Sau, Mulimuli Mai ia te A’u
21–27 Setema. ”O Le Vavega Lava, O Le Mea Foi e Ofo Ai”: Isaia 13–14; 22; 24–30; 35

21–27 Setema. ‘O Le Vavega Lava, O Le Mea Foi e Ofo Ai’: Isaia 13–14; 22; 24–30; 35,” Sau, Mulimuli Mai ia te A’u—Mo Le Aiga ma le Ekalesia: Feagaiga Tuai 2026 (2026)

21–27 Setema. ’O Le Vavega Lava, O Le Mea Foi e Ofo Ai,’” Sau, Mulimuli Mai ia te A’u: 2026

O le Atua ma Iesu Keriso o loo faaali atu i le talavou o Iosefa Samita

Vao Paia, saunia e Brent Borup

21–27 Setema: “O Le Vavega Lava, O Le Mea Foi e Ofo Ai”

Isaia 13–14; 22; 24–30; 35

O le tasi o mea na fetalai mai le Alii i perofeta ina ia fai o le lapatai atu lea e uiga i taunuuga o le agasala. Mo perofeta o le Feagaiga Tuai, o lenei mea e masani ona faauigaina o le ta’u atu i taitai o malo malolosi e manaomia ona latou salamo. Sa o se galuega lamatiaina, ae o Isaia sa le fefe, ma o ana lapataiga i malo o ona vaitaimi—e aofia ai Isaraelu, Iutaia, ma malo na latalata atu i ai—sa lotoa (tagai Isaia 13–23).

Ae peitai, o Isaia sa i ai foi sana savali o le faamoemoe. E ui lava ina sa iu lava ina oo atu faatamaiaga na valoiaina i nei malo, ae sa muaivaaia foi e Isaia se avanoa mo le toefuataiga ma le toefaafouga. O le a valaaulia e le Alii Lona nuu e foi mai ia te Ia. O le a Ia faia “le serapi ma vailepa, … le nuu naumati ma vaipuna” (Isaia 35:7). O le a Ia faia “se galuega tele ma le ofoofogia” (Isaia 29:14), e toefuatai atu ai ia Isaraelu faamanuiaga sa Ia folafolaina atu ia i latou. E leai se isi lava tagata e oo lava foi ia Isaia na soifua i lena taimi na ola e vaai i lenei galuega tele. Ae o loo tatou vaaia i aso nei. O le mea moni, o i tatou o sea vaega.

aikona o suesuega

Manatu mo le Aoaoina i le Aiga ma i le Ekalesia

Isaia 13:1–11, 19–22; 14:1–20

O le a toilalo le faamaualuga ma mea faalelalolagi.

I aso o Isaia, o Papelonia o se malo malosi ma sē sa pulea malosi. O le taimi nei, o Papelonia ua o se talafaasolopito anamua. Aisea la e taua ai le savali a Isaia ia Papelonia, i le Isaia 13–14, ia i tatou i aso nei? Talu ai o Papelonia o se faatusa o le faamaualuga, matape’ape’a, ma le agasala, o mea ia o loo si’omia ai pea i tatou i aso nei. Mafaufau i lenei faafaatusa ao e faitaua le Isaia 13:1–11, 19–22; 14:1–20. Atonu e mafai ona e mafaufau i fesili e pei o nei:

  • O a ni mea e tutusa ai o e vaaia i le va o le faamaualuga o le tupu o Papelonia ma le faamaualuga o Satani? (tagai Isaia 14:4–20; Mose 4:1–4). O a ni lapataiga ua e maua mo oe lava i lenei fuaiupu?

  • E faapefea ona tuuina mai e le Faaola le “faafilemuina … i lou tiga, ma lou atuatuvale”? (Isaia 14:3).

O Iesu toetu o loo faaali atu ia Maria e latalata i Lona tuugamau

“E faaumatia e Ia le oti e faavavau” (Isaia 25:8).

Isaia 22:22–23; 24:21–23; 25:6–8; 26:19; 28:16

O Iesu Keriso o le Mesia na folafolaina.

O tusitusiga a Isaia e masani ona faasino atu i le misiona a le Faaola, e aofia ai Lana taulaga togiola, Toetu, ma le Afio Mai Faalua. O a vaega o Lana misiona e oo mai i lou mafaufau a o e faitauina fuaiupu nei: Isaia 22:22–23; 24:21–23; 25:6–8; 26:19; 28:16? O a isi fuaitau e te tau i ai e faamanatu mai ai ia te oe le Faaola?

Tuu atu i tagata aoao ni avanoa e molimau atu ai ia Iesu Keriso. ”O le avea ma se faiaoga o le talalelei a Iesu Keriso o lona uiga o le fesoasoani lea i isi ia malamalama ma faalagolago i Ana aoaoga, mana togiola, ma le alofa atoatoa” (Aoao Atu i le Ala a le Faaola, 8). O se tasi o auala faigofie e faia ai lena mea i taimi uma e te aoao atu ai o le fai atu lea o se fesili e pei o le, ”O le a se mea na e maua i tusitusiga paia i lenei vaiaso na aoaoina ai oe i se mea e uiga i le Faaola?” Ona tuu atu lea i tagata aoao e faasoa mai o latou aafiaga ma faamalosia le faatuatua o le tasi ma le isi.

Isaia 24:1–12; 28:1–8; 29:7–13; 30:8–14

O le liliuese mai le Alii e aumaia ai se tulaga lamatia faaleagaga.

I Lona alofa mutimutivale, na auina mai ai e le Alii Isaia e lapataia tagata o le feagaiga e faapea ua latou se ese mai ia te Ia. Vaai pe mafai ona e maua faailoga o lapataiga faaleagaga o lenei mea i le Isaia 24:5; 29:13; 30:8–12. Aisea e lamatia ai faaleagaga nei uiga ma amioga?

Ina ia lapatai atu e uiga i taunuuga o le lē manatu i ai pe teenaina le Alii, sa faaaoga ai e Isaia ni faatusatusaga e le mafaagaloina. A o e suesueina, fesili ifo ia te oe lava pe faape’i le teenaina o le Alii:

  • O se lalolagi faanoanoa ma le gaogao (Isaia 24:1–12).

  • Onanā (Isaia 28:7–8).

  • Fiaai ma le fia inu (Isaia 29:7–10).

  • O se puipui po o se ipu ua nutililii (Isaia 30:13–14).

Aisea e taua ai ia te oe le tu latalata ai i le Alii?

Isaia 29; 30:18–26; 35

aikona o le seminare
E mafai e le Alii ona toefuatai mea na leiloloa pe ta’ei.

Pe na i ai se taimi na leiloa ai sau mea sa e manatu o le a e le toe mauaina lava? Pe atonu foi na nuti se mea, ma sa e popole ina nei le mafai ona toe faaleleia. Pe a tatou liliu ese mai le Alii, e manao Satani ia tatou mafaufau e le mafai lava ona tatou toe foi mai pe faamaloloina. Ae peitai, na faamatalaina e Isaia nisi o mea tetele o le a faia e le Alii ina ia fesoasoani ia i tatou e toe foi atu ai ia te Ia. O a ni mea e te aoao mai le Isaia 29:13–24; 30:18–26;35 e uiga i le Alii, Lona alofa, ma Lona mana? Atonu e mafai ona e maua se fuaiupu i nei fuaitau e te maua ai le faamoemoe pe a e manaomia le faamalologa. E mafai foi ona e vaai i le savali a Sister Amy A. Wright ”E Faamaloloina e Keriso Mea ua Gauia” (Liahona, Me 2022, 81–84).

O se tasi o auala ua faaalia ai e le Alii Lona mana ma le alofa mutimutivale, e ala lea i le Toefuataiga o Lana talalelei. O leIsaia 29 o loo i ai ni nai fuaitau e i ai mea e tutusa ai ma mea na tutupu o le Toefuataiga. Mo se faataitaiga:

I lou manatu, aisea e lelei ai upu o le ”vavega lava” ma ”ofo ai” (Isaia 29:14) e faamatala ai le toefuataiga e le Alii o Lana talalelei? E mafai faapefea ona e fesoasoani e faataunuu valoaga e uiga i le Toefuataiga? Mo ni manatu, tagai i le savali a Elder Gerrit W. Gong ”Atunuu Uma, Ituaiga, ma Gagana” (Liahona, Nov. 2020, 38–41).

Tagai foi i le “O le Toefuataiga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi” (Potutusi o le Talalelei); ”Ua Tafa Ata,” Viiga, nu. 1.

Mo nisi manatu, tagai i le lomiga o lenei masina i mekasini o le Liahona ma le Mo Le Malosi o le Autalavou .

aikona o le vaega a tamaiti

Fautuaga mo le Aoaoina o Tamaiti

Isaia 14:3; 25:8–9; 28:16

E mafai e Iesu Keriso ona laveaiina a’u mai le agasala ma le oti.

  • E faapefea ona e fesoasoani i lau fanau ia iloa le Faaola i tusitusiga a Isaia? Atonu e mafai ona e fesoasoani ia i latou e sue fuaitau lea e faamanatu atu ai ia i latou o Ia i le Isaia 14:3; 25:8; po o le 28:16. E mafai foi ona latou faafetaui nei fuaiupu mai le Isaia ma isi fuaiupu lea o loo aoao mai e uiga i le Faaola, e pei o le Mataio 11:28–30; 1 Korinito 15:53–57; Helamana 5:12. O a ni mea sili ua faia e le Alii mo i tatou?

  • A uma ona faitau faatasi le Isaia 25:8–9 , e mafai ona e vaai i ata o le Faaola i Ketesemane, i luga o le satauro, ma ina ua mavae Lona Toetu. Tuu atu i lau fanau e talanoa e uiga i mea o loo tutupu i ata ma le mafuaaga latou te alolofa ai ia Iesu ma ”olioli i lana olataga” (fuaiupu 9).

  • Atonu e te filifili e ta’u atu i lau fanau e uiga i le faanoanoa na e lagonaina ina ua maliu se tasi e te alofa i ai. Molimau atu i le faamafanafanaga ua e maua ona o Iesu Keriso. Atonu e mafai e lau fanau ona tusi ni foliga tagi ona tapeese lea o loimata a o outou faitauina faatasi le Isaia 25:8 .

O Iesu i Ketesemane

Ia Faia Lou Finagalo, saunia e Ken Spencer

Isaia 25:4–6

Ua tuuina mai e Iesu ia te au le ”malu i le afā.”

  • Pe na e maua ea ma lau fanau se aafiaga o le faamanuiaga o le malutaga saogalemu i le taimi o se afā po o se paolo i se aso vevela o le taumafanafana? Pe na e fiafia i se taumafataga lelei a o e fiaai? Talanoa e uiga i nei aafiaga a o e faitauina le Isaia 25:4–6. E faapei faapefea le Faaola o nei mea?

Isaia 29:11–18, 24

O le Toefuataiga o le talalelei o “le vavega lava.”

  • A o e faitauina ma lau fanau le Isaia 29:14, faasoa atu ia i latou isi upu e tutusa lona uiga ma le ”vavega lava” ma le ”ofo ai.” Ia tuu atu ia i latou e fesoasoani ia te oe e sue mea faitino po o ata ia e faatusa i nisi o vavega lava a le Alii i aso e gata ai. E mafai ona aofia ai se kopi o le Tusi a Mamona, se ata o se malumalu, po o se ata o le Uluai Faaaliga (o loo i ai se ata i le amataga o lenei otootoga). Ia valaaulia lau fanau e filifili se aitema ma fetufaai atu pe aisea ua avea ai o se vavega lava ia i latou.

  • O se pese e uiga i le Toefuataiga o le talalelei e mafai ona o lelei ma le Isaia 29, e pei o le ”I Se Taeao Manaia” (Tusipese a Tamaiti, 57). Ma atonu e mafai ona fesoasoani se aafiaga faaletagata lava ia i fanau ia malamalama i le uiga o le toefuataiga . Mo se faataitaiga, e mafai ona e talanoa ma lau fanau e uiga i sau mea na leiloa ma le auala na e toe maua ai. Fesoasoani i lau fanau e faatusatusa lenei mea i le Toefuataiga o le talalelei. E tusa ai ma le Isaia 29:13–15, aisea tatou te manaomia ai le Toefuataiga? O a vavega lava o le galuega a le Alii o loo faia e toefuatai mai ai Lana talalelei? (tagai i le itulau o gaoioiga o le vaiaso lenei).

Mo nisi manatu, tagai i le lomiga o lenei masina o le mekasini o le Uo .
Iesu i luga o le satauro

O Le Faasatauroga, saunia e Carl Heinrich Bloch, i le Falemataaga o Talafaasolopito o le Malo, i Frederiksborg

Itulau o gaoioiga a le Peraimeri: O Le Toefuataiga o le talalelei o galuega o “se vavega lava.”