Isikeli 1–3; 33–34; 36–37; 47

Ena Isikeli 3 kei na 34, na Turaga e vakatokai ira na nodra iliuliu na Nona tamata mera ivakatawa kei na ivakatawa ni sipi. Nio wilika na veiwase oqo, vakasamataka mada na cava era vakatututaka na veiulutaga oqo me baleta na ibalebale ni dua na iliuliu.

O cei o ira na “sipi” e vinakata na Turaga mo vakania? Na cava o raica ena Isikeli 34 ka rawa ni vukei koya e vakavakarau tiko me laki kaulotu, susugi gone, se vakayacora edua na ilesilesi ni veiqaravi? Ona muria vakacava na ivakaraitaki ni iVakabula ni sa noda ivakatawa? (raica na tikina e 11–31).

E rawa talega mo na vakasamataka vakatitobu na ivakatakarakara o kunea ena wase oqo. Na cava beka e rawa ni matataka na vanua “veico vinaka” kei na “lomanibai vinaka” ena tikina e 14? Na cava na kedrau duidui na sipi e “yali” kei na dua e “vakasevi tani”? (tikina e 16). Na ivakatakarakara cava tale eso o kunea?

Raica talega na Joni 21:15–17; Gerrit W. Gong, “Veiqaravi,” Liaona, Me 2023, 16–19.

“Ke saumi … vei keda na noda ivalavala ca,” era a vakataroga na Isireli era tiko vakabobula,“eda na qai bula tale vakaevei?” (Isikeli 33:10). Me kena isau, na Turaga a vakavulica vei ira na veika me baleta na veivutuni kei na veivosoti. Na veitaro oqo ena rawa ni vukei iko mo vakasamataka vakatitobu na veika a vakatavulica o koya:

• Na cava o nanuma ni ibalebale ni “vakararavi ki na [nomu] ivalavala dodonu”? (raica na Isikeli 33:12–13).

• Na cava ona kaya vua edua e nanuma ni o ira na tamata ka vakamacalataki tiko ena Isikeli 33:12–19 era a sega ni lewai vakadodonu? (raica talega na Maciu 21:28–31; Luke 18:9–14).

• Na cava o kunea ena veitikina oqo e vukei iko mo kila vakavinaka na ibalebale ni veivutuni? Na ikuri ni veivakararamataki cava o kunea ena Isikeli 36:26–27 kei na Alama 7:14–16?

Na vakasokomuni nei Isireli e vakaraitaki tiko ena Isikeli 37 ena rua na ivakatakarakara. Nio wilika na kena imatai—era vakabulai tale na sui mate (raica na tikina e 1–14)—vakasamataka vakatitobu se cava e tukuna vei iko me baleta na sokomuni nei Isireli ena yasa ruarua ni ilati (raica talega na Isikeli 36:24–30). Taroga na veitaro vakaoqo:

• Na cava e tovolea tiko na Turaga me rawata ena nodra vakasoqoni vata na Isireli?

• Na sala cava e sa vakayacora tiko kina o Koya?

Ena rawa nio tarogi iko ena veitaro vata oqo nio wilika na ikarua ni ivakatakarakara, ena tikina e 15–28. Na ivakatakarakara oqo erau okati tiko kina erua na ititoko, ka vuqa na vuku era vakadewataka mera papa kau ni volavola ka ra semati vata ena dua na idi. Na ititoko nei Juta e rawa ni matataka na iVolatabu (me vaka ni voleka ni iVola Tabu taucoko era a vola na kawa i Juta), kei na ititoko nei Josefa e rawa ni matataka na iVola i Momani (me vaka ni matavuvale nei Liai era kawa nei Josefa mai Ijipita). Ena vakasama oqori, na cava o vulica ena veitikina oqo me baleta na itavi ni ivolanikalou ena nodra vakasokomuni na Isireli?

Vakananuma mada na sala erau cakacaka vata kina na iVolatabu kei na iVola i Momani ena nomu bula—vakabibi, me vukei iko mo lako mai vei Karisito. Na veimalanivosa cava soti e vakaibalebale vakalevu sara vei iko?

Raica talega na 2 Nifai 3:11–13; 29:14; “Isireli Bau Rogoca,” Sere ni Lotu, naba 6; Topics and Questions, “Bible,” “Book of Mormon,” Gospel Library; “The Book of Mormon Gathers Scattered Israel” (vidio), Gospel Library.

1:31

Nio wilika na Isikeli 47:1–12, ena rawa ni veivuke me kilai ni Waitui Mate e sa rui tuituina ka na sega ni rawa ni bula kina na ika kei na kau. Na cava e vakauqeti iko me baleta na wai e vakamacalataki ena tikina e 1–12? (raica talega na iVakatakila 22:1). Na cava era rawa ni vakatakarakarataka na wai oqo? Na cava era rawa ni matataka na vunikau e vakamacalataki tiko ena tikina e 12 ?

Na cava e vakuria na itukutuku nei Elder Dale G. Renlund na “Cakacaka ni Valetabu kei na Tuva Kawa: Veivauci kei na Veivakabulai” ki na nomu kila ka? (raica na Liaona, Me 2018, 47–48). Vakasamataka vakatitobu na sala o sa kunea kina na bula vakayalo kei na veivakabulai ena vuku ni valetabu.

• Era na marautaka beka na gonelalai mera cakava na imoimoi e salavata kei na Isikeli 3:17. Me ivakaraitaki, e rawa nira dusia na matadra, daligadra, kei na gusudra nio wilika na vosa “ivakatawa,” “rogoca,” kei na “gusuqu.” Era na rairai taleitaka talega mera taubale—e tautuba se wavokita ga na rumu. Nira taubale tiko, vakasalataki ira me baleta na veika ena salatu, me vaka na uciwai mera lade kosova, tabanikau mera levea, se manumanu mera drotaka (caka dina se matanataki). Oqo ena rawa ni veimuataki kina dua na veivosaki me baleta na sala e vakasalataki keda kina na parofita ni Turaga ena veika rerevaki eda sega ni raica rawa.

• Oqo e dua tale na sala me vakamacalataki kina na Isikeli 3:17; 33:1–5. Edua vei iratou na luvemu ena rawa ni vakasamataki koya me dua na “ivakatawa” ena nona rai yani ena dua na katubaleka ka tukuna vei ira na kena vo na veika e yaco tiko e tautuba. Sa rawa talega mo sarava na vidio “Watchman on the Tower” (ChurchofJesusChrist.org). E noda ivakatawa vakacava na noda parofita bula?

  

  4:17

• Ni oti na nomudou wilika vata na Isikeli 37:15–23 dou rawa ni vakaraica e rua na kau kei iratou na luvemu ka vola ena dua na Me Baleti Juta (iVolatabu) kei na kena ikarua Me Baleti Josefa (iVola i Momani). Dou qai rawa ni veiwaseitaka na italanoa se veitikina eso mai na iVola Tabu kei na iVola i Momani ka vukei iko mo vakila nio voleka vua na iVakabula ka yaco mo “[Nona] tamata” (tikina 23). Na cava e vinaka kina me tiko ruarua na ivola ruarua ni ivolanikalou oqo?

• NaIsikeli 47 e vakamacalataka na raivotu nei Isikeli me baleta na wai ka drodro mai na valetabu ka vakabula na Waitui Mate—edua na wasawasa tuituina sara ka sega ni rawa nira bula kina na ika kei na kau. De dua e rawa nira droinitaka na luvemu yadua edua se rua na iyaya mai na raivotu, me vaka na valetabu, na uciwai, na vanua dravuisiga, Waitui Mate, dua na yavuni ika, se dua na vunikau vuavuai vinaka. Ni dou wilika vata na tikina e 1–12 e rawa nira wasea na nodra droini ni cavuti na iyaya oya. Na veivakalougatataki cava a kauta mai na uciwai ena raivotu oqo? Vukei ira na gone mera raica na sala era tautauvata kina na veivakalougatataki oqo, kei na veivakalougatataki e vakarautaka tu na iVakabula vei ira era maroroya na veiyalayalati ni valetabu. Na vidio “And the River Will Grow” (Gospel Library) ena rawa ni veivuke.

  

  3:43

• E rawa mo dou lagata vata edua na sere e vakamacalataka tiko na veivakalougatataki ni valetabu, me vaka na “Matavuvale me Tawamudu Tu” (iVolanisere niGonelalai, 98). Na cava e vakavulica na sere oqo me baleta na sala e vakalougatataki keda kina na Turaga ena Nona vale tabu?