“Septempe 14–20. ‘Koht Me Wia Komourpei’: Isaiah 1–12,” Kohdo, Idawehn Ie—Ohng Tehnpesomwi oh Imwen Sarawi Kan: Kadehdeh Mering 2026 (2026)
“Septempe 14–20. ‘Koht Me Wia Komourpei,’” Kohdo, Idawehn Ie: Kadehdeh Mering 2026
The Soukohp Aiseia kohpada ipwidien Krais, sang Harry Anderson
Septempe 14–20: “Koht Me Wia Komourpei”
Aiseia 1–12
Mendahte ma ehdin ahmw wadek pwuken Aiseia, miehte mekot me ke pahn diarada me ke esehier. Pwehki, nan pwungen soukohp koaros me mih nan Kadehde Mering, padahk en Aiseia me keieu kalap doadoahk nan pwuhk sarawi teikan, iangahki pein sounkomouro pil iang padahngki. En Aiseia padahk kan pil kin sansal nan melkahka oh ekei koul en sarawi kan.
Dahme kahrehda padahk en Aiseia kalapw pwerda? Ni mehlel ehu kahrepe iei me Aiseia ahneki kisakis en kasalehda wehwehn mahsen en Koht kan me aramas kin kak Tamataman. Ahpw pil miehte ekei kahrepe. Soukohp en mwehi kei kin doadoahngki mahsen kan sang Aiseia pwehki mahsen kan me E kin padahngki laud sang koahiek en madamadau en aramas en ah mwehi o (nanpwungen 740 oh 701 Mwohn Krais). E intingiada duwen Sapwelimen Koht doadoahk sarawi en komourla, me inenen laud sang wehi ehu de ansou ieu. Nihpai esehsang Aiseia me mendahte ahr tohrohr sangehr Isrehl, re wiahte kisehn Sapwelimen Koht aramas en inouo. Nan Aiseia, soun nting Kan en Kadehde Kapw diarada kokohp kei me pid Mesahiahu me sansalehr mwohn meserail kan. Josep Smith pil esehsang Aiseia mwomwen doadoahk en imwin rahn Akan pwehn kapwurepene Souleng kan oh kawada Sahion. Ansou me ke pahn wadek Aiseia, dahme ke pahn diar?
Kalaudpen duwen Aiseia oh ah nting kan, kilang “Aiseia” nan diksineri en Pwuhk Sarawi. Kalaudpen duwen ansou me Aiseia momour, kilang 2 Nahnmwarki Kan 15–20 oh 2 Kronikel 26–32.
Mehn Kaskuhl Ohng Tehnpesomwi oh Wasahn Kaudok Kan
Aiseia 1–12
Sapwelimen Aiseia mahsen kan koaros udahn pahn pweida.
Sounkomouro mahsanih “soahng koaros me e kosoia pweidahr oh pahn pweida, iei nin duwen mahsen kan me E kosoiahier” (3 Nihpai 23:3). Ni ahmw pahn onopki pwuken Aiseia, song kairekehdi oh ntingiedi kaudiahl kan me oaralap kan pahn due met: mwein Aiseia, Sapwelimen Soundoaro kalohk pohn sampah wet, oh Imwin rahn akan. Tamataman me en Aiseia kokohp kan kin pweida nin soangen ahl tohto (tehk Diksineri en Pwuhk Sarawi, “Aiseia”).
Presiden Dallin H. Oaks padahngki me: “Kokohp kan en nan pwuken Aiseia kin pweida nin soangen mwohmw kei. Ehu mwomwen pid irail akan nan mwein Aiseia de momour en dien mwuhr kan. Pilehu wehweh, me kalapw rasehng met, mwomwen pil pid dahme wiawiher kan mahso, ansou me Serusalem olahr oh aramas akan salongpesengehr mwurin pwoulahn Ieroso. Ahpw pilehu wehweh de pweidahn kokohp wet mwomwen pil dokdoke dahme pahn wiawi ni Ketdo Keriau en Soundoaro. Pwehki wehwehn kokohp pwukat ah tohto kahrehda kitail anahne rapahki kaweid en Ngehn Sarawi pwehn sewese kitail wehwehki” (“Wadwadek Pwuhk Sarawi oh Kaudiahl,” Ensign, Sen. 1995, 8).
Wehwehki pwuken Aiseia Sounkomouro mahsanih, “loaloapwoationg rapahki mepwukat; pwe mahsen kan en Aiseia me kesempwal mehlel” (3 Nihpai 23:1; pil tehk ire tikitik 2–3). Ahpw pil ni ansouohte, me tohto kin apwal en wehwehki audepen pwuken Aiseia. Iren Madamadau pwukat pil kak sawas:
-
Medemedewe kasansal oh mehn karasaras kan me Aiseia doadoahngki.
-
Pein idek rehmw, “Dahme I esiesehla me pid Sises Krais?” (tehk 1 Nihpai 19:23).
-
Tehk mwahu oaralap kan me doke kitail ansou wet.
-
Doadoahngki mehn sawas en onop kan, me duehte diksineri, iren kaweid en ire tikitik kan, kawehwehpen oaralap kan, oh Mehn kaweid ohng Pwuhk Sarawi Kan.
Aiseia 1; 3–5
Soukohp kak padahngki duwen keper pen wie dihpw oh koapwoaroapwoar pwehki kohluhla.
Duwehte soukohp teikan, Aiseia doulahte kaparki aramas akan luwetin pali ngenirail kan. Ni ahmw pahn wadek Aiseia 1; 3; 5, rapahki ire kan me kawehwehda mwomwen mour en pali ngenin aramas akan (kilang, karasepe, Aiseia 1:2–4, 21–23; 3:9, 16–17; 5:11–12, 20–23). Iahnge kahpwal kan me duwehte atail apwal en ansou wet? Ke pil kak rapahki ire tikitik kan me kaparki duwen kalokepen mour en pali ngenin mehn Isrehl kan’ (me duehte Aiseia 1:7; 3:17–26; 5:5–7, 13–15).
Kalaudpen kaweid wet, Aiseia padahngki duwen koapwoaroapwoarki tomw en Soundoaro (kilang, karasepe, Aiseia 1:16–19, 25–27; 3:10; 4). Dahme ke esehla duwen Kauno sang nan ire pwukat? Dahme sansal sang ire pwukat me mahsen en Kauno wekikihsang dahme Sehdan mwahuki kitail en kamehlel?
Pil duwehte Aiseia, soukohp en rahn pwukat kaparkin kitail duwen dihp oh kahpwalpeh kan, oh ehukihiong kitail padahk kan men pahn Kapwurehdo koapwoaroapwoar sang Sises Krais. Soangen karasaras dah me ke kak medewehda? Komwi pil kak pilehu wadek padahk kan sang Nan kapokonlap me wiawihier kan, oh rapahki kehkehlik oh inoun pwukat.
Aiseia 2; 4; 11–12
Koht pahn wia doadoahk kesempwal ehu ni imwin rahn akan.
Mie wehwehn palilaud en en Aiseia kokohp ohng momour en ansou wet? Pwe ken kak diar, rapahki Lepin lokaia me kasalehda me e pahn wiawi(me rasehng “e pahn wiawi” de “e pahn kohla”) Karasepe, rapahki lepin lokaia pwukat ni omw Pahn wadwadek Aiseia 2; 4; 11–12. Komwi pil kak wekidehng mehkot me wihwiawi ansou pwukat (me rasehng wihwiawi de wihwiawihier). Mehnia kokohp me keiu kesempwal ohng komwi? Dahme komw esehla sang ni kokohp pukat me pid Sahion, kokoudahn tehnpas Sarawi Kan, oh kopwurupwurpenehn mehn Isrehl kan?
Aiseia 2:2–3 doke mehlel Souleng en Imwin Rahn Akan. Iahnge pweidahn kokohp kan me wiawihier? Dahme komw esehla duwen Sapwelimen Kauno “wiepeh kan” oh “ahl akan” en Sapwelime wehi? (ire tikitik 3).
Pil tehk Aiseia 5:26; “High on the Mountain Top,” Melkahka, nempe. 5.
Aiseia 6
Soukohp kan pilkipilda sang rehn Koht
Nan Aiseia 6, Aiseia kosoiahiong irail duwen pahngoak ohng ih en wiahla soukohp men. Ni ahmw pahn wadek oaralap wet, dahme kopwuriamwei ohng uhk me pid mour en Aiseia? Ia mwomwen oaralap wet ah wekidala mwomwen ahmw kin medewe Kauno, Sapwelime soukohp kan, oh doadoahk me irail kin wia?
“Kisin seri kis ipwidiongkitailehr, neitail pwutak emen kihieng kitailehr” (aiseia 9:6).
Aiseia 7–9
Koht inoukihda me e pahn ketkihdo Sises Krais en wia ahi Sounkomou.
Erein ansou me Aiseia wie padpadahk seli, Isrehl ehuong Syria pwehn doare pein irail sang mehn Assyria kan. Isrehl oh Syria nanatiheng pwe Ahaz, me wia nahnmwarki en Suhda, en iangrail la. Ahpw Aiseia kohpada me ehupene wet sohte pahn pweida oh kaweidki Ahaz en likih Kauno (Aiseia 7:7–9; 8:12–13).
Ansou me Aiseia kaukaweid Ahaz, e kasalehda kokohp kei me-dehde, me duehte dahme ntingdier nan Aiseia 7:14; 8:13–14; 9:2, 6–7. Mendahte kesempwalpen kokohp pwukat ohng Ahaz, irail pil ni sansal dokdoke Sises Krais (pil kilang Madiu 1:21–23; 4:16; 21:44; Luke 1:31–33). Dahme kahrehda “Imanuel” wia mwahr kesempwal ehu ohng Sounkomouro? (tehk Madiu 1:23). Ia mwomwen ah wia “Soun Kaweid” de “Kaun en Meleilei” ohng uhk? (Aiseia 9:7). Ia ekei mehkot me ke esehla sang nan ire pwukat duwen Sounkomouro?
Kalaudpe kilang makesihn kan en sounpwonget Liahona oh Ohng Kakehlepen Me Pwulopwul Kan.
Mehn Kasukuhl Ohng Seri Kan
Aiseia 1:2–4, 16–19
Pwehki Sises Krais, I kak koluhla oh mwakelekelda.
-
Nan Aiseia 1:2–4, Kumwail oh noumwail seri kan kak diar kahrepen Kauno ah ahneki engieng pahn mehn Isrehl kan. Kilang karasaras en mahn akan nan ire tikitik 3—ihs me atail “kaun”? Iamwomwen atail kak kasalehda me kitail ese ihs Ih?
-
Pwehn kilelehdi nan amwail madamadau kan Aiseia 1:16–18, kumwail oh noumwail seri kan kak kilang mehkot me weitahta marain oh me pwetepwet tohr. De kumwail kak sawas pene oh kamwakelehda mehkot. Dahme kin kasaminehla pali ngenitail? Iamwomwen Sise ah kak kamwakelei kitailda? Dahme kitail esehsang nan ire pwukat duwen Sounkomouro? Ehukihong noumwail seri kan amwail pepehm duwen Ih oh dahme E wiahiong kumwailehr.
Aiseia 2:2–4
Nan tehnpas sarawi, I kak esehla duwen Sises Krais
-
Aiseia kilangadahr ansou ehu me “Dohl en Tehnpesen Kauno” pahn wahdo aramas tohto sang “sahpw koaros” (Aiseia 2:2). Iamwomwen omw kak sewese Serih kan en men kohla ni tehnpesen Kauno? Ke kak lukehiong irail en mahleniada Killeen imwsarawi koa. Kumwail eri wadekpene Aiseia 2:2, oh lukehiong irail en mahleniada ehu kilel en “tehnpesen Kauno,” me iei tehnpas sarawi. Wadek pene Aiseia 2:3. Ndahng irail en mahleniada aramas tohto me kohkohdo ni tenpas sarawio, pil iangahki arail peneinei kan.
-
Kumwail pil kak wadek peneAiseia 2:2–3 oh kilangada ehu mehkot me kin kaweid kumwail oh noumwail seri kan en kohla ni tehnpas sarawi. . Eri, mwurin amwail wadek pene Aiseia 2:4, kumwail kak kosoia ia mwomwen tehnpas sarawi ah wadohng irail meleilei. Kumwail koukipene koul me pid tehnpas sarawi, me duehte “I Love to See the Temple” (Pwuken Koul en Seri Kan, 95). Sewese seri kan en rapahkida lepin mahsen kan me kawehwehda dahkot tehnpas Sarawi oh dahme kitail kin wia wasahu.
Tehnpas Sarawi en Salt Lake
Aiseia 7:14; 9:6–7
Sises Krais Ketdo pohn Sampah pwehn wia ahi Sounkomour.
-
Pwehn karasahiong kokoh en Aiseia kan ohng Krais, kumwail oh noumwail seri kan kak kosoia duen pwukoah kan en aramas akan, duehte presiden, pisop, oh sounpadahk. Dahme pwukoah pwukat ndahiong kitail me pid aramas pwukat? Sewesehki seri kan en rapahkida ekei mwaren Sises Krais nan Aiseia 7:14 oh 9:6–7 (pil tehk pali en ire tohrohr kan en wihk wet). Dahme oaralap pwukat padahkihiong komwi duwen Ih? Ia pil ekei mehkot me ire pwukat padahkihiong kumwail duwen Sises Krais?
-
Komwi pil kak ehukihiong seri kan “Soukohp Aiseia” (nan Soai kan en Kadehde Mering, 150–51). Kin uhdi ekei pak oh idek dahme Aiseia ese duwen Sises Krais mwohn ah ipwidi. Ke kak uhd doadoahngki Madiu 1:21–23; Luhk 1:31–33 pwehn kosoia mwomwen kokohp kan en Aiseia nan Aiseia 7:14; 9:6–7 ah pweidahr.
1:18Isaiah the Prophet
Kalaudpe, kilang makesihn en sounpwonget Friend.