hvaða vísbendingar sjáið þið í Jeremía 37:1–3, 15–21; 38:1–6, 14–28 um að Sedekía konungur hafi trúað að Jeremía væri sannur spámaður Drottins? Hvaða vísbendingar sjáið þið um að Sedekía hafi ekki trúað? Hvað lærið þið af þessum samanburði? Þegar þið lesið Jeremía 39, íhugið þá hverju það hefði breytt ef Sedekía og þjóð hans hefðu fylgt spámanninum og haldið boðorð Drottins. (Berið saman það sem kom fyrir Sedekía og það sem kom fyrir fjölskyldu Lehís í 1. Nefí 1–2.)

Höfðingjum konungs fannst spádómar Jeremía draga úr fúsleika hermanna þeirra til að berjast og vörpuðu því Jeremía í skítuga gryfju (sjá Jeremía 38:1–4). Hvað vekur áhuga ykkar varðandi viðbrögð Ebeds–Meleks frá Kús í Jeremía 38:6–13? Gætið líka að blessuninni sem Drottinn veitti Ebed-Melek í Jeremía 39:15–18.

Hvernig gætuð þið fylgt fordæmi Ebeds-Meleks?

Harmljóðin eru safn ljóða skrifuð eftir tortímingu Jerúsalem og musterisins. Af hverju haldið þið að mikilvægt hafi verið að varðveita þau? Íhugið hvað líkingamálið í Harmljóðunum 1 og 3 hjálpar ykkur að skilja varðandi hina djúpu sorg sem Ísraelsmenn upplifðu. Hvaða vonarboðskap um Krist finnið þið? (sjá einkum Harmljóðin 3:20–33; sjá einnig Matteus 5:4; Jakobsbréfið 4:8–10; Alma 36:17–20).

M. Russell Ballard forseti minntist á nokkrar aðstæður sem gætu valdið því að einhver missi vonina og hann veitti leiðsögn um hvar væri hægt að finna von:

„Sum okkar gætu upplifað að líf okkar sé fyllt vonbrigðum, vonsvikum og sorg. Mörgum finnst þeir hjálparvana við að takast á við það óskipulag sem virðist ríkja í heiminum. Aðrir örvænta yfir fjölskyldumeðlimum sem berast hraðbyri niður straum ofsafenginnar bylgju veikjandi gilda og hrakandi siðferðisstaðla. Margir hafa jafnvel talið sér trú um og sætt sig við að ekki verði ráðin bót á ranglæti og grimmd heimsins. Þeir hafa gefið upp vonina. …

Sum okkar kunna að hafa misst vonina vegna syndar og misgjörðar. Menn geta orðið svo samdauna leiðum heimsins að þeir sjá enga leið út og missa alla von. Ákall mitt til allra sem hafa fallið í þessa gildru andstæðingsins er að gefast aldrei upp! Trúið mér, hversu vonlaust sem allt virðist vera eða hversu mikil sem örvæntingin verður, þá getið þið ávallt átt von. Ávallt“ („The Joy of Hope Fulfilled,“ Ensign, nóv. 1992, 31–32).

Sjá einnig „Come, Ye Disconsolate,“ Hymns, nr. 115 (til á íslensku).

• Þegar þið lesið Jeremía 31:3 með börnum ykkar, gætu þau hjálpað ykkur að finna hluti (eða myndir af hlutum) sem endast í langan tíma, eins og málmpening, og aðra sem gera það ekki, eins og ávöxt. Þið gætuð rætt merkingu hugtaksins „ævarandi“ og miðlað hvert öðru hvernig þið hafið fundið hina „ævarandi elsku“ himnesks föður. Þið gætuð líka sungið saman söng eins og „God Is Watching Over All,“ (Children‘s Songbook, 229).

• Börn ykkar gætu notið þess að teikna hjarta á blað og skrifa síðan á hjartað það sem þau lærðu í Jeremía 31:31–34 um að gera sáttmála við Guð. Þið gætuð viljað rifja upp sáttmálann sem þau gera við skírn sína (sjá Mósía 18:10, 13) og ræða merkingu þess að hafa þessi loforð rituð á hjörtu sín.

• Verkefnasíða þessarar viku gæti hjálpað börnum ykkar að læra um Jeremía, Barúk og konunginn (sjá Jeremía 36). Þau gætu líka gert hreyfingar sem samræmast orðunum í Jeremía 36:4–10, svo sem að skrifa í bók (sjá vers 4) og lesa ritningarnar fyrir fólkið (sjá vers 8, 10).

• Þið og börn ykkar gætuð skoðað barnabók og eintak af ritningunum og rætt hvernig þessar bækur eru ólíkar. Hvað gerir ritningarnar sérstakar? Hvetjandi gæti verið að miðla hvert öðru einhverjum ritningarversum sem eru ykkur kær.

• Þið gætuð notað myndina aftast í lexíudrögunum til að hjálpa börnum ykkar að sjá fyrir sér söguna um Ebed–Melek í Jeremía 38:6–13. Þið gætuð ef til vill hjálpað þeim að finna vers þar sem Ebed–Melek gerði eitthvað af hugrekki til að hjálpa spámanni Drottins. Hvað getum við gert til að sýna að við vitum að spámaður okkar í dag er kallaður af Guði?

• Til að kynna Harmljóðin, gætuð þið viljað útskýra fyrir börnum ykkar að vegna þess að Ísraelsmenn iðruðust ekki, voru Jerúsalem og musterið eyðilögð. Þið gætuð miðlað hvert öðru hvernig ykkur gæti hafa liðið ef þið hefðuð búið þar á þeim tíma (sjá Harmljóðin 1:1–2, 16). Hvernig gæti boðskapurinn í Harmljóðunum 3:22–26 hafa veitt ykkur von?

• Þið gætuð líka sagt hvert öðru frá því þegar þið voruð döpur yfir slæmri ákvörðun sem þið tókuð. Hvað finnum við í Harmljóðunum 3:22–26 sem hjálpar okkur að skilja þá fyrirgefningu sem Jesús Kristur býður?