Taniela 1–7

Ena dua tale na rai, eda sa bula kece tiko e Papiloni. Eda dau sotava na veitemaki ka vakanadakuya kina na noda ivakatagedegede ka gole tani mai na vakabauti Karisito. Nio wilika na Taniela 1, 3, kei na 6, raica na sala eratou a vakasaurarataki kina o Taniela, Setareki, Mesaki, kei Apeti-niko me ratou vakayacora na veika e ratou a kila ni cala. Na cava eratou a cakava niratou sotava na veituvaki vaka oqo? (raica na Taniela 1:10–13; 3:15–18; 6:10). Na cava beka na icavacava ni nodratou vakabauta? Na cava o vulica mai na veika sotavi oqo, ka na rawa ni vukei iko mo nuitaka na Turaga nio sotava na veisaqasaqa? Vakasamataka talega na taro eso oqo:

• Na gauna cava o vakasaurarataki kina mo cakava edua na ka o kila ni cala? Sa vakalougatataki iko vakacava na Turaga nio maroroya tiko na nona ivakaro?

• Ia vakacava ke sega ni muataki iko na nomu vakabauta ki na cakacaka mana o vaqara tiko? (me ivakaraitaki, raica na Alama 14:8–13). Mai na veika o wilika ena Taniela 3:13–18, na cava o nanuma se eratou na sauma vakacava na taro oqo o Setareki, Mesaki, kei Apeti-niko? Ena vakayaco-ka vakacava na nodratou ivakaraitaki kina sala mo sotava kina na nomu vakatovolei?

• Ena rawa vakacava ni veimuataki ki na vakabauta cecere cake vua na Turaga na nomu digidigi dodonu? (raica na Taniela 2:47; 3:28–29). Vakasamataka vakatitobu na revurevu ni nomu digidigi ki na nodra bula eso tale.

Raica talega na Dieter F. Uchtdorf, “Kakua ni Yalolailai, Vakadinata Ga,” Liaona, Nove. 2015, 76–79.

Mai na ivakatakila, a raica kina o Taniela ni tadra nei Nepukanesa sa tukuna tiko na veimatanitu vakavuravura ena gauna mai muri, ka vakakina na matanitu ni Kalou ena gauna mai muri, ka na “sega sara ni vakarusai rawa” (Taniela 2:44). “Na Lotu sa ikoya na matanitu edaidai ka a parofisaitaki mai,” a vakatavulica o Elder D. Todd Christofferson, “a sega ni bulia na tamata, ia a tara cake na Kalou ni lomalagi ka qiqi mai me vaka e dua na ‘vatu mai na ulunivanua sa sega ni ta ena liga‘ ka roboti vuravura” (“Na Vu ni Lotu,” Liaona, Nove. 2015, 111). Vakasamataka mada na matanitu ni Kalou edaidai nio wilika na ivakamacala ni vatu ena Taniela 2:34–35, 44–45. Na cava na nomu itavi ena kena vukei na parofisai oqo me vakayacori?

Raica talega na “Na Veivanua Rogoca Tu,” Sere ni Lotu, naba 160; “God Gave Them Knowledge” (vidio), ChurchofJesusChrist.org.

13:49

Ni ko railesuva na Taniela 2:1–15, vakasamataka se cava ona vakila kevaka o a tiko ena itutu nei Taniela. Na cava a cakava o Taniela? (raica na Taniela 2:16–18). Na cava o rawa ni vulica mai na Taniela 1:17 me baleta na sala a vakarautaki Taniela kina na Kalou? Na cava o rawa ni vulica mai na vosa kei na cakacaka nei Taniela ni oti na nona ciqoma na veivuke ni Turaga? (raica na Taniela 2:19–30).

Ena nona veiqaravi voli e vuravura na iVakabula, e vuqa na Jiu era a nanuma de itutu ni “Luve ni tamata” ena Taniela 7:13 e dusia tiko na Mesaia ena lako mai. Na cava o vulica me baleta na Mesaia mai na Taniela 7:13–14? (raica talega na Mosese 6:57).

E dau vakatokai koya vakawasoma na iVakabula me “Luve ni tamata.” Nanuma mo railesuva eso na ivakaraitaki: Maciu 25:31; Marika 9:31; 10:45. Na cava e vakavulica tiko o Koya me baleti Koya ena veitikina oqo? Ena Marika 14:61–64, a vakayagataka o Jisu na itutu oqo ena iotioti ni siga ni Nona bula vakayago. Raica mada na nodra ivalavala na tamata era a rogoca na ka a kacivaka o Koya. E vakayaco ka vakacava ki na nomu vakanananu na parofisai nei Taniela me baleta na Luve ni Tamata, ena ka a yaco Vua ena Marika 15?

Me vaka ga ni cati o Jisu ena nona tukuna nio Koya na “Luve ni tamata,” ena rawa talega nio sotava na veivakacacani nio vunautaka na dina. Vakatauvatana na parofisai ena Taniela 7:13–14 kei na yalayala eso ena Vunau kei na Veiyalayalati 121:29, 46.

Raica talega na Vunau kei na Veiyalayalati 49:6; iDusidusi kina iVolanikalou, “Luve ni Tamata,” Valenivola ni Kosipeli.

• Me vukei ira na luvemu mera vuli mai na italanoa veivakauqeti ena ivola i Taniela, sa rawa mo raica na iyaloyalo ni veika a yaco ena Taniela 1, 3, kei na 6 (raica na tabana ni itaviqaravi ni macawa oqo se na iVola ni iYaloyalo Vakosipeli, naba 23, 25, 26). Oti qai biuta vakatoboicu na iyaloyalo ka sureta edua na gone me vukica cake edua ka veivosakitaka na italanoa e matataka. (Mo vukei, raica na “Taniela kei Iratou na Nona iTokani,” “Setareki, Mesaki, kei Apeti-niko,” kei “Taniela kei na Qara ni Laione”ena iTalanoa eso mai na Veiyalayalati Makawa, 154–56, 160–62, 163–65.)

  

  1:39

  

  1:39

  

  1:45

• Vukei ira na luvemu mera vakasamataka eso na ituvaki era na rawa beka ni vakasaurarataki kina mera digidigi cala, me vakataki Taniela kei iratou na nona itokani ena Taniela 1, 3, kei na 6. Dou veiwaseitaka na sala dou sa vakalougatataki kina ni dou digidigi dodonu, ena gauna mada ga e dredre kina. E rawa ni dou lagata vata edua na sere e semati kina ulutaga oqo, me vaka na “Digitaka na Dodonu” (Sere ni Lotu, naba 142).

• Ni wiliki na italanoa kei Taniela kei iratou na nona itokani niratou sega ni via kania na lewe ni manumanu kei na mena waini na tui, ena rawa ni vakauqeta e dua na veivosaki me baleta na lawa ni bula e solia vei keda nikua na Tamada Vakalomalagi (raica na Vunau kei na Veiyalayalati 89). De dua e rawa nio vakasaqara na veivakalougatataki a ciqoma o Taniela kei iratou na nona itokani ka vakatauvatana ki na veivakalougatataki sa yalataki tu ena Vosa ni Vuku (raica na Taniela 1:15–17 kei na Vunau kei na Veiyalayalati 89:18–21).

• Nio wilika na Taniela 2:31–35, 44–45 vata kei iratou na luvemu, e rawa nio sureti iratou me ratou droinitaka e dua na iyaloyalo ni tadra nei Nepukanesa. Vukei iratou me ratou kila vakavinaka, ni vatu ena tadra e matataka na Lotu i Jisu Karisito ni Yalododonu Edaidai. Na cava eda vulica baleta na Lotu mai na veitikina oqo? O iratou na luvemu eratou rawa ni tukuna eso na ka a cakava na Tamada Vakalomalagi me tauyavutaka kina na Nona Lotu edaidai. Ke ra gadreva na veivuke, vakaraitaka eso na iyaloyalo ni veika a yaco ena Veivakalesui mai ni Lotu (raica na iVola ni iYaloyalo Vakosipeli, naba 90–95).

• Na cava e a rui bibi kina vei Taniela na masu vua na Tamada Vakalomalagi? Dou rawa ni veivosakitaka vakaveiluveni na taro oqori ni dou wilika na Taniela 6 vata tiko. Oti mo dou qai veiwaseitaka na vuna e bibi kina vei iko na masu. Era na taleitaka beka na luvemu mera droinitaka na kedra itaba nira masu tiko ena veituvaki eso. E rawa nira vakayagataka na nodra droini mera veivakavulici kina vakai ira, ni rawa nida masu vua na Tamada Vakalomalagi se vanua cava ga eda tiko kina se na cava ga eda gadreva.