Rikanaan Ro im Kannaan Ko

Rikanaan ro im kanaan ko rej kōm̧m̧an juon eddo eļap ilo aolepān Kallim̧ur M̧okta. Ebream, Aisak, im Jekab rekar lo visōn ko im rekar kōnono kōn ribōktok ennaan ro jān lan̄. Moses ekar kōnono n̄an Anij ilo aerro lukkuun jelm̧ae doon im eaar ekkōnono kōn Ankilaan n̄an ajri ro nejin Israel. Bok eo kein kajuon im karuo in Kiin̄ Ro ej kwaļo̧k jerbal ko im enaan ko an rikanaan ro Elijah im Elisha. Kallim̧ur M̧okta ej bar kōnono kōn kōrā in rikanaan ro āinwōt Miriam im Debora, im kōrā ro jet raar jeraam̧m̧an kōn jetōb in kanaan, āinwōt Rebeka im Hanna. Im men̄e rijeje Sam Ko raar jab rikanaan, er raar bar obrak kōn jetōb in kanaan, eļaptata ilo aer tōllok n̄an itok eo an Messeia eo.

Ejjeļo̧k iaan men kein rej kailibōk ro uwaan Kraist im Armej ro Rekwojarjar ilo Raan Ko Āliktata. Ilo m̧ool, gospel eo an Jisōs Kraist me em̧ōj an jepļaaktok ej katakin kōj bwe rikanaan ro rejjab wōt m̧ōttan bwebwenato ko rekaitoktok limo ak rej juon m̧ōttan eaorōk ilo karōk eo an Anij. Ilo an jet maron̄ kalimjōk rikanaan ro āinwōt rejenoļo̧k ilo iien ko an Kallim̧ur M̧okta, jej kalimjōkei āinwōt juon men eo me jej juon wōt ilo iien ko an Kallim̧ur M̧okta.

Ak riiti juon jepta jān bok in Aiseia n̄an Ezekiel emaron̄ oktak jān am̧ riiti ennaan ko an kweilo̧k eo eļap jān Būreejtōn eo rainin an Kabun̄ in. Jet iien emaron̄ pen n̄an loe bwe rikanaan ro etto ewōr men ko rekōņaan ba n̄an kōj. Ālkin aolep men kein, laļ in jej mour ie ilo rainin eļap an oktak jān laļ eo rekar kwaļo̧k naan im kanaan ie. Im eļak wōr ad juon rikanaan emour rainin emaron̄ bōktok ļōn̄tak juon kajjitōk: etke eaorōk kijejeto in—im ej bōk eļap kijejeto—n̄an riiti naan ko an rikanaan ro etto?

Eļaptata, armej in raan kein rejjab armej ro jinointata rejeļā kōn rikanaan ro ilo Kallim̧ur M̧okta. Rikanaan rein rekar kajju kwaļo̧k apan̄ im inepata ko aer ilo tōre ko im jikin ko rekar pād ie—āinwōt an rikanaan ro ad ilo raan ko āliktata kar kwaļo̧k apan̄ im inepata ko aer kōn raan kein.

Im ilo ejja iien in wōt, rikanaan ro remaron̄ lo iim̧aan men otemjej. Rej katakin m̧ool ko ejjeļo̧k jem̧ļo̧kier, ekkar n̄an aolep iien kab aolep jikin. Rejeraam̧m̧an kōn revelesōn, rej lo eļapļo̧k, em̧wūlaļ jeļā eo aer kōn jerbal eo an Anij. N̄an waanjon̄ak, Aiseia ear kakkōl armej ro ilo iien eo an kōn jerawiwi ko aer. Ear bar jeje kōn lo̧mo̧o̧ren eo an ri Israel ro ro renaaj kar mour 200 iiō ilju im jekļaj. Ilo ejja iien in wōt, ear bar katakin kōn lo̧mo̧o̧r eo aolep armej ro an Anij rej pukote. Im ear je kanaan ko me, n̄an rainin, rej kōttar wōt aer kūrm̧ool—āinwōt kallim̧ur eo n̄an “laļ ekāāl” (Aiseia 65:17) me enaaj “obrak kōn jeļā Irooj” (Aiseia 11:9), ijo bwij ko rejabwābwe an Israel renaaj kuk tok ijo “aelōn̄ ko” reban “katak tariṇae” (Aiseia 2:4). M̧ōttan lan̄lōn̄ im im̧we me ej itok jān ad riiti naan ko an rikanaan ro ilo Kallim̧ur M̧okta āinwōt Aiseia ej kile bwe ewōr ad juon eddo ilo raan eo eaibojooj me rej antooneļo̧k.

Innem n̄e kwoj riit kanaan ko etto, emaron̄ jipan̄ eok ekkatak kōn meļeļe ko me raar je—ak kwoj aikuj bar lo eok make ie, ak kōm̧m̧an bwe ren n̄an [kwe make]” (1 Nipai 19:24; ;bar lale eoon 23) Jet iien meļeļein ej kile Babilon āinwōt juon kōkaļļe in wujwaan mour in im utiej bōro, ejjab āinwōt jikin eo etto. Emaron̄ meļeļein jeļā kajeen ri Israel ro āinwōt armej ro an Anij ilo jabdewōt iien im jabdewōt jikin. Ak emaron̄ meļeļein lo Zaiōn āinwōt un eo an raan ko ālikttata me armej ro an Anij rej mour kake, ijelo̧kin kalimjōke āinwōt bar juon naan n̄an Jerusalem.

Jemaron̄ keidi jeje ko n̄an mour ko ad kōnke jemeļeļe bwe juon kanaan emaron̄ kūrm̧ool ilo elōn̄ wāween ko. Juon waanjon̄ak em̧m̧an kōn kanaan in ilo Aiseia 40:3: “Ainikien juon ej kūr, Kom̧win kōppojak i āne jam̧aden iaļ eo an Irooj.” N̄an Riju ro rekar rikam̧akoko ilo Babilon, ennaan in emaron̄ kar n̄an Irooj ilo an kar leļo̧k juon iaļ eo bwe ren anemkwoj jen kam̧akoko im rool ļo̧k n̄an Jerusalem. N̄an Matu, Mark, im Luk, kanaan in ej iokļo̧k Jon Ripeptaij, eo ekar kōpooj iaļ eo n̄an iien kwaļo̧k naan eo an Rilo̧mo̧o̧r. Im Josep Smith ekar bōk revelesōn in ke kanaan in ej wōnm̧aanļo̧k wōt n̄an an kūrm̧ool ilo raan ko āliktata n̄an kōppopo n̄an iien jerbal eo an Jisōs ilo millenium. Ilo wāween ko me jej itok im meļeļe, rikanaan ro etto raar kōnono n̄an kōj. Im rej katakin elōn̄ m̧ool ko raorōk im an mour indeeo ko me raorōk n̄an kōj āinwōt kar n̄an ri Israel ro etto.

Bōlen men eo eļapļo̧k an aorōk ijjelo̧kin ad lo kōj make ilo kanaan ko an Kallim̧ur M̧okta, jej lo Jisōs ilo kanaan ko. Eļan̄n̄e kwoj pukot E, kwonaaj lo E, men̄e rejjab ba Etan. Emaron̄ jipan̄ n̄an likūt ilo kōļmenļo̧kjeņ bwe Anij eo ilo Kallim̧ur M̧okta, Irooj Jeova, ej Jisōs Kraist. Jabdewōt iien rikanaan ro rej kōmeļeļeiki ta eo Irooj ej kōm̧m̧ane ak ta eo Enaaj kōm̧m̧ane, rej kōnono kōn Rilo̧mo̧o̧r.

Konaaj bar lo meļeļe ko reļļapļok ilo Eo Em̧ōj Kapiti, juon Rilo̧mo̧o̧r im, juon Kiin̄ ilju im jekļaj jān bwijjin Devid. Erkein rej aolep kanaan ko kōn Jisōs Kraist. Enaaj ļapļo̧k am̧ riit kōn anemkwōj eo jān kam̧akoko, jeorļo̧k bōd, pinmuur, im jepļaaktok eo. Kōn Rilo̧mo̧o̧r eo ilo kōļmenļo̧kjeņ im bōro, kannaan kein renaaj bokļok eok n̄an Nejin Anij. Ālkin aolep men kein, wāween eo em̧m̧an tata n̄an meļeļe kanaan eo ej n̄an bōk “jetōbōn kanaan,” eo im Jon ej kwaļo̧k n̄an kōj ej “naan in kam̧ool eo kōn Jisōs Kraist” (Revelesōn 19:10).