« គំនិតដែលត្រូវចងចាំ ៖ ព្យាការី និងការព្យាករ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ព្យាការី និងការព្យាករ » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦
គំនិតដែលត្រូវចងចាំ
ព្យាការី និងការព្យាករ
នៅក្នុងទំនៀមទម្លាប់របស់ក្រុមគ្រីស្ទាននៃព្រះគម្ពីរសញ្ញាចាស់ ផ្នែកចុងក្រោយគេ ( ចាប់ពីគម្ពីរអេសាយ រហូតដល់ម៉ាឡាគី ) ត្រូវបានគេហៅថា ព្យាការី ។ ប្រហែលជាមួយភាគបួននៃផ្នែកនេះនៃព្រះគម្ពីរសញ្ញាចាស់ មាននូវពាក្យសម្តីរបស់ពួកអ្នកបម្រើដែលមានសិទ្ធិអំណាចរបស់ព្រះ ដែលជាអ្នកបានទូលនឹងព្រះអម្ចាស់ ហើយបន្ទាប់មកបានថ្លែង ជំនួស ទ្រង់ តាមរយៈការចែកចាយសារលិខិតរបស់ទ្រង់ជាមួយប្រជាជន នៅប្រមាណជារវាងឆ្នាំ ៩០០ និងឆ្នាំ ៥០០ មុន.គ.ស. ។
ព្យាការីប្រាស្រ័យទាក់ទងពីព្រះឆន្ទៈរបស់ព្រះ
ព្យាការី និងការព្យាករដើរតួយ៉ាងសំខាន់នៅក្នុងព្រះគម្ពីរសញ្ញាចាស់ទាំងមូល ។ អ័ប្រាហាំ អ៊ីសាក និង យ៉ាកុប បានឃើញនៅក្នុងការនិមិត្ត ហើយបានទូលជាមួយសារទូតសួគ៌ា ។ ម៉ូសេបានទូលជាមួយព្រះប្រទល់មុខ ហើយចែកចាយព្រះឆន្ទៈរបស់ទ្រង់ទៅដល់ពួកកូនចៅនៃអ៊ីស្រាអែល ។ គម្ពីរពង្សាវតារក្សត្រទីមួយ និងទីពីរបានរៀបរាប់ឡើងវិញនូវកិច្ចការដ៏អស្ចារ្យ និងសារលិខិតរបស់ព្យាការី អេលីយ៉ា និង អេលីសេ ។ ព្រះគម្ពីរសញ្ញាចាស់ក៏ថ្លែងអំពីពួកហោរា ដូចជា ម៉ារាម និងដេបូរ៉ា ព្រមទាំងស្រ្តីផ្សេងទៀតដែលប្រទានពរឲ្យមានវិញ្ញាណនៃការព្យាករ ដូចជា រេបិកា និងហាណាផងដែរ ។ ហើយទោះបីជាទំនុកដំកើងពុំបានសរសេរដោយព្យាការីត្រឹមត្រូវក្តី ក៏គម្ពីរទាំងនេះសម្បូរទៅដោយវិញ្ញាណនៃការព្យាករផងដែរ ជាពិសេស កាលដែលគម្ពីរទាំងនេះចង្អុលទៅរកការយាងមករបស់ព្រះមែស៊ី ។
គ្មានអ្វីមួយកើតឡើងជាការភ្ញាក់ផ្អើលដល់សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយឡើយ ។ តាមពិតទៅ ដំណឹងល្អនៃព្រះយេស៊ូវគ្រីស្ទដែលបានស្តារឡើងវិញ បង្រៀនយើងថា ព្យាការីពុំមែនគ្រាន់តែជាផ្នែកគួរឲ្យចាប់អារម្មណ៍ខាងប្រវត្តិសាស្រ្តនោះទេ ថែមទាំងជាផ្នែកដ៏សំខាន់មួយនៃផែនការរបស់ព្រះទៀតផង ។ ទោះបីជាមនុស្សមួយចំនួនអាចមើលឃើញថា ព្យាការីមានលក្ខណៈពិសេសនៅសម័យព្រះគម្ពីរសញ្ញាចាស់ក្ដី ក៏យើងមើលឃើញថា ពួកលោកមានលក្ខណៈពិសេស ដូចគ្នា នឹងសម័យព្រះគម្ពីរសញ្ញាចាស់ដែរ ។
ប៉ុន្តែការអានជំពូកមួយនៅក្នុងគម្ពីរអេសាយ ឬអេសេគាល អាចមានអារម្មណ៍ថាខុសគ្នាពីការអានសារលិខិតនៅក្នុងសន្និសីទទូទៅមកពីប្រធានសាសនាចក្របច្ចុប្បន្នដែរ ។ ពេលខ្លះ វាអាចមានការលំបាកដើម្បីមើលឃើញថា ព្យាការីពីបុរាណមានអ្វីដែលត្រូវនិយាយមកកាន់យើង ។ យ៉ាងណាមិញ ពិភពលោកដែលយើងរស់នៅសព្វថ្ងៃនេះ គឺខុសគ្នាឆ្ងាយពីកន្លែងដែលពួកលោកបានបង្រៀន និងព្យាករ ។ ហើយខណៈដែលយើង មាន ព្យាការីដែលនៅរស់នោះ អាចចោទឲ្យសំណួរមួយឡើង ៖ ហេតុអ្វីយើងចាំបាច់ត្រូវខិតខំ—ហើយវាពិតជាតម្រូវឲ្យមានការខិតខំមែនឬ—ដើម្បីអានពាក្យសម្តីរបស់ព្យាការីពីបុរាណ ?
Fulness of Times [ កាលដ៏ពេញកំណត់ ] ដោយ ហ្រ្គេក អូលសិន
ព្យាការីពីបុរាណមានអ្វីមួយនិយាយមកកាន់យើង
ភាគច្រើន មនុស្សសព្វថ្ងៃនេះមិនមែនជាអ្នកអានចម្បងដែលព្យាការីនៃព្រះគម្ពីរសញ្ញាចាស់សំដៅទៅលើនោះឡើយ ។ ព្យាការីទាំងនោះបានមានកង្វល់បន្ទាន់ ដែលពួកលោកបានថ្លែងនៅសម័យ និងទីកន្លែងរបស់ពួកលោក—ដូចជាព្យាការីនៅថ្ងៃចុងក្រោយរបស់យើងថ្លែងពីកង្វល់បន្ទាន់ៗរបស់យើងនៅសព្វថ្ងៃនេះដែរ ។
ទន្ទឹមពេលគ្នានេះ ព្យាការីក៏អាចឃើញហួសពីកង្វល់បន្ទាន់ទាំងឡាយផងដែរ ។ ពួកលោកបង្រៀនសេចក្ដីពិតដ៏អស់កល្បជានិច្ច ពាក់ព័ន្ធគ្រប់ពេលវេលា និងគ្រប់ទីកន្លែង ។ ដោយមានពរជ័យនៃការមានវិវរណៈ នោះពួកលោកយល់ពីទស្សនៈដ៏ទូលំទូលាយអំពីកិច្ចការរបស់ព្រះ ។ ឧទាហរណ៍ អេសាយបានព្រមានប្រជាជនក្នុងជំនាន់របស់លោកអំពីអំពើបាបរបស់ពួកគេ ។ លោកក៏បានសរសេរអំពីការរំដោះពួកសាសន៍អ៊ីស្រាអែលដែលរស់នៅ ២០០ ឆ្នាំក្នុងពេលអនាគតដែរ ។ ក្នុងពេលជាមួយគ្នានោះ លោកបានបង្រៀនអំពីការរំដោះដែលរាស្ដ្រគ្រប់រូបរបស់ព្រះស្វែងរក ។ ហើយលោកបានសរសេរការព្យាករដែលសូម្បីតែនៅសព្វថ្ងៃនេះក្តី ក៏នៅតែរង់ចាំការសម្រេចបានពេញលេញផងដែរ—ដូចជាការសន្យានៃ « ផែនដីថ្មី » ( អេសាយ ៦៥:១៧ ) ដែល « គ្រប់ទាំងអស់នឹងស្គាល់ព្រះយេហូវ៉ា » ( អេសាយ ១១:៩ )ជាកន្លែងដែលពួកពូជអំបូរដែលបាត់នៃអ៊ីស្រាអែលនឹងត្រូវបានប្រមូលផ្តុំគ្នាវិញ និងជាកន្លែងដែល « នគរ »ទាំងអស់ ពុំ « ហាត់រៀនធ្វើសឹកសង្គ្រាមទៀត »ឡើយ ( អេសាយ ២:៤ ) ។ ផ្នែកមួយនៃអំណរ និងការបំផុសគំនិតដែលមកតាមរយៈការអានពាក្យសម្តីរបស់ព្យាការីនៃព្រះគម្ពីរសញ្ញាចាស់ ដូចជាអេសាយ គឺការដឹងថា យើង ដើរតួសំខាន់នៅក្នុងថ្ងៃដ៏រុងរឿងដែលពួកលោកបានស្រមៃឃើញ ។
ដូច្នេះនៅពេលបងប្អូនអានការព្យាករពីបុរាណ វាអាចជួយយើងរៀនអំពីបរិបទដែលពាក្យព្យាករនេះត្រូវបានសរសេរឡើង—ប៉ុន្តែបងប្អូនក៏គួរតែមើលឃើញខ្លួនឯងនៅក្នុងការព្យាករទាំងនោះ ឬ« ប្រៀបធៀបពាក្យទាំងនោះទៅនឹងខ្លួន[ ឯង ] »ផងដែរ( នីហ្វៃទី១ ១៩:២៤; សូមមើលផងដែរ ខទី ២៣ ) ។ ពេលខ្លះ វាមានន័យថា ការស្គាល់ក្រុងបាប៊ីឡូនថាជានិមិត្តរូបមួយនៃអំពើបាប និងភាពឆ្មើងឆ្មៃ មិនមែនគ្រាន់តែជាទីក្រុងបុរាណមួយនោះទេ ។ វាអាចមានន័យថា ការយល់ពីអ៊ីស្រាអែលថាជារាស្ដ្ររបស់ព្រះនៅគ្រប់ពេលវេលានិងគ្រប់ទីកន្លែង ។ ឬវាប្រហែលជាមានន័យថាការមើលឃើញទីក្រុងស៊ីយ៉ូនជាបុព្វហេតុថ្ងៃចុងក្រោយដែលរាស្ដ្ររបស់ព្រះឱបក្រសោប ជំនួសឲ្យការមើលឃើញវាគ្រាន់តែជាពាក្យផ្សេងសម្រាប់ទីក្រុងយេរូសាឡិម ។
យើងអាចប្រៀបធៀបបទគម្ពីរទៅនឹងជីវិតរបស់យើងបាន ដោយសារយើងយល់ថា ការព្យាករមួយអាចត្រូវបានបំពេញតាមរបៀបជាច្រើន ។ គំរូដ៏ល្អមួយគឺជាការព្យាករនៅក្នុង អេសាយ ៤០:៣ ៖ « មានឮសំឡេង១កំពុងតែស្រែកនៅទីរហោស្ថានថា ចូររៀបចំផ្លូវសម្រាប់ទទួលព្រះយេហូវ៉ា » ។ ចំពោះពួកសាសន៍យូដាដែលជាប់ក្នុងសេវកភាពនៅក្រុងបាប៊ីឡូន សេចក្ដីថ្លែងការណ៍នេះអាចសំដៅលើព្រះអម្ចាស់ ដែលកំពុងប្រទានផ្លូវដើម្បីឲ្យរួចផុតពីសេវកភាព ហើយត្រឡប់ចូលក្រុងយេរូសាឡិមវិញ ។ ចំពោះម៉ាថាយ ម៉ាកុស និងលូកា ការព្យាករនេះត្រូវបានបំពេញដោយយ៉ូហាន-បាទីស្ទ ជាអ្នកដែលបានរៀបចំផ្លូវសម្រាប់ការងារបម្រើក្នុងព្រះជន្មរមែងស្លាប់របស់ព្រះអង្គសង្គ្រោះ ។ យ៉ូសែប ស៊្មីធ បានទទួលវិវរណៈថា ការព្យាករនេះនៅតែកំពុងត្រូវបានបំពេញនៅថ្ងៃចុងក្រោយដដែល ក្នុងការរៀបចំសម្រាប់ការងារបម្រើនៅសហសវត្សរ៍របស់ព្រះគ្រីស្ទ ។ តាមរបៀបជាច្រើន យើងនៅតែយល់ដឹងថា ពួកព្យាការីបុរាណជាច្រើន បាន និយាយមកកាន់យើង ។ ហើយពួកលោកបានបង្រៀននូវសេចក្ដីពិតដែលមានតម្លៃដ៏អស់កល្បជានិច្ចជាច្រើនដែលទាក់ទងនឹងយើង ដូចជាវាទាក់ទងនឹងអ៊ីស្រាអែលពីបុរាណដែរ ។
ពួកព្យាការីពីបុរាណបានថ្លែងទីបន្ទាល់អំពីព្រះយេស៊ូវគ្រីស្ទ
ប្រហែលជារឿងដែលសំខាន់ជាងការមើលឃើញខ្លួនបងប្អូននៅក្នុងការព្យាករនៃព្រះគម្ពីរសញ្ញាចាស់ គឺជាការមើលឃើញព្រះយេស៊ូវគ្រីស្ទនៅក្នុងការព្យាករទាំងនោះវិញ ។ ប្រសិនបើបងប្អូនរកមើលទ្រង់ នោះបងប្អូននឹងរកឃើញទ្រង់ ទោះជាព្រះនាមរបស់ទ្រង់មិនត្រូវបានលើកឡើងក្ដី ។ វាអាចជាជំនួយដើម្បីចងចាំថា ព្រះនៃព្រះគម្ពីរសញ្ញាចាស់ ព្រះអម្ចាស់ ព្រះយេហូវ៉ា គឺជា ព្រះយេស៊ូវគ្រីស្ទ ។ នៅគ្រប់ពេលដែលពួកព្យាការីអត្ថាធិប្បាយអំពីអ្វីដែលព្រះអម្ចាស់កំពុងធ្វើ ឬអ្វីដែលទ្រង់នឹងធ្វើ នោះពួកលោកកំពុងថ្លែងអំពីព្រះអង្គសង្គ្រោះ ។
The Lord Appearing unto Abraham [ ព្រះអម្ចាស់កំពុងយាងមកជួបអ័ប្រាហាំ ] ដោយ ខៃ ឡាសិន
បងប្អូនក៏នឹងរកឃើញសេចក្តីយោងជាច្រើនទៅនឹងព្រះយេហូវ៉ាទ្រង់បានចាក់ប្រេងតាំង ព្រះប្រោសលោះ និងជាស្តេចនៅពេលអនាគតចេញពីរាជវង្សរបស់ស្តេចដាវីឌ ។ អ្វីៗទាំងអស់នេះគឺជាការព្យាករអំពីព្រះយេស៊ូវគ្រីស្ទ ។ ជាទូទៅ បងប្អូននឹងអានអំពីការរំដោះ ការអត់ទោស ការប្រោសលោះ និងការស្តារឡើងវិញ ។ ដោយមានព្រះអង្គសង្រ្គោះនៅក្នុងគំនិត និងដួងចិត្តរបស់បងប្អូន នោះជាធម្មតា ការព្យាករទាំងនេះនឹងចង្អុលបង្ហាញបងប្អូនទៅរកព្រះរាជបុត្រានៃព្រះ ។ នៅទីបញ្ចប់ វិធីដ៏ប្រសើរបំផុតដើម្បីយល់ពីការព្យាករគឺត្រូវមាន « វិញ្ញាណនៃសេចក្តីទំនាយ » ដែលយ៉ូហានប្រាប់យើងនោះ ពោលគឺ « សេចក្តីបន្ទាល់ពីព្រះយេស៊ូវ » ( វិវរណៈ ១៩:១០ ) ។