Itaia 13–14; 22; 24–30; 35

N ana bong Itaia, Bwaburon bon te abanuea ao te tautaeka ae korakora. Ngkai Bwaburon ai rongorongon ngkoa. E aera ngkai e kanakoa ana rongorongo Itaia nakon Bwaburon, n Itaia 13–14, e kakawaki nakoira n ara bong aikai? Ibukina bwa Bwaburon e tei ibukin te kainikatonga, te mwangainrang, ao te bure, bwaai aika a otabwaniniira ni bong aikai. Iangoa taekan te kanikina aei ngkai ko wareka Itaia 13:1–11, 19–22; 14:1–20. Kona bae n iangoi titiraki n aron aikai:

• Tera aika ti te arona ake ko noori imarenan ana kainikatonga uean Bwaburon ao ana kainikatonga Tatan? (taraa Itaia 14:4–20; Mote 4:1–4). Tera te kauring ae ko kunea ibon iroum inanon kiibu aikai?

• E kanga te Tia Kamaiu ni “motika rawam man rawawatam, ao man maakum”? (Itaia 14:3).

Ana reirei Itaia n taainako a bon kaineti nakon ana mition te Tia Kamaiu, n raonaki ma Ana karea ni kamaiu, Mangautina, ao Kauaokina. Tera kanoan Ana mition ae roko n am iango ngkai ko wareki kiibu aikai: Itaia 22:22–23; 24:21–23; 25:6–8; 26:19; 28:16? Tera kibuntaeka aika ko kunei are a kauringko iai ibukin te Tia Kamaiu?

N Ana nanoanga, te Uea e kanakoa Itaia bwa e na kauringiia ana aomata ni berita bwa a tionako mai Irouna. Taraia ngkana ko kona ni kunea te kanikina ni kauring n tamnei n aei n Itaia 24:5; 29:13; 30:8–12. Bukin tera ngkai a kakamaku taian anua ma mwakuri aikai n te maiu n tamnei?

Ni kauring ibukin bwaai aika a na riki imwiin te tannako nako mairoun te Uea, Itaia e kabonganai kabotau tabeua aika a ururingaki. Ngkai ko kamatebwaia, titirakiniko bwa tera te tannako mairoun te Uea:

• Te aonaaba, ae kananokawaki ao n akea kaina (Itaia 24:1–12).

• Rangaranga n te kamanging (Itaia 28:7–8).

• Baki ao te taka (Itaia 29:7–10).

• Te nono ke te bwai ni mwakuri ae uruaki (Itaiah 30:13–14).

Bukin tera e kakaawaki iroum bwa kona tei ni kaan nakon te Uea?

Iai am bwai ae e a tia ni bua ae ko taku bwa e na aki kona ni manga reke? Ke tao am bwai ae uruaki, ao ko raraoma bwa e aki kona ni manga karaoaki. Ngkana ti tannako mairoun te Uea, Tatan e tangiriira bwa tina iangoia bwa ti aki kona ni manga oki ke ni kamarurungaki. E ngae n anne, Itaia e kabwarabwarai tabeua bwaai aika a kamimi ake e kona ni karaoi te Uea nakoira ngkana ti raira nanora ao n rairaki nako Ina. Tera ae ko reiakinna man Itaia 29:13–24; 30:18–26; 35 ibukin te Uea, Ana tangira, ao Mwaakana? Tao ko kona ni kunea te kibutaeka n te rongorongo aei are e na anganiko te kantaninga ngkana ko kainnanoa te kamaiuaki. Ko kona naba n tara ana rongorongo Titita Amy A. Wright “Kristo e Kamaoa Are E Ikoaki” (Riaona, Meei 2022, 81–84).

Teuana te kawai are e kaota iai mwaakana ao ana nanoanga te Uea bon rinanon Kaokan Ana euangkerio. Itaia 29 iai inanona tabeua kibun taeka are ti te arona ma baike a riki n tain Kaokan bwai. Te katooto:

• Kabotaua Itaia 29:11–12 ma 2 Nibwaai 27:6–26 ao Rongorongon—Iotebwa Timiti 1:63–65.

• Kabotaua Itaia 29:13–14 ma Reirei ao Berita aika Tabu 4 ao Rongorongon—Iotebwa Timiti 1:17–19.

• Kabotaua Itaia 29:18–24 ma moan iteranbaan ana Boki Moomon.

N am iango, bukin tera ngkai “kamimi” ao “moan te kamimi” (Itaia 29:14) taeka aika raoiraoi ni kabwarabwaraan kaokan Ana eungkerio te Uea? Kona kanga ni buoka kakoroan nanon taian taetae ni burabeti ibukin Kaokanbwaai? Iango tabeua, taraa ana rongorongo Unimwaane Gerrit W. Gong’s message “Aaba, Reeti, ao Neewe” (Riaona, Nobembwa. 2020, 38–41).

Taraa naba “Kaokan Bwaninin Ana Euangkerio Iesu Kristo: Te Katanoata n te Kauabubua n Ririki nakon te Aonaaba” (Gospel Library); “The Morning Breaks,” Hymns, no 1.

• Kona kanga ni buokiia am ataei n noora te Tia Kamaiu inanon ana koroboki Itaia? Kona bae ni buokiia ni kakaea te kibutaeka are e kauringiia taekana n Itaia 14:3; 25:8; ke 28:16. A kona naba ni kabotaui kibu tabeua ake a reirei taekan te Tia Kamaiu, n aron Mataio 11:28–30; 1 I-Korinto 15:53–57; Ereman 5:12. Tera bwaai aika a korakora aika e a tia ni karaoia te Uea ibukira?

• Imwiin warekan Itaia 25:8–9 n ikotaki, ko kona n tara tamnein te Tia Kamaiu i Keketemwane, iaon te kaibangaki, ao imwiin Mangautina. Anganiia ataei bwa a na taetae iaon te bwai are e riki n te tamnei ao bukin tera a tangira Iesu ao “n kukurei n te maiu mai Irouna” (kibu 9).

• Ko bae n rineia bwa kona karakina nanokawakim are ko namakinna ngke e motirawa temanna ae ko tangiria nakoia am ataei. Kaota am koaua bwa ko karekea te rau n nano iroun Iesu Kristo. A kona am ataei ni korea tamnein te ubu ae tang ao imwiina a kamaunai rannimata ngkai ko wareka Itaia 25:8 ma ngaiia.

• Koa tia ngkoe ma natim ni karekea te kakabwaia n te katantan ae mano n tain te angibuaka ke te nuu man bongin te kabuebue? Ke koa tia ni kakukureiko n te amwarake ae tamaroa ngkana ko rang baki? Maroroakini taneiai aikai ngkai ko wareka Itaia 25:4–6. E na kanga ni kabotauaki Iesu ma bwaai aikai?

• Ngkai ko wareware nakoia am ataei ni wareka Itaia 29:14, tibwaia ma ngaiia taeka tabeua ake a nanona te bwai ae ti teuana n aron “kamimi” ao “moan te kamimi.” Anganiia bwa a na buokiko ni kakaei bwai ke tamnei ake a tei ibukin tabeua ana mwakuri te Uea aika kamimi ni boong aika kaitira. Aikai a kona n raonaki n katotongan ana Boki Moomon, tamnein te tembora, ke tamnein te Moan Mii ni burabeti (iai te bwai teuana n te moan ae kaota aei). Ngkanne kaoia ataei bwa a na rinea te rongorongo ao n tibwauaia bwa bukin tera e kamimi nakoia.

• Te kuna iaon Kaokan te euangkerio e nako raoi ma Itaia 29, n aron “On a Golden Springtime” (Children’s Songbook, 88). Ao tao te taneiai i bon iroum e kona ni buokiia ataei n ataia bwa tera nanon kaokan bwaai. Te katoto, ngkoe ma am ataei kam kona ni maroroakina te bwai teuana ae bua ao ko kanga ni kunea. Buokiia ataei ni kabotaua aei nakon Kaokan te euangkerio. Ni kaineti ma Itaia 29:13–15, bukin tera ti kainnanoa Kaokan bwaai? Tera te mwakuri ae kamimi ae e karaoia te Uea ni kaokan Ana euangkerio? (taraa te iteraniba ni waaki ni kakukurei n te wiiki aei).