“Jeptōm̧ba 7–13 ‘Enaaj Ba Kajjien Iaļ ko Am̧’: Jabōn Kōnnaan Ko 1–4; 15–16; 22; 31; Ekklisiastis 1–3; 11–12,” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)
“Jeptōm̧ba 7–13 ‘Enaaj Ba Kajjien Iaļ ko Am̧,’” Itok, Ļoor Eō: Kallim̧ur M̧okta 2026
Jisōs ippān Ajri Ro, jān Dilleen Marsh
Jeptōm̧ba 7–13: “Enaaj Ba Kajjien Iaļ ko Am̧”
Jabōn Kōnnaan Ko 1–4; 15–16; 22; 31; Ekklisiastis 1–3; 11–12
Komaron̄ ļōmņaki bok in Jaban Kōnnaan Ko āinwōt juon ko̧ļaakjen in kapilōk ko remāletlet jān ro jinen im jeman rej iakwe (lale Jabōn Kōnnaan Ko1:8). Lukkun enaan eo an ej bwe n̄e konaaj kappukot māletlet—eļaptata māletlet an Anij—mour enaaj em̧m̧an. Ak Jabōn Kōnnaan Ko ej itok m̧okta jān Ekklisiastis, āinwōt ej ba, “Ejjab pidodo pukot jeļāļo̧kjeņ.” Rikwaļo̧k naan eo ekar kout tok jān Ekklisiastis ekar lo bwe e ekar “likūt [buruōn] n̄an jeļā mālōtlōt” ak jej lo wōt “kan̄ kōto” im “eļap būrom̧ōj” (Ekklisiastis 1:17–18). Ilo elōn̄ wāween ko, bok eo ej kajjitōk, “Emaron̄ ke lōn̄ meļeļe rem̧oolilo juon laļ eo ijo aolep men renana, ewōr jem̧ļo̧kier, im rejjab ailikkar?”
Im aaet, ilo an bok kein ruo kalimjōk mour kōn ļōmņak ko roktak, rej katakin kōn m̧ool ko rej āinwōt juon. Ekklisiastis ej kwaļo̧k: “Em̧ōj ron̄jake aolepen: Kwōn mijak Anij, im pokake kien ko An: bwe en̄in aolepen kōm̧m̧an em̧m̧an an armej ro” (Ekklisiastis 12:13). Ejja pedped eo in loe ilo aolepen Jabōn Kōnnaan Ko: “Lōke Jeova kōn aolepen būruōm̧” (Jabōn Kōnnaan Ko 3:5; bar lale eoon 7). Mour aolep iien ej em̧m̧anlo̧k—n̄e ejjab weeppān—n̄e jej lōke im ļoor Irooj Jisōs Kraist.
N̄an juon tukaduin meļeļe an bok kein, lale “Proverbs, book of” and “Ecclesiastes” ilo the Bible Dictionary.
Ļōmņak ko n̄an Ekkatak ilo M̧weeo im ilo Kabun̄ in
Jabōn Kōnnaan Ko 1–4; 15–16; Ekklisiastis 1–3; 11–12
“kwōn kajeorḷọk lọjiln̄ūṃ n̄an mālōtlōt.”
Bok in Jabōn Kōnnaan Ko im Ekklisiastis robrak kōn meļeļe ko kōn māletlet. Ļōmņak in kakōļļeik naan eo “māletlet” im naan ko rej ekkeijel, āinwōt “jeļāļo̧kjen” im “meļeļe,” ilo am̧ loi ilo Jabōn Kōnnaan Ko 1–4; 15–16; Ekklisiastis 1–3; 11–12. Ekōjkan an eoon kein im̧we wāween am̧ ļōmņak kōn māletlet? Pedped ioon ta eo kwoj loe, ewi wāween am̧ kōmeļeļeiki m̧wil eo me “Irooj ej letok”? (Jabōn Kōnnaan Ko 2:6). Ta kōjeraam̧m̧an ko rej itok jān mālōtlōt an Anij?
Bar lale Matu 7:24–27; 25:1–13.
Jipan̄ rikkatak ro kwaļo̧k ta ko rej ekkatak. “Leļo̧k n̄an rikkatak ro iien n̄an kwaļo̧k n̄an doonta ko rej ekkatak kōn Rilo̧mo̧o̧r im gospel eo An. Kōm̧m̧ane men in enaaj jipan̄ er kobaik m̧ool ko raar katakin im kwaļo̧k ippāer ren m̧ōttaer. Enaaj bar jipan̄ er lōke er make ilo maron̄ eo aer n̄an kwaļo̧k m̧ool ko ilo jikin ko jet” (Katakin ilo Wāween eo an Rilo̧mo̧o̧r, 26). N̄an waanjon̄ak, komaron̄ karuwanene rikkatak ro n̄e je jet kein jipan̄ ko jān Jabōn Kōnnaan Ko ak Ekklisiastis ijo raar lo meļeļe ko kōn māletlet eo an Anij. Innem karuwanene rikkatak ro n̄an kōnono kōn ta ko raar ekkatak.
Jabōn Kōnnaan Ko 1:7; 2:5; 3:7; 15:33; 16:6; 31:30; Ekklisiastis 12:13
“Kwōn jab mālōtlōt wōt ilo mejaṃ; kwōn mijak Jeova.”
Bar juon unin tōl ilo Jabōn Kōnnaan Ko im Ekklisiastis ej “mijak Irooj.” Lale naan in ilo am̧ riit. Ta eo kwoj en̄jake meļeļein n̄an mijak Irooj? Kappukot meļeļe ko ilo enaan eo an David A. Bednar “Therefore They Hushed Their Fears” (Liahona, May 2015, 46–49). Ekōjkan an mijak Irooj oktak jān kain mijak ko jet?
Bar lale Jabōn Kōnnaan Ko 8:13
Jabōn Kōnnaan Ko 3:5–7; 4
“Lōke Irooj kōn aolepen būruōm̧.”
Ekōjkan am̧ naj kajjieōn̄ kipel juon armej ke em̧m̧anļo̧k “lōke Irooj” jān “atartar … ioon jeļāļo̧kjen eo [ad]”? (Jabōn Kōnnaan Ko 3:5). Ta mennin keid ko ak kein katak ko komaron̄ kōjerbali? Ilo am̧ lin̄ūri Proverbs 3:5–7, ļōmņak kōn wāween ko komaron̄ kam̧ōj jantōj ko āinwōt kein: Lōke Irooj ej āinwōt … atartar ioon jeļāļo̧kjen eo ad make ej āinwōt …
Etke ejjab juon men emelōtlōt n̄an atartar ioon meļeļe eo ad make? Elmen am̧ kar jeļā ke komaron̄ lōke Irooj?
Mekarta, jemaron̄ lo an pen n̄an lōke Irooj jet iien. Etke ej eindein? Elder Gerrit W. Gong ear letok jet un ko, ippān kapilōklōk eo ejipan̄ ilo “Bar Lōke” (Liaona, Nob. 2021, 97–99). Bwebwenato ak katak ta ko kwoj lo ilo enaan in me remaron̄ jipan̄ juon armej bar kōmour lōke eo ad ilo Irooj?
Jabōn Kōnnaan Ko 3:6 im Jabōn Kōnnaan Ko 4 rej jim̧or keidi mour n̄an juon “iaļ.” Ewi am̧ ļōmņak ta meļeļein n̄an kōtļo̧k bwe Irooj ej “tōl iaļ ko [am̧]”? (Jabōn Kōnnaan Ko 3:6). Ta eo kwoj loe jepta 4 me ej jipan̄ eok “lin̄ūri iaļ eo an ne ko [neem̧]”? (eoon 26). N̄an waanjon̄ak, ta eo eoon ko 11–12im 18–19 rej katakin kōn kōjeraam̧m̧an ko itok jān ļoor iaļ eo ejim̧we? Ta meļeļein eoon 26–27 n̄an kwe?
Bar lale 2 Nipa 31:18–21; “Lord, I Would Follow Thee,” Hymns, no. 220.
Jabōn Kōnnaan Ko 15; 16:24–32
“Naan in uwaak e jouj, ej kajeorḷọk illu.”
Jet iaan meļeļe ko ilo Jabōn Kōnnaan Ko 15–16 remaron̄ im̧we eok n̄an kōkm̧anm̧anļo̧k am̧ kōnono ippān ro jet, eļaptata ro kwoj iakwe er. N̄an waanjon̄ak, ļōmņak kōn iien ko me “uwaak e jouj” ekar jipan̄ “kajeorļo̧k illu” (Jabōn Kōnnaan Ko 15:1).
Komaron̄ bar ļōmņak kōn iien ko me Rilo̧mo̧o̧r ar waanjon̄aki katak ko ilo Jabōn Kōnnaan Ko 15:1–4, 18 (lale Mark 12:13–17; Jon 8:1–11). Ewi wāween am̧ ļoor waanjon̄ak eo An ilo am̧ ekōnono ippān ro jet?
Ekōjkan an kapilōk in ilo Jabōn Kōnnaan Ko 15; 16:24–32 jerbal n̄an kein ekōnono ko rainin? Lale n̄e komaron̄ lo juon eoon ilo jepta kein me komaron̄ ukote ilo naan ko am̧ make kōn kilen ekōnono ilo social media ak ilo text.
Bar lale Neil L. Andersen, “Ļoor Jisōs: Erom Rikōm̧m̧an Aenōm̧m̧an,” Liaona, Māe 2022, 17–20; Ronald A. Rasband, “Naan ko Raorōk,” Liaona, Māe 2024, 70–77; N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko (2022), 11–12.
Wōn eo Emaron̄ Lo juon Kōrā Ewānōk? II, jān Louise Parker
Jabōn Kōnnaan Ko 31:10–31
“Juon kōrā ej mijak Irooj, renaaj nōbar e.”
Jabōn Kōnnaan Ko 31:10–31 ej kōmeļeļeiki “juon kōrā em̧m̧an,” ak juon kōrā ewōr kajoor in jetōb eļap, maron̄, im im̧we. Kwomaron̄ kajjieon̄ kakaduikļo̧k ilo naan ko am̧ ta eoon kein kajjojo rej ba kōn kōrā ro rewānōk. Ewi iaan jinōkjej kein komaron̄ mour kaki?
Ekklisiastis 1–3; 12
Mour in ej an jidik wōt iien.
Etke eaorōk n̄an eok n̄an keememej menin eļap ilo laļ in, āinwōt an Ekklisiastis 1–2 kwaļo̧k, ej “men pata” (ak an jidik wōt iien im ejjab lukkun aorōk? Ta eo kwoj loe ilo Ekklisiastis 12 me ej kōm̧m̧an bwe mour en aorōk?
N̄an eļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Jabōn Kōnnaan Ko 1:7; 2:5; 15:33; 16:6; Ekklisiastis 12:13
N̄an “mijak Anij” meļeļein iakwe im pokake E.
-
N̄an jipan̄ ajri ro meļeļe eoon kein kōn mijak Anij, komaron̄ jāniji naan eo “mijak” n̄an naan ko āinwōt kein kautiej, iakwe, ak pokake (bar lale Hibru 12:28) Ekōjkan an meļeļe in im̧we wāween ad ļōmņak kōn eoon kein? Ewi wāween ad maron̄ kwaļo̧k ke jej mijak Irooj?
Jabōn Kōnnaan Ko 3:5–7
Imaron̄ lōke ilo Irooj kōn aolepān būruwō.
-
Kwe im ajri ro maron̄ ejaak m̧akutkut ko me rej ekkeijel ippān Jabōn Kōnnaan Ko 3:5–7, āinwōt kōm̧m̧an ob kōn peimi, atartar ilo juon jait, etetal ilo iaļ eo, im jitōn̄ļo̧k mejam. Ewi wāween ad kwaļo̧k bwe jej lōke Jisōs Kraist kōn aolepen buruōd?
-
N̄an kwaļo̧k ta meļeļein “atartar ioon jeḷāļo̧kjeņ eo am̧” (Jabōn Kōnnaan Ko 3:5), ļōmņak in karuwanene ajri ro n̄an atartar ilo juon men ekūjn̄en̄e im pen, āinwōt kiin em̧. Innem remaron̄ kajjieon̄ atartar ņae juon men eo ejjab pen, āinwōt juon būruum̧. Ak remaron̄ kajjieon̄ katartar juon alaļ ak juon pencil ilo jet men me rekūjn̄en̄e, āinwōt juon bok ak juon pepa. Etke eaorōk “lōke Irooj” (eoon 5) im jab “jeļaļo̧kjeņ eo am̧”?
Ekkatak Lōke Irooj, jān Kathleen Peterson
Jabōn Kōnnaan Ko 15:1, 18
Imaron̄ kōjerbal naan ko rejouj.
-
Bōlen kwe im ajri ro maron̄ ļōmņak kōn jekjek ko me kwe ak er raar illu. Riiti Jabōn Kōnnaan Ko 15:1 ippān doon, im jipan̄ ajri ro kōjerbal eoon in n̄an jekjek ko rej ļōmņaki. Bōlen remaron̄ ekkatak jet “uwaak jouj.” Al juon al kōn jouj, āinwōt “Love Is Spoken Here” (Children’s Songbook, 190–91), emaron̄ katakin pedped in.
-
N̄an jipan̄ ajri ro meļeļe ta meļeļein “e rum̧wij an illu” (Jabōn Kōnnaan Ko 15:18), kwe im ajri ro maron̄ kwaļo̧k kōn iien ko me kom̧ (ak juon armej kom̧ jeļā kajeen) kar illu ak kom̧ kar kāālet in jouj. Jipan̄ ajri ro ļōmņak kōn men ko jemaron̄ in m̧ōkaj n̄an eļan̄n̄e jej “rum̧wij n̄an illu.” N̄an waanjon̄ak, jemaro̧n̄ m̧ōkaj n̄an ļōmņak kōn Jisōs, n̄an kajjitōk jipan̄ ippān Jemedwōj Ilan̄, n̄an ļōmņak kōn juon al in Būraimere, ak eļan̄n̄e emaron̄, n̄an etetal ļo̧k jān.
N̄an eļapļo̧k, lale ennaan eo an allōn̄ in ilo eo Jera māākjiin.