“Septempe 21–27. ‘Doadoahk Kaselel oh Kopwuriamwei Ehu’: Aiseia 13–14; 22; 24–30; 35,” Kohdo, Idawehn Ie—Ohng Tehnpesomwi oh Imwen Sarawi Kan: Kadehdeh Mering 2026 (2026)
“Septempe 21–27. ‘Doadoahk Kaselel oh Kopwuriamwei Ehu,’” Kohdo, Idawehn Ie: 2026
Wasa Joseph Smith Kapakapiehu, sang Brent Borup
Septempe 21–27: “Doadoahk Kaselel oh Kopwuriamwei Ehu”
Aiseia 13–14; 22; 24–30; 35
Ehu mehkot me Kauno kupwurki soukohp kan en wia iei kaparki souleng kan kahpwal kan en wia dihp. Ohng soukohp kan nan Kadeheh Mering, met wehwehki me re kin padahkihiong soun kou kosonned lapalap akan en ehu ehu wehi me re anahne koluhla. E wia pwukoah keper ieu, ahpw Aiseia me inenen komwad, oh ah tungoal kehkehlik ohng ah tungoal wehi kan—me iei Isrehl, Suhdia, oh wehi teikan—me kin inen (tehk Aiseia 13–23).
Ahpw ni ansouohte, en Aiseia padahk kan kin wahdo koapwoaroapwoar. Mendahte kokohp en kamwomwomwla eh wiawihiongehr wehi pwukat, Aiseia pil kohpadahr me e pahn pwurehng kokouda oh kamwahula. Kauno pahn lukehiong Sapwelime aramas akan en pwurodohng Reh. E pahn ketin wiahiong “wasahn pihk karakar akan … pahn wiahla lehn pihl, oh sahpw madekeng kan pahn audaudkihda pwarer pwepwengkda” (Aiseia 35:7). E pahn ketin wia “mwekid kopwuriamwei kei” (Aiseia 29:14), pwehn kapwrehiong Isrehl mehkan me E ketin inoukihiong irailehr. Aiseia de emen emen me momour ansouo sohte kilang mwekid kopwuriamwei wet. Ahpw kitail kilkilang me pwukat rahnwet. Ni mehlelo, kitail wia kisehn.
Mehn Kaskuhl Ohng Tehnpesomwi Oh Wasahn Kaudok Kan
Aiseia 13:1–11, 19–22; 14:1–20
Pohnmwahsu oh momour en Sampah wet pahn sohrala.
Nan mwein Aiseia, Papilohn wia wehi lapalap iu oh ahniki kaun kaidehn mehn mwamwahl men. Rahnwet Papilohn wiahte soai ieu. Eri dahme kahrehda en Aiseia padahk ohng mehn Papilohn kan, nan Aiseia 13–14, kesempwalkihiong kitail rahnwet? Pwehki Papilohn wia kasalepen pohnmwahso, noahrok, oh dihp, me leledo rahnwet kitail kin kilkilang. Medewe mehn karasaras wet ni omw wadewadek Aiseia 13:1–11, 19–22; 14:1–20. Komwi pil kak medemedewe iren kalelapak pwukat:
-
Ia mwomwen ahmw kak karasahiong en nahnmwarki en Papilohn mour en pohnmwahsu ohng en Sehdan? (tehk Aiseia 14:4–20; Moses 4:1–4). Soangen mahsen da me komwi diar sang nan ire pwukat me doke omw mour?
-
Iamwomwen Soukomouro ah kak “kamaiawihiukada sang nan medek, oh sang nan lokolok”? (Aiseia 14:3).
“E pahn ketin kamwomwala mehla kohkohlahte” (Aiseia 25:8).
Aiseia 22:22–23; 24:21–23; 25:6–8; 26:19; 28:16
Sises Krais iei me Mesahiahu.
Pwuken Aiseia kalapw padahngki Sapwellimen Sounkomouro pwukoah doadoahk, me iei Sapwellime tomwo, Iasadahu, oh Ketdo Keriau o. Iahnge kisehn Sapwellime pwukoah doadoahk me ke medewehda ni ahmw wadwadek iretikitik pwukat: Aiseia 22:22–23; 24:21–23; 25:6–8; 26:19; 28:16? Iahnge irehkan me katamandohng komwi duwen Sounkomouro?
Mweidohng tohn sukuhl kan en wia arail kadehde duwen Sises Krais. “Sounpadahk en rongamwahu en Sises Krais men kin sewese mehteikan en wehwehki oh doadoahngki Sapwellime padak Kan, manaman en komour, oh limpoak unsek” (Padahk Duwen Me Sounkomouro Ketin Wia, 8). Ehu wiepen ken kak wia met ansou koaros me ke kin kasukuhl iei en kalelapak soangen peidek me duehte met “Dahme ke diarada nan pwuhk sarai Kan me padahkihong uhk mehkot me pid Sounkomouro?” Kahpw uhd mweidohng tohn sukuhl kan en ehukipene dahme re lelohngehr kan oh kakehlailih en emen emen ahr pwoson.
Aiseia 24:1–12; 28:1–8; 29:7–13; 30:8–14
Sohpeisang Kauno pahn kaluwetehla pali ngenomw.
Pwehki Kauno me diren limpoak oh mahk, e ketin kadarala Aiseia pwehn padahkihiong irail me re salongasangehr elen Kauno. Kilang ma ke kak diar kaweid pwukat nan Aiseia 24:5; 29:13; 30:8–12. Dahme kahrehda wiepen momour de wiewia pwukat keper ohng pali ngenomw?
Pwehn sewese kaparkin irail duwen kalokepen sohpeisang Kauno, Aiseia doadoahngki karasaras kei me sohte kak manoknokla. Ni ahmw pahn onopiki mepukat, kalelapak rehmw ia mwomwen sohpeisang Kauno:
-
Sampah ieu me tehn, oh kempoake (Aiseia 24:1–12).
-
Sakaulahr douluhl (Aiseia 28:7–8).
-
Duhpek oh Men Nimpil(Aiseia 29:7–10).
-
Dihd de sah me pwalpeseng (Aiseia 30:13–14).
Dahme e kesempwaliki en karakaranih Kauno?
Aiseia 29; 30:18–26; 35
Kauno kak kamwahuiala de kapwurehdo mehkot me salongalahr de ohla.
Mie pak me ke sehsehla mehkot koh lemehiong me ke sohte kak pwurehng diar? De mehkot ohla, koh eri pwunodikihda ede sohte kak pilehu wiawihda. Ansou me kitail kin sohpeisang Kauno, tepelo kin men kitail en lemeleme me kitail sohte kak koluhla oh pwurehng mwahula. Ahpw, Aiseia pil kosoiahda ekei mwekid kopwuriamwei me Kauno pahn wia pwehn kapwureikitaildo Reh. Dahme ke esehsang nan Aiseia 29:13–24; 30:18–26; 35 duwen Kauno, Sapwellime limpoak, oh manaman? Mwein komwi pil kak alehdihsang iren kaweid sang nan ire pwukat me pahn kihong komwi koapwoaroapwoar ansou me komwi anahne sawas. Ke pil kak kilang nan en Amy A. Wright’s padahk “Krais kin Kamwahuihla Dahme Olahr” (Liahona, Mei 2022, 81–84).
Kauno pil kasalehda Sapwellime manaman oh limpoak sang ni kopwurupwurdohn Sapwellime ronhgamwahuo. Aiseia 29 Auduadki ire kei me pahrekehng Dahme wiawiher nan kopwurpwurdohn rongamwahuo. Karasepe:
-
Karasapene Aiseia 29:11–12 ohng 2 Nihpai 27:6–26 oh Joseph Smith—History 1:63–65.
-
Karasapene Aiseia 29:13–14 ohng Doctrine and Covenants 4 oh Joseph Smith—History 1:17–19.
-
Karasapene Aiseia 29:18–24 ohng Eden Pwuken Mormon.
Ni pein ahmw madamadau, dahme “kaselel” oh “kopwuriamwei” (Aiseia 29:14) wiahki lepin lokaia pilipilda pwehn kawehweh Kauno ah pahn ketin kapwurehdo Sapwelime rongamwahuo? Ia mwomwen ahmw kak sewese kokohp en Kopwurupwurdohn rongamwahu en pweida? Ohng sawas en kaweid, kilang nan en Elder Gerrit W. Gong’s padahk “Sahpw Koaros, Aramas, oh Lokaia” (Liahona, Nop. 2020, 38–41).
Pil kilang “Kopwurupwurdohn Rongamwahu Unsek en Sises Krais: Ke Riepwiki en Ketemenpen Kalohk Ehu Ong Sampah” (Gospel Library); “The Morning Breaks,” Hymns, no 1.
Kalaudpe, kilang makesihn en sounpwonget Liahona oh Ohng Kakehlepen Me Pwulopwul Kan.
Kaweidpen Kaskuhl Ohng Seri Kan
Aiseia 14:3; 25:8–9; 28:16
Sises Krais kak Doarei Kitail sang Dihp oh Mehla
-
Iamwomwen omw kak sewesehki serihkan en esehla duwen Sises sang nan pwuken Aiseia. Komw pil kak sewesehkin irail kilangada lepin lokaiahkan me kataman ohng irail duwen Ih Aiseia 14:3; 25:8; de 28:16. Irail kak kapatahiong ire pwukat sang Aiseia ohng ekei ire me padahngki duwen Soundoaro, me duehte Madiu 11:28–30; 1 Korint 15:53–57; Helaman 5:12. Soahng kopwuriamwei dah me Kauno ketin wiahiong kitail ehr?
-
Mwurin amwail wadek Aiseia 25:8–9 pene, Kumwail kak kilang pene kilel en Soundoaro nan Kedsemeni, pohn lohpwuo, oh mwurin Ah Iasadahro. Mweidohng noumwail seri kan en kosoiapene dahme wihwiawi nan kilel pwukat oh Dahme irail poakohngki Sises oh “kapingki Sapwellime komour” (ire tikitik 9).
-
Ke pil kak pilada en ehukihong noumw seri kan duwen pahtou me ke ahneki ansou me emen kempoakepahmw kin kepinsalehdala. Wia ahmw kadehde me pid pepehm en nsenamwahu me Sises Krais ketkihong komwi. Mwein noumwail seri kan kak mahleniada ehu mahs me wia sengiseng oh irail ahpw kin irisala pile mas Kan ni amwail pahn wadekAiseia 25:8 pene.
Kupwuromwi En Pweida, sang Ken Spencer
Aiseia 25:4–6
Sises karukihehsang “melimel.”
-
Miehier pak Kumwail oh noumwail seri kan kehn kapaipen ihmw teng ehu nan ansoun melimel de ruksang ketipin karakar pahn mwete? De mie pak ke Kang mwonge ieu ehu ansou me ke men mwonge? Kosoiapene irair pwukat ni amwail pahn wadek Aiseia 25:4–6. Dahme Sises kupwur perenkihki mepwukat?
Aisehia 29:11–18, 24
Kopwurupwurdohn ronhgamwahuo wia “mwekid kopwuriamwei” ehu.
-
Ni amwail pahn wadek Aiseia 29:14, ehukihong irail ekei lepin Lokaia me wehweh duehte “kaselel” oh “kopwuriamwei.” Mweidohng irail en sewei komwi rapahkida dipwsou de kilel kan me kak kawehwehda mwekid kopwuriamwei me Kauno ketin wia rahn pwukat. Me iei Pwuken Mormon, kilel en tehnpas Sarawi, oh kilel en First Vision (kilelo mih ni tepin wasahn kaskuhl wet). Mwurin seri kan kak pilada ehu mehkot oh ndahda dahme e kopwuriamwei ki ohng iraill.
-
Ehu koul me pid Kopwurpwurdohu pahn pil mwahuong sewese Aiseia 29, me duehte “On a Golden Springtime” (Pwuken Koul Ohng Seri Kan, 88). Oh mwein ehu karasaras en Dahme ke lelohngehr pil kak sewese Seri Kan en wehwehki dahkot kopwurpwurdo. Karasepe, komwi oh seri kan kak kosoiapene mehkot me kumwail sehsehla oh iamwomwen amwail pilehu diarada. Sewesehki seri kan en karasa mepwukat ohng Kopwurupwurdohn rongamwahu. Sang kaweid en Aiseia 29:13–15, dahme kitail anahnehki Kopwurupwurdohu? Soangen mwekid kopwuriamwei da me Kauno patohwan wiewia pwehn kapwrehdo Sapwellime ronhgamwahuo? (tehk pali en ire tohrohr en wihk wet).
Kalaudpe, kilang makesihn en sounpwonget Friend.