Fahsruh, Fahsr Tukuk
Septempuh 21–27. “Sie Orekma Wolana Ac Usrnguk”: Isaiah 13–14; 22; 24–30; 35

“Septempuh 21–27. ‘Sie Orekma Wolana Ac Usrnguk’: Isaiah 13–14; 22; 24–30; 35,” Come, Follow Me—For Home and Church: Wuhlweacng Mahtuh 2026 (2026)

“Septempuh 21–27. ‘Sie Orekma Wolana Ac Usrnguk,’” Come, Follow Me: 2026

God ac Jisus Kraist sikyang nuh sin mukul fuhsr se Joseph Smith

Insack Muhtahl, sel Brent Borup

Septempuh 21–27: “Sie Orekma Wolana Ac Usrnguk”

Isaiah 13–14; 22; 24–30; 35

Sie ma Leum el siyuck mwet pahluh uh in oruh pa in sensenkihn ma ac tuhkuh ke ma koluk uh. Nuhsin mwet pahluh ke pacl luhn Wuhlweacng Mahtuh, inkaiyacn pacl uh kalmen ma se inge pa in fahk nuh sin mwet kol ke muhtuhnfacl lalos lah elos enenuhn in auliyak. Orekma na sensen se pa inge, tuhsruhk Isaiah el tiacna sahngweng, ac kahs in sensenkackihn lal nuh sin muhtuhnfacl ke pacl lal ah—wi Israel, Judah, ac muhtuhnfacl ma raunweack acn we—tuh arulacna fokoko (liye Isaiah 13–23).

Tuhsruhk, oasr pac kahs in finsrak lal Isaiah. Finne kahs in palye ke kuhnanuclac ah sikyak nuhke muhtuhnfacl inge, Isaiah el palyeack tari lah sahp ac oasr fohlohkihnyuckyak ac ahksasuc se. Leum El ac suli mwet Lal in fohlohk nuh Yohrohl. El fah orwaclah “puk fol … ekla sie lulu, ac acn paho ac fah sessesla ke unon in kof” (Isaiah 35:7). El fah oruh “aklutyalosyak ke kutu ma elos tiana motko mu ac ku in sikyak” (Isaiah 29:14), ac fohlohkuhnwacng nuh sin mwet Israel mwe insewowo El tuh olwelah nuh selos. Finne Isaiah kuh oacna sie mwet moul ke pacl sac tuh moul in liye ke orekma wolacna se inge. Tuhsruhktuh kuht liye kac misenge. Pwaccyeiyac uh, kuht oasr kac.

akucl in lutlut

Mwe nuhnak nuhke Lutlut Lohm Sesr ac Alu

Isaiah 13:1–11, 19–22; 14:1–20

Insefuhlwact ac mukwikwi luhn facluh ac tiac kuhtanglah.

Ke pacl lal Isaiah ah, Babylon pa sie tohkohsrahi na fokoko ma oasr mwet kol na fokoko se la. Ingena Babylon el oasr ke sramsram mahtuh ke pacl met ah. Na efuh mwe fahkwack lal Isaiah nuh sin Babylon, ke Isaiah 13–14, yohk srihpac nuh sesr misenge? Ma ke srihpen Babylon el luhmweyuck nuhke insefuhlwact, rahpkuh, ac ma koluk, ma srwackna oasr raunikuhtlac misenge. Nuhnkuh ke mwe akucl se inge ke kom riti Isaiah 13:1–11, 19–22; 14:1–20. Sahp kom kuh in motko ke kihsensiyuck oacna inge:

  • Meac ma oacna sie kom liye inmahsrlon insefuhlwact luhn tohkohsrah luhn Babylon ac ke insefuhlwact lal Satann? (liye Isaiah 14:4–20; Moses 4:1–4). Mwe sensen fuhkah kom konwacack keim sifacna ke fuhs inge?

  • Mwet Lahngo el fah sang “mongla liki ngal ac keok lalos”? (Isaiah 14:3).

Jisus El sifilpac moulyak ac sikyang nuh sel Mary sisken kuclyuck Lal ah

“El fah kunausla misa nwe tok” (Isaiah 25:8).

Isaiah 22:22–23; 24:21–23; 25:6–8; 26:19; 28:16

Jisus Kraist pa Messiah se ma tuh olwelah nuh sesr uh.

Mwe luti lal Isaiah kwacna sruhmuhn ke orekma luhn Mwet Lahngo, weacng iwaclah kisac Lal, Sifilpac Moulyak, ac Tuhkuh Ahkluo Lal. Ohiyac fuhkah ke misin Lal ah tuhkuh nuhke nuhnak lom an ke kom riti fuhs inge uh: Isaiah 22:22–23; 24:21–23; 25:6–8; 26:19; 28:16? Meac pac kuhtuh sramsram sahyac kom konwacack ma ahkacsmakihnye kom ke Mwet Lahngo?

Sang mwet lutlut an pacl wo lalos in fahkwack ke luhlahlfongi lalos ke Jisus Kraist. “Kalmen ekihn mwet luti se ke wosasuc luhn Jisus Kraist pa in kahsruh mwet sahyac in kahlwem ac fungyang nuhke mwe luti Lal, kuh in molwelah Lal, ac luhngse pwacye Lal” (Teaching in the Savior’s Way, 8). Sie inkacnek fihsrwacsr in oruh ma ingacn ke pacl nuhkwewa kom luti uh pa in siyuck kihsensiyuck soko oacna “Meac kom sokwack ke ma suhmuhslah ke wik se inge ma luti kom ke Mwet Lahngo?” Tohkoh kom sang mwet lutlut an in akacsruhi ke ma elos puhlakihn ac ahkfokokoye luhlahlfongi lalos kais sie.

Isaiah 24:1–12; 28:1–8; 29:7–13; 30:8–14

Forlah liki Leum use mwe sensen nuhke moul in nguhn lom.

Ke pahkotwen Lal, Leum el suhpwaclma Isaiah in sensenkackihn nuh sin mwet wuhlweacng lal lah elos fahsr liki Leum. Liye lah kom ac kuh in sokwack akucl nuhke kahs in sensenkackihn ke Isaiah 24:5; 29:13; 30:8–12. Efuh kuh elah ac mukuikui inge sensen nuhke moul in nguhn lasr?

Isaiah el orekmakihn kuhtuh ma sikyak met in kapsruh mwe sensenkihn ma ac sikyak nuh sin mwet uh elos fin forlah liki Leum. Ke kom lutlut ke ma inge uh, siyuck sum sifacna lah fuhkah ohiyen forlah liki Leum uh:

  • Faclu pulamlamla ac uli (Isaiah 24:1–12).

  • Sruhi koluk (Isaiah 28:7–8).

  • Masrinsrwacl ac maluh (Isaiah 29:7–10).

  • Sinkac kuh mwe nenyuck se muhsahllah (Isaiah 30:13–14).

Efuh yohk srihpac nuh sum in fototo nuh sin Leum?

Isaiah 29; 30:18–26; 35

akucl luhn seminary
Leum El kuh in ahollah ma tuhlac kuh muhsahllah uh.

Kuh na oasr pacl tuhlac ma se lom suc kom nuhnkuh muh kom ac tiac sifil sokwack? Kuh sahp sie ma lom muhsahllah, ac kom elyah kac muh ac tiacna kuh in ahkwoyeyucklac. Ke kuht forlah liki Leum uh, Satann el kena kuht in nuhnkuh muh kuht tiacna kuh in sifilpac fohlohklac kuh ahkkweyeyucklac. Tuhsruhktuh, Isaiah el ahkuhtweyac ke kuhtuh orekma wolacna ma Leum El fah oruh in kahsrwe kuht in fohlohk nuh Yohrohl. Meac kom lotwelah ke Isaiah 29:13–24; 30:18–26; 35 ke Leum, luhngse Lal, ac kuh Lal? Sahp kom kuh in sokwack soko pohloh kahs ke sramsram inge ma usot finsrak lom ke kom enenuh ahkkweyucklac uh. Kom kuh pac in riti pac mwe fahkwack lal Sister Amy A. Wright “Christ Heals That Which Is Broken” (Liahona, Mei 2022, 81–84).

Sie inkacnek Leum el ahkkahlwemye kuh Lal ac pahkotwen Lal pa ke Sifilpac fohlohkihnyuckyak ke wosasuc Lal. Isaiah 29 nacnwack kain in sramsram ma oacna sie nuhke ma sikyak nuhke Sifilpac Fohlohkyak luhn wosasuc uh. Pa nuh ke:

  • Kapsruh Isaiah 29:11–12 nuhke 2 Nephi 27:6–26 ac Joseph Smith—History 1:63–65.

  • Kapsruh Isaiah 29:13–14 nuhke Doctrine and Covenants 4 ac Joseph Smith—History 1:17–19.

  • Kapsruh Isaiah 29:18–24 nuhke title page of the Book of Mormon.

Ke nuhnak lom sifacna, efuh “wolana” ac “usrnguk” (Isaiah 29:14) kahs wo in sang ahkuhtweyac ke Leum el fohlohkohnwack wosasuc Lal? Kom kuh in kahsruh fuhkah in ahkfahsryelah kahs in palye ke Sifilpac Fohlohkihnyuckyak? Liye mwe fahkwack lal Elder Gerrit W. Gong nuhke kuhtuh mwe nuhnak “All Nations, Kindreds, and Tongues” (Liahona, Nov. 2020, 38–41).

Liye pac “The Restoration of the Fulness of the Gospel of Jesus Christ: A Bicentennial Proclamation to the World” (Gospel Library); “The Morning Breaks,” Puk In On, no 1.

Nuhke kuhtuh pac liye ma nuhke mahlwem inge Liahona and Nuhke Kuh luhn Mwet Fuhsr mackuhsin.

akucl luhn ip luhn tuhlihk

mwe nuhnak nuhke Luti Tuhlihk

Isaiah 14:3; 25:8–9; 28:16

Jisus Kraist El kuh in moliyulac liki ma koluk ac misac.

  • Kom ac kahsruh tuhlihk kom luti an fuhkah in liye Mwet Lahngo ke ma suhmuhslah lal Isaiah uh? Kom kuh in kahsrwelos in sokwack ke pohloh kahs ma ahkacsmakuhnuhlos Kacl ke Isaiah 14:3; 25:8; kuh 28:16. Eltahl kuh pac in kapsruh fuhs ke Isaiah inge nuhke fuhs sahyac ma luti ke Mwet Lahngo, oacna Mattew 11:28–30; 1 Corinth 15:53–57; Helaman 5:12. Ma wolacna fuhkah Leum El oruh nuh sesr?

  • Tukun komtacl tuhkweni riti Isaiah 25:8–9, kom kuh in liye petsac ke Mwet Lahngo ke Gethsemane, fin sahksin, ac tukun Sifilpac Moulyak Lal. Sang tuhlihk an in sramsramkihn lah meac sikyak ke petsac ingacn ac efuh eltahl luhngse Jisus ac “enganwack ke molwelah lal” (fuhs 9).

  • Kom kuh in sulaclah in fahk nuh sin tuhlihk an ke suhpwacr kom puhlakihn ke sie mwet kom luhngse el misac uh. Fahkwack ke mwe ahkkweye kom eis ke srihpen Jisus Kraist. Sahp tuhlihk an kuh in sruhlwaclah sie petsac ke muhtuhn mwet tuhng na tohkoh elah sronin muhta ke komtacl tuhkweni riti Isaiah 25:8 uh.

Jisus ke Gethsemane

Luhngse Lom In Orek, sel Ken Spencer

Isaiah 25:4–6

Jisus el use nuh sihk “acn wihklac liki pahkah.”

  • Yac kom ac tuhlihk an nuh wi puhlakihn mwe insewowo ke nien monglac liki pahkah kuh acn lullul ke sie lwen fol ke suhmihr? Kuh na oasr pacl kom kang mongo na yucyuc ke pacl kom masrinsrwacl? Sramsramkihn ma kom puhla inge ke kom riti Isaiah 25:4–6. Jisus El oacna ma inge fuhkah?

Isaiah 29:11–18, 24

Fohlohkyak luhn wosasuc uh “orekma usrnguck se.”

  • Ke kom ac tuhlihk an riti Isaiah 29:14, akacsruhi nuh selos kahs sahyac ma oacna kalmen “wolana” ac “usrnguk.” Sang elos in kahsrwe kom sokwack kuhtuh ma kuh petsac ma fahkwack ke kuhtuh orekma wolacna luhn Leum ke lwen sahflah inge. Kuhtuh sin ma inge kuh in Puk luhn Mormon se, petsac ke tempuhl, kuh petsac ke Aruhruhma Se Met (oasr petsac se ke muhtwacwacackiyacn ma tahklac inge). Tohkoh tuhlihk an kuh in sulaclah sie ma ah ac sruhmuhn lah efuh wolacna seltahl.

  • Soko on ke Fohlohkyak luhn wosasuc uh wo nuhke Isaiah 29, oacna “On a Golden Springtime” (Puk In On luhn Tuhlihk Srihsrihk, 88). Ac sahp kom fin sruhmuhn sie ma sikyak nuh sum ac kuh in kahsruh tuhlihk an in kahlwem kac lah meac kalmen sifilpac fohlohkyak . Nuhke mwe srihkasrak, kom ac tuhlihk an kuh in sramsramkihn ma se lom tuhlac ac kom konwacack fuhkah. Kahsruh tuhlihk an in kapsruh ma se inge nuhke Fohlohkyak luhn wosasuc uh. Oacna ke Isaiah 29:13–15, efuh kuht enenuh Fohlohkyak sac? Orekma wolacna fuhkah Leum El oruh in fohlohkohnwack wosasuc Lal? (liye sra puk in mukuikui nuhke wik inge).

Nuhke kuhtuh pac liye ma nuhke mahlwem inge ke Friend mackuhsin an.

Jisus fin sahksin soko

Srihpsrihpyak luhn Jisus fin sahksin soko ah, sel Carl Heinrich Bloch, ke Frederiksborg Museum luhn National History

Sra puk in mukuikui luhn U luhn Tuhlihk Srihsrihk: Sifilpac fohlohkihnyuckyak luhn wosasuc uh pa sie “orekma wolacna”