Aisea 50-57

E dina ga nira a tiko vakavesu na Isireli ena vuqa na yabaki—ka dina ga ni a vu ni nodra tiko vakavesu na nodra digidigi cala—na Turaga a vinakata mera rai kina veisiga ni mataka ena vakanuinui. Na cava o kunea ena itukutuku nei Aisea ka solia vei iko na inuinui? Ena rawa ni vukea nomu vuli e dua na ivolakabi vakaoqo:

Raica talega na Mosaia 12:20–24; 15:13–18; 3 Nifai 20:29–46; Vunau kei na Veiyalayalati 113:7–10; Russell M. Nelson, “Karona na Veisiga ni Mataka ena Vakabauta,” Liaona, Nove. 2020, 73–76.

E vica wale na wase ena ivolanikalou e vakamacalataka vakatotoka cake na veiqaravi ni veivueti i Jisu Karisito mai na Aisea 53. Vakasamataka na veiitaviqaravi vakaoqo mo kila vakavinaka cake kina ka bulataka na veiivakavuvuli kaukauwa vakaoqo:

• Vakananuma se veitalanoataka na sala e dau vakaraitaki kina ena italanoa kei na iyaloyalo yavala, o ira na tamata qaqa ka ra dau vueti ira na tamata. Veidutaitaka na ivakaraitaki oqori kei na ivakamacala ni iVakabula ena Aisea 53.

• Ni wiliki oti na veitikina yadua, cegu mo vakananuma na ka a sotava na iVakabula—na “rarawa,” “yaluma,” kei na “ivalavala ca” a colata o Koya—ena vukudra na tamata kecega ka vakabibi ga o iko. E rawa nio vakaisosomitaka na veivosa me vaka na o “keda” kei na “noda” ena “au” kei na “noqu” nio wiliwili tiko. Na veivakauqeti cava o vakila se o vakasamataka nio wilika na veitikina oqo?

• Navuca mo sarava na vidio “My Kingdom Is Not of This World” (Gospel Library), ka vakananuma na sala ena Aisea 53 a vakayacori kina na parofisai. Na cava eso na rarawa kei na yaluma e colata tiko ena vukumu na iVakabula?

  

  5:25

• Raica na iyaloyalo ni veika a yaco vakavolivolita na Veisorovaki i Jisu Karisito (raica na iVola ni iYaloyalo Vakosipeli, naba 56–60). Sa na qai rawa nio vakaraica na veimalanivosa ena Aisea 53 ka vakamacalataka na veika a yaco ena iyaloyalo. Na cava era vakauqeta vei keda meda cakava na vei ivakavuvuli oqo?

Raica talega na “Mai Mate Noda Tui Sau,” Sere ni Lotu, naba 108.

Eda dau sotava kece na gauna, eda dau vakila kina nida yawa mai vua na Turaga ena vuku ni noda ivalavala ca se malumalumu. Eso mada ga sa yali na nodra inuinui ni na vosoti ira rawa o Koya. NaAisea 54 kei na 57 erau wase ni ivola cecere me wiliki me veivakadeitaki ka veivakayaloqaqataki ena veigauna vakaoqo. Vakabibi ena Aisea 54:4–10; 57:15–19, na vosa cava e vakavulica vei iko na nanuma ni iVakabula me baleti iko? Na duidui cava e yaco ki na nomu bula ena nomu kila na veika oqo me baleti Koya?

O Peresitedi Dieter F. Uchtdorf a vakavulica:

“Se mani vakacava sara na ituvaki ni kena vakacacani vakadua na noda bula. Se mani vakacava sara na damu vakula ni noda ivalavala ca, se noda yaloca titobu, noda galili, guilecavi, se kavoro ni yaloda. O ira mada ga ka sa sega nodra inuinui, era lomaleqa, era voroka na veidinadinati, vakayalia nodra yalodina, se vukitani mai vua na Kalou e rawa mera tarai vou tale. …

“Na itukutuku rekitaki ni kosipeli sai koya oqo: ena vuku ni ituvatuva tawamudu ni bula marau e vakarautaka na Tamada Vakalomalagi kei na solibula tawamudu i Jisu Karisito, sa rawa meda sega walega ni vakabulai mai na keda ituvaki ni lutu ka vakalesui me savasava, ia sa rawa meda ulabaleta na vakasama ni tamata ka taukena talega na bula tawamudu ka vakaivotavota ena lagilagi ni Kalou e sega ni tukuni rawa” (“Ena Colati Iko e Tabana ka Kauti Iko i Vale,” Liahona, Me 2016, 102).

Raica talega na Patrick Kearon, “Na iNaki ni Kalou me Kauti Iko Vua,” Liaona, Me 2024, 87–89.

Ena veitabatamata, era kilai na Isireli mera tamata ni veiyalayalati ni Kalou. Ia, na ituvatuva ni Kalou sa dau okati kina e sivia na dua ga na matanitu, nio “ira kecega sa viagunu” era sureti mera “lako mai … ki na wai ”(Aisea 55:1). Mo nanuma tiko oqo nio wilika na Aisea 55 kei na 56, ka vakananuma na cava e kena ibalebale meda tamata ni Kalou. Na cava na nona itukutuku na Kalou vei ira era vakila nira “tawase tani” mai Vua? (Aisea 56:3). Navuca mo toqa na veitikina e vakamacalataka na ivakarau kei na nodra itovo o ira era dau “taura matua na noqu veiyalayalati” (raica na Aisea 56:4–7).

• Ena rairai marautaki beka vei ira na luvemu mera kunea na veimalanivosa me vaka na “yadra,” “tucake,” kei na “tokara na nomu kaukauwa” ena Aisea 51:9, 17; 52:1–2, 9 ka qai matanataka na veimalanivosa oqori. Ni oti oya, oni rawa ni veivosakitaka na ibalebale vakayalo ni yadra, tucake, ka vakaisulu. Na cava e kerea tiko vei keda na Turaga meda cakava ena veitikina oqo?

• Sureti ira na gone mera wilika na Aisea 51:1, 4, 7 ka kila se vosa tiko vei cei na Turaga kei na cava e vinakata o Koya mera cakava. Na cava e ibalebale ni “vakarorogo” vua na Kalou? Eda vakaraitaka vakacava vua na Turaga nida na “vakarogoci” Koya?

• Dou rawa ni raica vakaveiluveni e vica na itaba ka vakaraitaki tiko kina na rarawa kei na mate nei Jisu Karisito (raica, me ivakaraitaki, iVola ni iYaloyalo Vakosipeli; naba 56, 57, 58). Oti dou qai wilika vata na Aisea 53:3–6, 9 ka vaqara na vosa eso era vakamacalataka tiko na veika e yaco tiko ena iyaloyalo. Vukei ira na luvemu mera kila ni a wasea o Aisea na veidina oqo ena drau na yabaki ni bera ni yaco. Na cava na vuna e bibi kina mera kila taumada na tamata na veika oqo ni vo e vica vata na yabaki ni bera ni yaco? (raica na Alama 39:15–19).

• Ni oti na wiliwili mai na Aisea 53:4, “Sa colata ko Koya na noda rarawa, ka sa colata na rarawa ni lomada,” sa rawa vei ira na luvemuni mera tovolea mera laveta edua na iyaya bibi (se vaka mera laveta tiko edua). Veitalanoataka ni “mosi” kei na “rarawa” se lomabibi e rawa ni bibi ka dredre me colati. Na cava na vuna a colata kina o koya na noda “mosi,” “rarawa,” kei na “talaidredre” se ivalavala ca? (raica talega na Alama 7:11–12).

• Mera vakavulici na luvemu ena Aisea 55:6, e rawa mo vunitaka edua na itaba kei Jisu ena dua na vanua e loma ni rumu. E rawa nio sureti ira na luvemu mera vaqara na itaba ka tukuna edua na sala e rawa nira “vakasaqara na Turaga ni sa kune rawa.” Na sere me vaka na “Meu na Vaqara na Turaga” (iVolanisere ni Gonelalai, 67) ena rawa ni solia vei ira eso na vakasama. Oti sa na qai rawa nio digitaka edua me vunitaka na iyaloyalo ka tomana tiko na itaviqaravi.

• Ni oti na wiliki ni Aisea 55:9, ena rairai marautaki vei ira na luvemu mera tucake ena dua na idabedabe ka tukuna na kena duidui na irairai ni veika eso nio duri tu ena dua na vanua “cecere.” Se rawa nira droinitaka edua na droini me ibalebale ni Aisea 55:9 vei ira. Dou qai veitalanoataka kei ira na gone eso na sala ni Turaga ka cecere cake mai na noda sala. Me kena ivakaraitaki, na cava na Nona sala ena nodra qaravi na tamata ivalavala ca? (raica na Marika 2:15–17). Na cava na Nona sala ena nodra liutaki na tani? (raica na Maciu 20:25–28). Vakaraitaka vei ira na gone na sala o sa vulica mo vakararavi kina ki na sala kei na vakanananu cecere ni Turaga.