Faataoto 1–4; 15–16; 22; 31; Failauga 1–3; 11–12

O le tusi a Faataoto ma Failauga ua faatumulia i manatu e uiga i le poto. Mafaufau e faailoga le upu “poto” ma upu e faatatau i ai e pei o le “atamai” ma le “malamalama,” pe a e maua i le Faataoto 1–4; 15–16; Failauga 1–3; 11–12. E mafai faapefea e nei fuaiupu ona aafia ai le ala e te mafaufau ai e uiga i le poto? E faavae i mea ua iloa, e faapefea ona e faamatalaina le poto lea “o Ieova na te foai mai”? (Faataoto 2:6). O a faamanuiaga e maua mai i le poto o le Atua?

Tagai foi i le Mataio 7:24–27; 25:1–13.

O le isi autu o loo maua i le Faataoto ma le Failauga atoa o le “mata’u ia Ieova.” Vaavaai mo le fasifuaitau lenei a o e faitau. O le a sou manatu i le uiga o le mata’u ia Ieova? Vaavaai mo ni malamalamaaga i le savali a Elder David A. Bednar “O Lea Na Latou Faafilemu Ai Lo Latou Matata’u” (Liahona, Me 2015, 46–49). E faapefea ona ese le mata’u ia Ieova mai isi ituaiga o mata’u?

Tagai foi Faataoto 8:13

E faapefea ona e taumafai e faatauanau se tasi faapea e sili atu le “faatuatua ia Ieova” nai lo le “faalagolago … i [lo tatou] lava atamai”? (Faataoto 3:5). O a ni faatusatusaga po o ni lesona o mea faitino e te faaaogaina? A o e mafaufau loloto i le Faataoto 3:5–7, mafaufau i auala e mafai ona e faamaeaina ai fuaiupu faapenei: O le faatuatuaina i le Alii e pei lava … O le faalagolago i lo tatou lava malamalama e pei …

Aisea e le atamai ai le faalagolago i lo tatou lava atamai? Na faapefea ona e iloaina e faatuatuaina le Alii?

E ui lava i lea, atonu e faigata ia i tatou ona faatuatuaina le Alii i nisi taimi. Aisea e faapena ai? Ua fautuaina mai e Elder Gerrit W. Gong nisi o mafuaaga, faatasi ai ma fautuaga aoga, i le “Toe Faatuatuaina” (Liahona, Nov. 2021, 97–99). O a ni tala po o ni aoaoga e te maua i lenei savali e ono fesoasoani i se tasi e toefuatai mai ai lo latou faalagolago i le Alii?

O le Faataoto 3:6 ma le Faataoto 4 ua faatusatusa uma ai le olaga i se “ala” po o se “auala.” O le a sou manatu i le uiga o le tuu atu i le Alii e “faatonuina [ou] ala”? (Faataoto 3:6). O le a se mea ua e maua i le mataupu 4 lea e fesoasoani ia te oe e “mafaufau i le ala o [ou] vae”? (fuaiupu 26). Mo se faataitaiga, o le a se mea o aoao mai e fuaiupu 11–12 ma le 18–19 e uiga i faamanuiaga o le mulimuli i le ala sa’o? O le a le uiga o fuaiupu 26–27 ia te oe?

Tagai foi i le 2 Nifae 31:18–21; “Faaola, ia ’Ou Alofa,” Viiga, nu. 150.

O nisi o manatu o loo i le Faataoto 15–6 atonu e mafai ona musuia ai oe e faaleleia atili le ala e te talanoa atu ai i isi, ae maise lava i tagata e pele ia te oe. Mo se faataitaiga, mafaufau i taimi patino na fesoasoani ai “se tali filemu” e “[liliuese] ai le ita” (Faataoto 15:1).

Atonu foi e te mafaufau i taimi na faataitaia ai e le Faaola aoaoga o loo i le Faataoto 15:1–4, 18 (tagai i le Mareko 12:13–17; Ioane 8:1–11). E mafai faapefea ona e mulimuli i Lana faataitaiga a o e fegalegalea’i ma isi tagata?

E mafai faapefea e le fautuaga i le Faataoto 15; 16:24–32 ona faatatau i fesootaiga o onapo nei faatekinolosi? Vaai pe mafai ona e maua se fuaiupu i nei mataupu e mafai ona e toe faaupuina o se fautuaga e uiga i fegalegaleaiga i luga o ala o faasalalauga faaagafesootai po o feau feaveai.

Tagai foi i le Neil L. Andersen, “Mulimuli ia Iesu: Avea ma Sē e Faatupuina Le Filemu,” Liahona, Me 2022, 17–20; Ronald A. Rasband, “E Taua Upu,” Liahona, Me 2024, 70–77; Mo Le Malosi o le Autalavou: O Se Taiala mo le Faia o Filifiliga (2022), 11–12.

O leFaataoto 31:10–31 o loo faamatala ai “se avā amio lelei,” po o se tamaitai e maoae le malosi, gafatia, ma faatosinaga faaleagaga. Atonu e te taumafai e aotele i au lava upu ia mea o loo ta’u mai e nei fuaiupu taitasi e uiga i le avā amiolelel. O fea o nei uiga e mafai ona e faataitaia?

Aisea e taua ai ona e manatua o le tele o mea i lenei lalolagi, e pei ona faailoa mai e le Failauga 1–2 , e “faatauvaa” (pe e le tumau ma e masani lava e le taua)? O le a se mea e te maua i le Failauga 12 lea e tuuina atu le taua o le ola e faavavau?

• Ina ia fesoasoani i lau fanau ia malamalama i fuaitau e uiga i le mata’u i le Atua, e mafai ona e suitulaga le upu “fefe” i upu e pei o le migao, alofa, po o le usiusitai (tagai foi i le Eperu 12:28). E faapefea e lenei faiga ona aafia ai le auala tatou te mafaufau ai e uiga i nei fuaiupu? E faapefea ona tatou faaali atu tatou te matata’u i le Alii?

• E mafai ona e faia ma lau fanau ni gaoioiga e o faatasi ma le Faataoto 3:5–7, e pei o le faia o se fatu i ou lima, faalagolago atu i le tasi itu, savali i le tulaga, ma faasino atu i ou mata. E mafai faapefea ona tatou faaali atu tatou te faatuatua ia Iesu Keriso ma o tatou loto atoa?

• Ina ia faaali atu le uiga o le “aua le faalagolago i lou lava atamai” (Faataoto 3:5), mafaufau e valaaulia lau fanau e faalagolago atu i se mea malosi ma le mautu, e pei o se puipui. Ona latou taumafai lea e faalagolago atu i se mea e le malosi, e pei o se salu. Pe mafai foi ona latou taumafai e tuu se fasilaau po o se penitala e faalagolago i mea e eseese le malosi, e pei o se tusi po o se fasi pepa. Aisea e taua ai le “faatuatua ia Ieova” (fuaiupu 5) ae le o le faalagolago i “lou lava atamai”?

• Atonu e mafai ona e mafaufau ma lau fanau i ni tulaga e te ono lagona ai po o i latou foi le ita. Faitau faatasi le Faataoto 15:1 , ma fesoasoani i lau fanau e faaaoga lenei fuaiupu i tulaga sa latou mafaufau i ai. Atonu e mafai ona latou faataitaia ni “tali filemu.” O se pese e uiga i le agalelei, e pei o le “O Loo Tautalagia Iinei le Alofa” (Tusipese a Tamaiti,102), e mafai ona faamalosia ai lenei mataupu faavae.

• Ina ia aoao i le uiga o le ia “faatoatoa le tuulelei ia te ia le finauga” (Faataoto 15:18, o oe ma lau fanau e mafai ona faasoa atu taimi na e (po o se tasi e te iloa) lagona ai le ita ae na filifili e agalelei. Fesoasoani i lau fanau e mafaufau i mea e mafai ona tatou vave faia pe afai tatou te “faatelegese i le ita.” Mo se faataitaiga, e mafai ona tatou vave mafaufau ia Iesu, ole atu i le Tama Faalelagi mo se fesoasoani, mafaufau i se pese a le Peraimeri, po o le, pe a mafai, ia savali ese.