« ថ្ងៃទី២១–២៧ ខែកញ្ញា ‹ ការណ៍អស្ចារ្យ ហើយចម្លែក › ៖ អេសាយ ១៣–១៤; ២២; ២៤–៣០; ៣៥ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី២១–២៧ ខែកញ្ញា ‹ ការណ៍អស្ចារ្យ ហើយចម្លែក › » ចូរមកតាមខ្ញុំ ៖ ឆ្នាំ២០២៦
Sacred Grove [ ព្រៃពិសិដ្ឋ ] ដោយ ប្រេនថ៍ បូរ៉ាប់
ថ្ងៃទី២១–២៧ ខែកញ្ញា ៖ « ការណ៍មួយយ៉ាងអស្ចារ្យ ហើយចម្លែក »
អេសាយ ១៣–១៤; ២២; ២៤–៣០; ៣៥
រឿងមួយដែលព្រះអម្ចាស់បង្គាប់ឲ្យពួកព្យាការីធ្វើ គឺត្រូវព្រមានអំពីលទ្ធផលនៃអំពើបាប ។ សម្រាប់ពួកព្យាការីនៅក្នុងព្រះគម្ពីរសញ្ញាចាស់ កិច្ចការនេះជាញឹកញាប់មានន័យថា ប្រាប់ពួកអ្នកគ្រប់គ្រងនគរដ៏ខ្លាំងក្លាថា ពួកគេត្រូវការប្រែចិត្ត ។ នោះគឺជាការងារដ៏មានគ្រោះថ្នាក់ ប៉ុន្តែអេសាយមិនខ្លាចឡើយ ហើយការព្រមានរបស់លោកចំពោះនគរនៅសម័យរបស់លោក រួមមានអ៊ីស្រាអែល យូដា និងប្រជាជាតិដែលនៅជុំវិញ—ដោយអង់អាចណាស់ ( សូមមើល អេសាយ ១៣–២៣ ) ។
ទោះយ៉ាងណា អេសាយក៏មានសារលិខិតនៃក្តីសង្ឃឹមដែរ ។ ទោះបីជាការបំផ្លិចបំផ្លាញដែលបានព្យាករបានកើតឡើងចំពោះនគរទាំងនេះក្តី ក៏អេសាយបានមើលឃើញនូវឱកាសសម្រាប់ការស្តារឡើងវិញ និងកែប្រែឡើងវិញនេះដែរ ។ ព្រះអម្ចាស់បង្គាប់រាស្រ្តរបស់ទ្រង់ឲ្យត្រឡប់ទៅរកទ្រង់វិញ ។ ទ្រង់នឹងធ្វើឲ្យ « ខ្សាច់ដែលក្តៅព្រោចៗនឹងត្រឡប់ជាត្រពាំងទឹក ហើយដីហួតហែងនឹងមានក្បាលទឹកហូរ » ( អេសាយ ៣៥:៧ ) ។ ទ្រង់នឹងសម្តែង « ការណ៍អស្ចារ្យ ហើយចម្លែក » ( អេសាយ ២៩:១៤ ) ដោយស្តារឡើងវិញនូវពរជ័យដែលទ្រង់បានសន្យាដល់ពួកគេ ។ ទាំងអេសាយ និងអ្នកឯទៀតដែលនៅរស់ពេលនោះ ពុំបានឃើញកិច្ចការដ៏អស្ចារ្យនេះកើតឡើងទេ ។ ប៉ុន្តែយើងកំពុងមើលឃើញវានៅថ្ងៃនេះ ។ តាមពិតទៅ យើងមានចំណែកនៅក្នុងកិច្ចការនេះ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
អេសាយ ១៣:១–១១, ១៩–២២; ១៤:១–២០
សេចក្តីឆ្មើងឆ្មៃ និងរឿងខាងលោកិយនឹងបរាជ័យ ។
នៅសម័យរបស់អេសាយ បាប៊ីឡូនគឺជានគរដែលមានអំណាចគ្រប់គ្រងដ៏ខ្លាំងក្លា ។ ឥឡូវនេះ បាប៊ីឡូនគឺជាប្រវត្តិសាស្រ្តបុរាណ ។ ហេតុដូច្នេះហើយ ហេតុអ្វីបានជាសារលិខិតរបស់អេសាយទៅកាន់បាប៊ីឡូននៅក្នុង អេសាយ ១៣–១៤ មានសារៈសំខាន់ចំពោះយើងនៅសព្វថ្ងៃនេះ ? ពីព្រោះបាប៊ីឡូនជានិមិត្តរូបឲ្យសេចក្តីឆ្មើងឆ្មៃ សេចក្តីលោភ អំពើបាប និងអ្វីៗដែលនៅតែជុំវិញយើងសព្វថ្ងៃនេះ ។ សូមគិតពីនិមិត្តរូបនេះ នៅពេលបងប្អូនអាន អេសាយ ១៣:១–១១, ១៩–២២; ១៤:១–២០ ។ បងប្អូនក៏អាចពិចារណាពីសំណួរដូចទាំងនេះ ៖
-
តើបងប្អូនមើលឃើញភាពស្រដៀងគ្នាអ្វីខ្លះ រវាងភាពឆ្មើងឆ្មៃរបស់ស្តេចបាប៊ីឡូន និងភាពឆ្មើងឆ្មៃរបស់សាតាំង ? ( សូមមើល អេសាយ ១៤:៤–២០; ម៉ូសេ ៤:១–៤ ) ។ តើការព្រមានអ្វីខ្លះដែលបងប្អូនរកឃើញសម្រាប់ខ្លួនបងប្អូននៅក្នុងខគម្ពីរទាំងនេះ ?
-
តើព្រះអង្គសង្គ្រោះប្រទានទី « សម្រាកពីសេចក្តីទុក្ខ សេចក្តីវេទនា » របស់បងប្អូនយ៉ាងដូចម្ដេច ? ( អេសាយ ១៤:៣ ) ។
« ទ្រង់នឹងបំផ្លាញសេចក្តីស្លាប់ឲ្យសូន្យបាត់ទៅជាដរាប » ( អេសាយ ២៥:៨ ) ។
អេសាយ ២២:២២–២៣; ២៤:២១–២៣; ២៥:៦–៨; ២៦:១៩; ២៨:១៦
ព្រះយេស៊ូវគ្រីស្ទគឺជាព្រះមែស៊ីដែលបានសន្យា ។
ជារឿយៗ ការបង្រៀនរបស់អេសាយយោងទៅលើបេសកកម្មរបស់ព្រះអង្គសង្គ្រោះ រួមទាំងពលិកម្មដ៏ធួន ការមានព្រះជន្មរស់ឡើងវិញ និងការយាងមកជាលើកទីពីររបស់ទ្រង់ ។ តើបងប្អូនគិតឃើញអ្វីខ្លះអំពីទិដ្ឋភាពនៃបេសកកម្មរបស់ទ្រង់ នៅពេលបងប្អូនអានខគម្ពីរដូចតទៅនេះ ៖ អេសាយ ២២:២២–២៣; ២៤:២១–២៣; ២៥:៦–៨; ២៦:១៩; ២៨:១៦ ? តើវគ្គផ្សេងទៀតណាខ្លះដែលបងប្អូនរកឃើញ ហើយវារំឭកបងប្អូនអំពីព្រះអង្គសង្គ្រោះ ?
ផ្តល់ឱកាសដល់អ្នករៀនថ្លែងទីបន្ទាល់ពីព្រះយេស៊ូវគ្រីស្ទ ។ « ដើម្បីធ្វើជាគ្រូបង្រៀនដំណឹងល្អរបស់ព្រះយេស៊ូវគ្រីស្ទមានន័យថា ជួយអ្នកដទៃឲ្យយល់ និងពឹងផ្អែកលើការបង្រៀន ព្រះចេស្តាប្រោសលោះ និងសេចក្តីស្រឡាញ់ដ៏ឥតខ្ចោះរបស់ទ្រង់ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៨ ) ។ របៀបដ៏សាមញ្ញមួយដើម្បីធ្វើការណ៍នោះរាល់ពេលបងប្អូនបង្រៀនគឺត្រូវសួរសំណួរដូចជា « តើបងប្អូនបានរកឃើញអ្វីខ្លះនៅក្នុងបទគម្ពីរក្នុងសប្តាហ៍នេះ ដែលបានបង្រៀនបងប្អូននូវអ្វីមួយអំពីព្រះអង្គសង្គ្រោះ ? » បន្ទាប់មកអនុញ្ញាតឲ្យអ្នករៀនចែកចាយបទបិសោធន៍របស់ពួកគេ និងពង្រឹងជំនឿរបស់គ្នាទៅវិញទៅមក ។
អេសាយ ២៤:១–១២; ២៨:១–៨; ២៩:៧–១៣; ៣០:៨–១៤
ការងាកចេញពីព្រះអម្ចាស់នាំមកនូវគ្រោះថ្នាក់ខាងវិញ្ញាណ ។
ដោយសេចក្តីមេត្តាករុណារបស់ទ្រង់ ព្រះអម្ចាស់បានបញ្ជូនអេសាយឲ្យព្រមានរាស្រ្តនៃសេចក្តីសញ្ញា ថាពួកគេកំពុងវង្វេងចេញពីទ្រង់ហើយ ។ សូមមើលប្រសិនបើបងប្អូនអាចស្វែងរកទីសម្គាល់ការព្រមានខាងវិញ្ញាណនៃការណ៍នេះនៅក្នុង អេសាយ ២៤:៥; ២៩:១៣; ៣០:៨–១២ ។ ហេតុអ្វីបានជាឥរិយាបថ និងសកម្មភាពទាំងនេះមានគ្រោះថ្នាក់ខាងវិញ្ញាណ ?
ដើម្បីព្រមានអំពីលទ្ធផលនៃការវង្វេងចេញពីព្រះអម្ចាស់ អេសាយបានប្រើការប្រៀបធៀបដ៏គួរឲ្យចងចាំមួយ ។ នៅពេលដែលបងប្អូនរៀនពីវា សូមសួរខ្លួនឯងថាតើការងាកចេញពីព្រះអម្ចាស់មានលក្ខណៈដូចម្តេច ៖
-
ទុក្ខសោក ផែនដីនៅទទេ ( អេសាយ ២៤:១–១២ ) ។
-
ការស្រវឹងស្រា ( អេសាយ ២៨:៧–៨ ) ។
-
ស្រេកឃ្លាន និងស្រេកទឹក ( អេសាយ ២៩:៧–១០ ) ។
-
កំពែងដែលបាក់បែង ឬឆ្នាំងបំបែកខ្ទេចខ្ទី ( អេសាយ ៣០:១៣–១៤ ) ។
ហេតុអ្វីវាសំខាន់ចំពោះបងប្អូនដើម្បីបន្តនៅជិតនឹងព្រះអម្ចាស់ ?
អេសាយ ២៩; ៣០:១៨–២៦; ៣៥
ព្រះអម្ចាស់អាចស្ដារនូវអ្វីដែលបាត់បង់ ឬបែកបាក់មកវិញបាន ។
តើបងប្អូនធ្លាប់បាត់អ្វីដែលបងប្អូនគិតថាបងប្អូននឹងមិនរកឃើញម្តងទៀតដែរឬទេ ? ឬប្រហែលជាអ្វីមួយដែលបាក់បែក ហើយបងប្អូនបានព្រួយបារម្ភថាវានឹងមិនអាចជួសជុលឡើងវិញបានដែរឬទេ ។ នៅពេលដែលយើងងាកចេញពីព្រះអម្ចាស់ សាតាំងចង់ឲ្យយើងគិតថាយើងមិនអាចត្រឡប់មកវិញ ឬត្រូវបានព្យាបាលឡើយ ។ ទោះជាយ៉ាងណាក្ដី ក៏អេសាយបានរៀបរាប់អំពីរឿងដ៏អស្ចារ្យមួយចំនួនដែលព្រះអម្ចាស់នឹងធ្វើ ដើម្បីជួយយើងត្រឡប់ទៅរកទ្រង់វិញដែរ ។ តើបងប្អូនរៀនអ្វីខ្លះមកពី អេសាយ ២៩:១៣–២៤; ៣០:១៨–២៦; ៣៥ អំពីព្រះអម្ចាស់ សេចក្ដីស្រឡាញ់របស់ទ្រង់ និងព្រះចេស្ដារបស់ទ្រង់ ? ប្រហែលជាបងប្អូនអាចរកឃើញឃ្លាមួយនៅក្នុងប្រសាសន៍ទាំងនេះដែលផ្តល់ឲ្យបងប្អូននូវក្តីសង្ឃឹមនៅពេលដែលបងប្អូនត្រូវការការព្យាបាល ។ បងប្អូនក៏អាចរកមើលនៅក្នុងសារលិខិតរបស់ស៊ីស្ទើរ អេមមី អេ រ៉ាយ « ព្រះគ្រីស្ទប្រោសអ្នកដែលប្រេះឆា » ( លីអាហូណា ខែឧសភា ឆ្នាំ២០២២ ទំព័រ ៨១–៨៤ ) ។
របៀបមួយដែលព្រះអម្ចាស់បានបើកសម្ដែងឲ្យឃើញព្រះចេស្ដា និងសេចក្តីមេត្តាករុណារបស់ទ្រង់ គឺតាមរយៈការស្ដារឡើងវិញនៃដំណឹងល្អរបស់ទ្រង់ ។ អេសាយ ២៩ មាននូវវគ្គបទគម្ពីរមួយចំនួនដែលមានព្រឹត្តិការណ៍ស្រដៀងគ្នាខ្លាំងជាមួយព្រឹត្តិការណ៍ស្ដារឡើងវិញដែរ ។ ឧទាហរណ៍ ៖
-
សូមប្រៀបធៀប អេសាយ ២៩:១១–១២ ជាមួយនឹង នីហ្វៃទី២ ២៧:៦–២៦ និង យ៉ូសែប ស្ម៊ីធ—ប្រវត្តិ ១:៦៣–៦៥ ។
-
សូមប្រៀបធៀប អេសាយ ២៩:១៣–១៤ ជាមួយនឹង គោលលទ្ធិ និងសេចក្តីសញ្ញា ៤ និង យ៉ូសែប ស្ម៊ីធ—ប្រវត្តិ ១:១៧–១៩ ។
-
សូមប្រៀបធៀប អេសាយ ២៩:១៨–២៤ ជាមួយនឹង ទំព័រចំណងជើងនៃព្រះគម្ពីរមរមន ។
នៅក្នុងទស្សនរបស់បងប្អូន ហេតុអ្វីពាក្យ « អស្ចារ្យ » និង « ចម្លែក » ( អេសាយ ២៩:១៤ ) គឺជាពាក្យដ៏ល្អដើម្បីពិពណ៌នាពីព្រះអម្ចាស់ស្តារដំណឹងល្អរបស់ទ្រង់ឡើងវិញ ? តើបងប្អូនអាចជួយបំពេញការព្យាករអំពីការស្តារឡើងវិញដោយរបៀបណា ? ដើម្បីទទួលបានគំនិត សូមរកមើលនៅក្នុងសារលិខិតរបស់អែលឌើរ ហ្គើរីត ដបុលយូ ហ្គង « All Nations, Kindreds, and Tongues » ( Liahona ខែវិច្ឆិកា ឆ្នាំ២០២០ ទំព័រ ៣៨–៤១ ) ។
សូមមើលផងដែរ « ការស្ដារឡើងវិញនៃភាពពេញលេញនៃដំណឹងល្អរបស់ព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ » ( នៅលើបណ្ណាល័យដំណឹងល្អ ); « ថ្ងៃរះឡើងហើយ » ទំនុកតម្កើង ល.រ. ១ ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
អេសាយ ១៤:៣; ២៥:៨–៩; ២៨:១៦
ព្រះយេស៊ូវគ្រីស្ទអាចសង្គ្រោះខ្ញុំពីអំពើបាប និងសេចក្តីស្លាប់ ។
-
តើបងប្អូននឹងជួយកូនៗបងប្អូនមើលឃើញព្រះអង្គសង្រ្គោះនៅក្នុងសំណេររបស់អេសាយដោយរបៀបណា ? បងប្អូនអាចជួយពួកគេស្វែងរកឃ្លាដែលរំឭកពួកគេអំពីទ្រង់ អេសាយ ១៤:៣; ២៥:៨ ឬ ២៨:១៦ ។ ពួកគេក៏អាចផ្គូផ្គងខគម្ពីរទាំងនេះពីអេសាយជាមួយនឹងខគម្ពីរផ្សេងទៀតដែលបង្រៀនអំពីព្រះអង្គសង្គ្រោះ ដូចជា ម៉ាថាយ ១១:២៨–៣០; កូរិនថូស ទី១ ១៥:៥៣–៥៧; ហេលេមិន ៥:១២ ។ តើកិច្ចការដ៏អស្ចារ្យអ្វីខ្លះដែលព្រះអម្ចាស់បានធ្វើសម្រាប់យើង ?
-
បន្ទាប់ពីការអាន អេសាយ ២៥:៨–៩ ជាមួយគ្នា នោះបងប្អូនអាចមើលរូបភាពរបស់ព្រះអម្ចាស់នៅក្នុងសួនច្បារគែតសេម៉ានី នៅលើឈើឆ្កាង និងបន្ទាប់ពីការមានព្រះជន្មរស់ឡើងវិញរបស់ទ្រង់ ។ សូមឲ្យកូនៗបងប្អូននិយាយអំពីអ្វីដែលកំពុងកើតឡើងនៅក្នុងរូបភាពនេះ និងហេតុអ្វីពួកគេស្រឡាញ់ព្រះយេស៊ូវ និង « ត្រេកអរ ដោយសេចក្តីសង្គ្រោះរបស់ទ្រង់ » ( ខទី ៩ ) ។
-
បងប្អូនអាចជ្រើសរើសប្រាប់កូនៗបងប្អូនអំពីភាពសោកសៅដែលបងប្អូនមាន នៅពេលនរណាម្នាក់ដែលបងប្អូនស្រឡាញ់បានស្លាប់ទៅ ។ ថ្លែងទីបន្ទាល់នៃការលួងលោមដែលបងប្អូនបានទទួល ដោយសារព្រះយេស៊ូវគ្រីស្ទ ។ ប្រហែលជាកូនៗបងប្អូនអាចគូររូបមុខយំ ហើយបន្ទាប់មកលុបទឹកភ្នែកនៅពេលដែលបងប្អូនអានអេសាយ ២៥:៨ ជាមួយគ្នា ។
Thy Will Be Done [ សូមព្រះទ័យទ្រង់បានសម្រេច ] ដោយ ឃីន ស្ពែនសឺ
អេសាយ ២៥:៤–៦
ព្រះយេស៊ូវប្រទានឲ្យខ្ញុំ « ជាទីជ្រកកោនឲ្យរួចពីព្យុះសង្ឃរា » ។
-
តើបងប្អូន និងកូនៗបងប្អូនធ្លាប់បានដកពិសោធន៍នូវពរជ័យនៃការមានទីជម្រកដ៏មានសុវត្ថិភាពអំឡុងព្យុះភ្លៀង ឬនៃការមានម្លប់ជ្រកនៅថ្ងៃមួយដ៏ក្ដៅដែរឬទេ ? ឬបងប្អូនបានហូបម្ហូបយ៉ាងឆ្ងាញ់ នៅពេលបងប្អូនស្រេកឃ្លានដែរឬទេ ? សូមនិយាយអំពីបទពិសោធន៍ទាំងនេះនៅពេលបងប្អូន អាន អេសាយ ២៥:៤–៦ ។ តើព្រះយេស៊ូវដូចជាវត្ថុទាំងនេះដោយរបៀបណា ?
អេសាយ ២៩:១១–១៨, ២៤
ការស្តារឡើងវិញនៃដំណឹងល្អគឺជា « ការណ៍អស្ចារ្យ » មួយ ។
-
នៅពេលបងប្អូន និងកូនៗបងប្អូនអាន អេសាយ ២៩:១៤ សូមចែកចាយជាមួយពួកគេនូវពាក្យផ្សេងៗទៀត ដែលមានន័យដូចគ្នានឹងពាក្យ « អស្ចារ្យ » និង « ចម្លែក » ។ សូមឲ្យពួកគេជួយបងប្អូនស្វែងរកវត្ថុ ឬរូបភាពដែលតំណាងឲ្យកិច្ចការដ៏អស្ចារ្យមួយចំនួនរបស់ព្រះអម្ចាស់ក្នុងអំឡុងពេលថ្ងៃចុងក្រោយ ។ ទាំងនេះអាចរួមបញ្ចូលទាំងព្រះគម្ពីរមរមន រូបភាពព្រះវិហារបរិសុទ្ធ ឬ រូបភាពនៃការនិមិត្តដំបូង ( មានមួយនៅដើមទីនៃគម្រោងមេរៀននេះ ) ។ បន្ទាប់មក កូនៗបងប្អូនអាចជ្រើសរើសរបស់មួយ ហើយចែកចាយពីមូលហេតុដែលរបស់នោះអស្ចារ្យចំពោះពួកគេ ។
-
បទចម្រៀងអំពីការស្តារឡើងវិញនៃដំណឹងល្អអាចជាដៃគូយ៉ាងល្អជាមួយ អេសាយ ២៩ ដូចជាបទ « និទារឃរដូវមាស » ( សៀវភៅចម្រៀងកុមារ ទំព័រ ៥៧ ) ។ ប្រហែលជាបទពិសោធន៍របស់បុគ្គលម្នាក់អាចជួយកុមារយល់ពីអត្ថន័យនៃ ការស្ដារឡើងវិញ ។ ឧទាហរណ៍ បងប្អូន និងកូនៗបងប្អូនអាចនិយាយអំពីអ្វីដែលបាត់បង់ និងរបៀបដែលបងប្អូនបានរកឃើញវា ។ សូមជួយកូនៗបងប្អូនប្រៀបធៀបរឿងនេះទៅនឹងការស្ដារឡើងវិញនៃដំណឹងល្អ ។ យោងទៅតាម អេសាយ ២៩:១៣–១៥ ហេតុអ្វីយើងត្រូវការការស្ដារឡើងវិញ ? តើព្រះអម្ចាស់កំពុងធ្វើកិច្ចការដ៏អស្ចារ្យអ្វីខ្លះដើម្បីស្តារដំណឹងល្អរបស់ទ្រង់ឡើងវិញ ? ( សូមមើលទំព័រសកម្មភាពប្រចាំសប្តាហ៍នេះ ) ។
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។