Исаиа 13–14; 22; 24–30; 35

Исаиагийн үед Вавилон хүчирхэг захирагчтай хүчирхэг хаанчлал байжээ. Эдүгээ Вавилон бол эртний түүх юм. Тэгвэл Исаиа 13–14-т байдаг Вавилонд өгсөн Исаиагийн мэдээ өнөөдөр бидэнд яагаад чухал вэ? Учир нь Вавилон өнөөдөр ч гэсэн биднийг хүрээлж буй зүйлүүд болох бардам зан, шунахай зан, нүглийг бэлгэддэг. Исаиа 13:1–11, 19–22; 14:1–20-ийг уншаад, энэ бэлгэдлийн талаар бодож үзээрэй. Та дараахтай адил асуултуудыг бодож үзэж болно. Үүнд:

• Та Вавилоны хаан, Сатан хоёрын бардамналын хооронд ямар адил төстэй зүйл байгааг харж байна вэ? (Исаиа 14:4–20; Мосе 4:1–4-ийг үзнэ үү). Та эдгээр шүлгээс өөрт тань хандсан ямар ямар сэрэмжлүүлгийг олж харсан бэ?

• Аврагч хэрхэн “туйлдал зүдрэл, үймээн түйвээн[ээс] … чөлөөлөн амраа[даг]” вэ? (Исаиа 14:3).

Исаиагийн сургаалууд Аврагчийн үйл хэрэг, цагаатгагч золиос, Амилалт, Хоёр дахь ирэлтийн талаар өгүүлдэг. Исаиа 22:22–23; 24:21–23; 25:6–8; 26:19; 28:16 шүлгүүдийг уншихад Түүний үйл хэргийн ямар ямар хэсэг бодогддог вэ? Та Аврагчийг сануулсан өөр ямар судрын хэсгийг олсон бэ?

Их Эзэн нигүүлслээрээ гэрээт хүмүүст Өөрөөс нь холдож байгааг анхааруулахаар Исаиаг илгээсэн. Исаиа 24:5; 29:13; 30:8–12-т байдаг сүнслэг аюулын шинж тэмдгийг олж чадах эсэхээ үзнэ үү. Яагаад эдгээр зан байдал, үйлдэл сүнслэг байдлын хувьд аюултай вэ?

Их Эзэнээс нүүр буруулсны үр дагаврын талаар сэрэмжлүүлэхийн тулд Исаиа зарим мартагдашгүй харьцуулалтыг ашигласан. Тэдгээрийг судалж байхдаа Их Эзэнээс нүүр буруулах нь ямар байдгийг өөрөөсөө асуу:

• Гунигтай, хоосон газар (Исаиа 24:1–12).

• Сархдад согтож, хөлчүүрэх, самуурах (Исаиа 28:7–8).

• Өлсөж, цангах (Исаиа 29:7–10).

• Хугарсан хана эсвэл сав (Исаиа 30:13–14).

Их Эзэнтэй ойр байх нь таны хувьд яагаад чухал вэ?

Дахиж хэзээ ч олдохгүй гэж бодож байсан зүйлээ алдаж байсан уу? Эсвэл ямар нэг юм эвдэрч, хэзээ ч засаж чадахгүй байх вий гэж санаа зовж байлаа. Биднийг Их Эзэнээс нүүр буруулахад Сатан биднийг хэзээ ч эргэж ирэхгүй эсвэл эдгэрч чадахгүй хэмээн бодоосой гэж хүсдэг. Гэсэн ч хүмүүсийг наманчилж, Их Эзэнд хандах үед Түүний хийх зарим гайхамшигт зүйлийг Исаиа дүрсэлсэн байдаг. Та Исаиа 29:13–24; 30:18–26;35-аас Их Эзэн, Түүний хайр, хүч чадлын талаар юу сурч мэдсэн бэ? Та эдгээр судрын хэсгээс эдгэрэл хэрэгтэй үедээ найдвар төрүүлэх нэг хэллэгийг олж болох юм. Та мөн Эйми А.Врайт эгчийн “Христ гэмтсэнийг эдгээдэг” (Лиахона, 2022 оны 5-р сар, 81–84) хэмээх захиасыг харж болно.

Их Эзэн Өөрийн энэрэл, хүч чадлыг энэ цаг үед харуулсан нэг арга зам бол Түүний сайн мэдээ сэргээгдсэн явдал юм. Исаиа 29-д энэхүү Сэргээлтийн явцад өрнөсөн үйл явдлуудтай ижил төстэй үйл явдлын талаар өгүүлсэн хэд хэдэн судрын хэсэг бий. Жишээлбэл:

• Исаиа 29:11–12-ыг 2 Нифай 27:6–26, Иосеф Смит—Түүх 1:63–65-тай харьцуул.

• Исаиа 29:13–14-ийг Сургаал ба Гэрээнүүд 4, Иосеф Смит—Түүх 1:17–19-тэй харьцуул.

• Исаиа 29:18–24-ийг Мормоны Номын удиртгал хэсэг-тэй харьцуул.

Та нарын бодлоор, Их Эзэн Өөрийн сайн мэдээг сэргээж буйг дүрсэлсэн “гайхамшигтай”, “гайхалтай” (Исаиа 29:14) гэсэн үгс яагаад сайн үгс байдаг вэ? Та Сэргээлтийн талаарх бошиглолуудыг биелүүлэхэд хэрхэн тусалж чадах вэ? Санаануудыг авахын тулд ахлагч Гэррит В.Гонгийн “Бүх үндэстэн, ястан, хэлтэн” (2020 оны 10-р сарын Ерөнхий чуулган, 40–45) захиасыг үзнэ үү.

Түүнчлэн Gospel Library-аас “Есүс Христийн сайн мэдээний бүрэн байдлын Сэргээлт: Дэлхий дахинаа өргөх хоёр зуун жилийн ойн тунхаг”-ийг үзнэ үү.

• Та нар хүүхдүүддээ Исаиагийн бичээсээс Аврагчийг харахад нь хэрхэн туслах вэ? Та тэдэнд Исаиа 14:3; 25:8 эсвэл 28:16-аас Түүнийг сануулах хэллэгүүдийг олоход нь тусалж болно. Тэд мөн Исаиагийн эдгээр шүлгийг Аврагчийн тухай, Maтай 11:28–30-ийг заасан бусад шүлэгтэй тохируулж болно. 1 Коринт 15:53–57; Хиламан 5:12. Манай гэр бүлийн төлөө Их Эзэн ямар ямар агуу зүйл үйлдсэн бэ?

• Та Исаиа 25:8–9-ийг хамтдаа уншсаныхаа дараа Аврагчийн Гетсемани дахь, загалмай дээрх мөн Амилалтынх дараах Аврагчийн зургийг харж болно. Зураг дээр болж байгаа үйл явдлын талаар болон тэд яагаад Есүсийг хайрлаж, “Түүний авралд баясдаг” (9-р шүлэг) тухай хүүхдүүдээрээ яриул.

• Таны хайртай хүн нас барахад мэдэрсэн гуниг харууслынхаа талаар хүүхдүүддээ ярьж өгч болох юм. Есүс Христийн ачаар хүлээн авдаг тайтгарлын талаар гэрчил. Магадгүй, та нар Исаиа 25:8-ыг хамтдаа уншиж байхдаа уйлж буй царайг хараад, нулимсыг нь арчиж болох юм.

• Зуны халуун өдөр сүүдэрлэх, шуургатай үед хамгаалах аюулгүй хоргодох байранд байх адислалыг та болон танай хүүхдүүд хэзээ нэгэн цагт мэдэрч байсан уу? Эсвэл өлссөн үедээ сайхан хоол идсэн үү? Исаиа 25:4–6-г уншихдаа эдгээр туршлагынхаа талаар ярилц. Есүс Христ эдгээр зүйлтэй юугаараа адилхан бэ?

• Та хүүхдүүдтэйгээ Исаиа 29:14-ийг уншиж байхдаа тэдэнтэй “гайхамшигтай”, “гайхалтай” гэсэнтэй ижил утгатай үгсийг хуваалц. Хожмын өдрүүд дэх Их Эзэний зарим гайхамшигт ажлыг төлөөлөх эд зүйлс эсвэл зургуудыг олохдоо тэднээр туслуул. Эдгээрт Мормоны Ном, ариун сүмийн зураг эсвэл Анхны үзэгдлийн зураг ч байж болно (энэ тоймын эхэнд байгаа). Хүүхдүүдийг нэг зүйлийг сонгоод, яагаад энэ нь тэдэнд ер бусын гайхалтай болохыг хуваалцахад урь.

• “Хаврын нэгэн өдөр” (Хүүхдийн дууны ном, д.57) зэрэг сайн мэдээний Сэргээлтийн тухай дуу Исаиа 29-тэй утга агуулгаараа таарах сайн дуу байж болно. Хүүхдүүдэд сэргээлт гэдэг үгийн утгыг ойлгоход нь туслахын тулд туршлагаа товч хуваалц. Жишээлбэл: Та болон танай хүүхдүүд алдсан зүйлийнхээ тухай, хэрхэн олсон тухайгаа ярилцаж болно. Үүнийг сайн мэдээний Сэргээлттэй харьцуулахад хүүхдүүдэд тусал. Исаиа 29:13–15-д цэдэглэснээр, яагаад бидэнд Сэргээлт хэрэгтэй вэ? Их Эзэн Өөрийн сайн мэдээг сэргээхийн тулд ямар ямар гайхамшигт ажлыг хийж байна вэ? (Энэ долоо хоногийн үйл ажиллагааны хуудсыг үзнэ үү).