“Septempuh 28–Ohtohpa 4. ‘Ahkwoye Mwet Luhk’: Isaiah 40–49,” Come, Follow Me—For Home and Church: Wuhlweacng Mahtuh 2026 (2026)
“Septempuh 28–Ohtohpa 4. ‘Akwoye Mwet Luk,’” Come, Follow Me: Wuhlweacng Mahtuh 2026
Unwelah Mwet Kun Se, sel Carl Heinrich Bloch, ke Frederiksborg Museum ke National History
Septempuh 28–Ohktohpa 4: “Akwoye Mwet Luk”
Isaiah 40–49
“Akwoye” pa kahs se emet ke Isaiah chapter 40. Kahs se inge mahkiyac muhtwacwacyen siena puhsra, siena ahkuhtweyac ke mwe fahkwack luhn mwet pahluh se. Sihm lal Isaiah met kuhtuh sensenkihn mwet Israel ac Judah ke kuhnausyucklac ac srohuh ma ac tuhkuh ke srihpen ma koluk lalos. Tuhsruhk kahs in palye tok inge ma in sang ahkkweye mwet Jew ke yac 150 fahsruh uh—tukun Jerusalem ac tempuhl kuhnanuhlac ac mwet ingacn tuh utucklac mwet kaclpous sin Babylon. Kahs in palye inge, ne ohinge, som ahluhkwelah pacl fahsruh liki na mwet Israel ma kuf, ac inse toasr. Eltahl sramsram nuh sesr, suc kuhtuh pacl uh puhla kuf, toasr, ac finne tuhla.
Mwe fahkwack lal Isaiah nuh sin mwet lal ac nuh sesr tuhkuh ke kahs na fihsrwacsr: “Nimet Sangeng” (Isaiah 43:1). Ma nuhkwewa tiacna tuhlac. Leum el tiacna muhlkihnkomlac, ac oasr kuh Lal fin ma nuhkwewa ma kom liye muh kom tiac kuh in oruh. Yac Leum, suc “orwaclah kuhsrao” (Isaiah 42:5), kuh liki Babylon, liki ma koluk, liki oacna sie ma ahkkohsye kom? “Foloko nu yuruk,” El fahk, “nga pa molikomla uh” (Isaiah 44:22). El kuh in unwelac, fohlohkohnwack, ahkfokokoye, nuhnak muhnahs, ac ahkkweye—oacna sie ma kom enenuh, finne in molikomlac.
Mwe nuhnak nuhke Lutlut Lohm Sesr ac Alu
Isaiah 40–49
Jisus Kraist El kuh in ahkkweyeyuc ac use finsrak nuh sihk.
Ke Mwet Israel tuh srohoh muhta fin acn Babylon ah, sahp puhkantwen selos nuhnkuh lah elos tilac mwet suleyucklac luhn God, mwet wuhlweacng Lal. Ke kom riti Isaiah 40–49, suk ke sramsram fototo ma oasr ahkkweye ac finsrak kac. Ke kais sie sramsram ma kom sokwack ingacn, motko ac suhmuhslah ma Leum El fahk nuh sum ke fuhs inge. Pa inge kuhtuh ma kom kuh in muhtwacwacack kac:
-
40:11, 29–31:
-
41:10–13, 17–18:
-
42:6–7:
-
43:1–7, 25:
-
44:1–4, 21–24:
-
46:3–4:
-
49:7–16:
Meac kom puhla muh Leum El ke kom in etuh Kacl?
Kom ac kuh in akihlen lah on soko inge “How Firm a Foundation” (On In Alu, no. 85) apkuhran nuhke kahs lal Isaiah ke Isaiah 41:10; 43:2–5; 46:4. Motko in yuck kuh lohng on soko inge, in suk ma oacna sie ke kahs kac an ac ke fuhs ke Isaiah an. Leum El ahkfalyelah fuhkah olwelah ke fuhs inge ke moul lom an?
Liye pac Patrick Kearon, “He Is Risen with Healing in His Wings: We Can Be More Than Conquerors,” Liahona, Mei 2022, 37–40.
Orekmakihn ma suhmuhslah pac sahyac. Kuhtuh pacl uh kuht kuh in kahlwem ke Wuhlweacng Mahtuh wo kuht fin orekmakihn pac fuhs ke Puk luhn Mormon ke lutlut lasr uh. Nuhke mwe srihkasrak, mwet pahluh Nephi ac Jacob ke Puk luhn Mormon elos eis ma suhmuhslah lal Isaiah ke plwet prahs (liye 1 Nephi 19:22–23), ac elos orekmakihn kahs in palye inge in luti kacl Isaiah. In lotwelah lah Nephi ac Jacob oacna sie fuhkah Isaiah 48–49 nuhke mwet lalos, liye 1 Nephi 22. Ac kuh in kahsrwe kom in luhngse sapta inge nuhke moul lom sifacna.
Ke kuht ahkos masap luhn Leum, kuht kuh in eis “mislac … oana soko infal” (Isaiah 48:18).
Isaiah 40–49
“Kom mwet kuhlwacnsap luhk.”
Ke Isaiah 40–49 Leum el sruhmuhn ke “mwet kuhlwacnsap” ac “mwet loh” Lal. Kahs inge kuh in luhmweyuck nuh sinl Jisus Kraist (liye Isaiah 42:1–7), nuhke Mwet Israel (liye Isaiah 45:4), ac nuh sel Tohkohsrah Cyrus, suc tuh lwelah mwet Jew ac in fohlohklac nuh Jerusalem ac sifilpac muhsaheack tempuhl (liye Isaiah 44:26–28; 45:1–4). Kom kuh pac in motko lah sramsram inge kom orekmakihn fuhkah ekihn sie mwet kuhlwacsap ac mwet loh luhn Leum nuh sum. Nuhke mwe srihkasrak, motko ke kain kihsensiyuhk inge:
Isaiah 40:1–3, 9–11; 43:9–12. Ke ohiyac fuhkah kom ekihn oacna sie mwet loh luhn Jisus Kraist? Meac “pweng wo” ma kom kuh in akacsruhi ekihn mwet loh se Lal? Kom kuh in petsacelah muh pahng kom in ekihn mwet loh se ke sie miting lun kohrt. Ke miting se inge, lainyuck Jisus Kraist ke El fahk muh El pa sruhmuhnyuck ke Isaiah 43:11. Luhlahlfongi fuhkah kom kuh in sang in ahkkweye fahk luhn Jisus uh? Meac mwe srihkasrak ke moul lom ma kom kuh in suhkwack in sang ahkpwacyei ma se inge?
Isaiah 41:8–13; 42:6; 44:21. Meac Leum el pahngon kom in oruh? Nuhnkuh ke kunohkohn ke alu wi pac pacl wowo sahyac in kuhlwacnsuhp nuh Sel. El “orekomlac” kuh ahkwoekomlac fuhkah in ekihn mwet kuhlwacnsap Lal? El ahkkweye kom fuhkah ke kom kuhlwacnsap uh?
Isaiah 49:1–9. Mwe fahk fuhkah kom sokwack ke fuhs inge ma kuh in kahsrwe kom ke pacl orekma lom ac kuhlwacnsap lom oacna in “wangin sripa, ac wangin ma kom oracla”? (fuhs 4).
Isaiah 40:3–8, 15–23; 42:15–16; 47:7–11
Kuh luhn God fokoko liki kuh luhn facluh.
Isaiah el kalweni in ahkacsmakihnye mwet lal ke kuh luhn God, finne in kapsruh nuhke kuh luhn facluh ma raunweloslac. Suk ke mwe fahk se inge ke kom riti Isaiah 40:3–8, 15–23; 42:15–16; ac 47:7–11 (esam lah chapter 47 ma sihmlac nuh sin Babylon suc tuh sruokyac mwet Israel ah). Meac fhs inge luti kom ke ma luhn facluh? Meac fuhs inge luti kom ke God? Motko lah efuh mwe fahk inge yohk srihpac nuh sin mwet Jew ma muhta ye kohs. Efuh kuh yohk srihpac nuh sum?
Isaiah 48:10; 49:13–16
Leum El kuh in ahknwacsnwacsyeyuc liki kweok luhk.
Ke kom riti Isaiah 48:10, motko ke “fucnyuc luhn kweok” lom sifacna. Leum El “ahknwacsnwacsye” kom fuhkah? Kuh Isaiah 49:13–16 el kahsrwe kom fuhkah ke kom puhlakihn kweok?
Liye pac “The Refiner’s Fire” (video), Gospel Library.
The Refiner's Fire
Nuhke kuhtuh pac liye ma nuhke mahlwem inge ke Liahona ac Nuhke Kuh luhn Mwet Fuhsr mackuhsin.
mwe nuhnak nuhke Luti Tuhlihk
Isaiah 40:3–5
Nga kuh in kahsruh ahkolah “inkanek lun Leum.”
-
Nuhnkuh ke kuhtuh innek in ahkuhtweyac lah meac kalmac in “ahkolah … inkanek luhn Leum,” oacna ke ahkuhtweyucki ke Isaiah 40:3–5. Kom ac tuhlihk an kuh in ahksuwohsyelah sie ma kuhruhlac, sahkuhnlah infohk an in mwesahs, kuh orwaclah soko inkacnek mwesahs ah ke infohk yotyot se. Kom kuh pac in sang sie petsac kacl John Pacptais ac Joseph Smith tuhlihk an in liye (liye Gospel Art Book, nos. 35, 87). Elos ahkolah fuhkah inkacnek nuhke tuhkuh luhn Leum? (liye Luke 3:2–18; Doctrine and Covenants 135:3). Kuht kuh in kahsruh fuhkah? Ac pacl wowo se in sramsramkihn mwet sruok Aaronic Pristut lah elos kahsruh fuhkah in ahkolah inkacnek luhn Leum (liye Doctrine and Covenants 84:26–28).
Isaiah 43:10
Nga kuh in mwet loh se luhn Leum.
-
Tukun komtacl tuhkweni riti Isaiah 43:10, kom kuh in sruhmuhn lah meac kalmac in ekihn sie mwet loh. Akacsruhi yurin sie sin sie ma kom puhlakihn tari ma oruh kom kuh in ekihn “mwet loh” ke—nuhke mwe srihkasrak, mongo kom ema tari, acn se kom som muhtwacta we, kuh sie mwet kom etuh. Meac kalmac in ekihn mwet loh luhn Leum? Meac kuht kuh in fahk Kacl nuh sin mwet sahyac?
Isaiah 44:3–4; 45:8
Leum el fah “ukuiyac” mwe insewowo Lal nuh feik.
-
Tukun kowos riti fuhs inge, tuhlihk an kuh in sroksrokihnyac sahk soko ac sruhmuhn ke mwe insewowo ma Leum el ukuiyac nuh facltahl. Meac sikyak nuh sin sahk soko ke kuht saroksrokihn uh? Mwe insewowo lal Leum kahsrwekuht fuhkah in kapwack?
“Kutangla lukun tuku [nu suwos] oacna noa ma tok weacn uh” (Isaiah 48:18).
Isaiah 48:17–18
Liyacacng masap luhn God use mislac.
-
Petsac kuh petsac mukwikwi ke infacl ac noa inkof uh kuh in kahsruh tuhlihk an in petsacelah Isaiah 48:18 (oacna ke petsac ma tahklac inge). Tuhlihk an ac luhngse pac oruh paholos oacna infacl ac noa inkof ah. Mislac uh fuhkah oacna infacl soko? Suwohswohs uh fuhkah oacna noa uh? Sruhmuhn lah liyacacng masap luhn God fuhkah kahsrwekom in puhla mislac oacna infacl kuh fokoko oacna noa se.
-
Tuhkweni yuck soko on ke masap, oacna ke “Keep the Commandments” (Puk in On luhn Tuhlihk Srihsrihk, 146–47). Meac on soko inge luti kac lah efuh kuht enenuh in liyacacng masap luhn God?
Isaiah 49:14–16
Leum el fah tiacna muhlkihnyuclac.
-
Isaiah 49:14–16 kuh in sie mwe ahkkweye yohk nuh sin tuhlihk an ke yac fahsruh uh. Ke kom riti verse 14, kom kuh in sruhmuhn lah meac oruh mwet uh in puhla muhlkihnyucklac uh. Kuht ac etuh fuhkah lah Leum el tiacna muhlkihnkuhtlac?
-
In tuhkahkuhnlah verses 15–16, kom kuh in siyuhk sin tuhlihk an ke sie mwet suc elos ac tiacna muhlkuhnlah, kain se ke sie sucu kuh kawuck ah. Oacna ke Isaiah 49:15–16, efuh Leum el ac tiac muhlkihnkuhtlac? Tohkoh kom kuh in akacsruhi nuh sin sie sin sie puhla lowos kacl Jisus Kraist.
Nuhke kuhtuh pac liye ma nuhke mahlwem inge ke Friend mackuhsin an.