“12–18 ni Okotova. ‘Ena Lako Mai ki Saioni na iVakabula’: Aisea 58–66,” Lako Mai, Mo Muri Au—Me Baleta na iTikotiko kei na Lotu: Veiyalayalati Makawa 2026 (2026)

“12–18 ni Okotova. ‘Ena Lako Mai ki Saioni na iVakabula,’” Lako Mai, Mo Muri Au: Veiyalayalati Makawa 2026

Jesus in the Synagogue at Nazareth [O Jisu ena Valenisoro e Nasareci], mai vei Greg Olsen

12–18 ni Okotova: “Ena Lako Mai ki Saioni na iVakabula”

Aisea 58–66

Ena gauna taumada ni Nona veiqaravi o Jisu Karisito e vuravura, a sikova o Koya edua na valenisoro e Nasareci, na koro a susugi cake kina. A tucake o Koya me wilika na ivolanikalou, ka dolava na iVola i Aisea, ka wilika na ka eda kila ena gauna oqo me Aisea 61:1–2. A qai tukuna, “Ena siga oqo sa vakayacori e daligamudou na ivolatabu oqo.” Oqo a dua na nona ivakaro dina na iVakabula nio Koya e sa Lumuti, ka na “vakabulai ira sa yaloraramusumusu” ka “vunautaka na veisereki vei ira na bobula” (raica na Luke 4:16–21). A vakayacori vakaidina na ivolanikalou oqo ena siga o ya. Ia, me vakataki ira e vuqa tale na parofisai i Aisea, sa yaco tikoga na kena vakavotukanataki ena noda gauna oqo. Sa tomana tikoga na iVakabula na nona veivakabulai vei ira kecega sa ramusu na yalodra ka ra lako mai Vua. E levu era se tiko vakavesu era gadreva tu na veisereki. Ka sa tiko e dua na mataka lagilagi meda vakavakarau tiko kina—na gauna ena “bulia kina na Turaga na lomalagi vou kei na vuravura vou” (Aisea 65:17) ka “vakatubura … nai valavala dodonu kei na vakavinavinaka ena matadra na veimatanitu kecega” (Aisea 61:11). Nida wilika na Aisea ena dolava na matada kina veika sa vakayacora oti na Turaga, na veika sa cakava tiko o Koya, kei na veika ena qai cakava vei ira na Nona tamata.

Vakasama eso ni Vuli e Vale kei na Lotu

Aisea 58:3–12

Na lolo ena tara cake na kaukauwa vakayalo ka vakalougatataki ira na vakaleqai tu.

Na cava na vuna ena yalona kina edua me kua ni kana ni tu na kakana? Nio vulica na Aisea 58:3–12, ona rairai vakasamataka beka na vuna o lolo kina—ka vakakina na vuna e solia kina na Turaga na lawa oqo. Oqo eso na taro me vakasamataki vakatitobu:

Na cava e rawa ni nanumi kina ena so na gauna na lolo ni vaka edua na icolacola levu, ka sega ni veivakalougatataki? (raica na Aisea 58:3–5). E veisautaka vakacava na rai oqori vei iko, na ivakavuvuli ni Turaga ena wase oqo?
Na cava beka na ibalebale ni “sereka na ivesu sa sega ni dodonu” ka “luvata na ikaukau bibi”? (Aisea 58:6). Ena vakalougatataki ira vakacava na tani na lolo? (raica na tikina e 7).
E kauta mai vakacava vei iko na lolo na veivakalougatataki e vakamacalataki tiko ena Aisea 58:8–12?

Ena nona itukutuku, ena “Sa Sega Li ni Vaka Oqo na Lolo Kau sa Vinakata?” (Liaona, Me 2015, 22–25), A wasea kina o Peresitedi Henry B. Eyring e vica na ivakaraitaki ni nodra vakalougatataki na tamata ena lolo kei na isolisoli ni lolo. O sa vakadinadinataka vakacava na veivakalougataki vata qo ena nomu bula?

Raica tale ga na “Bless Our Fast, We Pray,” Hymns, no. 138; Topics and Questions, “Fasting and Fast Offerings,” Gospel Library.

Mo veikilai vata kei ira o vakavulica tiko. “Nio dua na qasenivuli va Karisito, mo kilai ira vinaka na tamata o vakavulica tiko ka segata mo kila na cava e tiko e lomadra. … Ena rawa mo vaqara na sala vinaka duadua era dau vuli kina. E rawa nio taroga na taro, vakarorogo matua, ka vakadidike. Ka kena ilutua mo masuta na kila ka, ena rawa ni solia duadua ga na Yalo. Na vinaka cake ni nomu kila edua na tamata, na vinaka cake talega ni nomu rawa ni vukei koya me vakaibalebale vua na kaukauwa e tiko ena kosipeli i Jisu Karisito. Nio kila vinaka na nona karamaca edua, na Yalo ena rawa ni vakavulici iko ena sala mo vagunuvi koya kina ena wai ni bula ni iVakabula” (Veivakatavulici ena iVakarau ni iVakabula, 13).

Aisea 58:13–14

Na rokovi ni Turaga ena Siga ni Vakacecegu ena kauta mai na reki.

E “ka rekitaki” beka vei iko na Siga ni Vakacecegu? Nio vulica na Aisea 58:13–14, vakasamataka na sala mo na kunea vakalevu cake kina na reki ena siga ni Turaga. Me vaka beka oqo, na cava beka e ibalebale ni “mo kakua ni cakava na ka ko sa vinakata ga ena [Nona] siga tabu”? Na cava na kedrau duidui na “[rekitaki] Jiova” kei na “muria na ka ko sa vinakata”?

Raica talega na Russell M. Nelson, “Me Ka e Rekitaki na Siga ni Vakacecegu,” Liaona, Me 2015, 129–32.

Aisea 59:9–21; 61:1–3; 63:7–9

O Jisu Karisito sa Noqu iVakabula ka Dauniveivueti.

NaAisea 58–66 e tiko kina e vuqa na idusidusi me baleta na ilesilesi ni veisorovaki i Jisu Karisito. Vakasaqarai ira ni ko vuli tiko. Vakabibi, raica na itutu kei na vosa e vakayagataki me vakamacalataka na iVakabula. Me kena ivakaraitaki:

Na cava e vakauqeti iko me baleta na ivakamacala ni “dauveisorovi” ena Aisea 59:16–21? E vakamalumalumutaka vakacava na iVakabula na ituvaki e vakamacalataki ena tikina e 9–15?
Ena gauna a kacivaka kina o Jisu Karisito vei ira na tamata mai Nasareci ni o koya na Mesaia, a cavuta na Aisea 61:1–3 (raica na Luke 4:16–21; raica talega na vidio “Jesus Declares He Is the Messiah,” Gospel Library). Sa vakalougatataki iko vakacava kei ira na tani o Jisu Karisito ena veisala eso e vakamacalataki tiko ena veitikina oqo? E sa solia vakacava o Koya na totoka me isosomi ni dravusa?

3:24
Jesus Declares He Is the Messiah
Na “yalololoma levu i Jiova” cava ona rawa ni “tukuna”? (raica na Aisea 63:7–9).
Na itukutuku cava soti tale me baleta na iVakabula o raica ena Aisea 58–66?

Raica talega na Mosaia 3:7; Vunau kei na Veiyalayalati 133:46–53.

e dodo yani na liga ni tagane vata kei na nona icina me waqaca na nona cina edua na marama — A Gift of Light [Nai iSolisoli ni Rarama], mai vei Eva Timothy

Aisea 60; 62

“Ko Jiova ga ena nomu rarama ka sega ni mudu.”

NaAisea 60 kei na 62 e tukuna tiko na rarama kei na butobuto, na mata kei na rai me vakavulica na sala ena vakalougatataki vuravura kina na kosipeli i Jisu Karisito ena veisiga mai muri. Vakaraica na veivakasama oqo ena Aisea 60:1–5, 19–20; 62:1–2. Nio wilika na veiwase oqo, vakasamataka vakatitobu na sala sa vakasokomuni ira tiko kina na Luvena na Kalou mai na butobuto ki na Nona rarama. Na cava na nomu itavi ena cakacaka oqo?

Raica talega na 1 Nifai 22:3–12; 3 Nifai 18:24; Vunau kei na Veiyalayalati 14:9; Bonnie H. Cordon, “Me Ra Raica,” Liaona, Me 2020, 78–80.

Aisea 64:1–5; 65:17–25; 66

Na Karisito ena vakatulewa e vuravura ena gauna ni Mileniumi.

A vosa o Aisea me baleta edua na siga ena “guilecavi kina na ka rarawa e liu” (Aisea 65:16). E dina ni vica tiko na gauna ena vakayacori kina na parofisai oqo, ena kena taucoko, na siga o ya ena qai yaco mai—ena gauna ena lesu mai kina o Jisu Karisito. E vakamacalataka o Aisea na siga mai muri oqo ena Aisea 64:1–5; 65:17–25; 66. Raica na wasoma ni nona vakayagataka na vosa me vaka na “reki” kei na “rekitaka.” Na cava na vuna ena dua na siga rekitaki kina vei iko na Nona lesu tale mai na iVakabula? Na cava o rawa ni cakava mo vakavakarau kina kina Nona lako mai?

Raica talega na Yavu ni Vakabauta 1:10; Russell M. Nelson, “Na Vunilagi ni Lotu: Vakarautaki ni Vuravura ki na iKarua ni Lako Mai ni iVakabula,” Liaona, Epe. 2020, 13–17.

Me baleta na vakasama tale eso, raica na ilavelave ni mekasini na Liaona kei na Me iSakisaki ni iTabagone ni vula oqo.

Vakasama eso ni Nodra Vakatavulici na Gonelalai

Aisea 58:6–11

Na lolo e vakalougatataki au kei ira tale eso era vakaleqai tu.

Na sala vinaka duadua beka mo vakayaloqaqataki ira kina na luvemu mera lolo—nira vakarau tu—sai koya mo vukei ira mera kila vakavinaka na inaki ni Turaga me baleta na lawa oqo. Navuca mo dou wilika vata na Aisea 58:6–11 me kunei kina na isau ni veitaro oqo: Na cava eda lolo kina? Eda na lolo vakacava? E rawa talega nio raica na “Lolo” ena iDusidusi ki na iVolanikalou.
Kevaka o sa sotava oti edua na ka vakaibalebale ena lolo, wasea vei ira na luvemu. E rawa talega nio tarogi ira se ra na vakamacalataka vakacava vua edua na itokani na vuna e solia kina vei keda na Turaga na lawa oqo.

Aisea 58:13–14

Na Sigatabu sa rawa ni ka e rekitaki vei au.

Ni oti na nomu wilika na Aisea 58:13–14, sa rawa mo dusia na veisiga ni macawa ena dua na ivolanivula ka sureti ira na luvemu me ra cavuta vata kei iko na siga. Nio yacova na Siga ni Vakacecegu, kerei ira mera vakatoka na siga o ya me ka “rekitaki.” Tukuna vei ira na vuna e vu ni reki kina vei iko na Siga ni Vakacecegu.
Dou veiwaseitaka na sala e rawa ni dou “rekitaka kina na Turaga” ena Siga ni Vakacecegu. De dua e rawa nira droinitaka na luvemu na nodra vakasama ka biuta ena dua na “kato ni veika rekitaki ena Siga ni Vakacecegu.” Ni oti, ke ra gadreva na vakasama eso me baleta na veika me caka ena Siga ni Vakacecegu, sa rawa mera ucuna mai na kato e dua na vakasama.

dua na itaba kei Jisu — Our Light, mai vei Dan Wilson

Aisea 60:1–3

Na iVakabula sa vaka na rarama vei au.

Sureti ira na gone mera bobo ena gauna o wilika kina na Aisea 60:1–3. Kerei ira mera dolava na matadra nira rogoca na vosa “rarama” ka bobo nira rogoca na vosa “butobuto.” Vakamacalataka nio Jisu Karisito kei na Nona kosipeli erau vaka edua na rarama ka na vukei keda meda raica na noda sala lesu ki vua na Tamada Vakalomalagi.

Aisea 65:17–25

Ni na lesu tale mai o Jisu, ena kauta mai o Koya na vakacegu kei na reki.

NaAisea 65:17–25 e vakamacalataka na ituvaki kei vuravura ni lesu tale mai na iVakabula. Ni dou wilika vata vakaveiluveni na veitikina oqo, vukei iratou me raica na cava ena duidui ena bula ena “vuravura vou” e vakamacalataka o Aisea. A cava na vuna me oqo ena gauna ni “marau kei na reki me tawamudu”? (tikina e 18).
Dou rawa talega ni lagata vata edua na sere me baleta nai Karua ni Lako Mai, me vaka na “When the Savior Comes Again” (Gospel Library). Dou veiwaseitaka na veika dou sa nanamaki kina me baleta na lesu mai ni iVakabula. Na cava e rawa nida cakava meda vakavakarau kina kina siga oya?

Me baleta na vakasama tale eso, raica na ilavelave ni mekasini na iTokani ni vula oqo.

Jisu Karisito mai lomalagi, ni serau tu — “Mo tu cake, mo rarama mai; ni sa yaco mai na nomu rarama, ia na serau i Jiova sa cadra mai vei iko” (Aisea 60:1). Light and Life, mai vei Mark Mabry

Tabana ni itaviqaravi ni Lalai: Na Siga ni Vakacecegu e rawa ni ka rekitaki vei au — “Mo tu cake, mo rarama mai; ni sa yaco mai na nomu rarama, ia na serau i Jiova sa cadra mai vei iko” (Aisea 60:1). Light and Life, mai vei Mark Mabry