Aiseia 13–14; 22; 24–30; 35

Ilo raan ko an Aiseia, Babiļon ekar juon laļ ekajoor ippān juon rikien ekajoor. Kiiō Babilon ej juon bwebwenato in etto. Innām etke ennaan eo an Aiseia n̄an Babilon ilo Aiseia 13–14, eaorōk n̄an kōj rainin? Kōnke Babilon ej kōkaļļeen utiej bōro, aņokņak, im jerawiwi, men kein me rej jepool kōj. Ļōmņak kōn kōkaļļe in ilo am̧ riiti Aiseia 13:1–11, 19–22; 14:1–20. Kwomaron̄ ļōmņaki kajjitōk ko āinwōt kein:

• Ta ko me rej āinwōt juon kwoj loe ikōtaan utiej bōro an kiin̄ ro ilo Babilon im utiej bōro an Setan? (lale Aiseia 14:4–20; Moses 4:1–4). Ta kōkkaļļe ko kwoj loe ippam make ilo eoon kein?

• Ewi wāween an Rilo̧mo̧o̧r eo letok “kakkije jān am̧ būrom̧ōj, im jān am̧ jorrāān”? (Aiseia 14:3).

Katak ko an Aiseia ekkā aer iookļo̧k mijen eo an Rilo̧mo̧o̧r, ekoba en̄taan in pinmuur eo An, Jerkakpeje im Itok eo Kein Karuo. Ta m̧ōttan ko ilo mjen eo An me rej itok n̄an kōļmenļo̧kjen eo am̧ ilo am̧ riiti eoon kein Aiseia 22:22–23; 24:21–23; 25:6–8; 26:19; 28:16? Ta eoon ko jet kwoj loi me rej kakeememej eok kōn Rilo̧mo̧o̧r?

Ilo An tūriam̧o, Irooj eaar jilkintok Aiseia n̄an kakkōl armej in bujen ro bwe raar jebwābwe jān E. Lale n̄e kwomaron̄ lo kakkōl in jetōb ko an men in ilo Aiseia 24:5; 29:13; 30:8–12. Etke m̧wil kein im m̧akutkut kein rekauwōtata ilo jetōb?

Kakkōl kōn jekjek ko n̄an oktakļo̧k jān Iroj, Aiseia eaar kōjerbal n̄an keidi jet ememļo̧kjeņ ko. Ilo am̧ ekkatak kaki, kajjitōk ippam̧ elmen en̄jake eo n̄e jej oktaļo̧k jān Irooj:

• Juon laļ ekabūrom̧ōjm̧ōj, im ejjeļo̧k kobban (Aiseia 24:1–12).

• Ekadōkdōk (Aiseia 28:7–8).

• Kwole im maro (Aiseia 29:7–10).

• Juon oror erup ak jāpe (Aiseia 30:13–14).

Etke eaorōk ippam̧ n̄an pād wōt im epaake Irooj?

Em̧ōj ke an jako juon men kwoj ļōmņak koban bar loe? Ak bōlen juon men erup, im kwoj inepata ke emaron̄ jab bar em̧m̧an? N̄e jej oktakļo̧k jān Irooj, Setan ekōņaan bwe jen ļōmņak jejamin bar ro̧o̧l ak bar mour. Ijoke, Aiseia ekar kōmeļeļeik jet iaan men ko rekabwilōn̄lōn̄ me Irooj enaaj kōm̧m̧an bwe armej ren ukweļo̧k im oktak n̄an E. Ta eo kwoj ekkatak jān Aiseia 29:13–24; 30:18–26; 35 kōn Irooj, iakwe eo An, im An kajoor? Bōlen kwomaron̄ lo juon naan ilo eoon kein me ej lewaj kōjatdikdik n̄e kwoj aikuj kōmour. Kwomaron̄ bar lale enaan eo an Sister Amy A. Wright “Kraist Ej Kōmour Bōro ko Rerub” (Liaona, Māe 2022, 81–84).

Juon wāween Irooj ej kwaļo̧k An kajoor im tūriam̧o ej ilo Jepļaaktok eo an gospel eo An. Aiseia 29 ewōr ie jejjo̧ eoon ko me rej juon wōt n̄an m̧akūtkūt ko an Jepļaaktok eo. N̄an waanjon̄ok:

• Keidi Aiseia 29:11–12 ippān 2 Nipai 27:6–26 im Josep Smith—Bwebwenato 1:63–65.

• Keidi Aiseia 29:13–14 ippān Katak im Bujen Ko 4 im Josep Smith—Bwebwenato 1:17–19.

• Keidi Aiseia 29:18–24 ippān taitōļ peij eo an Bok in Mormon.

Ilo ļōmņak eo am̧, etke “jerbal eo em̧m̧an” im “kabwilōn̄lōn̄” (Aiseia 29:14) rej naan em̧m̧an n̄an kōmeļeļeik an Irooj kōjepļaaktok gospel eo An? Ewi wāween am̧ maron̄ jipan̄ kakūrm̧ool kanaan in kōn Jepļaaktok eo? N̄an ļōmņak ko, lale enaan eo an Elder Gerrit W. Gong “All Nations, Kindreds, and Tongues” (Liahona, Nov. 2020, 38–41).

Bar lale “Jepļaaktok eo an Tarlep in Gospel eo an Jisōs Kraist: Juon Naan in Kean̄ n̄an Laļ in Kōn Rūbukwi Iiō in Jepļaaktok eo” (Gospel Library); “The Morning Breaks,” Hymns, no 1.

• Elmen am̧ naaj jipan̄ ajri ro nejūm lo Rilo̧mo̧o̧r ilo jeje ko an Aiseia? Kwomaron̄ jipan̄ er pukot naan ko me rej kakeememej er kōn E ilo Aiseia 14:3; 25:8; ak 28:16. Remaron̄ bar kajejjet eoon kein ilo Aiseia ippān eoon ko jet me rej kwaļo̧k kōn Rilo̧mo̧o̧r, āinwōt Matu 11:28–30; 1 Korint 15:53–57; Hilamōn 5:12. Ta men ko rem̧m̧an Irooj eaar kōm̧m̧ani n̄an kōj?

• Ālkin riiti Aiseia 25:8–9 ippān doon, kom̧ maron̄ kalimjōk pijain Rilo̧mo̧o̧r ilo Getsemane, ioon dābwāāl eo, im ālkin Jerkakpeje eo An. Kōtļo̧k bwe ajri ro nejūm̧ ren kōnono kōn ta eo ej waļo̧k ilo pija ko im etke rej iakwe Jisōs im “lan̄lōn̄ ilo lo̧mo̧o̧r eo An” (eoon 9).

• Kwomaron̄ kōnaan kālet n̄an jiron̄ ajri ro nejūm kōn būrom̧ōj eo kwoj en̄jake n̄e juon armej kwoj iakwe em̧ōj an jako. Kam̧ool kōn aenōm̧m̧an eo kwoj en̄jake kōnke kōn Jisōs Kraist. Bōlen ajri ro nejūm̧ remaron̄ jin̄aik juon mejen jan̄ innām jeorļo̧k kemjaļaaļ ko ilo am̧ riiti Aiseia 25:8 ippān doon.

• Em̧ōj ke am̧ ak ajri ro nejūm̧ en̄jake juon kōjeraam̧m̧an in kōjparok in jikin kōppād ilo juon iien ļan̄ ak ilo juon raan ebwil? Ak em̧ōj ke ami m̧ōņōņō ilo juon m̧ōn̄ā ke kom̧ kar kwole? Kōnono kōn en̄jake kein ilo am̧ riiti Aiseia 25:4–6. Elmen an Jisōs āinwōt men kein?

• Ilo am̧ im ajri ro riit Aiseia 29:14, kwaļo̧k n̄an er jet naan ko me rej juon wōt meļeļeir ippān “jerbal in menin bwilōn̄.” Kōtļo̧k bwe ren kappukot kein katak ko ak pija ko me rej pinej jenkwan jet iaan jerbal ko rekabwilōn̄lōn̄ an Irooj ilo raan kein āliktata. Men kein emaron̄ koba juon kape in Bok in Mormon, juon pija in tampeļ, ak juon pija in Visōn eo M̧oktata (ewōr juon ilo jinoin unin tōl in). Innām ajri ro nejūm̧ remaron̄ kāālet juon aitōm im kwaļo̧k etke ekabwilōn̄lōn̄ n̄an er.

• Juon al kōn Jepļaaktok eo an gospel eo emaron̄ em̧m̧an an ekkeijelļo̧k ippān Aiseia 29, āinwōt “On a Golden Springtime” (Children’s Songbook, 88). Im bōlen juon en̄jake an juon make emaron̄ jipan̄ ajri ro meļeļe ta meļeļein jepļaaktok eo. N̄an waanjon̄ak, kwe im ajri ro nejūm̧ maron̄ kōnono kōn juon men me ekar jako im elmen ami kar loe. Jipan̄ ajri ro nejūm̧ keidi menin n̄an Jepļaaktok eo an gospel in. Ekkar n̄an Aiseia 29:13–15, etke jej aikuji Jepļaaktok eo? Ta jerbal eo ekabwilōn̄lōn̄ Irooj ej kōm̧m̧ane n̄an kōjepļaaktok gospel eo An? (lale peij in m̧akūtkūt eo an wiik in).