“October 26–November 1. ‘Upwe Siwini Ar Netipechou ngeni Pwapwa’: Jeremiah 31–33; 36–39; Könun Noninen 1; 3” Feito, Tapweto Mwiri—Ren Imw me Mwichefen: Testament Noom 2026 (2026)
“October 26–November 1. ‘Upwe Siwini Ar Netipechou ngeni Pwapwa,’” Feito, Tapweto Mwiri: Testament Noom 2026
Jeremiah Lamenting the Destruction of Jerusalem, seni Rembrandt van Rijn
October 26–November 1:“Upwe Siwini Ar Netipechou ngeni Pwpwa”
Jeremiah 31–33; 36–39; Könun Noninen 1; 3
Nupwen ewe Samon a keran kokkori Jeremiah an epwe emon soufos, I a ureni pwe an misin epwe “uttireta o oturereno” (Jeremiah 1:10)—me non Jerusalem, mi chommong fofforungaw ne uttireta o aturereno. Nge ei chok ekis pekin an Jeremiah misin—i a pwan kokko ngeni an “aueta,, me fotukatiw” (Jeremiah 1:10). Me a tongeni kauuta ika fotutiw non ewe neni mi ponnuno me ren ekkewe chon ungeni ekkewe aramas pwon? Eis pwan non och napanap, nupwen tipis ika koum a nikitano kich non tatakis, ifa usun sia tongeni kauuta sefan me fot sefan? Ewe ponuwan a nom non “ewe Panen wenechar” (Jeremiah 33:15), ewe Messiah mi pwon ngeni kich. I a wato “eu minafon pwon mi pin” (Jeremiah 31:31)—eu mi namot nap seni ewe mesemesen nikitu me nukun. An annuk epwe “nom non [ach] kewe kinikin non,” a makkeno “non [ach] netip.” Ina met wewen me ren ewe Samon an “epwe [ach] Kot] me ren ach “sipwe [Noun] aramas” (Jeremiah 31:33). Eu mettoch unusen manau, me sipwe chiwen chok fori mettoch mi muan me efisata netipeta seni fansoun ngeni fansoun. Nge nupwen sia fori, ewe Samon a pwonei, “Upwe siwini ar netipechou ngeni pwapwa” (Jeremiah 31:13).
Ren ew mennapen Könun Noninen, nengeni “Könun Noninen, Puken” non ewe Emwen ngeni ekkewe pukefel.
Ekkoch ekiek ren Kaeo non Imw me non Mwichefen
Jeremiah 31; 33
Ewe Samon epwe wau Noun aramas pwon seni fotek.
Non Jeremiah 31; 33 ewe Samon a apareni ewe “könun noninen, me kechiwengaw” (Jeremiah 31:15) ekkewe Chon Israel repwe kuna me non fotek. Inamo, i a pwan awora kapasen ourur me epinukunuk. Kutter nupwen ka anneani ekkei sopwun. Met pwon ka kuna mi wewe ngonuk?
Jeremiah 31:31–34; 32:37–42
“Me repwe nei aramas, me ngang upwe nour Kot.”
Inamo ika ekkewe Chon Israel ra atai ar kewe pwon mi pin, Jeremiah a osini pwe ewe Samon epwe forata sefan eu “minafon” me “pwon mi pin esemuch” ngenir (Jeremiah 31:31; 32:40). Met ena pwon mi pin? Nengeni Guide to the Scriptures, “Minafon Pwon mi pin Ese much,” Gospel Library.
Nupwen ka anneani Jeremiah 31:31–34; 32:37–42, ekipwichi:
-
Met wewen ngonuk om kopwe choni noun Kot aramas pwon.
-
Met wewen om An annuk epwe makeno non netipom.
-
Met ewe Samon a pwonei nupwen ka fori pwon mi pin ren.
-
Ifa usun pwonen nefinom ren Kot a siwinuk.
Met pwon ka fen fori ngeni Kot nupwen ka fen foffori angangepin? Ifa usun I a apwonueta An pwon ngonuk?
Nengeni pwan David A. Bednar, “Abide in Me, and I in You; Therefore Walk with Me,” Liahona, May 2023, 123–26.
Jeremiah 36
Mi wor manamanen ekkewe pukefel ar repwe akunnuei seni ngaw.
Anongonong won Jeremiah 36:2–3, pwata ewe Samon a annuku ngnei Jeremiah epwe rekotuni an osini? Nupwen ka anneani Jeremiah 36, apareni ifa usun ekkei aramas mi makketiw ra mefi usun ekkei osini:
-
Ewe Samon (nengeni uwokisin 1–3, 27–31)
-
Jeremiah (nengeni uwokisin 4–7, 32)
-
Baruch (nengeni uwokisin 4, 8–10, 14–18)
-
Jehudi me King Jehoiakim (nengeni uwokisin 20–26)
-
Elnathan, Delaiah, me Gemariah (nengeni uwokisin 25)
Ekipwichi ifa usun ka mefi usun ekkewe pukefel. Ifa usun ra anisuk ne kun seni ngaw?
Jeremiah 37–39
Kopwe pochokun ne tapweno mwirin noun Kot soufos.
Non Jeremiah 37:1–3, 15–21; 38:1–6, 14–28, met minen pwarata ka kuna pwe King Zedekiah a nuku pwe Jeremiah i noun ewe Samon ennetin soufos? Met kewe minen pwarata ka kuna pwe Zedekiah ese nuku? Met ka kaeo seni ei anonno fengen? Nupwen ka anneani Jeremiah 39, ekipwichi ewe sokkofesen ita epwe fis ika Zedekiah me noun kewe aramas ra tapweno mwirin ewe soufos me apwonueta ekkewe annukun ewe Samon. (Anonno fengeni met a fis ngeni Zedekiah ngeni met a fis ngeni an Liai famini non 1 Nifai 1–2.)
Jeremiah 38:6–13; 39:15–18
Ua tongeni pwaracho ne eppeti met mi pung.
Noun ewe king kewe nouwis ra mefi pwe an Jeremiah kewe osini ra fori nour kewe sounfiu ar resap kon mochen fiu, iwe ra aturanong Jeremiah non eu nimengawen pwang (nengeni Jeremiah 38:1–4). Non Jeremiah 38:6–13, met a eingok usun ponuwen me ren Ebed-melech ewe Chon Ethiopia? Apareni pwan ewe feioch ewe Samon a ngeni Ebed-melech non Jeremiah 39:15–18.
Ifa usun ka tongeni tapweno mwirin an Ebed-melech nenien appiru?
Ewe Sio an Jeremiah
Könun Noninen 1; 3
Ewe Samon a tongeni angasa ewe netipechou ua mefi pokiten tipis.
Ewe puken Könun Noninen eu pinuken toropwen memmef a makketiw mwirin ewe tanon Jerusalem me an ewe tempel. Pwata ka ekieki pwe mi auchea pwe ? Ekieki met ewe kapasen awewe non Könun Noninen 1 me 3 a anisuk ne weweiti usun ewe watten netipengaw Israel a mefi. Met porousen epinukunuk non Kraist ka kuna? (Nengeni akkaewin Könun Noninen 3:20–33; nengeni pwan Matthew 5:4; James 4:8–10; Alma 36:17–20).
Preseten M. Russell Ballard a apasa ekkoch nikinik repwe efisi ekkoch aramas an epwe turuno ar epinukunuk, me i a awora ourour usun ian sipwe kuna epinukunuk me ia:
“Ekkoch me neich sipwe kuna manauch repwe ur ren ningeringer, tipengaw, me netipechou. Chommong ra mefi nipwakingaw ren angang ngeni ewe osukosuk usun minne mi nemenemeno non fonufan. Ekkoch ra riaffou ren chochon famini ekkewe ra weweino me kokono ren apwangapwangen mettoch me kisinon nongonongen manau. … Chommong ra fen fangeta inisir ne etiwa ewe fofforungaw me rochongawen ewe fonufan pwe och mettoch ese tufich epwe forsefan. Ra fen fangeta epinukunuk. …
“… Ekkoch me neich meni a turuno unusen ar epinukunuk pokiten tipis me atai annuk. Emon aramas a tongeni epwe kokono non ngawen orenien fonufan iwe esap kuna eu anen epwe tou seni me a turuno seni epinukunuk meinisin. Ai sio ngeni meinisin ekkewe ra turunong non ei sar an ewe chon koum pwe resap tongeni fangeta! Ese nifinifin ifa usun nikinikin siongawen mettoch ika ifa usun siongawen mettoch epwe fis, nukuei, a tongeni wor om epinukunuk fansoun meinisin. Fansoun meinisin” (“Ewe Pwapwan Epinukunuk a Pwonuta,” Ensign, Nov. 1992, 31–32).
Nengeni pwan “Come, Ye Disconsolate,” Kon mi fen, no. 115.
Anisi ekkoch repwe pwisin nemenem won ar pwisin kaeo. Fan ekkoch usun ewe mecheresin aan ne osukun ina ach sipwe chok ureni ekkewe chon kaeo met sia ekieki repwe sinei. Nge inamo, ewe mecheresin aan esap chok ina ewe aan murino. Elter David A. Bednar a afanafan: “Ach mochen esap ‘Met upwe urenir?’ Nge, ikkei ekkewe kapaseis sipwe eisini pwisin kich ‘Met ua tongeni etiwer repwe fori? Met murinon kapaseis ua tongeni eis pwe, ika ra mochen ponuweni, minne epwe poputa ne etiwa ewe Ngun mi Fel non manauach?” (nekunion ren emon Meinap Unus, Feb. 7, 2020, broadcasts.ChurchofJesusChrist.org; nengeni pwan Teaching in the Savior’s Way, 25). Mei chomong anen ach sipwe anisi chon kaeo repwe wisen nemeni ar kaeo. Ren awewe, non ei kokkot mi makketiw chon kaeo ra ketiw ar repwe kutta, ekipwichi, etettenatiw mettoch, kutta sasing, fiti nesenin mettoch, chunga, me aporousa me aea met ra kaeo.
Ekkoch ekiek ren Osukuna Semirit
Jeremiah 31:3
Samach non Nang me Jises Kraist ra tongeiei “ren eu tong esemuch.”
-
Nupwen ka anneani Jeremiah 31:13 ngeni noum kewe semirit, ra tongeni anisuk ne kutta ekkoch mettoch (ika sasingin mettoch) mi tongeni nom non fansoun nakatam, usun ren efou senisen mecha, me ekkoch resap nakatam, usun ren efou foun ira. Ka pwan tongeni kapas usun met wewen “esemuch” me aporousa fengeni ifa usun ka fen mefi an Samach won Nang “tong esemuch.” Oua pwan tongeni konu fengeni echo kon usun “God Is Watching Over All” (Noun Semirit Puken Kon, 229).
Jeremiah 31:31–34; 32:38–41
Kot epwe anisiei ne apwonueta ai pwon mi pin.
-
Noum kewe semirit repwe sani ar repwe chungani efou foun ngasangas won echo toropwe me mwirin repwe makkei non ewe foun ngasangas ekkewe mettoch ra kaeo seni Jeremiah 31:31–34 usun fori pwon mi pin ren Kot. Menin kopwe pwan mochen atona sefani ewe pwon mi pin ra fori atun papatais (nengeni Mosaia 18:10, 13) me aporousa met wewen ar repwe makkeno ekkei pwon non netiper.
Jeremiah 36:1–4
Ekkewe pukfel mi ewe kapasen Kot.
-
Peichin urumotun ei wik a tongeni anisi noum kewe semirit ar repwe kaeo usun Jeremiah, Baruch, me ewe king (nengeni Jeremiah 36). Ra pwan tongeni fori ekkoch foffor mi tongeni epwe fiti ekkewe kapas non Jeremiah 36:4–1o, usun ren ar makkei non eu puk (nengeni uwokisin 4) me anneani ekkewe uwokisin ngeni ekkewe aramas (nengnei uwokisin 8, 10).
-
En me noum kewe semirit oua tongeni nenengeni noun eu noun semirit puk me eu kapin ekkewe pukefel me kapas ren ifa usun ekkei puk ra sokkono. Met a fori ekkewe pukefel ar repwe auchea? Menin epwe murino ne aporousa fengeni ekkoch uwokisn pukefel ekkewe ir mi auchea ngeni kemi.
Jeremiah 38:6–13
Ngang ua tongeni eppeti met mi pung.
-
Ka tongeni aea ewe sasing nesoponon ewe okokkot mi makketiw ne anisi noum kewe semirt repwe anapanapa ewe porousen Ebed-melech non Jeremiah 38:6–13. Menin ka tongeni anisir ne kutta eu uwokisin ikewe Ebed-melech a fori och mettoch mi pwaracho ne anisi noun Kot soufos. Met sia tongeni fori ne pwarano pwe kich mi sinei nouch soufos ikenai a kokko me ren Kot?
Konun noninen 1:1–2, 16; 3:22–26
Ewe Chon Amanau a otufichi ngeniei an epwe musuno ai tipis.
-
Ne esinei Könun Noninen, meni kopwe mochen awewei ngeni noum kewe semirit pwe pokiten ekkewe Chon Israel rese aier, Jerusalem me ewe tempel ra tano. Oua tongeni aporousa fengeni ita ifa usun ami mefi ika ami mi nom ikewe non ena fansoun (nengeni Könun Noninen 1:1–2, 16). Ifa usun ita ewe porous non Könun Noninen 3:22–26 a fen ngonuk epinukunuk?
-
Ka pwan tongeni ureni fengeni kemi usun fansoun oua mefi netipengaw usun eu finata mi ngaw oua fori. Met sia kuna non Könun Noninen 3:22–26 ewe a anisi kich ne weweiti ewe omusomusen tipis Jises Kraist a awora?
Ren pwan ekkoch, nengeni puken non ei maram ren ewe Friend magazine.