Osea 1–6; 10–14; Joeli

Na wati Osea, o Komera, a sega ni dina vua, a qai dusia na Kalou na ka rarawa oqo me vakavulica vei ira na Isireli na ivakarau ni Yalona vei ira kei na nodra veiyalayalati kei Koya. Nio wilika na Osea 1–3, vakasamataka vakatitobu na itovo ni Nona raica na Kalou na Nona veiwekani kei ira na Nona tamata ni veiyalayalati. E tautauvata vakacava na veiyalayalati kei na Turaga vata kei na veidinadinati ni vakawati? E tautauvata vakacava na voroki ni veiyalayalati oya kei na nona sega ni yalodina edua vei watina? (raica na Osea 2:5–7, 13). Na cava e vakavulica vei iko na Osea 2:14–23 me baleta na loloma ni Turaga kei na Nona loloma veivueti? O na vakaraitaka vakacava Vua na nomu loloma kei na yalodina?

Ena Osea 14, vakasaqara na vuqa na yalayala totoka e cakava na Turaga vei ira era lesu tale Vua. Na cava na ibalebale ni malanivosa na “lomani ira ga” vei iko? (tikina e 4). Na cava e vakavulica vei iko na vosa vakaibalebale ni itei ena tikina e 5–8 me baleta na veivakalougatataki ni Turaga, oka kina na veivakalougatataki ni veivutuni? Me tiki ni nomu vuli, navuca mo lagasere se vakarorogo kina dua na serenilotu me baleta na loloma veivueti ni iVakabula, me vaka na “Bau Mai vei Jisu” (Serenilotu, naba 64).

O ira na tamata ena gauna i Osea era dau cabora na isoro manumanu, ia era a voroka tiko eso na ivakaro e bibi cake sara. Na cava o nanuma ni ibalebale ni nona kaya na Turaga “na yalololoma ga kau sa vinakata, ka segai na imadrali; kei na kila na Kalou, ka segai na isoro kama”? (Osea 6:6). Na cava o nanuma ni vaka kina edua na o se vaka na tegu na ivalavala dodonu? (raica na Osea 6:4). Me tautauvata beka kei na cava na noda ivalavala dodonu? (raica na Aisea 48:18; 1 Nifai 2:9–10).

E rawa talega nio wilika na Maciu 9:10–13; 12:1–8 mo raica na sala a vakayagataka kina na iVakabula na Osea 6:6 ena gauna ni Nona veiqaravi. E vukei iko vakacava na veitikina oqo mo kila vinaka kina na vosa nei Osea?

Ni wiliki na Joeli 2:12–13, ena rawa ni veivuke me kilai ni nona basuraka se dresulaka edua na nona isulu, sa ivakatakilakila ni lolosi se rarawa. E duidui vakacava na noda basuraka na yaloda mai na noda basuraka na noda isulu?

Na cava o raica ni tautauvata ena noda gauna kei na siga a raica mai o Joeli? (raica vakabibi na Joeli 2:1–2, 11, 18–32). Na cava e vakauqeti iko me baleta na veivakalougatataki e yalataka na Turaga ena tikina e 18–32? Na cava ena yaga vakalevu kina nikua o ira na veivakalougatataki oqo?

Ena rairai taleitaki beka na wiliki ni veika a tukuna o Moronai me baleta na Joeli 2 ena nona sikovi Josefa Simici ena 1823 (raica na Josefa Simici—Ai Tukutuku 1:41). O vakila vakacava ni sa vakayacori tiko ena noda gauna na parofisai ena Joeli 2:28–32 (raica talega na Cakacaka 2:1–21). Na cava o nanuma e kena ibalebale, ni Turaga ena “sovaraka na [Yalona] kivei ira na tamata kecega”? (Joeli 2:28).

A vakatavulica o Peresitedi Russell M. Nelson “ena veisiga mai oqo, ena sega ni rawa nida bula vakayalo voli ke sega na veituberi, veidusimaki, veivakacegui, kei na veivakauqeti tudei ni Yalo Tabu” (“iVakatakila ki na Lotu, iVakatakila ki na Noda Bula; Liaona, Me 2018, 96). Na cava na vuna sa rui bibi kina na ivakatakila kina nomu bula tiko vakayalo?

Na cava o rawa ni cakava kevaka o vakila nio sega ni ciqoma tiko na veisovaraki oya? Oqo eso na ivakaraitaki ena rawa ni veivuke. Na cava era a cakava na tamata ena veivolanikalou oqo mera ciqoma kina na sovaraki ni Yalo ni Turaga?

• Mosaia 4:1–3, 19–20; 18:7–11

• Ilamani 6:34–36

• Vunau kei na Veiyalayalati 19:37–41

Nio wilika na veivosa oqo mai vei Elder David A. Bednar, vakasamataka vakatitobu na kena ibalebale vei iko mo vakila na sovaraki ni Yalo Tabu ena nomu bula e veisiga:

“E vakawasoma noda dau vakadredretaka ki vei keda vakai keda meda ciqoma na ivakatakila yadua. E kena ibalebale oya ni yalayala ni veiyalayalati sai koya, nida rokova noda veiyalayalati, na Yalo Tabu sa na rawa ni dau tiko ga kei keda me noda itokani tudei. Ia eda dau veitalanoataka ka nanuma ni kena rogoci na domo ni Turaga mai Vua na Yalona edau yaco vakavudua. … [Na Yalotabu] e dodonu me tiko vata kei keda ena veigauna kece. Sega ena veitiki ni sekodi lalai kece, ia kevaka e cakava tiko na nona vinaka duadua edua na tamata—e sega ni gadrevi mo vinaka sara—ia kevaka edaru cakava tiko na nodaru vinaka kece ka daru sega ni cakava e dua na ivalavala ca bibi, sa na qai rawa me daru nuitaka na Yalo Tabu me dusimaki kedaru tiko. .…

“… Eda dau vakabauta ni Yalo Tabu e vaka me dau yaco mai vakaukauwa ka vakasauri, ia ena dau malumu ka lailai ka yaco mai vakalalai ni toso tiko na gauna” (“Elder David A. Bednar Discussion” [yakavi vata kei na dua na Vakaitutu Raraba, 7 ni Fepe., 2020], broadcasts.ChurchofJesusChrist.org).

Raica talega na Gary E. Stevenson, “Veivakauqeti ni Yalotabu,” Liaona, Nove. 2023, 42–45; “Enemy Territory” (vidio), Valenivola Vakosipeli.

3:38

• Ena ivola i Osea, e vakatauvatana na Turaga na Nona veiyalayalati kei ira na Isireli kina dua na vakawati. Mo vuli mai na veivakatauvatani oqo, dou rawa ni raica vakaveiluveni edua na itaba ni dua na yalewa kei na tagane vakawati ka veivosakitaka na sala e vinakata na Tamada Vakalomalagi merau veimaliwai kina vakairau na veiwatini. Vukei ira na luvemu mera kunea na vosa ena Osea 2:19–20 ka vakamacalataka na veika e vakila na Turaga me baleti keda. Eda na vakaraitaka vakacava vua na Turaga nida lomani Koya ka na yalodina tiko Vua?

• Osea 10:12 e cavuta tiko na kakaburaki, tatamusuki, gauna, kei na uca me sureti keda meda vakasaqara na Turaga. Nio wilika na tikina oqo, na vakasama vivinaka cava e basika vei iko ka na rawa ni vakauqeti ira na gone mera vakasaqarai Koya? Me vaka beka oqo, de rawa nira droinitaka na luvemu edua na kaloko ka vola na sala eso e rawa nira vakasaqara kina na Turaga ena veigauna duidui eso ena loma ni dua na siga. Na sere me vaka na “Anytime, Anywhere” (Gospel Library) ena rawa ni vukei iko mo vakavulica ni dau gauna vinaka na gauna ni vakasaqara na Turaga.

• Se rawa nira cakava na luvemu na cakacaka rawarawa e salavata kei na tikina oya, me vaka era tei sorenikau tiko, beti kakana draudrau, se vakatautau uca. Vukei ira na gone mera vakatauvatana na teivaki ni sorenikau kei na tamusuki ni kakana vinaka, vata kei na bula dodonu kei na ciqomi ni veivakalougatataki ni Turaga. Qai rawa moni veiwaseitaka me baleta na veivakalougatataki ni Turaga sa vakatauca vei iko nio tovolea mo vakasaqarai Koya.

• Me vakabibitaki na dina ena Osea 13:4 ni sega tale ni dua na iVakabula o Jisu Karisito ga, e rawa nio vakaraitaka vei ira na luvemu na kedra iyaloyalo e vica na tamata, oka kina o Jisu. E rawa nira veivukevuke na luvemu me dusi koya e tiko vua na kaukauwa me vakabulai keda mai na ivalavala ca kei na mate. Wasea nomu ivakadinadina baleti Jisu Karisito kei na Nona Veisorovaki.

• E rawa nira vaqara na luvemu na veivosa ena Osea 13:4, 14 ka vakamacalataki Jisu Karisito. Na cava e vakavulica vei keda na veivosa eso oqo me baleti Koya? Navuca mo vukei ira na luvemu mera vakayagataka na iDusidusi ki na iVolanikalou mera kunea kina eso tale na ivolanikalou ka vakavulica nio Jisu na noda iVakabula ka Dauveivueti. Veiwaseitaka vakai kemuni na nomuni nanuma me baleti Jisu Karisito.

• De dua e rawa nio vukei ira na luvemu mera kila vinaka na Joeli 2:28–29 ena nomu vakatara mera sova na wai ka qai veidutaitaka vata kei na dua na turu se tiri ni wai. Na cava e rawa ni kena ibalebale me “sovaraki mai” vei keda na Yalotabu?

• Nio wilika vata na Joeli 2:28–29 ena rawa mo sureti ira na luvemu mera vakacuruma na yacadra me isosomi ni malanivosa na “luvemudou tagane” kei na “luvemudou yalewa.” Qai vukei ira mera vakasaqara na ivolanikalou me vaka na Joni 14:16; Moronai 10:5; Vunau kei na Veiyalayalati 42:17 me kilai kina na sala e rawa ni vukei ira kina na Yalotabu.