“19–25 ni Okotova. ‘Niu a Bera ni Buli iKo ena Kete Kau sa Kilai iKo’: Jeremaia 1–3; 7; 16–18; 20,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)

“19–25 ni Okotova. ‘Niu a Bera ni Buli iKo ena Kete Kau sa Kilai iKo,’” Lako Mai, Mo Muri Au: Veiyalayalati Makawa 2026

Jeremiah [Jeremaia], mai vei Walter Rane

19–25 ni Okotova: “Niu a Bera Ni Buli iKo ena Kete Kau sa Kilai iKo”

Jeremaia 1–3; 7; 16–18; 20

A nanuma taumada o Jeremaia, nio koya ena sega ni dua na parofita vinaka. “Raica, kau sa sega ni kila na vosa,” a vakatusa yani (Jeremaia 1:6). Ia na Turaga a vakadeitaka vua, “Ka’u sa tauca na noqu vosa ki na gusumu” (tikina e 9). A nanuma o Jeremaia nio koya a se “gone” ga (tikina e 6), ia a vakamacalataka na Turaga nio koya sa vakarau vakavinaka tu, ka sega tiko ni kila o koya—e a tabaki ki na veikacivi oqo ni bera mada ga ni sucu mai (raica na tikina e 5). Sa qai vakatikitikitaka na nona rere o Jeremaia ka ciqoma na veikacivi. A vakasalataki ira na tui kei na bete e Jerusalemi ni nodra lotu vakarairai ena sega ni vakabulai ira. Na “gone” ka a nanuma ni sega ni rawa ni vosa sa mai vakila na vosa ni Kalou “e [lomana] me vaka na bukawaqa” ka sega ni rawa me kinoca (Jeremaia 20:9).

Na italanoa kei Jeremaia e nomu italanoa talega. Ea kilai iko talega na Kalou, ni bera nio sucu ka vakarautaki iko kina nomu ilesilesi ena bula oqo. Me ikuri ni veika tale eso, na cakacaka oya e oka kina edua na ka a raica taumada mai o Jeremaia: na nodra vakasokomuni na tamata ni Kalou, vakayadudua, me “kauti [ira] mai ki Saioni” (Jeremaia 3:14). Kevaka mada ga o sega ni kila vinaka na ka mo cakava se tukuna “mo kakua ni rere …; niu sa tiko vata kei iko, sa kaya na Turaga” (Jeremaia 1:8, 19).

Me raiciraraba na ivola i Jeremaia, raica na “Jeremaia” ena iDusidusi ki na iVolanikalou.

Vakasama eso ni Vuli e Vale kei na Lotu

Jeremaia 1:4–19; 7:1–7; 20:8–9

Era kacivi na parofita mera vosataka na vosa ni Kalou.

Raitayaloyalotaka mada nio vosa tiko vua edua na itokani ka se bera ni bau rogoci ira na parofita, ka o nanuma mo vakamacalataka na vakasama ni nona a kacivi o Jeremaia me dua na parofita ena Jeremaia 1:4–19. Na cava o kunea ena veitikina oqo ka vakavulica e dua na ka me baleti ira na parofita ni Kalou? E rawa talega nio raica ena Jeremaia 7:1–7; 20:8–9 kei na serenilotu me vaka na “We Listen to a Prophet’s Voice” (Hymns, no 22).

Ona rairai vinakata talega mo vakavulica vei nomu itokani baleti koya na parofita bula nikua. E tiko beka edua na ka ena veitikina oqo ena rawa ni veivuke? Me ivakaraitaki, na cava era “cavuta laivi” se “basuka” o ira na parofita ni noda gauna”? Na cava era “tara” ka “tea”? (Jeremaia 1:10). O sa kila vakacava ni noda parofita bula e kacivi mai vua na Kalou?

Raica talega na Yavu ni Vakabauta 1:6, 9; “Why Do We Have Prophets?” (vidio), ChurchofJesusChrist.org.

Jeremaia 1:5

Na Kalou sa kilai au oti tu mai niu bera ni mai sucu.

Na cava a vulica o Jeremaia me baleti koya ena Jeremaia 1:5? Me vaka edua na parofita kacivi vou, na cava ena bibi kina vua me kila na itukutuku oqori?

E vuqa na ka a vulica o Jeremaia me baleti koya ena Jeremaia 1:5 e dina talega me baleti iko. Na Kalou talega sa kilai iko tu ni bera nio sucu ka sa vakarautaki iko tu ki na so na itavi digitaki. Mo vulica eso tale na ka me baleta na nomu bula ni bera nio mai sucu, wilika na Alama 13:1–4; Vunau kei na Veiyalayalati 138:53–56; kei na Eparaama 3:22–23. O na cakava beka edua na lisi ni veidina o kunea. Na cava e bibi kina vei iko mo kila na itukutuku oqo?

Mo vulica na sala a tara kina na bula nei Elder Ahmad S. Corbitt na veidina oqo, vulica na nona itukutuku ena “Ko na Rawa ni Vakasokumuni Isireli!” (Liaona, Me 2021, 63–63). Ena vakayacoka vakacava ki na nomu bula vakayago na nomu kila na veika baleta nomu bula taumada?

Oqo na ka a kaya o Peresitedi Russell M. Nelson me baleta na nomu bula taumada:

“Sa kilai iko oti tu mai vakabalavu sara na Tamada Vakalomalagi. O iko, me vaka nio Luvena tagane se yalewa, o digitaki mai Vua mo lako mai ki vuravura ena gauna sara ga oqo, mo veiliutaki ena Nona cakacaka cecere e vuravura. Oni a digitaki sega ni baleta na ituvaki ni yagomuni ia me baleta na ituvaki ni yalomuni me vaka na yaloqaqa, yalodei, yalodina, dau viagunuva na dina, viatugana na yalomatua, kei na gagadre me qaravi ira na tani.

“Oni a tara cake eso na ivakarau ni bula oqori ena bula taumada. Eso tale e rawa nio mai tara cake ena vuravura oqo nio segata vagumatua” (“Vakatulewa me baleta na Tawamudu,” Liaona, Nove. 2013, 107).

Vakasamataka mada eso na ituvaki ona sotava ka na bibi kina mo nanuma tiko na veidina oqo me baleta na nomu bula taumada. Na cava o rawa ni cakava mo vakananumi iko kina ena veidina oqo?

Raica talega na Russell M. Nelson, “Vakatulewa me Baleta na Tawamudu,” Liaona, Nove. 2013, 106–9; Topics and Questions, “Foreordination,” “Premortal Life,” Gospel Library.

ena imawi, tucake tu edua ena ivakato levu ni wai maca; ena imatau, e dua na savu ni wai — Ena Jeremaia 2:13, a vakatauvatana kina na Turaga na ituvaki vakayalo ni tamata ki na “ikeli ni wai ka ca” ka vakatauvatani Koya ki na “mata ni wai bula.”

Jeremaia 2; 7

“Era sa biuti au na mataniwai bula.”

Ena vanua dravuisiga ka ra bula kina na Isireli, edau maroroi na wai vakamareqeti ena ivakato ni wai e lomaniqele ka vakatokai na ikeli ni wai. Na cava o nanuma e rawa ni vakatakarakarataka na “ikeli ni wai ka ca” ka tukuni ena Jeremaia 2:13 ? Na cava na vuna ena vinaka cake kina na gunu wai mai na dua na mata ni wai bula, mai na vakararavi ki na dua na ikeli ni wai? Na cava na kena ibalebale me biuti “na mataniwai bula”? Nio wilika na Jeremaia 2 kei na 7, raica na nodra biuta na tamata na mata ni wai bula ni Turaga (raica, me kena ivakaraitaki, na Jeremaia 2:26–28; 7:2–11). Na cava e ivakatakarakara vinaka kina ni veika e solia vei keda na iVakabula, na “mata ni wai bula”? Vakasamataka mada na sala o sa ciqoma tiko kina na mata ni wai bula.

NaJeremaia 7 e vagolei vei ira na tamata era a curu tiko kina “vale ni Turaga mera sokalou vua na Turaga,” ia na nodra ivalavala a sega ni tautauvata kei na nodra yalodina e taudaku (raica na tikina e 2–11). Na veitukutuku cava o nanuma ni tiko vua na Turaga me solia vei iko ena tikina e 21–23?

Vakayagataka na lesoni vakaraitaki. Era dau vakatauvatana na parofita ni Turaga na dina vakayalo kina veika eda kila levu tu. Vakasamataka mo cakava vakakina nio vulica ka vakatavulica na kosipeli. Me kena ivakaraitaki, me raitayaloyalotaki na Jeremaia 2:13, e rawa nio biuta na wai ena dua na koniteina lu se kavoro se gunu mai na dua na igunugunu ni wai. E vakataka vakacava na “mata ni wai bula” ko Jisu? (Jeremaia 2:13). Eda na gunu vakacava mai na Nona mata ni wai bula?

Jeremaia 3:14–18; 16:14–21

Na Turaga ena vakasokomuni ira na Nona tamata.

Ena Jeremaia 16:14–15, a vakatauvatana kina o Jeremaia na nodra vakasoqoni vata na Isireli ena veisiga e muri kei na nodra Lako Yani na Isireli mai Ijipita. Ena nomu rai, na cava ena bibi cake kina na soqoni oqo vei ira na tamata ni Kalou, mai na Lako Yani?

Na cava e vakatututaka na Jeremaia 3:14–18; 16:14–21 me baleta na sala ena yaco kina na vakasoqoni vata?

Ena nona itukutuku “Nuinui kei Isireli,” o Peresitedi Russell M. Nelson, me vakataki Jeremaia, a vakavulica ni vakasoqoni vata nei Isireli “sa ka bibi duadua e yaco tiko e vuravura nikua” (lotu ni itabagone e vuravura raraba, 3 ni Jiune, 2018, Valenivola Vakosipeli). Wilika se vakarorogo ki na nona itukutuku, ka raica kevaka o rawa ni kunea (a) na sala e vakamacalataka kina o Peresitedi Nelson na vakasoqoni vata nei Isireli, (b) na sala e vakamacalataka kina na kena bibi, kei na (c) na sala mo tiki kina ni vakasoqoni vata oqo.

Me baleta na vakasama tale eso, raica na ilavelave ni mekasini ni Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Jeremaia 1:5

A kilai au tu mai na Tamada Vakalomalagi ni bera niu sucu mai.

Me vakamacalataki na dina bibi e vakavulici ena Jeremaia 1:5, sa rawa mo vakaraitaka vei ira na luvemu edua na iyaloyalo ni dua na gonelailai (se, ke rawa, moni sarava na kedra itaba na luvemu nira se gone). Tarogi ira na luvemu se era kila na vanua era a bula mai kina ni bera nira mai sucu. E rawa talega moni lagata vata e dua na sere ka vakavulica na veika me baleta na noda bula taumada, me vakataka na “Mai Lomalagi Daru a Dau Bula Kina” (iVolanisere ni Gonelalai, 141).
Kevaka era vinakata na luvemu mera vulica eso tale na ka, e rawa nio vukei ira mera kunea na “Bula Taumada” ena iDusidusi ni iVolanikalou. E rawa nira vakaraica se “o cei,” “gauna cava,” kei “na cava” na isau ni veitaro eso me baleta na bula taumada.

na goneyalewa e keveta tu e dua na gonelailai

Jeremaia 1:4–19

Era kacivi na parofita mera vosataka na vosa ni Turaga.

Navuca mo vakaraitaka na kena itaba na parofita bula se o ira na parofita mai na ivolanikalou (e rawa nio raica eso ena Mekasini ni Lotu, na iVola ni iYaloyalo Vakosipeli, kei na Lako Mai, Mo Muri Au). Tarogi ira na gone se cava era kila tu baleti ira na parofita oqo.
Me vakatavulici na veika era dau cakava na parofita, e rawa mo digitaka eso na tikina ena veivuke mai na Jeremaia 1, me vaka na tikina e 5, 7, 10, kei na 19. E rawa nira digitaka yadua na luvemu edua vei ira na tikina, wilika, ka wasea edua na ka era vulica me baleti ira na parofita.

Jeremaia 16:14–16

Au na rawa ni vukei ira na luvena na Tamada Vakalomalagi mera lesu mai Vua.

Nio wilika na Jeremaia 16:16, e rawa nira vaka mera “siwa” se “vakasasataka” tiko eso na iyaya e loma ni rumu. E vakatauvatani ira na gonedau kei ira na dauvakasasa o Peresitedi Russell M. Nelson kei ira na daukaulotu ena tikina oqo (raica na “Vakasoqoni o Isireli sa Veiseyaki,” Liaona, Nove. 2006, 81). Na cava era dau cakava na daukaulotu? E rawa vakacava nida veivuke ena “siwa” kei na “vakasasa” vei Isireli era veiseyaki tu? (raica na “A Message for Children from President Russell M. Nelson” [vidio], ChurchofJesusChrist.org).

3:30
Video: A Message for Children from President Russell M. Nelson

Jeremaia 18:1–6

Au rawa ni vakatara vua na Turaga me dusimaka na noqu bula, me vaka nona bulia na dautuli kuro na tete.

Moni vakadikeva na veitikina oqo, e rawa moni veivosakitaka se vakaraitaka na icakacaka ni kuro qele (raica na iyaloyalo ena mua ni ituvatuva oqo). Na itukutuku cava e vakarautaka tu vei keda na Turaga ena Jeremaia 18:1–6? Na cava na kena ibalebale me da tete ena liga ni Turaga? (raica talega na Aisea 64:8). Me baleta e dua tale na italanoa ka vakatauvatani keda kei na tete ni dautuli kuro, raica na itukutuku nei Elder Richard J. Maynes “Na Rekitaki ni Bula sa Va-Karisito” (Liaona, Nove. 2015, 27–30).

Me baleta na vakasama tale eso, raica na ilavelave ni mekasini ni iTokani ni vula oqo.

bulia tiko na bilo qele ena qiqi edua na liga — “Raica me vaka na tete ena liga i koya na dautuli bilo, sa vakakina koi kemudou e na ligaqu, na mataqali i Isireli” (Jeremaia 18:6).

Tabana ni itaviqaravi ni Lalai: Au rawa ni vukei ira na luvena na Tamada Vakalomalagi mera lesu mai Vua — “Raica me vaka na tete ena liga i koya na dautuli bilo, sa vakakina koi kemudou e na ligaqu, na mataqali i Isireli” (Jeremaia 18:6).