Jeremaia 31–33; 36–39; Lele i Jeremaia 1; 3

Ena Jeremaia 31; 33 a tukuna kina na Turaga na nodra “qoqolou, kei na tagi levu” (Jeremaia 31:15) na Isireli ena nodra tiko vakavesu. Ia, a cavuta talega o Koya eso na vosa ni veivakacegui kei na inuinui. Vakasaqarai ira nio wilika tiko na veiwase oqo. Na yalayala cava o kunea ka rawa ni nomu talega?

E dina ga nira a voroka na Isireli na nodra veiyalayalati, a parofisaitaka o Jeremaia ni na tauyavutaka tale na Turaga e dua na “veiyalayalati vou” ka “tawamudu” vata kei ira (Jeremaia 31:31; 32:40). Na veiyalayalati cava oya? Vakasamataka mo vaqara eso na raititobu ena iDusidusi ki na iVolanikalou, “Veiyalayalati Vou ka Tawamudu,” Valenivola Vakosipeli.

Ni o wilika na Jeremaia 31:31–34; 32:37–42, vakasamataka vakatitobu:

• Na cava na kena ibalebale vei iko mo dua na tamata ni veiyalayalati ni Kalou.

• Na cava na kena ibalebale, me volai e yalomu na Nona lawa.

• Na veika e yalataka na Turaga nio caka veiyalayalati vata kei Koya.

• Na sala e veisautaki iko kina na nomu veiwekani ena veiyalayalati kei na Turaga.

Na yalayala cava o sa cakava vua na Kalou ni o vakaitavi ena veicakacaka vakalotu tabu? Sa vakayacora tiko vakacava o Koya na Nona yalayala vei iko?

Raica talega na David A. Bednar, “Ko na Tu vei Au, Kau na tu vei Iko; O Koya mo Lako kina Vata kei Au,” Liaona, Me 2023, 123–26.

Me vaka na Jeremaia 36:2–3, na cava na vuna a vakaroti Jeremaia kina na Turaga me vola na nona parofisai? Ni o wilika na Jeremaia 36, raica na nodra nanuma na tamata oqo me baleta na veiparofisai oqo:

• Na Turaga (raica na tikina e 1–3, 27–31)

• Jeremaia (raica na tikina e 4–7, 32)

• Peruki (raica na tikina e 4, 8–10, 14–18)

• Jiutai kei Tui Jioiakimi (raica na tikina e 20–26)

• Elinecani, Tilaia, kei Kimaraia (raica na tikina e 25)

Vakasamataka vakatitobu na cava o nanuma me baleta na ivolanikalou. Era sa vukei iko vakacava mo gole tani mai na veika ca?

Ena Jeremaia 37:1–3, 15–21; 38:1–6, 14–28, na ivakadinadina cava o raica nio Tui Setekaia a vakabauta nio Jeremaia a parofita dina ni Turaga? Na ivakadinadina cava o raica nio Setekaia a sega ni vakabauta? Na cava o vulica mai na veivakatautauvatataki oqo? Ni o wilika na Jeremaia 39, vakasamataka vakatitobu na duidui a rawa ni yaco kevaka mera a muria na parofita o Setekaia kei ira na nona tamata ka cakava na ivakaro ni Turaga. (Vakatauvatana na ka a yaco vei Setekaia kei na ka a yaco kina matavuvale nei Liai ena 1 Nifai 1–2.)

Era vakila na vakailesilesi ni tui ni parofisai nei Jeremaia ea vakavuna mera yalolailai kina na nodra sotia mera vala, ka ra mani biuti Jeremaia kina kina ikeli lolobo (raica na Jeremaia 38:1–4). Ena Jeremaia 38:6–13, na cava e vakauqeti iko me baleta na ka a cakava o Epeti-meleki na kai Iciopea? Raica talega na veivakalougatataki a solia na Turaga vei Epeti-meleki ena Jeremaia 39:15–18.

O na muria vakacava na ivakaraitaki nei Epeti-meleki?

Na Lele i Jeremaia edua na ikumuni ni serekali a volai ni oti na vakarusai nei Jerusalemi kei na kena valetabu. Na cava na vuna o nanuma kina ni bibi mera maroroi? Vakasamataka na vosa vakaibalebale ena Lele i Jeremaia 1 kei na 3 me vukei iko mo kila vakavinaka kina na rarawa levu a vakila o Isireli. Na itukutuku cava ni vakanuinui vei Karisito o kunea? (raica vakatabakidua na Lele i Jeremaia 3:20–33; raica talega na Maciu 5:4; Jemesa 4:8–10; Alama 36:17–20).

A cavuta o Peresitedi M. Russell Ballard eso na ituvaki ka rawa ni vakavuna vei ira eso me yali kina nodra inuinui, ka solia na ivakasala me baleta na vanua me kunei kina na inuinui:

“Eso vei keda eda na kunea na noda bula ni sinai tu ena cudru, yalolailai, kei na rarawa. E vuqa era vakila nira malumalumu mera sotava vakacava na veilecayaki ni bula ka vaka me sa solega tu na vuravura. Eso tale era rarawa me baleti ira na lewe ni matavuvale ka ra sa vakayacora na itovo ka veisaqasaqa kei na itovo ni bula savasava baleta ni ciqomi ka vakacaucautaki e vuravura. … E vuqa era sa tu vakasuka ka ciqoma na ivalavala ca kei na veivakalolomataki ni vuravura, ena nodra nanuma ni sa na sega ni wali rawa. Sa oti na nodra vakanuinui. …

“…Eso vei keda sa mai yali na nodra vakanuinui kece ena vuku ni ivalavala ca kei na talaidredre. E rawa ni dromuci tu edua ena veivakasama vakavuravura ka sa sega ni drotani rawa mai kina, ka yali kina na inuinui kecega. Na noqu vakatakekere kivei ira kece era sa sikalutu ena viridai ni vu ni ca sai koya mera kakua ni soro! Se vakacava sara na levu ni veika edau yaco se na levu ni ka era na sotava, yalovinaka vakabauti au, e rawa ni na tu ga vei iko na inuinui. Ena veigauna kece” (“The Joy of Hope Fulfilled, Ensign, Nove. 1992, 31–32).

Raica talega na “Come, Ye Disconsolate,” Hymns, no. 115.

• Nio wilika vata kei ira na luvemu na Jeremaia 31:3 e rawa nira vukei iko mo vaqara eso na iyaya (se itaba ni iyaya) ka dau tu dede, me vaka edua na ilavo siliva, kei na kena era sega ni dau tu dede, me vaka edua na vuanikau. E rawa nio veivosakitaka na ibalebale ni “tawamudu” ka veiwaseitaka na sala o vakila kina na “loloma tawamudu” nei Tamada Vakalomalagi. E rawa talega nio ni lagata vata edua na sere va oqo“God Is Watching Over All” (Children’s Songbook, 229).

• Era na marautaka beka na luvemu na droinitaka e dua na uto ena dua na tiki ni pepa ka qai vola e loma na veika era sa vulica mai na Jeremaia 31:31–34 me baleta na caka veiyalayalati vata kei na Kalou. O na gadreva beka mo railesuva na veiyalayalati era a cakava ena papitaiso (raica na Mosaia 18:10, 13) ka veivosakitaka na ibalebale ni kena volai e yalodra na veiyalayala oqo.

• Na tabana ni itaviqaravi ena macawa oqo ena rawa ni vukei ira na luvemu mera vulica na veika baleti Jeremaia, Peruki, kei na tui (raica na Jeremaia 36). E rawa talega nira cakava na imoimoi e salavata kei na veivosa ena Jeremaia 36:4–10, me vaka na volavola ena ivola (raica na tikina e 4) kei na wiliki ni ivolanikalou vei ira na tamata (raica na tikina e 8, 10).

• O rawa ni raica kei ira na luvemu edua na nodra ivola na gone kei na dua na ilavelave ni ivolanikalou ka tukuna na kedrau duidui na ivola oqo. Na cava e duatani kina na ivolanikalou? Ena veivakauqeti beka mo ni veiwaseitaka eso na veitiki ni ivolanikalou koni taleitaka.

• E rawa nio vakayagataka na iyaloyalo ena mua ni ituvatuva me vukei ira na luvemu mera raitayaloyalotaka na italanoa kei Epeti-meleki ena Jeremaia 38:6–13. De dua e rawa nio vukei ira mera kunea edua na tikina ka a vakaraitaka kina o Epeti-meleki na yaloqaqa me vukea na parofita ni Turaga. Na cava e rawa nida cakava me vakaraitaka nida kila ni noda parofita nikua e kacivi mai vua na Kalou?

• Mo tukuna na ikau ni Lele i Jeremaia, ona rawa beka ni vakamacalataka vei ira na luvemu nia vakarusai o Jerusalemi kei na valetabu baleta nira a sega ni veivutuni na Isireli. E rawa nio veiwaseitaka na veika oni na vakila kevaka moni a tiko e kea ena gauna oya (raica na Lele i Jeremaia1:1–2, 16). Ena rawa beka vakacava ni solia vei iko na inuinui na itukutuku ena na Lele i Jeremaia 3:22–26 ?

• E rawa talega moni veiwaseitaka na gauna o a rarawa kina ena vuku ni dua na digidigi ca o a cakava. Na cava eda raica ena Lele i Jeremaia 3:22–26 ka vukei keda meda kila vakavinaka kina na veivosoti e vakarautaka tu o Jisu Karisito?