“Septempe 7–13. ‘E Pahn Ketin Kasalehiong Uhk Ahl Me Pwung’: Lepin Padahk Audapan Kan 1–4; 15–16; 22; 31; Eklesiasdes 1–3; 11–12,” Kohdo Idawehn Ie—Ohng Tehnpesomwi oh Imwen Sarawi Kan: Kadehdeh Mering 2026 (2026)
“Septempe 7–13. ‘E Pahn Ketin Kasalehiong Uhk Ahl Me Pwung,’” Kohdo, Idawehn Ie 2026
Sises Krais Rehn Seri Kan, sang Dilleen Marsh
Septempe 7–13: “E Pahn Ketin kasalehiong Uhk Ahl Me Pwung”
Lepin Padahk Audapan Kan 1–4; 15–16; 22; 31; Eklesiasdes 1–3; 11–12
Komw pahn kak medewe me pwuken Lepin Padahk Audapan Kan audaudeki peneu sang pahpa oh nohno limpoak kei (tehk Lepin Padahk Audapan kan 1:8). Me wehwehki ma ke pahn rapahki eripit—ahpw mehlel eripit en Koht—mour pahn mengei. Ahpw pwuken Eklesiasdes Kohdo mwurin Lepin Padahk Audapan Kan, me kosoia, “E sohte mengei.” Sounpadahk me sansal nan Eklesiasdes diarada me e “kosoanedhi nan kapehde me e pahn sukuhkli erpit” ahpw pil diarada “me likamwete e pwakpwakih kisinineg” oh “pwunod laudla” (Eklesiasden 1:17–18). Nin soangen mwohmw kei, pwuhk wet kalelapak ma, “E pahn kak mie katepen mour ieu me mehkoaroas mwomwen sohte katepe, sohte pahn poatoapoat, oh sohte koapwoaroapwoar?”
Ahpw mendahte wekpeseng en pwuhk pwukat, ira koaros padahngki me mehlelo. Eklesiasdes kosoia: “Mwurin mepwukat koaros mehteieu me I pahn nda: lemwiki Koht, oh kapwaiada Sapwellime mahsen : pwehki ih kahrepe wet me aramas kepikipikihda” (Eklesiasdes 12:13). Iei soahngohte me sansal nan pwuken Lepin Padahk Audapan Kan: “Likih Kauno ni mohngiongomw unsek” (Lepin Padahk Audapan Kan 3:5; pil tehk ire tikitik 7). Mour kalapw mwahu—ma e sohte kalapw unsek—ansou me kitail pahn likih oh idawehn Kauno Sises Krais.
Ohng petehkpen pwuhk pwukat, kilang “, pwuhk en, Lepin Padahk Audapan Akan” oh “Eklesiasdes” nan diksineri en Pwuhk Sarawi.
Mehn Kaskuhl Ohng Tehnpesomwi oh Imwen Sarawi Kan
Lepin Padahk Audapan kan 1–4; 15–16; Eklesiasdes 1–3; 11–12
“Rong kanaiehng ngilen me kupwurokong kan.”
Pwuken Lepin Padahk Audapan Kan oh Eklesiasdes audaudeki mahsen en kupwurokong. Kilelehdi lepin lokaia “kupwurokong” oh pil, “eripit” oh “wehwe,” ni omw Pahn kin wadekada nan Lepin Padahk Audapan Kan 1–4; 15–16; Eklesiasdes 1–3; 11–12. Iamwomwen ire pwukat eh kalaudehla ahmw wehwe? Sang dahme ke diarada, ia mwomwen ahmw pahn kawehwehda marain me “Kauno ketkihonguhk”? (Lepin Padahk Audapan Kan 2:6). Iahnge kapai kan me kohsang ni Sapwellimen Koht marain?
Pil tehk Madiu 7:24–27; 25:1–13.
Seweseie tohn sukuhl en en ehukihda dahme re esehla. “Mweidohng tohn sukuhl kan en ehukihpene dahme re esehla duwen Sounkomouro oh Sapwellime rongamwahu. Soahng wet pahn seweseirail en kak sohngada dahme re esehla oh kasalehda. E pil kak seweseirail en kak eimahki dahme re esehla wasahkan me re pahn mihmiseli ie” (Padahk nin duwen me Sounkomouro wia, 26). Karasepe, ke kak lukehiong tohn sukuhl kan en ntingiedi iren kaweid sang Lepin Padahk Audapan Kan lel Eklesiasdes me kasalehda ire kan me kosoia duwen marain en Koht. Lukehiong tohn sukuhl kan en kosoiahda dahme re esehla.
Lepin Padahk Audapan Kan 1:7; 2:5; 3:7; 15:33; 16:6; 31:30; Eklesiades 12:13
“Dehr mweidohng pein kowe en medemedewe me ke loalokongsang me ke udahn ese: peikiong Kauno.”
Ehu lepin mahsen kesempwal kalapw dierek nan Lepin Padahk Audapan Kan lel Eklesiasdes iei “lemwiki Kauno.” Kilang wewehn ire wet ansou me ke wie wadawad. Ia omw pepehm ong me pid lemwiki Kauno? Pil kilang ekei iren kaweid nan en Elder David A. Bednar’s padahk “Therefore They Hushed Their Fears” (Liahona, May 2015, 46–49). Ia wekpeseng en lemwiki Kauno oh lemwiki teikan.
pil tehk Lepin Padahk Audapan Kan 8:13.
Lepin Padahk Audapan Kan 3:5–7; 4
“Likih Kauno ni mohngiongomw unsek.”
Ia mwomwen ahmw pahn song en kaweidki aramas emen me “likih Kauno” mwahusang “koapwoaroapwoarkihte [pein] atail wehwehki”? (Lepin Padahk Audapan Kan 3:5). Soangen mehn karasaras da de dipwsou en kaskuhl me komwi kak doadoahngki? Ni ahmw pahn koadoaropwe Lepin Padahk Audapan Akan 3:5–7, medewe ia mwomwen ahmw pahn kak kanekehla sendens pwukat: Likih Kauno duehte … Koapwoaroapwoarkihte pein ahmw ese duehte …
Dahme e sohte mwahu ki ken koapwoaroapwoarki mehkan me ke pein lemeleme me ke ese? Komwi eselahr me komw kak koapwoaroapwoarki Kauno?
Menda ma, ekei pak kitail kin apwalki koapwoaroapwoarki Kauno. Dahme kahrehda met? Elder Gerrit W. Gong kihda ekei kahrepe, pil iangahki ekei kaweid me kak sawas laud, nan “Trust Again” (Liahona, Nov. 2021, 97–99). Soangen soai de padahk da me ke diar nan padahk wet me kak sewese emen aramas me luet en kapwurehdo ah likih Kauno?
Koaros Lepin Padahk Audapan Akan 3:6 oh Lepin Padahk Audapan Akan 4 karasahiong mour ohng “ahl ehu” de “ahl.” Ia wehwehn Kauno “pahn Ketin Kasalehiong uhk ahl me pwung”? (Lepin Padahk Audapan Kan 3:6). Dahme komw diarada nan irelaud 4 me sewesei komwi en “koaosanehdi ni keninei dahme ke pahn wia”? (ire tikitik 26). Karasepe, dahme ire tikitik 11–12 oh 18–19 kaweidki me pid kapai kan ni omw pahn weiweidki ahl pwungo? Ia wehwehn ire pwaukat ire tikitik 26–27 ohng komwi?
Pil tehk 2 Nihpai 31:18–21; “Kaun, I Pahn Idawehn Komwi,” Melkahka, no. 220.
Lepin Padahk Audapan Kan 15; 16:24–32
“Sapengki ngihl tikitik kin kameleileidi lingernger.”
Ire kan me sansal nan Lepin Padahk Audapan Kan 15–16 kak seweseie komwi kamwahuiala mwomwen omw koasoakoasoai ohng mehteikan, ahpw mehlel kempoakepahmw kan. Karasepe, medewehda ansou iei me “sapengki ngihl tikitik” sawas pwehn “kameleileidi lingernger” (Lepin Padahk Audapan Kan 15:1).
Komwi pil kak medewehda ansou kan me Sounkomouro kasalehda mwomwen momourki mahsen pwukat nan Lepin Padahk Audapan Kan 15:1–4, 18 (tgehk Mark 12:13–17; Sohn 8:1–11). Ia mwomwen omw kak idawehn Sapwelime karasaras ni omw pahn kin patehng mehteikan?
Ia mwomwen kaweid en nan pwuken Lepin Padahk Audapan Akan 15; 16:24–32 ah kak doadoahk ohng mwehi wet me doadoahngki mehn kapehsehn nan rahnpwukat? Rapahkida ire kan sang nan irelaud pwukat me kak kawehwehda mwomwen atail pahn doadoahngki mehn kapesehn nan wehwehkan.
Pil kilang Neil L. Andersen, “Idihdawehn Sises: Wia soun Kameleilei men,” Liahona, Mei 2022, 17–20; Ronald A. Rasband, “Lepin Lokaia Kan Kesempwal,” Liahona, Mei 2024, 70–77; Ohng Kakehlepen Me Pwulopwul Kan: Mehn Kaweid Ohng Wiahda Pilipil Kan (2022), 11–12.
Isime Kak Siarada Lih Poadedi Men? II, sang Louise Parker
Lepin Padahk Audapan Kan 31:10–31
“Lih emen me kin lemwiki Kauno, udahn pahn ndandla.”
Lepin Padahk Audapan Kan 31:10–31 kawehwehda “lih mwakelekel men,” de lih emen me pali ngene kehlail, ahneki koahiek, oh manaman. Komw kak oaralapiada duwen omw wehwehki dahme ire pwukat koskosoia duwen lih poadedi men. Soangen koahiek da me komwi ahneki?
Eklesiasdes 1–3; 12
Mour pohn Sampah wet pahn imwsekla.
Dahme e kesempwalkihong uhk en tamataman me soahng tohto nan sampah, me rasohng kaweid en Eklesiasdes 1–2, me re wiahte mehn “kapwat” (de ohngete ansou kis oh pak tohto sohte katepe)? Dahme komwi patohwan diarada nan Eklesiasdes 12 me Kasalehiong komwi kesempwal pen mour soutuk?
Kalaudpe, Kilang makesihn en sounpwonget Liahona oh Ohng Kakehlepen Me Pwulopwul Kan.
Mehn Kaskuhl Ohng Seri kan
Lepin Padahk Audapan Kan 1:7; 2:5; 15:33; 16:6; Eklesiasdes 12:13
“Lemwiki Koht” wehwehkikitail en poakohng oh peikiong Ih.
-
Pwehn sewese seri kan wehwehki dahkot lemwiki Koht, komwi kak weliankihdi Lepin lokaia “lemwiki” ohng wahu, limpoak, de peik (pil tehk Ipru 12:28). Iamwomwen soahng pwukat ah wekidala atail medemedewe wewehn ire pwukat? Iamwomwen atail kak kasalehda me kitail lemwiki Kauno?
Lepin Padahk Audapan Kan 3:5–7
I kak Likih Kauno sang nan ahi mohngiong unsek.
-
Kumwail kak sohngada wiepeh kei Lepin Padahk Audapan Kan 3:5–7, me rasehng doadoahngki pemwail kan en wiahda mohngiong, alialu wasahtehkis, oh idih mesemwail kan. Iamwomwen atail kak Kasalehiong Sises Krais me kitail Likih sang nan atail mohngiong unsek?
-
Pwe ren kak wehwehkihla wehwehn “dehr koapwoaroapwoarki mehkan me ke pein lemeleme me ke ese” (Lepin Padahk Audapan Kan 3:5), lukehiong seri kan en idengekda ni mehkot me teng, me rasehng dihd kan. Re kak song idengen ni mehkot me sohte teng, me rasehng kepennok. De re kak kasihnenda Lepin tuhke de pinsel ni soahng teikan, me rasehng pwuhk de tehn daropwe. Dahme e kesempwaliki kitail en “likih Kauno” (verse 5) ah kaidehn “pein atail loalokong”?
Esehla Likih Kauno, sang Kathleen Peterson
Lepin Padahk Audapan Kan 15:1, 18
I kak doadoahngki lokaia mwahu.
-
Komwi oh omw tungoal Seri Kan kak medewehda ansou kan me kumwail kin kehn pepehm en lingeringer. Wadek pene Melkahka Kan 15:1 oh sewese seri kan endoadoahngki ire pwukat ohng soangen irair kan me re medewehda. Mwein re kak soahngada ekei “pasapeng mengei kan.” Koul ehu me pidada kadek, me duehte “Love Is Spoken Here” (Pwuken Koul en Seri kan, 190–91), kak sewese iren padahk wet.
-
Pwehn wehwehkihla mwahu wehwehn “sohte mwadang en lingerngerda” (Lepin Padahk Audapan Kan 15:18), komwi oh sapwelimomwi seri kan kak ehukipene ansou me kumwail (de aramas me kumwail ese) amwail lingerngerda ahpw pilada en ahniki mahk. Sewese seri kan en medewe soahng da me kitail kak mwadang wia ma kitail “sohte kin mwadang lingerngerda.” Karasepe, kitail kak mwadangete medewe Sises, de peki sawas rehn Sahm Nanleng, de medewehda ehu koul en seri kan, de, ma kak, en udahte kohkohlahsang.
Kalaudpe, kilang makesihn en sounpwonget Friend.